الحوار المتمدن - موبايل
الموقع الرئيسي


خفيف الدسم. -1.- القضاء السوري يبحث عن قضاءٍ..!

فاضل الخطيب

2009 / 7 / 28
كتابات ساخرة


خفيف الدسم. "1."
مطلوب قضاة ومستشارين قضاء غير فاسدين، للعمل في سلك القضاء السوري..
+ خير.. انشالله ما تكون مريض، ولا نسيت تحكي عربي، ما تكون شربان ومخلّط بالشرب؟
ــ استغفر الله، يا رجل إنت بتعرف أني ما بشرب، نحن ماية ويا دوبنا قادرين نحصل عليها للشرب، بس فعلاً مثل ما قلت لك، إنو في حملة جديدة ضد الفساد..
+ فساد، شو هذا خييّ، أني هاللق صرت ما بعرف عربي، شو معنى فساد؟ أكلة جديدة؟ ولا شي شغلة جديدة نازلة على السوق؟
ــ والله ما عا بمزح، يا رجل حديث الشارع هذا، شو إنت نايم، ما سمعت عن وزير العدل وتصريحاتو ضد الفساد؟
+ أني ما بسمع هيك تصريحات، أني سمعت تصريح رئيس الوزراء ضد الفساد، شو رأيك أياه أقوى؟ ما بقصد بالنفوذ.. أيّ تصريح كان أقوى؟
ــ إنت كل عمرك مانك جدّي.. بتعمل من هيك خبر مُهمّ مزحة.. لو عندك شيء قضية مع شي محكمة كنت حكيت غير هيك..
+ لا يا رجل، أني عا بيحكي لإني بعرف مليح، وكان عندي شغل عند محاكم، مو بس محكمة واحدة..
ــ روحة المحاكم ما شغلي كثير مليحة، بتعرف أكثر شيء بيتردد على المحاكم المشكلجية، وإنت ما كان مبين عليك إنك زلمة مشاكل..
+ لا خييّ، روحتي للمحاكم مو بسبب مشاكلي أني، إذا بدّك شي مرة بحكيلك عن اللي سوّو معي، الله لا يوقّعك باللي وقعت فيه.. بس خلينا عند خبرك، مبين عليك مهتم كثير فيه.
ــ طيب، يا سيدي فعلاً وزير العدل حامل حملة على القضاة الفاسدين في الوزارة، والناس عا بتقول يمكن هذي حملة راح توّصل كل الوزارات..
+ لا تمزح، ليش بالوزارات الثانية كمان فيه فساد؟ ان شالله ما يبيّن بكره إنو كمان بمطارح أكبر من الوزارة فيه فساد وما كنّا منعرف.. لك والله نحن ماشية الماية من تحتينا وما حاسّين..
ــ أخي إذا بدّك تضل تمزح، إنسى الحديث وخبّرنا إنت عن البطالة بأمريكا.. أو عن الهنود الحمر شلون صارو شقر، أو عن الـ..(مقاطعاً +).
+ شو باين إنت صرت تمزح مو أني.. طيب هذا الموضوع بصراحة ما موضوع ضحك، لكن العملية اللي عا بيسووها بتضحك، عالقليلة نحن منضحك على حالنا، أحلى ما هنّي فوق يضحكو علينا.
ــ شو بتقصد؟ يعني كلها حكي بحكي، وكلها ضحك على الدقون؟
+ ضحك على الدقون وعلى الشوارب.. طبعاً بكرة بيمسكو شيء واحد انتهت مدة صلاحيتو وبيعملو منّو إنو هوّي سبب كل المشاكل بالبلد.
ــ وقّف.. وقّف شوية بالله، يعني بتقصد كلها عملية مرتبة من الأول؟
+ بالضبط.. مرتبة من الأول.. ولو بتعرف إنو الأول قديش عا بيرتب لنا شغلات اللي نحكي فيها وبين فترة وفترة بيطلع واحد إبن حرام ماكل البلد وناهبها، والقيادة ما منتبهتلو، لكن إجا وقت حسابو..
ــ طيب خليني أني كمان ساعدك بالحديث طالما هاللق فهمت راس الخيط.. يعني نحن لازم بعد ما يمسكو اللي مسبب لنا الفقر والبهدلة، لازم نشكر الرئيس الليّ سهران من شان الناس..
+ طبعاً.. شو مفكّر إنت غير هيك؟، كل هذول الحرامية عا بيشتغلو من وراء ظهر الرئيس، ومن وراء ظهر إبن خالو، وأني بقول لك إنو أهل مرتو كمان ما بيعرفو بهيك شغلات، هن إنكليز وعينهن شبعاني..
ــ على طاري الشبع، لازم إشترى للبيت ربطتين خبز، يمكن نسمع شي كلمة مو كويسة من المرا، بس المشكلة إذا هتفنا وغنينا وبروظت صورتها، ما راح تسكت عني، إذا ما دبّرت أكلات العيال . الله يلعن هالزمان. ما فينا نضحك عليها مثل ما فوق عا بيضحكو علينا.
+ كل شيء يمكن بينضحك عليه، بس البطون الجايعة ما بتقدر تضحك عليها، لا بالصور ولا بالشعارات ولا بالهتافات..(مقاطعاً ــ ).
ــ يمكن بعَدّنَا بالحديث كثير، إذا ما منوّقف يمكن ربطتين الخبز ما راح إقدر إشتريهم بكرا.. الله يسترك خمسمائة ليرة لآخر الشهر..
+ بسيطة خيّي، بس إذا قدمت على مسابقة قاضي نظيف، وخالي من الفساد وربحت المسابقة، الله يسترك ما تنسانا.. وخلّي الـ 500 ليرة ثمن فنجان قهوة..





