الحوار المتمدن - موبايل
الموقع الرئيسي


جلسة سمر انتخابية

عزيز العراقي

2010 / 2 / 28
كتابات ساخرة



ذهبت لزيارة صديقي محي ألعبيدي في مدينة الشعب شمال بغداد , والشعب حي شعبي مختلط , دفع أثمان غالية نتيجة الصراع الطائفي . محي صديقي منذ ثلاثين عاما ولا اعرف عنه من أية طائفة إلا في السنوات الأخيرة , ومحي فنان شعبي , ليس فنان فنان , بل قارئ مربع , وليس كثيرا عليه هذا اللقب أمام عشرات الألقاب الكبيرة التي تمنح لهيفاء وهبي وباقي المغنين من الشباب . كنا مجموعة من الأصدقاء منذ الطفولة في عكَد الأكراد في شارع الكفاح , وتفرقنا في عدة أماكن من بغداد . وبعد استكمال متطلبات الجلسة , والدخول في التهويمات التي راصفت بساط الريح , أتحفنا العزيز محي بصوته البغدادي الأصيل في هذا المربع :

افرح يا شعب دورة انتخابية
ومن هذي النمايم عبي كَونية
*****
اسمع وافتكر من انشلع صدام
عينك تنفتح , اوعيب بعد اتنام
جري وي الأكل لاتحطه بعد صيام
واحذر يا شعب , رجعة البعثية
*****
لا تغرك صورهم ذوله هلطليان
ولا تسمع حجيهم تره بس لسان
من ايصير نائب يكسر الميزان
ويعّلم بعد بصفوف هتلية
*****
ناحت كهرمانه وشاط ابو نواس
من شاف العمايم كسرت بالفاس
تماثيل ونصب مابيه كل احساس
كَلله بعد , نختفي بلطمية
*****
فوزية تكَله لزيد بن حسون
نسوان وزلم ترشحنه بالقانون
متفقين كلنه الهر فحل بزون
أيد بأيد , ونشرد الجريذية
*****
محي : قابل الهر فحل بغل ؟ طبعا فحل بزون .
استغل الصديق أمير توقف وتعليق محي , وسأله : ابو سيف ( محي ) بروحه لابوك , الهر اللي اتكَول عليه الأخت فوزية لزيد ابن حسون : من يا عمام ؟
محي وسط ضحكنا : شنو تريد اتناسبه ؟
امير : لا , هو مو واحد من المرشحين والاخت اتسويله دعاية ؟
محي : العتوي لو مترشح جان حتما يفوز .
امير : ليش شراح أيوزع ؟!
محي : كل البزازين تنتخبه , والفيران هم ماخذ بوشهم , شتريد اكثر من هذولة ؟! ولكي يقطع الطريق على تعليقات امير, واصل ابو سيف اكمال المربع :

ممنوع الشرب للهر تر ياناس
اخيار وطماطه لابسات الباس
يسبح الجزر نازع بله احساس
كَلتله البتيته : اخجل شوية
*****
هذا فريج الاكَرع للعتاوي ايكَول
السعلوه امي , ومن وره اتبول
خلوه عليّ , والشعب مسطول
والتصويت الكم واحد ابميه
*****
صوت للنزيه اليحفظ الميعاد
للشاف المراره وبعد ما ينصاد
فطومة وعلي والكاكه ابو آزاد
ولد الشعب ذوله , موالهتليه

امير (بعد اكمال المربع بقليل): عاشت حنجرتك ابو السيوف, والله تستاهل انسويلك فيديو كلب لهذا المربع .
محي : الفيديو كلب غالي اموري , ومنين نجيب الفلوس ؟!
امير متحمسا : ولا يهمك , احنه أصدقائك موجودين , بس شد حيلك . واقترح عليك , ان يطلع بالفيديو كلب الهر شايل دريل من مالات صولاغ , ويركض وره البزون يريد يزرف اذنهه ويعلكلهه ترجية مال خارطة العراق .
محي : مو جنت تحجي عدل ؟
امير : انت شبيك ؟ ما تريد اساعدك بالاخراج ؟ واكمل : واخاف ذوله جماعة صولاغ يزعلون , نجيب الاخت صابرين تركص وي ردات المربع . بس هاي ماراح تجي , وتكَول : ما اجي للعراق الا يتحسن الوضع الامني , آني مناضلة ومطلوبة لهواي اطراف . ولو الامريكان صار فترة يغازلوني , بس لحد الآن ما صار شي . فاقترح عليك ان نأجل الموضوع الى ان تتفق صابرين وي الامريكان وتجي , شتكَول ؟
محي : لا هواي راح يطلع الفيديو كلب ابن حلال .
امير : انت شضارك اذا يطلع نغل لو ابن حلال ؟ زين اقترح عليك اقتراح ثاني ؟
محي : اليوم تشبعنه اقتراحات .
امير : بس اسمعني , نطول المربع ثلاث مقاطع على الرئاسات . هذوله مو ياخذون بالشهر كل واحد مليون دولار بلاش فوك راتبه , فاكيد نحصل منهم جم فلس اذا مدحناهم وهذي ايام انتخابات . وازيدك علم , لازم نطول بالفيديو كلب ايضا . اقصد : نطلع وي الدريل سيارة صغيرة تحمل مولدة كهربائية , وبجانبهه برينة يديوية , في سبيل اذا الكهرباء انكَطعت , نشغل الدريل بالمولدة , وذا انتهى البانزين بالمولدة , عدهم البرينة . اقصد مانطيهم أي حجة ينتقصون بيه من الفيديوكلب , والثانين , انطول بمشاهد الأخت صابرين , بعدين صابرين اتشيل الدريل بأيد والبرينة بأيد الثانية , وتصير احسن دعاية للمصالحة الوطنية . شتريد بعد اكثر ؟!





التعليق والتصويت على الموضوع في الموقع الرئيسي


التعليقات

1 - جلسة جميلة حقا
محسن الحاج مطر ( 2010 / 2 / 28 - 21:34 )
استاذنا العزيز ثق ان المفردات التي وردت في الجلسة هي دبلوماسية اذا ماقارنتها بما يقوله الشارع عن هؤلاء الحرامية الذين يتسترون باسم الدين تارة وباسم المظلومية تارة اخرى. ان الناس مستاءة منهم والكل يعرف مسبقا انهم سيزورون في الأنتخابات وان من يشجع على التزوير هم قيادة المفوضية من الحيدري وانت نازل . احد الأصدقاء هنا في مدينة الرفاعي قال بالحرف : اقبضوا من دبش طالما لم تتغير قيادة المفوضية لأنها تمثل المحاصصة الطائفية والقومية.؟
وشكرا

اخر الافلام

.. فقرة غنائية بمناسبة شم النسيم مع الفنانة ياسمين علي | اللقاء

.. بعد تألقه في مسلسلي كامل العدد وفراولة.. لقاء خاص مع الفنان




.. كلمة أخيرة - فقرة غنائية بمناسبة شم النسيم مع الفنانة ياسمي

.. كلمة أخيرة - بعد تألقه في مسلسلي كامل العدد وفراولة.. لقاء




.. كلمة أخيرة - ياسمين علي بتغني من سن 8 سنين.. وباباها كان بيس