الحوار المتمدن - موبايل
الموقع الرئيسي


شعب إي سي دي سي

سرمد علي الجراح

2010 / 8 / 19
كتابات ساخرة


عفيه شعب شكد تحبون الاشاعات وتشيلون غيبة النواب المساكين. اخبار عاريه من الصحه والعافيه تتحدث عن ان اكثر من 300 نائب ونائبه سافروا للسياحه وهربا من الحر. اولا الخبر مبين كذب لأنهم لم يسافروا للسياحه وانما للدياحه وهناك فرق بين الاثنين حسب الزمخشري, وثانيا ليس هربا من الحر وانما طلبا للماء والكلأ, حتى تكدرون تسألون حادي العيس المنتهيه صابونته ومايرضه يتزحلك, ثالثا اريد افتهم انتوا اشتريتوهم للنواب بل كم فلس اللي ياخذوهه رواتب, وماتستحون يوميه تعيروهم بيه, ثم وإذا راتب النائب يعادل راتب عشر نواب بريطانيين غير المخصصات والهدايا ورواتب الحمايه. ليش بريطانيا مثل العراق الغني المليان نفط وما له صاحب؟. وللعلم والاطلاع النائب البريطاني واحد كافر لايدفع خمس ولا زكاة ولا يلبس محابس ولاعنده حمايه لأن مايسوه الطلقه اذا رادوا يقتلوه. اصلا الشغله خساره في خساره لأن لو تدرون واحدهم شكد صرف على الدعايه الانتخابيه كان بجيتوا على حالهم.
شويه ياشعب خافوا الله وانتوا برمضان, تريدون نائب شكده شكبره يعيش مثلكم على الحصه التموينيه لو يكعد هوه ونسوانه بالحر ينتظر الوطنيه؟ يعني تريدوه مايسافر لأن جنابكم بلا كهرباء ولا ماء, ليش انتوا انتخبتوا أديسون على اساس!! لو مايسافر لأن اكو ارهاب ويوميه مقتول كم مواطن؟ ليش يبقه, حتى يدفنهم ؟ بالله هوه نائب لو دفان؟ ثم ان الخطه الامنيه على احسن مايرام كلش زين, ومراكز التطوع ما كدروا الارهابيين يهاجموهه بس سبع مرات فقط لاغير!!
لو تشوفون شكد اكو فوائد تجيكم من سفرهم كان مافتحتوا افواهكم. واولها ان البرلمان والمكاتب الملحقه به لما تعزل يعني ماراح تصرف كهرباء وتزداد حصتكم. وثانيا ماراح يزعجوكم بقطع الطرق عند مرورهم. وثالثا تصير هدنه طائفيه لأن زعماء العصابات ماموجودين. رابعا تتوقف حالات السطو على البنوك والصاغه الى اشعار اخر. وخامسا تخلصون من طلعتهم البهيه والمغص ولعبان النفس المرافق. سادسا بقاء البلد بدون حكومه مده اطول لأن اكيد اللي تجي اتعس من اللي تولي حسب القاعده العراقيه للحكومات.
ما ادري شتريدوهم يسوون هل مساكين, قابل همه عدهم الاسم الاعظم حتى يغيرون احوالكم. خاف صدكتوا ان الجماعه هم السلطه التشريعيه؟. تره كل الحل والربط بيد سته لو سبعه من العتاوي الكبار وممثلي سفارة جمهورية الباسدران. وعند التصويت للموافقه يرفعون الايدي والارجل والافخاذ اذا لزم الامر وكلشي بحسابه. واني متأكد ما راح ينسوكم بالدعاء لأن قلوبهم بيضاء ويطلبون من الله ان يسامحكم ويغفرلكم لسوء ظنكم وظن اللي خلفكم.





التعليق والتصويت على الموضوع في الموقع الرئيسي


التعليقات

1 - حيرت قلبي معاك ياسرمد
ايار العراقي ( 2010 / 8 / 19 - 21:57 )
والله العظيم انت ياسرمد تحير اللي مايتحير يعني نواب وخاطبو جمهورهم بلغة الشارع البسيطة اللي يفهموهه ويفهموهم مو مثل ذاك الرجال على كولة صاحبك يتكلم لغة مو مفهومه كسر بجمع الطرفين متفاهمين وظروف الانتخابات غاية بلروعة والشفافية وتره هاي مال تزوير واستخدام المال السياسي والاستقطاب الطائفي والقومي دعايات مال خسرانين اللي ماعرفو يحجون ويه الجمهور اللي جان ممتلئ يسارية وحماس بس غير صاحبنه كلامه كله حزورات وفوت الفرصة وخله الملاية والسيد والشوفيتي والعطال بطال يصعد للبرلمان اخ منك صاحبته كلهه منك لاكهرباء لاخدمات لاوظايف لاامل لابشرى لاحسنية كعدت تحجي بلمبهم والغير مفهوم وصعدت التاس الكلاوجية لاتدير بال خويه سرمد بلدورة الجاية راح نصعد ربعنه للبرلمان بلكلام البسيط اللي يفهموه الناس واذا اقتضى الامر تجيب وسائل مساعدة للتوضيح مثل قامة سبحة ام المية وواحد وتغير الشعار ونذبح خرفان ع الطريقة الاسلامية الصحيحة ع القبلة بلمليم حتى الشعب يفهمنه ونفهمه ونحل هذا الاشكال اللي خلانه بيه
شكرا لمقالك المعبر

