الحوار المتمدن - موبايل
الموقع الرئيسي


( أبو كاظم والبنك الدولي )

ضياء حميو

2010 / 2 / 20
كتابات ساخرة


ملاحظة لقاريء العربية غير العراقي : يُلفظ حرف گ جیما معطشة على طريقة الإخوة في مصر في لفظها ويقابل حرف القاف .

التقيته بعد فراق سنين طويلة ،فلاح من إحدى قرى الفرات الأوسط في العراق.
بعد التحية والسلام والعزاء المتأخر بمن فـُقدوا من الأهل والأحبة ،سأل : عمي ايش تشتغل هسه " الآن "؟ قلت : أكتب .
- أي عمي انت زين بالقراءة والكتابة ،منذ كنت شابا في أرض المرحوم والدك، تفلح والكتاب لايفارق يديك.
ثم استدرك متسائلا:" بس انت عمي چبير " كبير "ماتعلمت قراءة وكتابة لسه " لغاية الآن "؟!
قلت صادقا "لا والله عمي كلما تعلمت أكثر اكتشف اني لم اتعلم شيئا"..!!
- الله يعطيك رجاحة العقل ابني.
وبعيدا عن موضوع رثاءه لبطئِ فهمي قلت : " عمي أبو كاظم "..! أردت ان اكتب عن موضوع "الواقع الزراعي في العراق في هذه الأيام" وعندي بعض الأسئلة اريد ان اسمع رأيك بيها ،وهذا الذي ستذكره سأدونه كاملا وسينشر بالجريدة مع صورة لك واسمك الكامل تحتها..!!
اعتدل " أبو كاظم " بجلسته، وعدّل عقاله كمن يتأهب لإلقاء خطبة، ذكر اسمه كاملا حتى سابع جد، ثم توقف سائلا:" قلتَ جريدة ؟!
- أي نعم.
- لا عمي ..! اكتب عبد الزهرة وبس.
- ليش عمي ؟!
- عمي الدنيا مافيها أمان ، بس عبد الزهرة.
لم يقتنع بطمأنتي ، وأقنعته أخيرا بوجوب إضافة " أبو كاظم " على الأقل من باب الاحترام ،فوافق.
السؤال الأول :" انت شتزرع الآن ؟!
- سؤالك مثل الماعنده وَلَد ويسألونه " شوكت طَهرتْ المحروس؟! ، عمي غير اكو " يوجد " ماي " ماء " خاطر ازرع ، هو وين الماي؟!يگولون الذنب من تركيا وسوريا ماتنطينه حصتنا بالماي ...زين اسألك بالله ... انت هم ابن عشائر وتفتهم بالاصول ..!؟
- قلت :" نعم عمي أكمل كلامك "..
- لا آني أسألك ..!تركيا وسوريا مو عندهم چبير.. رئيس دوله؟!
- قلت : نعم.
- قال أبو كاظم: " أي محلولة..احنه هم عدنه " چبير " وناس تفتهم ..نجمع وجهاء لهم وزنهم "ونروح "مشية" على تركيا وسوريا ونگلهم " نقول لهم " " محظوظين ومبخوتين " مانشرب لاچايكم " شايكم " ولاقهوتكم ..! اذا ماتحلون شغلة الماي وتعطونا حصتنا ...!
- ثم مستدركا :" معقولة ايفشلونا " يخجلوننا" ؟! ، عمك هم يسمع الاخبار ويشوف التلفزيون ..احنه مو عدنه صداقة ويه امريكا واتفاقية ..!!
أومأتُ برأسي موافقا فيما اكمل أبو كاظم :" اذن لابأس بجماعتنا اذا اخذوا وياهم " اوباما "رئيس امريكا..! أي هكذا فعل" زلم" ، والله العظيم لو آني وياهم ،و يخلوني احچي " اتكلم " ..لگلتلهم ..عيب تقطعون الماي عنا ، احنا جيرانكم واخوتكم ومسلمين مثلكم، ومارايدين غير الإنصاف.
قلت مهدئا بعد ان احتدت نبرته ..:" أبو كاظم ...!مشكلة الماي افتهمناها ،هو بالفعل قليل جدا قد لايمكّن من زراعة الشلب والحنطة والمساحات الواسعة ،ولكنك تقدر ان تستغل مساحة صغيرة لزراعة الخضروات مثلا، الى ان يحلونها " الكبار " انشاالله..!"
قال وهو يومئ بيده ساخرا :" زرعت بصل وطماطة ، والى ان صارن بالقل هو الله احد ، نزلت للولاية ابيعهن ، لگيت " وجدت " البصل السوري والإيراني والتركي ويمكن حتى صيني ، المهم ارخص من بصلاتي وطماطاتي بنص السعر..ومحد يشتريهن ...لو زارع خيار كان يمكن اشتروهن أهل الطرشي.
- انت تقصد المنافسة الغير عادلة من البضاعة الأجنبية؟
- أي عمي... احنه مو كلنا موظفين، لازم الحكومة تحمينا ، ويخلون تسعيرة حتى نگدر انعيش؟!
قلت:" عمي..! لايستطيعون.. هذا إخلال بشروط البنك الدولي؟!"
- يعني البنك الدولي امخلي " وضع " راسه ابرأس بصلات أبو كاظم؟
- للأسف عمي حتى البصلات یراقبهن ، يقولون ان الأفضل هو اقتصاد السوق وانه هذا اجراء من ضمن الإجراءات التي تحد من التضخم.
- يا تصخم؟! اگلك عمي متنه من الجوع..اكتب بالجريدة كللهم ..لا حليبتنا نقدر انبيعها ولا بصلاتنا الهن سوق ،حتى الحنطات التي زرعتهن گبل سنه وسوقتهن للدولة ... فلوسهن على ثلاث دفعات ، لحد الآن مااستلمت غير دفعة واحدة ، أسمدة كيماوية ماكو " لاتوجد "..عمي الارض صارت "بور" ، وبعد سنه" الله وكيلك" اذا ماانزرعتْ بعد ماتنزرع.
عمي من باچر "باكر " وي صلاة الفجر يروحون " كبارنا" الى " كبار" تركيا وسوريا ويحلون اول شيء شغلت الماي ... لكي نزرع وبعدها انشوف شغلة " البنك والتصخم "..واكتب آني " عبد الزهرة أبو كاظم " ماعندي مانع أروح اوياهم " معهم "حتى " شخيّر" ابن عمي يروح اويانا .





