الحوار المتمدن - موبايل
الموقع الرئيسي


عاشق الكهرباء بالصورة والقصيدة

ذياب مهدي محسن

2009 / 6 / 25
كتابات ساخرة


عاشق الكهرباء بالصورة والقصيدة
ذياب مهدي آل غلآم
الأحبة القراء تحياتي لكم وصلت لي هذه القصيدة لشاعرها من أحد منتديات الأنترنيت والصورة هي للفنان المناضل سلمان عبد ولكونها جميلة وواقعية ومن عاشق كهربائي عراقي (أمأصل) ولتطابقها مع الواقع المعاش حاليا أحببت ان يطلع عليها القراء وأسف لعدم ذكر الشاعر لا أعرفه اتمنا ان يصوبها صاحبها او من يعرف قائلها مشكورين أحبائي



اكو فد واحد اشكد مايحب الكهرباء صار شاعر
يله خلي انشوف اشكتب

ماتگدر تجينه امحنيه رجليهه
بلوه الكهرباء شلون تاليهه
***
ماتگدر تجينه وطبع دلوعه
بس ساعه تهل وخمسه مگطوعه
وحنه الصيف اجانه شحلو موضوعه
الروح بيا مكان وّين اوديهه
***
ما تگدر تجينه وشاغله الافكار
واليطلب الحسنه المهر بالدولار
تشرط قصر عالي امحوّط ابأسوار
والمايگدرلهه بحرّه يگضيهه
***
ما تگدر تجينه وخايفه علينه
حكمتهه هوه التبريد ياذينه
ديدنهه تحبنه ودوم توصينه
سبلتكم قناعه فياي يغنيهه
***
ما تگدر تجينه والمكيف دوم
بي صارت كآبه وشال كومه هموم
تضحكله المهفه تگله جالك يوم
ارجع منشأك خل عزتك بيهه
***
ماتگدر تجينه والحكومه بخير
من يوم الاجت ما صار كل تغيير
لحظه والعقل يخواني مني يطير
ياهو من الوزاره لعلتي يدريهه
***
ما تگدر تجينه محنيه حته الراس
والمسؤل يحلف والله والعباس
مضروبه المحطه شبيدي يا هلناس
صبرولي سنه ... عشرين خليهه !!
***
ما تگدر تجينه والشعب داوي
خزّن ما يطيب الجرح شتداوي
اتحزم سبع يا خوي للواوي
وفرش عل سطوح عذيبي تلگيهه
***
ما تگدر تجينه والشمس تشوي
وفريزرنه خالي بس هوه يحوي
ووعود القياده وعود ما تروي
هيه اتريد امبيرين ننطيهه
***
ما تگدر تجينه والمولد فار
مشكور اعله تعبه وكفو منه وبار
يوميه بعطل حته المصلح حار
يفتر صبح ليل وحته ظهريهه
***
ما تگدر تجينه ونتوا خو تدرون
عدنه شلون صيف يذوب الفافون
مو لعبة طفل متونس ابّالون
من ايطگ محول ظلمه يغديهه
***
ما تگدر تجينه والگلب فرحان
أحنه اكثر بلد بالنفط والحرمان
وأحنه أسعد وطن محسود بالاوطان
من ناكل البيضه بچوله نگليهه
***
ما تگدر تجينه والجروح كبار
هادي الشعب ساكت يسمع الاخبار
واحد لزم كرسي وثاني شاله وطار
بس محد سأل عناس وشبيهـــــــه
***
ما تگدر تجينه وطالت المده
گمت أحلم بواط بدربي يتعدّه
يا كبر الصداع براسي شيهيده
والآلام كثرت من يداويهــــــه
***
ما تگدر تجينه وصايره هوايه
باليابان مرّه انطفت لحظايه !!
وحنه ارقام عدنه القطع بالمايه
وبدفتر جينس منهو اليجاريهه
***
ما تگدر تجينه وشنهو الجاره
راح انصب عله البيتونه فرّاره
بلكي بهوه شرجي ولنهه دواره
ولأجواء نوبل أسمي يضويهه
***
ماتگدر تجينه ومجلس النواب
سوّاله اجتماع مقفل الابواب
گال الحل شعبنه ينزع الاثواب
وبدجله وفرات السبح ينسيهه
***
ما تگدر تجينه الامم متحدات
تبحث بالعراق اوراق منشورات
وصلوا للنتيجه وأسف عاجل فات
گال ايران علنت عن نواويهه
***
ما تگدر تجينه وفتحوا الجوال
ووراق العراق بسلة الازبال
يامسكين شعبي محطم الآمال
روحك طور( داخل) بس يسليهه
***
ماتگدر تجينه وتوصل انّه اِلبيت
ديمقراط اجانه وهمر بالباكيت
من ماكو اناره عولمه ضويت
شوفواشگد جميله الوان تزهيهه
***
ما تگدر تجينه انگطع حته السير
والخضراء تزهي يغني بيهه الطير
رامس كوندليزه وحضر حته بلير
والسي آي أي ما گدر يحييهه
***
ما تگدر تجينه وصرت متأكد
خابرني الزعيم القطب والاوحد
بوش وگاللي لأحلامك توسد
ماتنحل يگلبي انخبط صافيهه
***
ما تگدر تجينه محنيه رجليهه
بلوه الكهربااااااااااااء شلون تاليهه
*************





التعليق والتصويت على الموضوع في الموقع الرئيسي


التعليقات

1 - بلوه الكهربااااااااااااء شلون تاليهه
مارسيل فيليب ( 2009 / 6 / 25 - 03:36 )
حكم بالمناسبة
اول كلمة ينطقها الطفل العراقي عندما يبدأ الكلام
أنـ طفــ ت ... هــ هــ

حكمة أصبحت شعار لكثرة تداولها بين العراقيات والعراقيين
هف بيدك .. محد يفيدك

شعار يظهر على الحواجز الكونكريتية الفاصلة بين مناطق بغداد بعد ان زادت ساعات قطع الكهرباء بسبب حلول فصل الصيف
يارئيس الوزراء .. رحمه للعباس سووي الكهرباء

سؤال ضمن اسئلة الأمتحانات لطلاب المرحلة المتوسطة
ما هو اصلح وضع ... المولدة بالسطح... لوبالطارمة.. لو بآخر الحديقة يم الدجاج ؟
واذا ما عدكم مولد أكتب بتفصيل وافي .. منين ساحبين .. و ابيش الامبير ...!

مصري و فرنسي و عراقي رفاق سفر في طيارة ... صاح الفرنسي فجأة .. هذه باريس
سألوا و كيف عرفت
قال هذا برج ايفل لايخفى على احد
وبعد جم ساعة صاح المصري هذه القاهرة عاصمة الدنيا
سألوه كيف عرفت قال هذه الاهرام شوفوها
بعد العشاء صاح العراقي وهو يدك أصبعتين ... هذه بغداد المتنبي
سألوه كيف عرفت
كل .. باوعوا من الشباك كلها ظلمة ... يعني الكهرباء مقطوعة .





اخر الافلام

.. حياة كريمة.. مهمة تغيير ثقافة العمل الأهلى في مصر


.. شابة يمنية تتحدى الحرب واللجوء بالموسيقى




.. انتظروا مسابقة #فنى_مبتكر أكبر مسابقة في مصر لطلاب المدارس ا

.. الفيلم الأردني -إن شاء الله ولد-.. قصة حقيقية!| #الصباح




.. انتظروا الموسم الرابع لمسابقة -فنى مبتكر- أكبر مسابقة في مصر