2 - شلون اوصفك
علي مهدي الشمري ( 2010 / 8 / 19 - 22:29 )
الاخ الكاتب المحترم
كلامك ذهب مصفى وبلسم على جراح العراقيين
أن جميع ماذكرته بحق السادة الاشاوس قليل بحقهم,وأن العتاوي الكبار الستة الذين ذكرتهم قد عمدوا الى اذاقة النواب الجدد حلاوة السلطة والمال ,وذلك عندما أفتتحوا جلسة واحدة للبرلمان ليسجلوا حضورهم (للمباشرة باستلام الراتب والامتيازات )
فأن وصفتهم كالبهائم يديحون في أرض الله الواسعة طلبا للكلأ فالبهائم افضل منهم كون العراقيين يستفادون من حليبها ولحومها,وأن وصفتم بالابل وحادي الضعن ما (يعطيهه)فالابل يستفاد منها في الحل والترحال وحمل الاثقال وتحمل العطش والصبرعلى مشاق الحياة الصحراوية,,,,
,. فهل توجد واحدة من صفات البهائم او الابل متوفرة عند نوابنا الجدد حتى توسمهم بها؟؟والله لقد ظلمت الحيوانات بتشبيهك بها هؤلاء النكرات؟؟؟
تقبل تحياتي

3 - والعاقل يفهم
جاسم الزيرجاوي-مهندس استشاري ( 2010 / 8 / 20 - 09:42 )
سرمد الحلو
ترى مو الشعب يشتغل....إي سي دي سي...
النواب والكتل هي اللي تشتغل ...إي سي دي سي
والعاقل يفهم
شكرت لك سرمد

4 - رائع كالعادة
يونس حنون ( 2010 / 8 / 20 - 13:47 )
اخي الكريم سرمد
مقالتك تضحكنا وتبكينا في نفس الوقت ،تضحكنا على هؤلاء الدجالين الذي يسمونهم سلطة تشريعية وهم شلة حرامية وانتهازيين ، لكن المصيبة التي تبكينا هي من الذي انتخبهم ؟ وهل نتوقع ان نختار في يوم من الايام من هم افضل منهم ؟

5 - لا عاب حلكك
كامران عبد الرحمن ( 2010 / 8 / 20 - 17:57 )

دذبهه للدره عاد ! اي مو صارلي دهر دا انتظر فد مقال منك تا اشبع ضحك
اي والله و لا عاب حلكك , فشكله لم يلد ولم يولد ( ابو البرلمان ) لا والنوب صايرلي بزر نستله .. و كله اووووي حارتلي , كبل لا الله ايوفقه ويصير برلماني جان العرج ميطككه
اللهم اجعل بيننا وبينهم جبلا من الصابون , وامطرها ليل نهار .. كي لا يتشلبخ الينا سعدان او جهبهار !ا

والله ياسرمد ضحكتني وآنه موش طوييب
تحياتي

6 - بهارات وفلفل
Aghsan Mostafa ( 2010 / 8 / 21 - 14:18 )
والله انت يارسرمد تغب تغب وبعدين تجي وياك الخير كله وعلى كولتك احنا صدك مانستحي.... لايعجبنا العجب ولا الصيام برجب !!!! زيدنا وبطل بخل وشويه كثر من البهارات والفلفل لأنه الأكل يطلع اطيب وشهي ولذيذ هممممممممممممم
تحياتي سرمد وينعاد عليك صحة وعافية

اخر الافلام

.. كلمة أخيرة - ياسمين علي بتغني من سن 8 سنين.. وباباها كان بيس

.. كلمة أخيرة - المهرجانات مش غناء وكده بنشتم الغناء.. رأي صاد



.. كلمة أخيرة - -على باب الله-.. ياسمين علي ترد بشكل كوميدي عل

.. كلمة أخيرة - شركة معروفة طلبت مني ماتجوزش.. ياسمين علي تكشف



.. كلمة أخيرة - صدقي صخر بدأ بالغناء قبل التمثيل.. يا ترى بيحب