الحوار المتمدن - موبايل
الموقع الرئيسي


-سوريا ألله حاميها-

وهيب أيوب

2010 / 4 / 10
كتابات ساخرة


قريتلكون اليوم بالجولان المحتل إعلان، بمناسبة احتفالات 17 نيسان القادم، يعني "الجلاء": تحت عنوان: "سوريا ألله حاميها"
قالْ شو قالْ ؟... ( سوريا ألله حاميها )!
ألله يحمي جميع خلْقو ويحفظهونْ برعايتو يا أرحم الراحمين، قولوا معي آمين....
هلّق بالفعل اطّمأن بالنا وهدي حالنا، ألله يهدّي أحوال الجميع، ردّوا وراي آمين...
صبحان اللّي بغيّر وما بيتغيّر يا إخوان...
خلّيكون بحْياتكون معي وكونوا من السامعين، وقولوا يا مُعين....
كلكون بتتذكّروا عيوني، عنّا بالبلد، أنو حزب البعث هوّيّ قائد الدولي والمجتمع، إضافي طبعاً للقائد المُلهم،يللي كان هويّ يطلّع الشمس من حدّ اليابان من صوب الشرق يعني، ويرجع يغرقّها بأيدو بالبحر المتوسط عند المَسا راضية مرضية وغير آبه بإسرائيل، قولوا حبايبي معي صقالله أيام زمان...
وبتتذكروا قلبي، كيف كانت صورة القائد المُلهم حافظ، نشوفها بالتلفزيون السوري تاعنا، وهي نازلي من حدّ قرص الشمس، صبحان يللي عطا ويللي أخذ، خذنا برحمتك يا وليّ النِعَمْ.... مش سامعكون عبتقولوا.. آمين
طيب يعني بكفّي الحزب والقائد يحمي بربّكون ستين سبعين سني يا هالسوريين، فإسا خللي ألله ياخُذ شقلي عنّون، ولَكْ يعني المهم انكون محميين، انشالله من السعادين، فكيفك يكون ألله؟؟
يا جماعة والله نحنا محظوظين، النظام بيسهر عراحة المساجين، وبأمّن كل اللوازم، وما بقصّر، لا واللّه، من دواليب ومراجيح وتشبيح وبساط الريح. وكهربا ما بتنقطع بغرف التحقيق والزنازين وحياتكون ومالكون عليي يمين تحلّفوني ولا يسار، أربعا وعشرين على أربعا وعشرين، يعني مش مثل باقي المحافظات المعتّي، يعني ساعة في وساعة ما في، ولك يا عمّي هوذي أبطال التشارين، افردلي وجهك ولا تبقى حزين.... ولك سوريا ألله حاميها، وللي صايرلكون مش صاير لحدا ، ضحاك، وَلََكْ ضحاك خللّي يبان سن الذهب عيييني، ضحاك...
وََلَكْ وشو يعني إذا بين كل فترة وفترة بيمرق طيران العدو مرقة، وبطللو طللّي فوق القصر الجمهوري، ولاّ بيقصفلو شي موقع هون أو هونيك، شو طارت الدنيا يعني، خلّيك رِيلاكس عيوني، هوذي جيرانا، والجار موصّى بالجار.. يعني صحيح هون بدك تسألني أنو كيف يعني هيك وسوريا ألله حاميها، يعني وين بيصرفوها هذي بالله؟!
يعني بقلّك كمان ألله عندو بعض الاستثناءات وهوّي عن جد يعني بساير اليهود شوي، يا أخي هذول حيّروا الأنبيي، بدّك يعصاهون ألله يعني...
أني بالفعل شفت شعوب جاحدي، بس مثل الشعب السوري عيني ما رأت !!!
عَمّي: مازوت في! غاز في! كهربا في! مَي في! أكل في! تعليم في! صحّة في! بطالي في، تخلّف في، جهل في، أُميّي في، مساجد في، مُخابرات وأمن، روحي، في، حراميي وفساد وسرقا قديش بدّك في، قوانين طوارئ وأحكام عرفيي ومحاكم عسكريي، وحياتك عالغالي من خمسين سني متوفّري وفي .... فا شو في ما في؟؟
وَلَكْ حتى ديموقراطيي موجود لأبو موزي، أي نعم، عندك أحزاب الجبهة الوطنيي التقدميي الوطنيي القوميي العِسراويي الإشتراكيي الماركسيي اللينينيي، يعني عكل دِرِسْ لون حُبّي، وعندك كمان بيجيك مجلس الشعب يللي ما بتفوتون الفايتي وأعضاءوا ما بيعرفو الزايحة ولا الزاحلي، وما بمرّقوا لحدا شي مهما كان راسو كبير، وما بيرفعوا إيدون بالموافقة والتأييد إلا عالشِديد الأوي، عراي إخوانا المصريين.
اطمئن حبيبي ظهرك مسنود عجبل، فحطللي ببطنك بطيخا صيفي، وديك وجريك بميّ باردي، عندك كل ها، وبظهرون سوريا ألله حاميها...
وَلَكْ فعلاً تحيّرنا بربكون يا هالسوريين، يللي مطيّر عقلي منكون...ليش بظلّكون عابسين...؟!
الجولان المحتل





