الحوار المتمدن - موبايل
الموقع الرئيسي


أغاني

عبد الباقي فرج

2010 / 1 / 6
الادب والفن


ـ 1 ـ

باب

شلون أسد باب التجيني منها ريح ؟
وآنه قلبي الباب أو قلبج الريح !

****************

هو قلب زغير
وبلمسة أنامل شع ضواه
فرد ْ جنحانه محبه
عشك كل الناس بس محد هواه
مومثل كلّ القلوب !
هو من وصلة سما ورقـّة بريسم
هو من أجمل ورد مرسوم
بس عيبه وفاه


ـ 2 ـ

أحلام البنات


لون البحر والســما
أحلام البنيات
وما بين بحر وسـما
عيونهن نجمات
وگلوب لون الورد
مرسومة بـمرايـات

***
من يمر أسم الحلو
تتنهد الكلمات
وبشفاف مثل الجمر
أتضوّي البسمات
يا طيف بين الجفن
والعين ردت تبات !

***
ياليل مرّ بهده
لتفزز البوسات
حلمانه بين الحلو
البثياب بيض وورد
أوبينها خطوات !


ـ 3 ـ

يا شاغلي


بس أنت البخاطـري
وشاغلني الشاغلك
وسنين عمري انذرت
شمعات الخاطرك


يلگلبي رفّ بس ألك
او بس عليك ينوح
مرمرته وك بالهجر
وما يوم اهو هاجرك

يا ريت يا شاغلي
تهجر بقايا الروح
خليها تطفه بهده
صدكني وك عاذرك


ـ 4 ـ

غريب

غريب ومـن بعد كل ذاك الفراك
أردن لأصدقائي هواي مشتاك
أرد
مـشـــتـاك للي جانو زغار
لهلي
مشــتـاك والله لعتبة الباب
أرشـّهـا بذكريات تخضر عتاب
غـريب ومن بعد كل ذاك الفراك
أرد ردود افرك روحي علناس
وباب الصديق الغيبوه ياس
غـريـب ومن بعد كل ذاك الفراك
أرد ردود انشد وين العراك ؟


كوبنهاجن





التعليق والتصويت على الموضوع في الموقع الرئيسي


اخر الافلام

.. رحيل الممثل البريطاني برنارد هيل عن عمر 79 عاماً


.. فيلم السرب يتخطى 8 ملايين جنيه في شباك التذاكر خلال 4 أيام ع



.. الفنان محمد عبده يكشف عبر برنامج -تفاعلكم- أنه يتلقى الكيماو

.. حوار من المسافة صفر | الفنان نداء ابو مراد | 2024-05-05




.. الشاعر كامل فرحان: الدين هو نفسه الشعر