الحوار المتمدن - موبايل
الموقع الرئيسي


جوله ثانيه لاجتماع الكتل الفائزه

سرمد علي الجراح

2010 / 6 / 8
كتابات ساخرة


المجلس: نرحب بكل الموجودين. اخوان المحكمه الاتحاديه صادقت على نتائج الانتخابات والبرلمان لازم يجتمع و عدنه جدول اعمال خلي نحجي بي. اهم فقره هي صيغة* اختيار رئيس الوزراء.
مندوبة العراقيه (تحجي ويه المقابيلهه): شبيك انخبصت وتتْلفّت يمنه ويسره .
المجلس: هذا سمع (صيغه) تخربط. عمي صيغه* بالعربي مو بالايراني. قابل مفتح ببيتي ملهى.
المجلس: نرجع الموضوعنه: أي آليّه ممكن نتفق عليهه لاختيار رئيس الوزراء؟
الجان يتلفّت: هسه كانت صيغه شبساع يگلب السيد.
الصدريه: أي آليّه مو مهم, بكيفكم, بس المالكي خط احمر.
الدعوه: لا اله الا الله, هاي شلون مصيبه. اخي ما جاي نكول منو يترشح, دن گول شلون نختار؟
الصدريه: اعرف, بس هيج ردت اغثك.
الجعفري (يصيح للچايچي): ابني هل من الممكن تحوّطا, بسْتَرة الاقداح لدرء مخاطر التلاقح الجرثومي والاستزادة من البعد الصحي والبيئي.
الكورديه (للچايچي): اذا افتهمت شكال تعال اكعد بمكاني واني اجيب چايات.
الچايچي: عمي اللي افتهمته اكو فد شي خربان لو بَله صالنصه. (يحجي ويه روحه: انهجم بيتك على هل دماغ شكبره, تكول يقره دعاء كميل مو يحجي)
المجلس: نرجع الموضوعنه
العراقيه: احنه الفائزين بالانتخابات ونعتبر من حقنه محاولة تشكيل الحكومه
الدعوه: احنه الكتله الاكبر ولازم احنه نحدد رئيس الوزراء
العراقيه: يا كتله تقصد؟ شو انتو كتله بس بالعنوان, ومن تزل سطر تصير بالقنادر, ما كافي تتحملون اهانات تعالوا يمنه واحترموا نفسكم شويه.
الصدريه: هاي عبالهه تايهه ويجي يمهم. بس يجي يمكم كل جماعته تگلب وتجي يمنه وبأمر من اصدقاءنه.
الدعوه: انته صرت هدوره محلل ستراتيجي؟ اكول شصار من عربانتك, يكولون تطلع ملثّم تبيع بيهه لبلبي دورات. والله حقك, الينْكر اصله نغل.
الصدريه: اليوم تره لابس تراكسود وا گوملك اسويك ثريد.
العراقيه: هذا تراكسود ؟ والله عبالي وحمه!!.
تلفون محمول يرن باغنية (احترك عمك)
عادل زويه: اسف ياجماعه هذا تلفوني نسيت اسده. فد لحظه من رخصتكم هذي الاهل.
ها شتردين موكتلج لا تخابرين عدنه اجتماع مهم.
مرته: يمعود الحگلنه هذا ابنك بلع الحبوب مالتك.
عادل زويه: ولج بس لا الحبوب الزر گه!!.
موكتلج هذا ابنچ خِبلْ, دروحي اركضي, دخلي الدجاجات بالقفص. هوه بلا حبوب ويوميه ناقصات اثنين.
فوگاهه تريدني اسويه عضو برلمان. بقت بس عايزه عليه وتكمل, حمودي ابو الريش يصير عضو برلمان.
ساد الجلسه عاصفه من الضحك
مندوبة العراقيه (فحطانه ضحك): ما شاء الله يبيّن راح تصير جد, بس گللي (تحب) احفادك سلك لو قلي؟!!
الكورديه: بلكي يصير رئيس وزراء حتى نصير اول دوله عدهه رئيس هراتي.
المجلس: اخوان كافي تره اكو ضغط داخلي ودولي على ان تتشكل الحكومه
الصدريه: داخلي خارجي احنه ما يهمنه, اللي يريده السيد لازم يصير.
العراقيه: (للدعوه) شنو هوه شباچ الكاظم وچلّبتوا بي.اخذوا اي وزاره تعجبكم. قابل هيه ورث. يابه ننطي المالكي وزاره البنتاكون العراقي بعد شيريد.
الكرديه: فد لحظه عيني. لازم نشوف شنو المشكله ونلگه حل
الصدريه: المشكله واضحه اكو ناس لازگه بس احنه راح نشلعهم
الدعوه: تالي ويه هذا, حصّل كم عضو بالبرلمان تكول صار بيت اللي خلفه. بسيطه الا نخليكم تصيرون مثل الدوره السابقه قرقوزات بالبرلمان.
الصدريه: عبالك صعبه نطكم بالدهن واحد واحد. جيش الامام جاهز وبلحظه نسويهه ظلمه.
العراقيه: تره اني دخت اگوم اروح, بعدني ماطابخه, عود من تتفقون صيحولنه.
المندوب الايراني: چماله يكولون تكسر عظم العجمي يطلع خ.......هذوله من تكسر عظمهم شيطلع؟
المندوب الامريكي: من وره هذوله اني راح اصير اول فرار بتاريخ الجيش الامريكي.

