الحوار المتمدن - موبايل
الموقع الرئيسي


ذبتْ ( شعر شعبي)

ضياء حميو

2009 / 2 / 20
الادب والفن


قبل سنين ذهبت حبيبتي في رحلة ، ماكنت اظن اني سأراها بعدها ، لها ولتلك الايام ، وللعشق البريء ، كتبت حينها هذي القصيدة....
ذِبتْ ...ذِبتْ ..ذِبتْ
ذِبتْ يابه ..وذِبتْ يمه
وذِبتْ حتى العظم طفه بشريانه وي دمه
وذِبتْ غيمة
وذِبتْ دمعه....
دمعه مستحية تنث بِلـَله
تخاف ماتلگه اليلمه
وذبـــــــتْ..!
اشگد ذبت وآنه انتظر..!؟
ذبت داير وذبت حاير
وذبت روحي الفرفحتْ سكرانه دوم ابضحكتك
تتنطرك..!
وآنه الذبتْ................
................
ذوبني... وك ذوبني
ذوبني حَدر النهد وامطر علي قداح
مو انته كل شربي الأحب
وتلسعني كل مآردن احب
وشلون اشربك ياراح..!
أصفگـ عليك الراحين
كل راح تلسعها اوتشب
وتصيح وياك الخلگـ كلما تهب..
...ها ياصاح..!
........................
........................
خليني ارشف عسل من اشفايفك
وك ياآخ..!
شنهو المطر هذا البيك يالدوخاني وماداخ!!

وبيوم وبشهگة صبح ، فزيت من نومي ودرتْ
ودموعي تنشدني وتهم
دوريتْ بثيابك أشم
عن ريحتك آنه وأشم
ضميني يرويحته وخليني اشمّه شما فاح
كل يوم من بعده ابسنه..
مو صبح بعده المصباح
او وحدي أنه ..!!
آنه الذبتْ....
ابدن ولاأبدن أملّ
مسودن ولاشاف العقل
وبهيچ احب لمن ترد

...............
...............
ابيايوم اتناك وترد..؟
ناذر نذر لمن ترد...
ناذر نذر لمن ترد...!
شنذر نذر ولعيناك..!
وبيانذر اتلگاك..ّ؟
احچيلك آنه ابغيبتك
إشگد شفت وتعذبت..!؟
لا...!!
ابچيلك آنه ،والبچي وحده إهو اليخبرك
ويگلك بهذا وذاك....
لملمتْ روحي ابغيبتك ،هم كابرتْ
خافن يمر واحد يصد ابعيني
أستحي تنزل دمعتي
يرد الدمع يبچيني
ايشوف الوجد بيه ويگلي :إشمالك..!؟
ونگطتْ مني ابمستحه :
كلمات....أحبْ
ولكم أحب
والله أحب





التعليق والتصويت على الموضوع في الموقع الرئيسي


اخر الافلام

.. غياب ظافر العابدين.. 7 تونسيين بقائمة الأكثر تأثيرا في السين

.. عظة الأحد - القس حبيب جرجس: كلمة تذكار في اللغة اليونانية يخ



.. روبي ونجوم الغناء يتألقون في حفل افتتاح Boom Room اول مركز ت

.. تفاصيل اللحظات الحرجة للحالة الصحية للفنان جلال الزكى.. وتصر



.. فاق من الغيبوية.. تطورات الحالة الصحية للفنان جلال الزكي