الحوار المتمدن - موبايل
الموقع الرئيسي


ضايع

محمد علي محيي الدين
كاتب وباحث

2010 / 11 / 20
الادب والفن


ضايع ولا أكولن ضعت
تايب ولا كولن تبت
ملينه حجي المستحه ..التيه الجمعه من السبت
وضيعنه ذاك الما صدك وعده ولا كال أجذبت
ناحل ولا أكول نحلت
خايب ولا كولن خبت
هالضاع بعيوني الضوه البيه على الوادم سيرت
هالمات بامالي الفرح واللي كصدته ما شفت
خليني بعيون الحزن غركان خليني غركت
ودهديني بأفات الوكت ما جني بسمك غردت
وخلي سوالفنه المضت جذبة عمر
وخلي مكاتيب السلف تنكط حبر
وخلي كواغدنه الصفر
ياكلها دود الكاع ما يبكه سطر
وخليني سالوفه غفت بلسان من سولف وبسمه سولفت
كافر ولا أكول كفرت
خلي التعاليم المضت ..تذكر بأسمك شكتبت
وخلي المناشير شكثر دوم على فكرك وزعت
وخليني ماصول بحلك تعبان خليني تعبت
يا فرحة العريس بأماله شكثر بيك أفرحت
يا ضحكة الفرحان لو هزه الطرب..
عمري الكضيته بس لأغانيك أطربت
........
....................
جاذب لون كلت أتعبت
هذه آنه بسمك غردت
هذه آنه بسمك هلهلت
هذا آنه نسمة صيف طشرني بسواجيك عزيز شما ردت
وأشما كلت
تلكاني ذاك آنه الوفي اللي غزر بعينه الملح
وأشما ردت
تلكاني فحل الموزمه وكلبي جبح
بيك أندهت
بيك أحلمت
وتشايمت
صرت الياليك ضوه ونجوم بيها سيرت
فدوة عمر هذه آن هالك
غنوة فرح بمحبتك
خليني ذاك آنه الزرعته بسجتك
خليني بيرغ ثار يزهي بيمنتك
فدوه آنه الك
وذاك آنه أصير أشما ردت
مثل الطماطه وعلى كل طبخه أرهمت
لو جنت أبيع الناس والدنيه ..وهلي
وكل أخوتي
لأسمك تراني ما بعت
وخلي يطفي شمعته الشامت لون شاف تعبت
مثل الذهب ..تعتك الدنيه..
وآنه وعيونك جديد ومعتكت
وشما تسوي أوياي ..ذاك آنه الوفي
لن الحليبك من زغر سني رضعت
وأبكه آنه ما جن السلف طشاره صار بكل كتر
وأبكه آنه ما جن الفرح تعبان بعيون الزلم رايد صبر
سجه وصفه العاكول غاطيها وتتيها الظهر
وتسألني عنك روحي جا يمته يمر
يمته يمر..بلجن يمر ؟يمته ؟ العصر
يا وسفه هالضاع العمر
يا ربي شنهو الصار متوهم وتحسبني الشمر
****
سفان ..عمري الرايح رايد حوبته
وآلام هاي الناس تبكه بركبته
جا يمته يرتاح الكلب والفرح يمته ربابته
جا يمته ديوان السلف بوجاغه ننصب دلته
ويمته العشيرة الما نست ثار الوكت
يجمعها رجال ويعلك رايته
ويمته أشوفك بيرغ وشوباش أصيح [زفته
جا يمته مو هاي الربع تتباهه شالت صورته
وك يمته...
ملينه الحجي ومزامط البيه زامطت
زنسينه كل ذاك الشعر جن لا حديت وهوست
وك وهوّست ..
وهواس صاير لو شفت مزنه تمر
حضرت شمسيتي وكلت جانه المطر
تالي ظهر
لنهر عيد وممطرت
وأرجع أصبر الروح هالبان المطر
لاجن تمر أسنين وآنه أنطر ولا بيّن مطر
وارجع أكول أتوهمت
وأتباوع المقياس تيهت الصدك من الجذب
تالي المقاييس العقل كلها كسرت





التعليق والتصويت على الموضوع في الموقع الرئيسي


التعليقات

1 - رائعة
باسم محمد ( 2010 / 11 / 20 - 22:23 )
تدخل القلب فتعصره عصرا عنيفا ثم تنساب بهدوء لتخاطب العقل والضمير وتعيد الى الاذهان القيم والمثل العظيمة التي تربى عليها جيل كامل سوف تواصلها او تحاول ان تتواصل معها الاجيال القادمة.
اديبنا الكبير تقبل محبتي واحترامي.

2 - الأخ باسم محمد
محمد علي محيي الدين ( 2010 / 11 / 21 - 06:45 )
تحياتي لك والف شكر على مرورك الكريم والقصيدة تمثل تداعيات لمنعطفات خطيرة جعلتنا نجوب العوالم في مراجعة زادتنا أصرارا على المضي في ذات الطريق

3 - ضيعنه الوكت
عماد الحلي ( 2010 / 11 / 21 - 06:48 )
ماطول ضيعنه الوكت
ومااعرفنه شنهو هالوكت

رايدله من فهم ونكت
ضاعت علينه ومابكت

4 - وين ظامها
حامد كعيد الجبوري ( 2010 / 11 / 21 - 19:21 )
جميلة جدا صديقي العزيز وين جانت مظمومه تمنياتي لك بالابداع والمواكبة

5 - شكرا
محمد علي محيي الدين ( 2010 / 11 / 21 - 19:27 )
الأستاذ الصديق حامد كعيد
شكرا لمرورك وهي من دفاتر الأيام

