الحوار المتمدن - موبايل
الموقع الرئيسي


الشكوى

حامد كعيد الجبوري

2011 / 1 / 18
الادب والفن


ضاكت يا علي وعمري بمهب الريح
على ساعه العواصف ريح وتطشره
اليحجي يبتلي لو خارجي يسموه
اليسكت ينذبح ويموت بالحسره
خصمي هو نفسه حاكم التحقيق
ألمن نشتكيله ونسكب العبره
مثل يوسف أخوتي والعراق البير
ولا وارد يذب أحباله للبشره
منونه بشمس تجلي سواد الليل
يسيرون أعله نهجك يتبع اثره
بزمانك سيدي هم الوطن ينباع
معروض بمزاد ومرخصه السعره
ما بعتو الحرم والركن واالكعبه
ما بعتوا المدينه وكبة الصخره
بزمانك سيدي هم الوطن مذبوح
مدفون بظلام وضيعوا كبره
بزمانك سيدي ما شكلو أحزاب
أصحاب الخيم والألويه النكره
عدكم برلماني عالشعب حاقد
على جتافه صعد ومجازته ينكره
ناقشتو وثيقة بيع للمحتل
حبيتوا الأيادي بكاعك تجسره
يحمي للكراسي وينهب الخيرات
يضيّع للعراق ويحرس الخضره

فسيفساء عدكم لو شفافيه
مناصبكم توافق لو على الخبره
قسمتوا الوزاره للوقف سني
وشيعيه وزرع ما بينهم جمره
وزعتوا الكراسي بس سياسيين
أصحاب الجناسي السوده والحمره
بثياب السياسي جيوب ما يملك
قاصات بسترته وباب أله وحجره
الرواتب عالشريعه توزعت مولاي
ومن توصل حلكنه نلوج عالكطره
وّيمنها علي يحسبني مدري منين
معارض للحكم لو متبع مطره
سرحتوا المقاتل مثل ما للجيش
منحل ينحسب يتنكر القدره
قنينة الغاز الباكها يرجع
سياسي منفصل والمنصب أشكبره
وهم عدكم ورّث تتقاسمه الأحزاب
شما خلف الطاغي الباكه يدخره
نكطة حيه وطاحت واليصير يصير
ولا مرسل نزل لا غايب أنطره
وهم عدكم مراجع تختلف عالعيد
مرجع يبقه صايم مرجع يفطره
وقف ذري المراجع للسياسيين
ردت مرجع يصرّح موقفه أيجهره
يابه الغوث أغثنه و يا علي أدركنه
يا كهف اليتيم وخيمة الفقره
أقلع باب خيبر ردت من جديد
وخل شعب العراق بزندك يعبره
************************





التعليق والتصويت على الموضوع في الموقع الرئيسي


اخر الافلام

.. أمسيات شعرية - الشاعرة سنية مدوري- مع السيد التوي والشاذلي ف

.. يسعدنى إقامة حفلاتى فى مصر.. كاظم الساهر يتحدث عن العاصمة ال



.. كاظم الساهر: العاصمة الإدارية الجديدة مبهرة ويسعدنى إقامة حف

.. صعوبات واجهت الفنان أيمن عبد السلام في تجسيد أدواره




.. الفنان أيمن عبد السلام يتحدث لصباح العربية عن فن الدوبلاج