الحوار المتمدن - موبايل
الموقع الرئيسي


في الظل

لؤي عجيب

2010 / 2 / 20
الادب والفن


- افرحتلك من كل قلبي ... ألف .. ألف مبروك ...
- الله يبارك فيك يا رب ...
- مبروك يا عروس ..
- بكير ... لسا ما صارت عروس .. هاهاهاهاها ...
- هه هه هه هه هه .. انشالله الأسبوع الجاي بتكون أحلى عروس بالدنيا ...
- تسلموا يا جماعة .. عم تخجلوني هيك ...
- يا عمري أنت مو شايفة حالك منيح .. أنت أحلى من القمر ..
- تسلملي ...
- تفضلوا ... تفضلوا ... شو .. وين يقعدوا النسوان معانا .. ولا بالصالون التاني ..
- شو بدون يعملوا معانا ... يلا دبروا حالكم ... ولك وين الراكب الرابع ..؟؟ تأخر كتير..
- يلا عالطريق .. ما تقول إلا وصل ...
- شو استاذ .. رح نقعد على قلبك اذا ضلينا هون ...
- .. لا .. لا .. خلينا نقعد لحالنا ... احسن النا ..
- معك حق .. اصلا أحسن ما نقعد معهم ونسمع صياحهم على لعبة الشدّة ....
- بالعكس .. أريح إلنا من وجع الراس معكم ...
- يلي بسمعكم بقول رايحين تحاربوا ... وانتوا متل الأولاد الصغار.. رح تتقاتلوا على الورق ...
- يعني شورح تفيدوا هالوطن بقعدتكم ..؟؟؟
- رح نحكي عليكم .. هه هه هه هه هه ....
- يلا احكوا قد ما بدكون ... بيضل حكي نسوان ... هاهاهاهاهاها ..
- شو قصدك حكي نسوان ...
- يعني ما الو قيمة ... هاهاهاهاها ..
- هاها .. يلا تفضلوا .. تفضلوا يا شباب .. ارتاحوا
- شروفوا يا صبايا .. يا زينة الدنيا ... خليهم يعرفوا قيمتنا ... هه هه هه هه ...
- لا تنسونا من القهوة والشاي ...
- تكرم عينك يا زوجي ... أنت بتأمر ... أمر ...
... ... ... ... ... ... ...

