الحوار المتمدن - موبايل
الموقع الرئيسي


بعشق حاجات

عمر عبد العزيز

2010 / 2 / 9
الادب والفن


بعشق حاجات
مهيش كتير
لحظة دفا
من شمس حانية مولِّفة
داخلة تطبطب من ورا شباك إزاز
وسط الغيوم و المطر و الزمهرير
و صوت حرير
غنوة لفيروز أوأغاني قديمة جاز
كرسي فوتيه
جرنان معاه سيجارة و كمان فنجان لاتيه
يسحِرنا عالم م الشجن و الذكريات

بعشق حاجات
نسمة خريف
مرت شهور الحر المطلي بزيف
و طفلة رايحة المدرسة
واخدة معاها عُمر لسه بيبتدي
و ضفيرة و فيونكة و شنطة كراسات
سابتها قاصدة ولا ناسية
كراس موسيقى وياَّ علبة ألوانات

بعشق حاجات
لحظة ميلاد
و تحيا مصر في مدرسة بصوت الولاد
ساعة الشروق
و حوار بذوق
عن شعب طيب مستكين
و حلم إنه يجيله يوم يصحى يفوق
و آدان بيعلى ان العمل خير م السُبات
حيّ على بلادنا و حيّ على العباد
حيّ على الحاضر و بكرة
الماضي فات ... الماضي مات
بعشق حاجات
ساعة الفطار
و فرن عيش بلدي مع جبنة و خيار
سينما و كتاب
ضحكة عجوز
نظرة رضا في عين فقير
و لُقا السِرير
لمَّة صحابي مهما طالت بالساعات
بعشق حاجات
كرسي في جنينة ... و اتنين سوا
بيسرقوا.....
لحظات هنا في وسط مشوار الشَقا و حياة ضنينة
الشَّعر شايب و الزمن سايب رُتوش
عِشرة و وفا باينة في عيونهم و الوشوش
بعشق حاجات
مهيش كتير
أشياء بسيطة صغيرة
لكن أكيد فيها حاجات متكررة
عند الصغير و الكبير
بس ف زحمة يومنا و ف جري الساعات
بتضيع حاجات
و تتوه حاجات
و ف لحظة نِهدى و نفتكر
إن الحياة دي عمرها ما تكون حياة
إلا في لحظة نحسها ... و نحبها
هتجيلنا و لا نروحلها
ولاّ يضيع العمر نحلم بالُّلقا
و من سُكات
نعشق حاجات





التعليق والتصويت على الموضوع في الموقع الرئيسي


التعليقات

1 - شكرا لقد امتعتنا
عبد العزيز الحيدر ( 2010 / 2 / 9 - 15:51 )
قصيدة جميلة..انها تذكرنا بكل متع الدنياالصغيرة والسهلة التي لايحصل عليها بالنتيجة المؤسفة كل الناس.....هنا تتحول الامنيات الى احلام.. وتختصر الاحلام الى كلمات....الا انها بذلك تكون الرابط بين البشر ويا له من رابط....اصرة الحب واصرة الجمال واصرة الذوق والتذوق جميل جدا ان نسمع مثل هذا الزجل الواعد.... احييك من العراق

اخر الافلام

.. أدونيس: الابداع يوحد البشر والقدماء كانوا أكثر حداثة • فرانس

.. صباح العربية | بينها اللغة العربية.. رواتب خيالية لمتقني هذه



.. أغاني اليوم بموسيقى الزمن الجميل.. -صباح العربية- يلتقي فرقة

.. مت فى 10 أيام.. قصة زواج الفنان أحمد عبد الوهاب من ابنة صبحى



.. الفنانة ميار الببلاوي تنهار خلال بث مباشر بعد اتهامات داعية