الحوار المتمدن - موبايل
الموقع الرئيسي


جير وبسامير

رحيم العراقي

2008 / 5 / 23
الادب والفن



ما مشتاكَـ لا والله .. ولا حاسبكم احباب
بس حملي كسر ظهري..وإلتـّجيت عالباب..
إنفتح باب الجرح والحوش..وبصدري
إعصار وجرف كل عمري
وإنفـتحـت بروحـي أبواب وأبواب..
دست الباريه البلحوش ..إيه ياحوشنة الضيّكـ
يامن كنت كل الكون ..
طبـّكَـناه طـكَـَ إعطيه.. جص .. كل كاشية من لون
لسه بحوشنه أوراق و حصيره وباريه وسطله وصحن فافون
وطيارة ورق مكَطوعه وجعاب
ودعابل ملحه وإبطالة سفن آب..
أنا الناسي الطفوله وسافر وشاب
ورجع للبيت ..نفسه البيت.. شنهو إستجد بي ..؟
..بس عش الغراب..
حتى الصور عالحيطان ماحفظت ملامحهه ..
إنمحت.. ذابت ..وغابت ضمن من غاب..
لكَيت بحوشنه إمرايه على الكاشي
شفت بيهه وجه محتار.. ما مفهوم ..
لا راجع ولا ماشي..
شفت وجهي ..لا مو وجهي
شفت عيون تعبانه وتجاعيد وسمار وشيب وتراب
نفخت إبحسره..كل قوتي..
بس ماراح منها..غير التراب..
..بعد بـيَّ محبه ..ومامش احباب
بعد بـيَّّ لعب..و صحابي متغربين..
لو أموات..والناجين شيّـاب..
كِنـّّـا اطفال متعلكَين على حيطان غرفتنه..
بصـوَرنه وإحنه طلاب..
بالمدرسه..من أربعطعش مادون
إبكَــهوه بشـارع السـعـدون
وإحنه شـــــــباب
صورنه الحمره ..وإحنه أوجـوه ممنوعه
صورنه الخاكي ..وإحنه جنود ..
ملابسنا على الأسلاك والرايات مرفوعه
صورنه الزركَـه وإحنه أشجار مكَطوعه
ونأدي التحيه إلمنجل الحطاب
وعمرنه إيدور بينه ..إيدور دولاب
لو ذل وحرب ..
لو مدري شيسّـمونه ..
لو إرهاب..
..ياحـوش الطفـوله الماعرفناهه
ولا شاهد علينه إيكَول عشناهه
الشمس حركَت سطحنه و..جير..
من مرزيبنه المكسور ينزل جير
على شباج غرفتنه .. ودما وريش العصافير
لا لوحه ولا منظر طــبيعي ولا تصـاوير
بحيطــان الغـــرف جــير وبسامير...





التعليق والتصويت على الموضوع في الموقع الرئيسي


اخر الافلام

.. فيلم السرب يتخطى 8 ملايين جنيه في شباك التذاكر خلال 4 أيام ع

.. الفنان محمد عبده يكشف عبر برنامج -تفاعلكم- أنه يتلقى الكيماو



.. حوار من المسافة صفر | الفنان نداء ابو مراد | 2024-05-05


.. الشاعر كامل فرحان: الدين هو نفسه الشعر




.. جريمة صادمة في مصر.. أب وأم يدفنان ابنهما بعد تعذيبه بالضرب