الحوار المتمدن - موبايل
الموقع الرئيسي


أي كلام

شريف حافظ

2009 / 10 / 22
الادب والفن



كل واحد مننا في مكان
الحروف إتفرقت جوانا
والتعريفات تاهت بهوانا
والدين؟
ضاع من زمان!
بادينا إحنا اللي ضيعناه!
إقرأ؟
مبدأ ربنا!
بس الإشاعة والخوف
بتضمنا
خوف من القراية،
خوف من البداية للنهاية!
الموروث عايش محروس،
والعقل با حسرتي، موكوس!
وأدينا عايشين
مش محترمين
نداري جراحنا في الصباح
ف المسا أراجوز للعالم وصاح
ما فيش منا واحد يسأل:
أيه الحكاية؟
ولا يحكي بالحق الرواية؟
بنأفلم على بعضنا
لجل ما توه الدروس
وتـمرض وياها، كالعادة،
النفوس
ومين همهُ؟
كلنا في الهم تروس
ورا أكل العيش للأيـد والرجل
نبوس!
حتى الكلام
أصبح بلا معنى
زي الجراد
كتييييييييييييير
وبيقع ينهار
مع الإختبـار
شعارات عايشنها
ومش عايشانا
والنص بنعبد
والفحوى يا سيدي،
مش همانا!
بنمثل أننا أحنا،
رغم أننا من زمان أوي
سحنا!
قال أيه:
بيقولك أننا فل!
طب ونبي أحلف
برب الكل!
بس الحلفان
بقى راخر سهل
وزمان كانوا قالوا
وقال
جالي الفرج
يا خال!
برامج حوار
ممثل بين دور ودور
محتار
بيحكي عن صعوبة شخصية
يا عيني على المسئولية
أجره بيجيب يا دوب مليون
أقل من لاعب في نادي سيون
مش بتاع علم جربان
منه المجتمع هربان
للفن بس المهرجان
وسلملي على الكتاب
وحتى الجرنان
وتعاليم القرآن!
يا نهار أسود!
إزاي أكتب كده؟
كفرت وهنت الأمانة؟
وحياة مين يا أبو وأم بهانة؟
بتضحك على ذقنك
ولا على السبحة اللي في أديك؟
يا بتاع إرضاع الست
والبت واللعب في صوابع رجليك!
يا بتاع طهارة البول
وناسي أن الفراعنة
هم بناة أبو الهول
مين اللي جبنا هنا؟
في النقطة دي؟
مين أبن الكلب اللي ضحك علينا
وخطفنا وخطف دمغنا وعنينا؟
لا بنفكر ولانشوف
وكله واضح
بس إظاهر أننا
بنحط النقط فوق الحروف
قبل ما نطللع فوق الروف
ربنا بيقول ما نمشيش
ورا أهالينا
من غير ما نفكر
بس أحنا برضُه نسينا
أصل التناسي أو النسيان
ماهوش في أدينا
في أيدين أولاد العم سام
ما هو كان فيه فرق
بين الآنسة والمدام
وبين الجهل والعلام
حلمك يا شيخ علام! (ضحك)
اللي نعرفه، أحسن من اللي ما نعرفوش
يا جمالك يا حسنك، الرخاء مفروش
وبكرة القدس ترجع
يا كُتر القوة! حلق حوش!
القرار:
ننسحب من كل حتة
لجل ما نسلمش على إسرائيلي!
هما يخدوا كل حاجة
نتفرج آه، بس السلام؟
يا ويلي يا ويلي!
أوعى تطبع أوعى تسلم!
يكبروا في العلم
ويشتروا العالم
وأنت تسيبهم
حتى يا عم، لو تتألم!
يالا نصوت يالا نولول
شدوا الهمة علوا الصوت
عايزين نسمع أحلى قوالة
حس الحس ولو بالموت!
والوحدة العربية كبيرة
رقاصة ترقص
هز يا وز
كله يصقف
آدي العز
كرامتنا في وسط ورجلين
ودماغنا ما بينهم الأتنين
أوعى تقولي أني لبخت
ده من غيظي
لأني بكيت
من كتر دموعي
راح النظر والبصيرة! ..
إتعميت!
لكن ده في الصالح العام
لجل الأعمى معلوهش ملام
أي كلام كان يعني إتقال
شفته في ليل أو موال





التعليق والتصويت على الموضوع في الموقع الرئيسي


اخر الافلام

.. غياب ظافر العابدين.. 7 تونسيين بقائمة الأكثر تأثيرا في السين

.. عظة الأحد - القس حبيب جرجس: كلمة تذكار في اللغة اليونانية يخ



.. روبي ونجوم الغناء يتألقون في حفل افتتاح Boom Room اول مركز ت

.. تفاصيل اللحظات الحرجة للحالة الصحية للفنان جلال الزكى.. وتصر



.. فاق من الغيبوية.. تطورات الحالة الصحية للفنان جلال الزكي