الحوار المتمدن - موبايل
الموقع الرئيسي


من مدينة -همبورغ- [1]

زياد الرحباني

2009 / 5 / 19
مواضيع وابحاث سياسية


بمدينة همبورغ (ألمانيا) يا اخواتي يا حلوين، همبورغ للّي خصّصها قصف الانكليز بأواخر الحرب العالمية الثانية بشكل محبّب وموجّه وخاص، يعني مطرح ما كنت من أسبوعين، بعد الحرب العالمية الثالثة ع غزّة وبغداد وكابول: استحلَيْت فوت عَ مطعم وتطلع فيه المملحة ما بتنزّل ملح، وكلّهن، مطعم وسط، غالي، رخيص، كلّو ممالحو بترشّ. ومع الملاحظة إنو عدد قليل كتير من الممالح، حاطّين فيها رزّ. هيدا شو بيعني؟ هيدا ممكن برأيكم مش / شو هالتفصيل للّي بدّو مقال، لا والله هيدا مهم وكتير لدرجة إنو لازم كلّنا، نحنا عجايب هيدا الشرق الحزين، نقوم ننضبّ... تعو ننضبّ، أشرفلنا واللهِ... هلّق وين بدنا ننضبّ كلّنا ما عم بقدر أعرف. أنا بس لأنّي عم بتأسّف كتير عحالي، عم بكتب هالمقال، وما عم حرّض حدا ع حدا ولا في مين حرّضو لانّو كلّنا هيك، لسوء الحظ، وما دخّل الحظ، نحنا للي عم ندَخّلو.
ولِيه لي تلات أرباع الممالح عنّا ما بتنزّل ملح؟ وليه هَيْ شو دخّل رستم غزالي فيها؟ وشو بيقدرو الألمان يعملو بهيك حالة؟ ما في شي رح ينفع، أيّا تحريض؟ فانية وهيك. أساساً نحنا ما رح نحضرها للآخرة، لأنو رح ننقرض قبل بكتيييييير. هلّق أنا منّي عارف أيمتا الآخرة ولا يوم القيامة ولا الحشر بس للّي أكيد منّو وبقصّ أ...ي اذا نحنا مش قبلهن بكتير. خَلَص ولا يهمّكن! انتو بهالوقت خلّيكن عم بتحطّو رزّ بالممالح وإصْحا تغيّروهن أبداً كل فترة، وخدوا نتيجة! وخلّيكن عم تتمسخروا ع الصينيّين وع البضاعة الصينيّة (للّي غازية هامبورغ) وع البضاعة الكوريّة والماليزيّة واطرقوا إيد بإيد وقولوا: Yes! وكتبوا حرف العين برقم 3 والهمزة بالـ 2 ونزلوا من جيب طلعوا بالتاني ع أساس الحالة كتير تعبانة.
الظاهر إنّو يسوع المسيح لمّا قال لتلاميذو: "أنتم ملح الأرض فإذا فسد الملح فبماذا يُملَّح؟"، كان عم بيوجّه رسالتو للألمان انتو ما ألكن تعلُّق... نحنا يعني، ما إلنا تعلُّق. نحنا بدنا كل يوم نطلّ عالمملحة؟؟؟!!! بعد ناقص، ما في مية ألف شغلة براسنا.
مين بدافع عن الحريات؟
مين بيحمي هالديموقراطية الوحيدة بالشَرق أو تحت اللسان؟
مين بيوقّف المخططات الإيرانيّة ـ السوريّة؟
وأخيراً مين بيحرس ثورة الأرز؟
طبعاً، لبنان أولاً.





التعليق والتصويت على الموضوع في الموقع الرئيسي


التعليقات

1 - نحنا شغلتنا ننزع كل شيىء موجود و بتطاله إيدنا
محمد عبد القادر الفار ( 2009 / 5 / 18 - 19:13 )
وتأسيس لتخريب اي شي ممكن يجي بالمستقبل ومحضرينلو تعديل نحنا

والله يحميلبنا الاستـئــليل والسييدة

منور يا استاز زياد ... يا كبير

2 - بالعربي الفصيح
مؤيد عبدالأئمه سعيد ( 2009 / 5 / 19 - 00:11 )
اتمنى من الأستاذ زياد الرحباني أن يكتب كلمته باللغه العربيه الفصحى ليستطيع فهمها جميع العرب من المغرب الى المشرق ...علما بأني احب اللهجه اللبنانيه وخصوصا الأغاني ومعجب بالمسرح الرحباني

3 - كبير و بضلك كبير يا أستاذ
وائل الياس ( 2009 / 5 / 19 - 05:15 )
طريقتك بالكتابة الرمزية رائعة، و هي فن بحد ذاتها، كل انسان ممكن يفهمها بطريقة معينة، بس كل طرق الفهم لازم توصل على نفس النتيجة يلي هي رسالتك من وراء كلماتك المبعثرة بطريقة تدل على مدى عبقريتك الفذة.

تحياتي لشخصكم الكريم

4 - هذا فقط يستحق التصفيق
مازن كم الماز ( 2009 / 5 / 19 - 06:29 )
أعتذر لأنني أجد نفسي أصفق لا لديكتاتور منتفخ أو لشيخ يزبد و يرعد , بل فقط لك يا من لم يستطع أن يروض لسانه على المدائح

5 - تعليق
نادر ( 2009 / 5 / 19 - 07:49 )
أنت الملح يا زياد وإذا فسد فبك يُملح، هذا ما قصده صاحب الكلمة عندما قال: أنتم ملح الأرض .. أنتم يا من تصنعون من الكلمة وطنا للحلم والجمال

6 - الحظ
jasim ( 2009 / 5 / 19 - 08:45 )
تحية للرحباني
.....وما دخّل الحظ، نحنا للي عم ندَخّلو......... العبد الذي لا يعي عبودية لا يستحق ان يعامل الا معاملة عبد...
.واحنا صرنا بيد الكاولية والروزخانية والكابوية
وبعد ماتجي وحدة مثل فيروز و الرحبانية

7 - كلمات من غزة البائسة
عبدالله أبو شرخ ( 2009 / 5 / 19 - 10:52 )
ألف تحية للموسيقار العبقري زياد الرحباني. كنا في جامعة بيرزيت نسمع زياد ومسرحياته وألحانه العذبة. الآن مع الحصار لا يصلنا إنتاجك من سنوات طويلة. تقبل احترام كبير من مثقفي غزة ... لو ضل فيها مثقفين !

اخر الافلام

.. إسرائيل تهاجم أردوغان.. أنقرة توقف التبادلات التجارية مع تل


.. ما دلالات استمرار فصائل المقاومة باستهداف محور نتساريم في غز



.. مواجهات بين مقاومين وجيش الاحتلال عقب محاصرة قوات إسرائيلية


.. قوات الأمن الأمريكية تمنع تغطية مؤتمر صحفي لطلاب معتصمين ضد




.. شاهد| قوات الاحتلال تستهدف منزلا بصاروخ في قرية دير الغصون ش