الحوار المتمدن - موبايل
الموقع الرئيسي


نسم علينا الهوى ...

لؤي عجيب

2010 / 6 / 7
الادب والفن


- سمعت شو صاير ..؟؟؟
- شو صاير .؟؟؟
- اسرائيل عاملة هجوم على اسطول الحرية وقتلت مجموعة من الأتراك ..؟؟؟
- مو غريب هي الفعل من اسرائيل ولا جديد هيدا الشي ...
- بس الجديد أنو اسرائيل اعتدت على دولة جديدة ...
- مين بتقصد .... تركيا ..؟؟؟
- ايه .. وهيدا الجديد بالموضوع ... انت مفكر الأتراك رح يسكتوا ..
- لا أبداً ما رح يسكتوا ... رح يعملوا مظاهرات ... ويحاصروا السفارة الإسرائيلية ... ويحرقوا العلم الإسرائيلي .. وبس يجوا جثامين .. الشهداء ... رح يشيعوهم باحترام واجلال ...
- عم تتمسخر انت ..؟؟ أنت متوقع تركيا تسكت ..؟؟ بتعرف هيك حركة ممكن تساوي حرب عالمية..
- انا قلتلك انها ما رح تسكت .. ولا حداً رح يسكت ... بس السؤال يا صاحبي ... رح يعرفوا يستفيدوا اعلامياً من هالحدث .. ويشنوا حرب اعلامية على هالعنتريات يلي عم تعملها اسرائيل .. ويحجموا اسرائيل و يبينوا همجيتها بالتعامل مع كل المواضيع .. ولا رح يعملوا كالعادة ... يتركوا اسرائيل تقلب الموازين الإعلامية وتستفاد من اي شي ولو كانت مُدانه ....
- أكيد رح تستفاد اسرائيل .. من ورا تواطئ الغرب ....
- لا يا صديقي مو من تواطئ الغرب .. من ضعفنا نحنا .. ما عم نقدر نوصل صوتنا للطرف الآخر من العالم ولا نبين وجهة نظرنا ...
- كيف يعني ضعفنا ...؟؟ العالم كله مع اسرائيل ضدنا ...
- تعرف ... انا كيف عم جاريك بالحديث ما بعرف ... حبيبي انا اعلنت اعتزالي النقاش السياسي بكافة جوانبه ... رجاءً .. اذا عندك شي نحكي فيه غير السياسة انا عم اسمع ..
- انا بس حابب اسمع وجهة نظرك بهيدا الموضوع ... مو انت كل عمرك بتدين الضعف العربي ...
- وهلا اعلنت اعتزالي .. بدي ارتاح من نقاش ما بيفيد ... لو حكينا انا وانت من هون للصبح شو رح نقدم بهي المجال ... أنا حالياً ياصديقي أهتم بشؤون الأدب والفن والجمال وصولاً للسياحة والسفر ... ولو كل واحد اهتم بالشي يلي بحبه ... رح تتغير أحوالنا ...
- هلا هيدا همك السياحة والسفر ومو همك الشهداء يلي عم يموتوا كل يوم ...
- بتعرف .... طول ما نقاش العرب مع بعض بهيدي الطريقة رح يبقى الوضع متل ما هو ... لما بتتغير طريقة النقاش ... رح يتغير الوضع بالمقابل ... صدقني ...

- أحيانا بحسك واحد مخبول ولا بتفهم شي ... ما بفهم عليك كيف بتحكي وبتدخل المواضيع ببعض..
- ما فيه شي داخل بشي ... كل موضوع كتلة مستقلة .. بس كل موضوع يرتبط بالآخر مشان التوازن .. ولما بيتحقق التوازن .. بتزداد عناصر القوة بالبلد بكل جوانبها ...
- عم قلك ... أنك أهبل ...
- هاهاها ... والله انك بتضحكني من كل قلبي ...
- نسم علينا الهوى .... أيه ديه ... ديه ملحمة ...
- هي شرف هالأهبل التاني ...
- هاهاهاهاهاهاها ....
- مالك يا بني ... انت معصب من الصبح ليه ...آه بالحق ... والنبي عايز منك خدمه ..
- تكرم عينك تفضل ....
- عاوز الأغنيه ديت ... نسم علينا الهوى .. ايه ديه ...
- هي فيروز يا حبيبي ...
- عارف فيروز .. بس والله أول مرة أسمع كلام جميل زي ده ... ياه .. دي جميلة أوي ...
- والله انكون مجانين ... الدنيا قايمة قاعدة وانت عم تحكوا على الأغاني ...
- هو أيه يلي حاصل ...؟؟
- ما سمعت ..؟؟ طبيعي واحد أهبل متلك ما رح يهتم ...
- مالك يابني ... حصلك أيه ..؟؟؟
- ما سمعت بالأتراك ... يلي ماتوا بأسطول الحرية ..
- يا سيدي ربنا يرحمهم ...
- وانت شو ردت فعلك ... معقول ما أثروا فيك ...
- أكيد تأثرت .. بس أنت عاوزني أعمل أيه يعني ... أديني بدعهيلهم بالرحمة ....
- معقول انتو ... ما عندكم احساس ... ما عندكم مشاعر ....
- هاهاهاها .. شو بد نساوي عيني ...
- بيخرف وبيقول أيه الولد المسطول ده ... ؟؟؟ سيبنا بهمنا يا بني ..
- أيه ... شو قلتلي بدك غنية فيروز نسم علينا الهوى ...
- والنبي ... تقدر تحمّلها عن النت دي الوقت ...
- تكرم عينك يا مذوق .. والله انك عجبتني ...
- " نسم علينا الهوى .. " هي بتقول حاجة جميلة أوي ... خايفة من الغربة .. أنا فهمتها بس ما عرفت الكلام بالضبط ..
- " فزعانه يا ألبي .. تكبر بـ هالغربة ... وما تعرفني بلادي .. خدني... خدني ... خدني على بلادي" ....
- أيوه هي ديه ... هي ديه .. دي حلوة أوي ... ياه ...
- وين سمعتها انت ...
- سمعتها بالراديو ... على شان كده جيت عندك .. لأني متأكد انك تعرفها ... تعرف ... وانا ماشي بالسيارة ... وفيروز تقول نسم علينا الهوى .. تصدق بالله ... حسيت بهوى البلد عندنا .. كأنه بيلطم وجهي ....
- معك حق ... هي الغنية حلوة كتير .. تنشط الخيال ... وتنعش الذاكرة .... سكر باب المكتب من عندك وخلينا نسمع هالغنيه الجميلة ... شو رايك يا ثورجي ..؟؟؟
- صحيح انتوا التنين هبلان ... بس والله أنكم فتحتوا علينا المواجع ... وفيروز ما عليها أي كلام ...
- هاهاها ... اسمعوا ...
- علي الصوت ....
" ... ... نسم علينا الهوى من مفرق الوادي ... يا هوى دخل الهوى ... خدني على بلادي ... نسم علينا ... .... ... ... ..... .... ... "





التعليق والتصويت على الموضوع في الموقع الرئيسي


اخر الافلام

.. الأسباب التي تعلم منها التقليد.. الكوميدي شادي طعمه يوضح


.. الفنان محيي إسماعيل في ضيافة صباح العربية




.. الفنان محيي إسماعيل يوضح لصباح العربية أسباب غناء -ابن القرن

.. -ابن القرن الـ21-.. آخر إصدارات الفنان الكبير محيي إسماعيل




.. الكوميدي شادي طعمه يقلد العديد من اللهجات في ستوديو صباح الع