التعليق والتصويت على الموضوع في الموقع الرئيسي


التعليقات

1 - ولك يسلم تمك يا شهم
نبيل السوري ( 2010 / 4 / 10 - 19:30 )
لسوء حظي الكبير لم أحظ بقراءة شيء لهذا الكاتب الشهم المفوه
وقمت بقراءة مقالات سابقة وجدتها كلها هامة

على ذكر سوريا الله حاميها
إذا كان جنابو حاميها وكل هالمصايب حلت عليها من حزب فاشي لحرامية وعصابات من 47 سنة ولليوم وزاد بالطنبور نغماً اللص الأكبر اللي ورّث إبنو اللي تابع مسيرة القمع والشفط

لوكان الله مو حاميها كانت مصيبتنا رح تكون أكبر؟؟؟ مستحيل
لذلك علينا طلب استرحام من الله إنو يوقف حمايتو اللي ما جابتلنا غير البلاوي

2 - حاميها
galal ( 2010 / 4 / 10 - 20:13 )
حاميها حراميها

3 - آمين آمين آمين
نادر عبدالله صابر ( 2010 / 4 / 10 - 20:15 )
ما اروعك ايها الكاتب

4 - الله حاميها بالفعل
سوري ( 2010 / 4 / 10 - 20:45 )
نحن نحمد الله على نعمة الامن في سوريا
وستبقى سوريا قلعة من قلاع التحدي والصمود ضد كل من يعاديها
------------
هل الكتابه بالعامية مسموح في الحوار المتمدن ؟

5 - الله حاميها فعلا
أيمن قـدرى ( 2010 / 4 / 10 - 22:14 )
ياعمى وطنى حبيبى الوطن الأكبر الله حاميه لحكامه من ألوف السنين بيحلبوا فيه وبعده فيه لبن
يخزى العين
تحيه مصريه الى كاتب المقال

6 - تحية للكاتب
روميو ( 2010 / 4 / 10 - 23:30 )
الف شكر لك يا سيدي الكاتب على مقالاتك الجميلة ............

7 - إيه والله يعطيك العافية
قارئة الحوار المتمدن ( 2010 / 4 / 11 - 15:05 )
كتابتك بالعامية أعطت نكهة حلوة للمقال , إن شاء الله الاخوة العرب يفهموها , مقالاتك كلها جميلة وممتعة تسلم إيديك يا أخانا ونحن معك

8 - صبرا-جميلا- اهل الشام على مساوئ الحكام
سمير سماحة ( 2010 / 4 / 11 - 15:48 )
سوريا اصبحت مثل خربة لا اشغال ولا مشغلة بس عالم عبتسرق عالم وحاكم بيورث حاكم والشعب رايح فراطة عبيشكي لربو بللكي بيبعث طوفان ليشيل الطغمة الحاكمة من اساسها

9 - انفجار
JABER ( 2010 / 4 / 11 - 23:26 )
عدد تزايد سكان سوريا في تزايد مخيف
اصدقائي اردت من طرح هذا الموضوع الاشارة الى خطر آخر قادم الى سوريا . انما هذه المرة من الداخل وليس فقط ضغوط خارجية وحسب .
بيقول المثل : كل شي بيزيد عن حده بيقلب ضده .
فكيف اذا كان عدد سكان سوريا يزيد في السنة مابين 400 الف و مليون نسمة اليس هذا امر مخيف . اذا بقي هذا الوضع على هذه الحال فسوريا ذاهبة الى انفجار سكاني لا محال .
والتي استندت الى تقارير من وزارة الداخلية السورية في 11 2004 مايقارب 19,936.573 مليون نسمة وذلك طبقا لقيود السجلات المدنية السورية ونقلت الصحيفة عن مكتب للاحصاء انه ووفقا لمؤشرات عديدة فان عدد السكان في سوريا كان في نهاية عام 2003 17,550 مليون نسمة وعليه فان عدد السكان في سوريا سيصل الى ما يقارب الستون مليون نسمة في العام 2020 وذلك اذا صدقت مؤشرات وزارة الداخلية السورية واذا ما اخذنا اعتباطا النمو الحاصل في العام الحالي وهو يثير الدهشة . واليه فان عدد الاكراد في سوريا سيتزايد ليصبح اكثر من 10 مليون نسمة مقارنة بالعدد الحالي وهو اكثر من 3 مليون حيث ان نسبة الانجاب في المناطق الكردية مرتفعة مقارنة مع المناطق الاخرى . وتشير التقارير الى النسبة السنوية للزيادة السكانية في سوريا كانت 400 الف نسمة الا انه وبالاستناد الى المعلومات الاخيرة فان النسبة السنوية للزيادة السكانية في سوريا قد اصبحت مايزيد عن 2,5 مليون نسمة

10 - هذا الرابط للاستاذ وهيب
روميو ( 2010 / 4 / 12 - 18:42 )
http://chamtube.com/index.php?q=ar/video/1819
لقد اصبح لنا في سورية جناح عسكري لحزب الله لكي يحموا سوريا من الاعتداءات الاسرائيلية .....
وان كنت لا تصدق فانظر الى هذا الرابط
وشكرا....

اخر الافلام

.. أمسيات شعرية- الشاعر فتحي النصري


.. فيلم السرب يقترب من حصد 7 ملايين جنيه خلال 3 أيام عرض




.. تقنيات الرواية- العتبات


.. نون النضال | جنان شحادة ودانا الشاعر وسنين أبو زيد | 2024-05



.. علي بن تميم: لجنة جائزة -البوكر- مستقلة...وللذكاء الاصطناعي