الحوار المتمدن - موبايل
الموقع الرئيسي


اني حاير والله لايحير عبده

نوري جاسم المياحي

2010 / 3 / 6
ملف: الانتخابات والدولة المدنية والديمقراطية في العراق



زارني جيراني ابو علي وابو عمر .. وبعد السلام وشلونك وشلونك وشلونك .. وشكو ماكو وشنو اخر الاخبار ؟؟ دارت بيننا الدردشة التالية
ابو علي ...
راح تنتخبون ياجماعة لو تقاطعون مثل ما يريد البعض ؟؟
ابو عمر ...
ليش ما ننتخب ؟؟ ليش هي الانتخابات مال ابو احد ؟؟ تذكرون في انتخابات سابقة من طلب الشيخ مقاطعتها وورطنا .. هاي الشغلة ان شاء الله ما تتكرر.. المؤمن لايلسع من جحر مرتين ..
انا ....
طبيعي لازم ننتخب .. من يريد تصحيح الاخطاء وتعرية الفاشلين عليه ان يذهب لصندوق الاقتراع ويدلي بصوته .. وحتى لو الغي البطاقة ووضعها بيضاء .. المهم ان لايتنازل عن حقه ... علينا ان نعاقب النواب الحاليين وعدم التصويت لهم وطردهم خارج المجلس ومنعهم من العودة ثانية ... لانهم انانيون مصلحيون يحبون بس نفسهم .. اكلوا الدنيا واهلها
ابو علي ....
والله يا أخوان الانتخابات باجر (غدا) واني ما أعرف المن انتخب ..ولهسة ما قررت .. السيد اياد جمال الدين .. ليل مع نهار يصيح .. لاتنتخبوا الحرامية والفاشلين ..واني اشوف حجيه صح مية بالمية
ابو عمر ...
والله ياخوان .. طارق الهاشمي .. نفس الشي يعيط ويصيح .. لاتنتخبوا الفاسدين .. زين موهوه نائب رئيس جمهورية اربع سنوات وماسوه شي .. بس عنده شغلة حلوة تعجبني .. هو دائما يريد انصاف المعتقلين الابرياء اللي صار الهم سنين معتقلين بلا تهمة ولا محاكمة .. والناس تسميه ابو الغيرة .. بلكن يصير رئيس وزراء ويطلعلنه ولدنه
وعقبت أنا ...
اخواني الكل تصيح لاتنتخبوهم ثانية .. اشو علاوي هو عضو بالمجلس وحتى ما جان يحضر الجلسات .. ويريدنا ماننتخبهم ثانية وهو مشمول بالحجاية .. ومثال الالوسي مسوي اغنية انتخابية دوة على الكلب .. والبولاني اشو دعايته مو شي .. لازم ما قابض ؟؟؟ واخوتنا اليسارين مالهم حس .. شراح نسوي ؟؟؟
ابو علي ...
اني راح انتخب فد واحد .. يكون اولا عراقي وعايش بالعراق مومستورد من بره .. وما عنده جنسيتين لو ثلاثة .. وثانيا ما أريده يريد فدرالية ويقسم العراق وثالثا مو حرامي ينهب مال الفقرة ..
ابو عمر ..
اني اؤيد ابو علي .. بس اريد اللي انتخبه مو طائفي و يحارب المحاصصة .. واريد ه يدعوا الى حكومة اغلبية برلمانية قوية .. ورئيس كول وفعل .. مومثل علاوي والجعفري والمالكي ... نريد رئيس وزراء اخو اخيته .. مايخاف الاحزاب ولا دول الجوار ... ولازم يكون عادل ويساوي بين العراقيين .. شتوا هذا شيعي وهذا سني .. هذا كردي وهذا عربي .. وهذا مسلم وهذا مسيحي والله عيب .. نريد عراقي يكول كركوك عراقية مو كردية .. واني شايف نوشروان مصطفى يحب العراق وما يريد تقسيمه .. مو مثل غيره
عندها تدخلت ....
اخوان باجر المن نطي صوتنا .. لازم ننطيه لانسان يوفي بوعده .. المالكي حجيه حلو بس فعله قليل .. وماشفنا منه شي بس الحجي والوعود ..لكن اهلنا يكولون الشين اللي تعرفه احسن من الزين الما تعرفه .. والله اني مثلكم حاير .. ما ادري المن اصوت .. شنو رايكم نصوت لفيروز حاتم من جماعة ابراهيم الجعفري .. على الاقل حلوة وتخش بلبة الكلب .. واكيد هذه الرقة والحسن لايمكن تصير حرامية ..
ابو علي ...
تردون الصدك .. اني معجب باسامة النجيفي .. هذا الرجال شبعان وابن حلال .. ومواقفة العروبية ترفع الراس .. وواكف سجينة خاصرة لكلمن يريد تقسيم العراق .. بس مع الاسف مرشح عن الموصل واني بغدادي ..
انا ....
اذا تدورون على واحد شبعان وما لطخ ايده بالحكم وبسرقة المال العام .. اكو دكتور اسمه رعد مولود مخلص .. هذا ابن مولود مخلص .. من ضباط الجيش العثماني ومن الجماعة اللي ساعدت الملك فيصل الاول في تاسيس الحكومة الوطنية بعد الحرب العالمية الاولى وصار وزير وعين في مجلس النواب .. وهو من الوطنين المعروفين .. وبالتاكيد رعد على سر ابيه .. خلونا ننتخبه هو مرشح وي قائمة البولوني .. ها شتكولون ؟؟؟ لو تنتخبون الشريف علي وهذا من العائلة الهاشمية .. اللي اسست دولة العراق المستقلة ...وهم شبعان مو حرامي
ابو عمر ...
لاتزعلون اني راح انتخب العراقية مال علاوي .. هذا علماني .. وان شاء الله يطلع ابن حلال ويوفي بوعوده ..
ابو علي ...
اني راح انتخب وحدة العراق لان رعد مولود مخلص بيهه ...
انا ....
وهنا ختمت الحوار وكلتلهم .. لاتكولون عني شايب .. تره لسه روحي خضرة .. واتحسس بالجمال .. راح انتخب فد وحدة دكتوراه بالقانون ورائعة .. فاهمة ومتكلمة ومحجبة حجاب اسلامي .. واسم ابوها مثل هذا اللي يشربون بيه الكهوة ..
وهنا صاح ابو علي وابو عمر بصوت واحد ... بروح ابوك ابو ليث شسمها ؟؟؟ كللتهم هذا سر ... لو تابعون فضائية الحرة .. جان عرفتوها .. لانها دائما تطلع ببرنامج بالعراقي .. وتحجي خوش حجي .. والله يا اخوان لو الشعب ينتخب بس نسوان ..لما صار بينا اللي الصار .. بوك ونهب ومنافع شخصية وكل وقتهم خارج العراق سكر وعربدة واعمال سرسرية .. على الاقل النسوان يشعرون ويحسون بالم وعذاب الارامل والمطلقات واليتامى والمظلومات بالسجون العراقية
وهنا افترقنا لنلتقي بعد التصويت .. وكلنا نتمنى على المفوضية المو مستقلة .. ان تعلن النتائج بسرعة ومو تخلى الشعب ينتظر ويؤل ويتكله مثل البيض .. ولاسامح الله يصيرون عصبية ويتقاتلون .. بالانتحارين ووالمفخخات وكاتمات الصوت .. فد مرة صييري يامفوضية .. نزيهة ونظيفة وحيادية .. مانريد يعودون السرسية .. والله يحفظ العراق والعراقي والعراقية