التعليق والتصويت على الموضوع في الموقع الرئيسي


التعليقات

1 - تحية للزميل ضياء
اسماعيل داود ( 2010 / 2 / 20 - 17:15 )
قبل شهر التقيت ناشطةمن الهند وابدت استغرابها اننا في العراق لانهتم بموضوع البذور المنتجةمن شركات احتكارية والتي لاتتيح للفلاح ان يسترد بذور من نباتاته للموسم القادم وهكذا يعود ليشتري بذور من هذه الشركات في كل موسم . قالت ان - كبارنا- يسعون للاعتماد اكثر على مثل هذه البذور ولمختلف المحاصيل. قلبي مع ابي كاظم وكل فلاحينا
في عالم يكرس الاغنياء غنا ويزيد الفقراء فقراً.

اخر الافلام

.. فقرة غنائية بمناسبة شم النسيم مع الفنانة ياسمين علي | اللقاء

.. بعد تألقه في مسلسلي كامل العدد وفراولة.. لقاء خاص مع الفنان




.. كلمة أخيرة - فقرة غنائية بمناسبة شم النسيم مع الفنانة ياسمي

.. كلمة أخيرة - بعد تألقه في مسلسلي كامل العدد وفراولة.. لقاء




.. كلمة أخيرة - ياسمين علي بتغني من سن 8 سنين.. وباباها كان بيس