الحوار المتمدن - موبايل
الموقع الرئيسي


المزاولة

ممدوح رزق

2010 / 10 / 25
الادب والفن


( حامد ) صادق .. الصدق الذي يعني أن تتحدث مع الآخرين بما تؤمن به فعلا وتشعر به بقوة .. ( حامد ) يعرف أن العصر هو أجمل أوقات اليوم وأن البلكونة هي أجمل ما يناسب العصر وأن شرب الشاي هو أجمل ما يناسب البلكونة .. ( حامد ) يعرف أنه مسرور الآن مع العصر والبلكونة والشاي .. ( حامد ) يعرف أيضا أن عليه أن ينادي ابنه في تلك اللحظة ...
ـ أقعد يابني
يجلس الولد ...
ـ أنا عايز أسألك سؤال بس عشان خاطري ترد عليا بصراحة
ـ خير يا بابا
ـ إنت بتحبني ؟
ـ معقولة يا بابا تسألني سؤال زي ده .. طبعا بحبك
ـ يعني إنت حاسس إن أنا أب كويس ؟
ـ طبعا يا بابا ربنا يخليك لينا
ـ شوف يا حبيبي لازم تعرف إن كل همي في الدنيا دي إني أشوفك إنت ووالدتك وأخواتك مبسوطين ومرتاحين في حياتكو وإني أطمّن على مستقبلكو من بعدي
ـ متقلش كده يا بابا ربنا يديك الصحة وطولة العمر
ـ اسمعني يابني أنا عايزك دايمًا تراعي ربنا في كل حاجة في دنيتك .. في دراستك .. أسرتك .. صحابك .. شغلك .. زوجتك .. ولادك .. في كل حاجة .. عارف ليه .. لأن طول مانت ماشي بما يرضي الله وما بتعملش حاجة تغضبه هاتلاقيه دايمًا معاك وبيساعدك وينجحك وبيقف جنبك في كل حاجة
ـ طبعا يا بابا ونعم بالله
ـ عارف إيه هي أهم حاجة يابني .. إن نيتك دايمًا تكون سليمة وقلبك صافي وبتعامل الناس خصوصا أقربهم ليك بحب واحترام عشان ربنا يفضل راضي عنك طول حياتك ويحميك دايما ويحفظك من كل شر
ـ عارف والله يا بابا من غير ماحضرتك تقول .. إطمّن
ـ أنا مطمّن ياحبيبي وعارف إنك مابتنساش أبدا إن الله لا يضيع أجر من أحسن عملا .. مش كده ؟
ـ بالظبط يا بابا .. بعد إذن حضرتك
ـ الله أبهى
ينهض الولد وينصرف بينما يبتسم ( حامد ) والسكينة تغطي ملامحه تماما قبل أن يرفع كوب الشاي إلى فمه ويرتشف منه ثم يرفع ابتسامة وجهه متطلعا بنشوة نحو السماء الممتدة .. السماء التي تغطيها السكينة أيضا .

* * *
جزء من رواية " سوبر ماريو "





التعليق والتصويت على الموضوع في الموقع الرئيسي


اخر الافلام

.. فيلم شقو يضيف مليون جنيه لإيراداته ويصل 57 مليونًا


.. أدونيس: الابداع يوحد البشر والقدماء كانوا أكثر حداثة • فرانس



.. صباح العربية | بينها اللغة العربية.. رواتب خيالية لمتقني هذه

.. أغاني اليوم بموسيقى الزمن الجميل.. -صباح العربية- يلتقي فرقة



.. مت فى 10 أيام.. قصة زواج الفنان أحمد عبد الوهاب من ابنة صبحى