التعليق والتصويت على الموضوع في الموقع الرئيسي


التعليقات

1 - حيره...ياشعب
شمران الحيران ( 2010 / 3 / 6 - 17:27 )
الاخ الفاضل المياحي....احيي اختيارك اذا كنت تقصد الدكتوره منال فنجان كما احيي الاخ ابوعمر على اختياره الوطني للقائمه العراقيه الوطنيه الذي لم يتغير خطابها الوطني كونها وطنيه حقا جمعت كل العراقيين الشرفاء تحت سقفها...كما احيي ايضا الاخ ابو علي على اختياره لوحدة العراق ولكنني لااظن ان يصمد اختياره هذا امام الاراده السياسيه الى (ام علي)حيث ان جماعة ابو على وانا واحد
منهم ليس بوسعهم الثبات على امر واحد حيث تراهم يعجون كلاما وضجرا
ويتباكون ظلما من الحكومه وسوف تجدهم غدا اول المصوتين لقوائم القانون
والمعجون ليجددوا ماساة عراقيه اخرى ليتبابكون ثانية

2 - اخ شمران
نوري المياحي ( 2010 / 3 / 6 - 20:05 )
اخ شمران .. جياع شعبك بحاجة الى قارئة الفنجان .. فلا تبقى حيران .. يا أروع انسان

اخر الافلام

.. عزة.. ماذا بعد؟ | المعارضة الإسرائيلية تمنح نتنياهو -الأمان-

.. فيضانات في الهند توقع أضراراً طالت ملايين الأشخاص




.. مواجهة مرتقبة بين إسبانيا وفرنسا في نصف نهائي يورو 2024


.. الاستقرار المالي يثير هلع الفرنسيين




.. تفاعلكم | مذيعة أميركية تخسر وظيفتها بسبب مقابلة مع بايدن!