الحوار المتمدن - موبايل
الموقع الرئيسي


بيان رقم واحد زائد واحد

سرمد علي الجراح

2010 / 7 / 23
كتابات ساخرة


في ازمنة الانقلابات المجيده -وبمناسبة شهر الانقلابات- حين كان الضباط يجتمعون في النادي حول ميز البيره البارده ومواعين المزه والمشويات كان حديثهم ينصب على محورين مهمين الاول اخر اخبار الكاوليه والعاهرات والثاني هو السياسه, ولا فرق بين الموضوعين. لا أظن اني آتي بجديد عندما اقول ان الغالبيه ممن يدخل كلية الضباط هم من ينجح بدرجات كلهه جروخ, يعني كوه جايب خمسين من ميه, ولنا ان نقدر حجم العبقريه التي يتمتعون بها. بالاضافه الى عقدة النقص التي يشعرون بها امام الاذكياء من زملاء الدراسه وخصوصا عندما يرونهم اطباء او مهندسين او حملة شهادات مرموقه, فيكون رد فعلهم قاسيا على كل من يجلبه حظه السئ تحت امرتهم من هؤلاء. لأنهم بزر جكليت ويجب ان يأخذوا دروسا في الرجوله تبدأ بالأعتداء والسب والشتائم وتنتهي بالتعذيب والسجن.
قادني حظي العاثر لزيارة صديق كان على موعد مع عزيمه في عرس فاصطحبني معه لقضاء وقت ظريف كما وعدني. جلسنا على طاوله مع شخصين اخرين قدما نفسيهما على انهما من كبار الضباط السابقين. كالمعتاد بدءوا بالحديث عن مغامراتهم الذكوريه وغرام النساء الاوربيات بفحولتهم, رغم ان واحدهم شويه احلى من سحليه عدهه ابو صفار. من الأمور التي اكتشفتها انهم لايسمعون ابدا, فالضاهر ان حاسة السمع لديهم مبرمجه على الاستقبال من رتبه عسكريه اعلى فقط, اما باقي البشر فهم الذين يستمعون الى الدرر التي تخرج من جميع المخارج. عبثا تحاول تغيير مجرى الحديث او ان تسوّل لك نفسك مقاطعة احدهم وهو يروي احد نكاته التافهه. فأنت موجود لتستحسن مايجودون به عليك فقط. ثم بدأت مرحلة الخوض بالسياسه, هنا تشوف ربك شخالق
الاول: يا اخي الوضع كله خطه امريكيه
صديقي: شلون يعني
الثاني: اني افهمك, يريدون ايران تحتل العراق وهمه يطلعون لأن لازم يبقه العراق محتل
صديقي: ليش لازم يبقى محتل وبعدين ايران وامريكا عداوه
الاول: صدك انته غشيم ياعداوه, بابا هاي اسرار محد يعرفهه (اذا اسرار شلون عرفته), اصلا همه دهن ودبس بس يبينون نفسهم عداوه حتى يبيعون علينه كلاواتهم
صديقي: هسه ما كلتلنه ليش يبقى محتل
اني: منو محتل؟
الاول: انت مبين مطفي (الي الكلام), اسمع واستفاد. يبقى محتل لأن هذا بلد مذكور بالتوراة, هوه اللي راح يدمر اسرائيل
اني: الله واكبر, غير تكول هيج اني عبالي على مود عدنه بطنج هوايه. بس اذا همه يصدكون التوراة معناهه اسرائيل راح تدمر اول وتالي.
الثاني: همه لوتيه مو مثلك (اول مره اعرف السي آي أي مشغلين لوتيه) , شيريدون يسوون, يجيبون ايران تحتل العراق وتبلعه فبعد ماكو بلد اسمه العراق فتبقى اسرائيل.
اني: عجيب شلون لكفتوهه هالخطه. زين والحل شنو
الاول: بس اصبر خلي يطلعون الامريكان, متشوف إلا كم يوم وتسمع اخوانك الضباط يصححون المسيره
اني: وشوكت ندمر اسرائيل
الثاني: اول شئ نصفي البلد من عملاء ايران وامريكا وجزر القمر وبعدين نقضي على الجيب العميل في الشمال ثم نرجع الفرع الى الاصل في الجنوب, بعد ما نأمن الجبهه الداخليه نتجه لتحرير القدس
اني: هذي المقدمات لو الفلم لأن تاهت عليه
الاول: انته معليك بس انتظر بيان رقم واحد
اني: مو انتو اثنين فسووه بيان رقم واحد زائد واحد, نرجع لموضوعنه الاول شصار تالي من صاحبتك عارضة الازياء!!





التعليق والتصويت على الموضوع في الموقع الرئيسي


التعليقات

1 - رحمه على والديك استاذ سرمد شويه ضحكتنه
-اكاديمي مخضرم ( 2010 / 7 / 23 - 12:41 )
في هذا الحر اللاهب والازمه السياسيه يفقد الانسان توازنه ويكون بحاجه
الى شويه ترفيه فشكرا استاذ سرمد هم فائده وهم ترفيه شكرا كثيرا

2 - والله ضحكتني
رنا المنداي ( 2010 / 7 / 23 - 21:37 )
الله يرحم والديك ..... صدك صحكتني .... يااخي هذوله ناسنا وهذا الي يعرفو ......... لاتقطع عنا بالكتابه ....... خليك دائما متواجد ....مع التحيه