- العمى ما أغلظو زوجك ...
- هيك كل عمره .. بدج حكيو دج ...
- لا تكوني زعلتي ها ...
- لا .. أزعل ... قديش بحكيه ... وبقله انه الناس بيدايقوا من حكيه .. بس عبث .. أدن من طين وأدن من عجين ...
- الله يساعدك عليه ... بس إلا ما يكون عنده أشياء كويسة
- معك حق .. قديش دفش وحكيو دج ... بس والله قلبه متل قلب الطفل .. حنون كتيير .. وبعدين كريم كتير وما بينقص عنا شي أبداً ....
- عنجد الرجال غريبين ... طيب عندهم كل هالحنية .. ليش ما يبينوها ... ويتعاملوا معنا بلطف ...
- مشان ما تنخدش رجولتهم ... هه هه هه هه هه ...
- رح تخوفوني من الزواج ها ....
- حبيبتي .. لا تخافي ولا تهتمي ... الرجال ... احكيله متل مابيحب يسمع .. بيصير يلي بدك ياه ...
- مفكرين حالهم أذكياء ... هه هه هه هه هه ...
- بس زوجك غير ... فهمان ولطيف ... وبعدين محبوب كتير ..
- زوجها ...؟؟؟
- تقريباً .. هي كاتبين كتابهم ومو باقي غير العرس بعد كم يوم ....
- أي .. زوجي .. هه هه هه هه ...
- صحيح .. بدي اسألك ... عن ..
- خلص .. ما فيه داعي للحكي بالماضي ...
- أي عادي .. أكيد بتعرف بقصته ... مو كل البلد تعرفها ....
- قصدك عن البنت يلي تركها ...؟؟؟
- ايه ... بيزعجك الموضوع شي ...؟؟
- لا ... أبداً ... أصلاً ... هو ندمان على الفترة يلي قضاها معاها ...
- معه حق .. والله هالبنت سمعتها على كل لسان ...
- ما كانت شغلتها غير عشقانة هاد .. وتاركه هداك ....
- هي بهدلت حالها ... معقول كل يلي عشقتهم وخطبوها .. فيهم العيب .. وهي ما شاء الله عليها .. ما فيها شي ... صحيح مين ترك التاني ..؟؟؟
- الحكي بيناتنا ... هي تركته ...
- لك ما اوقحها ... وليش ..؟؟؟
- قال طريقة تفكيره دقه قديمة ....
- هه هه هه هه هه ... دقة قديمة ... ما يبلى الجديد ...
- وشو الدقة االجديدة يلي بدها ياها الأنسة ..؟؟؟
- ليش لساتها آنسة ...؟؟؟؟ هه هه هه هه هه ...
- هه هه هه هه هه .. أنا ما بحطها بذمتي ... بس سمعتها وتصرفاتها بتقول غير هيك..
- العمى مبهدلة هالبنت ... والله سيرتها على كل لسان بالبلد ...
- والله من حظه أنها تركته ... الله بعتله هالقمر ...
- ايه .. تسلمي .. خجلتيني ...
- أنا لهلا مستغربة كيف حبها ... وشو عجبه فيها ...
- ضروري نحكي يعني ...؟؟
- شو .. شو بدك تحكي ...؟؟؟
- أنت أحكي حبيبتي ... هي رح يصير زوجك وأنت تعرفيه أكتر مننا ....
- قصدك أنه كان نسونجي ...
- لا حرام عليكم ... والله مو نسونجي ... صحيح اله كم مغامرة مع كم بنت .. بس والله مو بقصد يتسلى ...
- أكيد ... ما عم نحكي أنه كان يتسلى مع البنات ويتركهم ...بس يعني ما فيه بنت هون ما كانت حاطة عينها عليه ...
- وهو ما قصر ... عمل يلي يقدر عليه ... هه هه هه ...
- والله أنتو ما بتعرفوه منيح ... كتير حباب ولطيف ... ولو أنه أي وحده من يلي عشقهم كانت متل ما بده .. لكان تزوجها من زمان .. بس هيك حظه ...
- أكيد هي حظه الحلو .. انو تعرف عليكي ...
- تسلمي ...
- وحظك أنت كمان ... لأنه والله ما فيه شب بالبلد بحلاوته ...
- هه هه هه هه هه ... يسلملي ... أنا رح نسيه كل شي ... ورح غير له كل عاداته ...
- أكيد لحاله بكرا بيتغير ...
- الله يهنيك أنت تستاهلي كل خير ...
- تسلموا ... شو بكرا رح تنزلوا معي عالسوق ...
- أكيد ... بس أنا ما رح اشتري شي ... بس بتفرج ..
- ليش زوجك عاملك حظر تسوق ...
- لا والله ... بس جبت المره الماضيه كم قطعة وهلا مو بحاجة ...
- والبلوزة يلي حطيتي عينك عليها المرة الماضيه ...؟؟؟
- ما عجبته لزوجي ...
- ليش ..؟؟
- قال فاضحة شوية ... يقبر قلبي .. انا بلبس على ذوقه ...
- أكيد ... لكان تلبسي على ذوق ابن الجيران ... هه هه هه ..
- اسكتي ولك ... هه هه هه ... زوجي كتير بيغار علي ... حتى لما نمشي بالشارع .. ما شغلته غير عم يتلفت يسار ويمين ...و كل ما طلعت برا لحالي أو مع حدا غيركم فيه خناقه بالبيت ...
- زوجي طلع أشطر... قطعها من أولها ... ما فيه لا طلعة ولا فوته ... بدونه هو ... او بدونكم انتوا ...
- طيب ليش الأسبوع الماضي ما نزلتي عالسوق ؟؟؟
- لأنه ما خلاني أنزل و صاحبتك معك ... قال كل الشباب بيطلعوا عليها لما تمشي بالسوق ... قال مشيتها مشبوهه ...
- لا .. الحمد الله ... زوجي ما وصل لهي المرحلة ... بيخليني أطلع وفوت مع صاحباتي ... صح نتخانق بعد المشوار ... بس بخيليني اطلع .. هه هه هه هه ...
- ولك حتى لما بدي روح لبيت أهلي .. ما بيخليني روح لحالي .. بيطلع معاي وبيوصلني ... وبالرجعة بتصل فيه يرجعني البيت ...
- أنا من أولها .. اشترطت عليه ... يخليني أنزل عالسوق لما يصرلي نزلة مع صاحباتي...و يخليني زور أهلي على كيفي مو على كيفه هو ..
- لساتكم عرسان .. بكرا بيتغير ...
- مو كل الرجال متل بعضهم .. هي زوجي .. لسا بيخليني روح واجي متل ما بدي ...
- يا ستي تتهنوا ... انا حظي الأسود ... زوجي مقفل كل باب للنقاش عنده ... خلص حكى كلمة .. ما عاد يتراجع عنها .. لو شو ما صار ....
- الله يعينك عليه ... والله صعبه الحكايه هيك ...
- يا ستي .. شو بدنا نساوي ... تعودنا ....





التعليق والتصويت على الموضوع في الموقع الرئيسي


اخر الافلام

.. الفلسطينيين بيستعملوا المياه خمس مرات ! فيلم حقيقي -إعادة تد

.. تفتح الشباك ترجع 100 سنة لورا?? فيلم قرابين من مشروع رشيد مش



.. 22 فيلم من داخل غزة?? بالفن رشيد مشهراوي وصل الصوت??


.. فيلم كارتون لأطفال غزة معجزة صنعت تحت القصف??




.. فنانة تشكيلية فلسطينية قصفولها المرسم??