الحوار المتمدن - موبايل
الموقع الرئيسي


(لا شكر على واجب)

عمر عبد العزيز

2009 / 12 / 4
الادب والفن

مش هشكرك
ولا همحي اسمك اللي موشوم جوه قلبي و اهجرك
ولا حفضل اشكي من سُكات
ولا أنيني هيفضل غنوة ف بقي و لحد أمّا أموت
ولا عاد هيسكنّي السكوت
ولا عدت هرضى بالفُتات
ولا هرضى للظالم يفوت
ولا عمري هاقبل م النهارده إني اسيبهم ينهبوكي
يمضغوكي و يهرسوكي يسلموكي جثة هامدة للعريس
و لو سابوني عضم مطحون جوه كيس
و بعتروني في الربوع
تنبت بذور شجرة أمل جوه الرفات
تحمل بُه أرضك و تداريه سنة أو سنين
لكن في يوم
أكيد هيتولد الجنين
بالعلم مروي بالعمل راضع حنين
و يبتدي من تاني بكرة يرسمك
و يشكلك
ميهمنيش اسمك يكون إيزيس زينب أو بهية
بس المهم تطيري فاردة الجوانح في المدى أجمل صبية
جناحات فتية
جناح أمل يمحي التعاسة م الوشوش
و جناح عدالة
يبدُر طمأنينة و أمان جوه النفوس
ايوه مهم من الفساد و القهر إني اطهرك
ايوه الأهم إني أنول حريتي و اكشف دماغك أعََّرفِك و أحررك
و ساعتها بس مش هعوزك تشكريني
ولا هتحتاجي للحظة إني اشكرك
و مش هشكرك

---

---

---

التعليق والتصويت على الموضوع في الموقع الرئيسي

---

.. مت فى 10 أيام.. قصة زواج الفنان أحمد عبد الوهاب من ابنة صبحى


.. الفنانة ميار الببلاوي تنهار خلال بث مباشر بعد اتهامات داعية




.. كلمة -وقفة-.. زلة لسان جديدة لبايدن على المسرح


.. شارك فى فيلم عن الفروسية فى مصر حكايات الفارس أحمد السقا 1




.. ملتقى دولي في الجزاي?ر حول الموسيقى الكلاسيكية بعد تراجع مكا