*صيغه او سيغه تعبير فارسي متداول يعني زواج المتعه





التعليق والتصويت على الموضوع في الموقع الرئيسي


التعليقات

1 - تعسا لكم انكم لستم سوى شرذمة
Raw3aSweden ( 2010 / 6 / 8 - 20:18 )
احسنت عزيزنا سرمد مقالة كالعادة تجسد واقع حال اللي لازمين زمام العراق للاسف ..والله ما يستاهل عراقنا هذه الشرذمة ...كان الله معك يا عراق..تحياتي وتقديري استاذ سرمد

2 - ألاعيب
أبو الوفا ( 2010 / 6 / 9 - 08:41 )
والله يا أخي سرمد هذه كلها ألاعيب عملاء ايران حيث أن القانون ينص على تولي منصب رئيس الوزراء من القائمة الفائزة في الانتخابات ولو بفارق صوت واحد وليس من قبل الكتلة الاكبر في البرلمان.....وعلى هذا الاساس تم تولي نوري المالكي المنصب سابقا......ما عدا ذلك باطل باطل باطل......تمنياتي لكم والخزي والعار لكل عميل خائن للعراق....

3 - ترجمه
Aghsan ( 2010 / 6 / 9 - 15:04 )
تحياتي سرمد اني يرادلي ترجمه لبعض الكلمات !!!!!!! بس مع هذا الي افتهمته موتني من الضحك
مثل مال الحبوب الزرقاء ودخلي الدجاج بالقفص!!! لو هذا تراكسود ؟ والله عبالي وحمه!!!
الله يخليك النا انشاءالله يا ابو دم خفيف

احتراماتي عزيزي سرمد تعذرني ما اكدر اطول لأنه كاعده اليوم بالبيت ولازم اروح اطبخخخخخخخخخ

4 - شكرا جزيلا
Sarmad ( 2010 / 6 / 9 - 16:45 )
شكرا جزيلا لكل الاخوه المعلقين وللذين مروا هنا. اما الاخت اغصان يمكنك زيارة صفحتي على الفيس بوك ووضع الكلمات التي تريدين معناها وسأجيبك بكل سرور

5 - الاخ العزيز سرمد
يونس حنون ( 2010 / 6 / 10 - 05:50 )

اعتقد انه سيكون بامكانك كتابة 4 او 5 حلقات اخرى تمتعنا بها ومازال هؤلاء المشاخيط بعيدين عن الاتفاق على صيغة تحفظ ماء وجوههم
وتستمر المهزلة

اخر الافلام

.. كلمة أخيرة - صدقي صخر بدأ بالغناء قبل التمثيل.. يا ترى بيحب


.. كلمة أخيرة - صدقي صخر: أول مرة وقفت قدام كاميرا سنة 2002 مع




.. كلمة أخيرة - مسلسل ريفو كان نقلة كبيرة في حياة صدقي صخر.. ال

.. تفاعلكم | الفنان محمد عبده يكشف طبيعة مرضه ورحلته العلاجية




.. تفاعلكم | الحوثي يخطف ويعتقل فنانين شعبيين والتهمة: الغناء!