الحوار المتمدن - موبايل
الموقع الرئيسي


عيون الشعب

حامد كعيد الجبوري

2010 / 3 / 16
الادب والفن


مهداة للحزب الشيوعي العراقي

حبيت الوطن وكتب شعر للناس
وأتمنه الوطن مهيوب أتمنه
ماذليت قلمي ولا بحت سري
ولابعت الضمير الباعه مومنه
تمثال الثلج ما مجدت تمثال
لأن زركة شمس تمثاله موعنه
كرهت كل الظلام وأذبحه بشمعه
أبثكل ضيم الليالي السود ضكنه
واليحب العراق يوج أله شمعه
وشمعه فوك شمعه الكون يضونه
جتف الجتف يسند نعمر المهدوم
نصراني ويزيدي وشيعته وسنه
ومن كاع الوطن حنه وعلك وبخور
ولطفال العراق نشيد الجنه
أطب بيت الحزب وتصدر الديوان
وأكـتب للحزب أشعار وتغنه
ماعوكت رجلي ولو غبت يسأل
صديق وللصديق يفكده يتعنه
ياخبزة حلال بعرك مكسوبه
ماياكل حرام ولا يعرفنه
نهرين الحزب صبن فرح وشعار
كل بيت أبعراقي الطيب رونّه
ما تدفع رواتب توعد بدولار
من لكمة رفاقك حزبك أبننه
كلبك ينبض وشريانه من شعبك
ومن دم الشعب بيبانك تحنه
ملجأ للفقير وصاحب الحاجه
واليوجي اعله بابك ماكطع ظنه
مايطلب كراسي ولا ركض ليها
أشماتصير الكراسي ما تكبرنه
أذا غيره أعتقد يتشرف بمنصب
يشرفها المناصب ما تشرفنه
ماسديت بابك لا عزت ناطور
لأن أنت الشعب وعيونه حرسنه
يطبلك قاتلك وتهلي وتمرحب
يموت بحسرته وهمومه ذبنه
عكارب والعكارب من تريد تجيب
تنهش بطن أمها بسمها شكنه
ميزني أعله ولده أولده فرحولي
وكراريس الحزب أشعاري كتبنه
شعري مو عواطف لامجد شخصي
مواقف للشرف تاريخي سجلنه
رائد مقتدر (عريان) وأسمي وياه
وفرق واضح جبير بشعري وبفنه
شفت الحزب خيمه وجمعة الطيبين
مو بس الشيوعي الشعب لمنه
جيفاره رمز والتقتديه أبطال
أشجم (جيفاره) منه بدمه جفنه
تركض رفقتك فزاعه للزينات
شهامه ومرجله وطيبات ومحنه
جاكوج المعامل ركص العمال
السنابل هلهلت لفراح منجلنه
يقراهه القصيدة كوكب إيلحن
كل شفة عراقي بوسه زوكنه
يغلب للشباب وعده عالسبعين
لاصابه ملل لجروحه ضهدنه
تشل جرح العراق وجرحك سهجته
بجروح السنيين الظيم أضمدنه
العراق بشاربك بعكالك نعكدت
خلص صبر العراق الموت أدمنه
عناوين أركضت عالدبكه والتمت
على حس الطبل خفن يرجلنه
يالبابك وسيعه وعازتك عازه
بخيت الينتخي ومحد يحشمنه
ياسدرة شواطي وكل زمانك كيض
يكصدها اليتيه أغصان فيّنه
ياعيطة نخل وعروكها أمتدت
ترضع بالتراب التمر عسلنه





التعليق والتصويت على الموضوع في الموقع الرئيسي


التعليقات

1 - جميل جدا
رحيم الغالبي ( 2010 / 3 / 16 - 19:01 )
جميل جدا ورائع ايها الشاعر النبيل
لك وللحزب الشيوعي العراقي ولكل اهل الحله محبتي

اخر الافلام

.. فنان إيطالي يرسم برج إيفل في حقل زراعي احتفالا بدورة الألعاب

.. الكينج وكاظم الساهر وتامر حسني نجوم حفلات مهرجان العلمين فى




.. عوام في بحر الكلام - الشاعر جمال بخيت يتحدث عن كلمات أغنية ع

.. عوام في بحر الكلام - الشاعرة كوثر مصطفى تتحدث عن أعمالها مع




.. عوام في بحر الكلام | الشاعر جمال بخيت - الإثنين 8 يوليو 2024