التعليق والتصويت على الموضوع في الموقع الرئيسي


التعليقات

1 - صحيح
سوري ( 2009 / 7 / 28 - 05:22 )
هذا هو حال سوريا منذ 46 عاماً، وما زال الشعب يبلع نفس السنارة ويقع بنفس الفخ. هذا وضع مبكي-مبكي لأن نفس الحاكم يلعب نفس اللعبة ويكررها مئات المرات ويقبل الشعب بهذه المهازل، في حين تتلاشى ثروته الوطنية يومياً
لذلك نقول: لايوجد ضوء في آخر نفق هذا الشعب المغنمن بجدارة (تحول إلى غنم) ويبدو بيستاهل

2 - لو بدهم
micho ( 2009 / 7 / 28 - 05:54 )
لو بدهم يغيروا سوريا لفعلوا ذلك في أقل من شهر... بس ما عندهم نيه في تغيير البلاد وكل همهم هو أنو تضل طيازهم ملزقه بالكرسي

3 - بدون منافسة
فاضل الخطيب ( 2009 / 7 / 28 - 10:08 )
أحييّ كل الذين مروا وقرأوا هذا، وشكراً للسيد السوري وللسيد ميشو، واريد تأكيد قناعتي وهي أن الأسرة الحاكمة جادة فعلاً في مكافحة الفساد -وأقول ذلك بكل جدية لأنها وبكل جدية لا تريد أن ينافسها أحد، الآخرون ليسوا ولن يكونوا منافسين على الفساد، فسادهم هو الفتات الذي يتقاضوه ثمناً للولاء.. ويا مولانا الوالي....

اخر الافلام

.. غياب ظافر العابدين.. 7 تونسيين بقائمة الأكثر تأثيرا في السين

.. عظة الأحد - القس حبيب جرجس: كلمة تذكار في اللغة اليونانية يخ



.. روبي ونجوم الغناء يتألقون في حفل افتتاح Boom Room اول مركز ت

.. تفاصيل اللحظات الحرجة للحالة الصحية للفنان جلال الزكى.. وتصر



.. فاق من الغيبوية.. تطورات الحالة الصحية للفنان جلال الزكي