3 - تحية لأبو دم خفيف
Aghsan Mostafa ( 2010 / 7 / 23 - 22:01 )
أني : سرمد من وين جتي في بالك جملة سحلية عدها ابوصفار؟
سرمد: مبتسم
اني : ياعارضة ازياء كنتوا تحجون بيها
سرمد: بعده مبستم

يمعود سرمد رد علينا!!! والله من قريت اسم الموضوع كلت بنفسي صايره حرب مرة ثانيه او ثالثه...... صدق ياحرب احنا هسه بيها لأنه تاهت عليه؟؟؟؟؟

جميل جدا ياسرمد.....تحياتي

4 - شكرا لمروركم
سرمد الجراح ( 2010 / 7 / 23 - 22:56 )
الاخ اكاديمي يسرني جدا ان اكون سببا للحظة من الانبساط والضحك ترفع بها عن كاهلك قليلا التعب شكرا لمرورك ورحم الله والديك
الاخت العزيزه رنا شكرا للتعليق يسعدني مرورك واهتمامك ورحم الله والديك
الاخت العزيزه اغصان سالفة السحليه اجت من شفتهم وعارضة الازياء اللي ماتت عليه طلعت بعدين تبيع سمج وعرضهه اكبر من طولهه. فضحه صاحبه بعدين. اما ياحرب احنه بيهه هاي تعذريني اخر حرب اذكرهه صارلهه ثلاثين سنه ماخلصانه

5 - بالصميم
يونس حنون ( 2010 / 7 / 23 - 23:26 )
والله سرمد صار زمان ما ضاحك مثل اليوم
مشكلة هذي النمونات من البشر التي تدعي انها تفهم اكثر من غيرها وان لديها اطلاع على اسرار البنتاغون والموساد انها مبرمحة لغرض اللغوة ، لكن المشكلة الاكبر ان هناك من يصدقهم ....اليس مقتدى الصدر احد اكثر القادة الحاليين اتباعا
الم يصرح ويثقف اتباعه ان امريكا غزت العراق لمنع ظهور المهدي المنتظر
هكذا ببساطة يوهمهم ان جهاز استخبارات جيش المهدي الذي لم يكمل خير مابيهم متوسطة قد اخترق حواسيب البنتاغون وانتزع اسرارها ومع ذلك يصر اكثر من مليون ادمي لديهم رؤوس بها قحوف تحتوي ادمغة على تصديق كل تخريفة ينطق بها قائدهم المطفي
ومن هالمال حمل افيالة

6 - هذه آخر مرة يا سرمد
محمد الرديني ( 2010 / 7 / 24 - 02:09 )
يبدو انك لاتؤمن بالديمقراطية وحاي تدرب حالك على انتحال شخصية المستبد صاحب الرأي الذي لايقهر
والا فما معنى ان تحذف المعلومة الرئيسية من الحوار - مو اني كنت شاهد
تذكر من سألك هذا الضابط ماكتلي شنو صاخبينه بمهدي المنتظر وانت رديت
هو منو هذا المنتظر
رد عليك هذا اللي ينتظرون ظهوره بعد ان خرج في الغيبة الصغرى وباقي الغيبة الكبرى
مو تمام اغصان؟؟

7 - هم حقكم اخوان
سرمد الجراح ( 2010 / 7 / 24 - 10:39 )
اخواني دكتور حنون والاخ الرديني مو سالفة المهدي يكولون بطل ما يظهر لأن الناس صارت بزر جكليت وتدور كهرباء وحصه تموينيه وجوازات سفر وفيز لدول الكفر. فيظهر حتى يوزع مولدات ثري فيز لو يبيع شكر وتمن لو يصير وكيل سفريات لاس فيكاس

8 - ماكو ماكو
Aghsan Mostafa ( 2010 / 7 / 24 - 14:26 )
استاذنا مع الأسف المنتظر لن يظهر لأنني سمعت من عدة مصادر بأن هناك مهندس مدني عراقي!!! يؤكد بأن غزو الأمريكان للعراق هي عملية عسكرية استباقية!!!! لمنع ظهور المنتظر بعد التعرف على هويته من
بعد ان قاموا بتفجير مرقد الأمامين العسكرين في سامراءDNAخلال ال
وبهذا يكونوا قد قضوا عليه قبل ظهوره....يعني اذا كان المهندس في غيبوبة كبرى فلا عتب على الضباط الذين يعيشون الغيبوبه الصغرى
وبهذا اكون قد بلغت الصابرين والمنتظرين ان يشوفولهم واحد ثاني ينتظروه ويتوكلون عليه لأنه ماكو ماكو ماكو ........بححححح

دكتورنا الحنين!!!عتبي عليك كبير ....لازم مادتجيك الأيميل مالتك هالأيام؟ .شنو مادتجيك رسائل من نمونات!!!! بشرية....... حبيتها هوايه

شكرا والله يخليك النا ياسرمد ياجامع الأحباب ومفرق الذئاب

غصونه النمونه

اخر الافلام

.. فقرة غنائية بمناسبة شم النسيم مع الفنانة ياسمين علي | اللقاء

.. بعد تألقه في مسلسلي كامل العدد وفراولة.. لقاء خاص مع الفنان




.. كلمة أخيرة - فقرة غنائية بمناسبة شم النسيم مع الفنانة ياسمي

.. كلمة أخيرة - بعد تألقه في مسلسلي كامل العدد وفراولة.. لقاء




.. كلمة أخيرة - ياسمين علي بتغني من سن 8 سنين.. وباباها كان بيس