6 - لا مبخوت ما تضيع
ذياب آل غلآم ( 2010 / 11 / 22 - 13:46 )
صنو الروح.... ماتضيع من كان يحمل الحزب والحب والناس في قلبه حلم ونضال... ماتضيع وهناك انفاسك حزب وليس أشخاص!؟ ما تضيع والوطن يعرف برجاله وأنت بكل ثقة منهم لا بل رآية فيهم...ماتضيع ايها المتصوف بالحب الشيوعي ومن دراويشه للعشق العراقي...لاتعاتب لكونك تحب؟ لا تعاتب لكونك في الصفوف الأولى فيه؟؟ لا تعاتب انه حزب الشعب والناس والحب والعصافير... لكنه شدو منك جميل ...قصيدة كأنها نشيد بنشيج!؟ مهظوم ومظلوم !لكن من نضالك من أجل وطن حر وشعب سعيد فأنت غير مفطوم!! قصيدتك لها مواجع دفينه يا أبا زاهد! تعزف على وتر الجراح يا يعسوب الذكرى والحب المباح... ما تضيع وهناك نفسك الوطن ؟ والغد الجديد! يذهبون ويبقى الحزب عالي يذهبون ويبقى أبو زاهد قمر الليالي وحبيبي في ايام الغربة الخوالي لاتعتب؟ لاتعذليه فأن العذل يولعه!! قد قلت حق لكن لم يسمعه ؟ ومن لايسوس الحكم يخلعه؟؟ بتصرف عن ابن زريق البغدادي ...نشيد سبعيني قصيدك يا صنو الروح تسلم وطاب فوهك وسلم يراعك

7 - رد1
رامي الخالدي ( 2010 / 11 / 22 - 17:25 )

عزيزي ابو زاهد أضع بين يديك قصيدة .. موتة محب .. وهذا ردا على قصيدتك ضايع .. ارجوا نشرها مع ودي
حيدر صبي


ضايع ولاجنك ضعت
وتايه وادري تيهت
وساكت تراني .. وسكتتي صرخه تراها بكل وكت
ناطور الك آنه جنت
وبحبك آنه تمرمرت
ردتك تظل اعله العهد
متكلي جا وين الوعد
محسود أنه وياك .. ما حظي كعد
ويامن كعد
كلها صفت تنهش بلحمي بمستحد
وظليت أدور عل البخت
مظلوم يل مالك بخت
وظليت كاعد عل التخت
تايه ودور صورتك بكل نحت
إنطيتك الماينطه وكتلي بعد
شنطي بعد
وجروحي تنده بلا ضمد
وانت الدوه وانت الضمد
عديت ايام الغرب
وتاليه تيهت العدد
لا يوم لا يومين صار سنين .. الك مالك نشد
كلبك صفه لغيري وعليه تبدلت
لو تنشد التغيير يل مالك وفه

8 - رد2
رامي الخالدي ( 2010 / 11 / 22 - 17:27 )
كلي شجاك اتسودنت
بيمن اوصفك يل بعتني بهل الوكت
حاير أنه واتحيرت
مجنون وبحبك جنت
ليش غدرت
اتريد اذكرك خاف ناسي انت شكلت
مو آني نجمة ليل... وقداح الصباح اتوصفت
وجنت كل الدنيا عندك
وانه كل شربة ميه انت شربت
وانه جنت الهوى الهاب بكل وكت
وتاليه للشمات تتركني وعله الضفه عفت
وأنت بحرت
وأنت إبعدت
وإنت خنت
متأكد آنه أنت خسرت
وترجع الي.. وتكلي آنه بطلت
آنه إندمت
سامحني هل المره وتبت
واللي توقعته حصل واتأكدت
وجابتك حسرت ليل تاليه كلت
اللي تركتك من وراه وتغربت
كام وتركني وحيد ودموعي تكت
واتكلي بيه شورت
وارجوك انسه اللي مضه خادم اصيرن لك عبد
واواعدك آخر وعد
ما راح اعوفك وابتعد
ولو متت كبلي احفر كليبي واصيرلك لحد
وكتن دموعي وياه.. وشهكه آنه شهكت
وبين ايديه اتوسدت
آخره لن آنه متت
آنه متت
آنه متت

9 - العزيز ابا محمد
محمد علي محيي الدين ( 2010 / 11 / 22 - 17:49 )
الأستاذ ذياب آل غلام
لا أدري ماذا أقول فقد وضعت النقاط على الحروف وكشفت الحب الواضح والألم الدفين ولا أدري هل هو قدرنا أن نعاني فيما يتنعم الآخرين على آلامنا لقد بح الصوت وتلجلجت الألسن ولكن لا حياة لمن تنادي عسى أن نرى شمس آذار ساطعة تطهر الأرض مما علق بها من أدران ،محبتي لك وتمنياتي بالتوفيق والعودة لتسهم في بناء الدار فالدار لا يبنيها الا أهلها

اخر الافلام

.. احتجاجات في جامعة ديوك الأميركية ضد الممثل الكوميدي جيري ساي

.. المغرب.. إصدارات باللغة الأمازيغية في معرض الكتاب الدولي بال



.. وفاة المنتج والمخرج العالمي روجر كورمان عن عمر 98 عاما


.. صوته قلب السوشيال ميديا .. عنده 20 حنجرة لفنانين الزمن الجم



.. كواليس العمل مع -يحيى الفخراني- لأول مرة.. الفنانة جمانة مرا