الحوار المتمدن - موبايل
الموقع الرئيسي


انا بردان وغضبان وزعلان على الامريكان

نوري جاسم المياحي

2011 / 2 / 6
كتابات ساخرة


العراقيين اليوم قسمين ..قسم النخبة اللي يشمل الرئاسات والوزراء والنواب وحبال المضيف مالتهم .. وذوله اسميهم المحظوظين وكلشي عدهم .. ما محتاجين شي ... والقسم الثاني من العراقيين هم الكتلهم الهبري واللي يسموهم في قاموس السياسة الفقراء والكادحين وذوله يشكلون القسم الاعظم من شعب العراق .. وذوله المساكين الدنيا زعلانه عليهم ..واني واحد من هذوله اللي الدنيا زعلانه عليهم ..
اليوم الدنيا زمهرير و البرد يوصل للعظم .. وماكو عضلة بالجسم الا وتركص هجع ... والمصيبة احنا ببيتنا خلصنا النفط الابيض اللي جمعناه شوية شوية من الصيف واخر حصة استلمناها شهر تشرين الثاني الماضي ...وحاولت الحجية تقتصد بصرف النفط .. فجانت تشعل صوبة وحدة بدل اربع صوبات اللي نحتاجها لان عائلتي جبيرة عددها عشرين نفر .. وبالرغم من الحرص على صرف النفط .. لعنة الله عليه وعلى القائمين على انتاجه وفي مقدمتهم وزير النفط السابق واللاحق وعلى موزعيه واللي طبع الطاقات الكوبونية.. فاطفالنا ترتجف من شدة البرد ..
عاد ولدي الكبيروهو مهندس واب لطفل رضيع من الدائرة .. تعبان .. نكظان .. زهكان .. من زحمة المرور والازدحامات في نقاط التفتيش .. فعرضنا عليه معانتنا من البرد .. وعدم وجود النفط الابيض للتدفئة .. وناشدناه ولاسيما االحجية ام حيدر ليبذل المستحيل لتدبير تنكة نفط لتجنب الموجة الزمهريرية... ولحين تنزل رحمة الله وتحمة الدنيا .. فتأفف ابني المسكين وتململ متمردا على هذا الوضع الحقير .. لان القضاء الذي نسكن فيه لايتوفر فيه النفط كبقية الخدمات الضرورية .. لان اهاليه من المغضوب عليهم .. امريكيا واقليميا وايرانيا .. وحتى حكوميا .. فهو مهمل بشكل يثير الاعجاب والفرحة في قلوب الحاقدين ..
وبعد ان انتهى من التململ والضوجة والتأفف .. قال لازم انزل للمنصور يبعد 25 كيلومتر عن بيتنا ليشتري تنكة نفط ابيض .. فذهب متوكلا على الله بعد ان اخرجناه من قلعة ياسين ...وتلاحقه دعواتنا بالحفظ والسلامة والامان وبقراءة اية الكرسي والمعذوتين ... عاد بعد ثلاث ساعات .. جالبا تنكة النفط التي تلقتها الحجية وضيعتها بلمح البصر في الصوبات الميتة من العطش للنفط الابيض ..
عندها سألت ولدي بكم اشتريت التنكة ؟؟؟..اجابني .. بعد نفس حار مرير وطويل .. يابه اشتريته ب 16000 الف دينار .. هاي النفطات يابه تكفينا يوم واحد .. فصعدت عندي الكابة .. ولا اكتمكم سرا .. شتمت الزمن والحكومة وصدام والامريكان .. العرب والمسلمين .. وزارة النفط والحرامية في البنزينخانات .. ولم ابقي احدا الا نقمت عليه وشتمته .. لانني رجل مسن ولا اتحمل البرد ولا املك غير السب والشتيمة على الطريقة البغدادية القديمة ..
فياناس هل تصدقون ان النفط في العراق الذي يعتبرمستنقع النفط توزعه حكومة ( الدعاة والروزخونية ) بالكوبونات .. خضنا الحرب مع ايران ثماني سنوات.. وبعدها غزو الكويت .. وحرب الخليج الثانية ..والعدوان الثلاثيني الكارثي والتخريبي ....وحصار اجرامي لمدة 13 سنة ... لم نشعر بنقص البنزين او النفط او الكاز اويل .. و أخونا المالكي الذي اعلن نيته عدم الاستمرار في حكم العراق لخمسة سنوات ثالثة .. وتخفيظ راتبه الذي يبلغ 400 مليون دينار كما يشاع الى 200 مليون دينار .. وانا اعلق على ذلك .. اني ادري انت تكدر تنصب بانزينخانة نفط بباب بيتكم .. وراتبك هذا الضخم تكدر تشتري منه تانكر نفط ... هله هله بينا .. بضعفاء هذا الشعب المسكين ... ابتلينا لو شنو ذنبنا يا اخونا وسيدنا وزعيمنا الاوحد ؟؟؟ كوبونات للخبز وللنفط والزيت والتمن .. شنو احنا عايشين بالحرب العالمية الثانية من جانوا يوزعون الشكر الاسمر والجاي بالكوبونات واكيد انت ما ملحك عليهه ؟؟؟.. 8 سنوات وانتم تقطرون علينا بالقطارة .. الرحمة .. الرحمة بالعراقيين وكفاية ذل ..
هسه انتو ا عرفتوا ليش اني غضبان ... اما ليش زعلان على الامريكان ؟؟ فهم من ورطونا بناس حرامية لايخافون الله ولاعباده .. فهل راح يجرون ايديهم عن جلاوزتهم مثل ما سوههه وي عميلهم اللامبارك حسني وزبانيته ؟؟؟ يشاع ان ثروة مبارك وعائلته تتراوح 40 - 70 مليار دولار ...حسرة ستبقى بكلبي اذا انكشفت ثروة الزلم اللي يحكمون العراق من 8 سنين جاع فيها شعبنا المظلوم .. وطاح حظه يا ظلام ...
يا امريكان وين الديمقراطية والمساواة وحقوق الانسان التي وعدتونا بيهه .. لوبس مصالحكم .. وثروة نفطنا لفطتوهه ؟؟؟
اللهم ارحم وانقذ العراق واهله اينما حلوا او ارتحلوا ....وشوية نفط





التعليق والتصويت على الموضوع في الموقع الرئيسي


التعليقات

1 - وبأي آلاء ربكما تكذبان
سالم سلمان ( 2011 / 2 / 6 - 19:54 )
عنوان المقال، انا بردان وغضبان وزعلان على الامريكان، كان لازم تضيف: وبأي آلاء ربكما تكذبان، والسلام على من اتبع الرحمان
التوقيع: واحد روحه زهكان، عايش في باكستان، جيران أفغانستان وبعيد عن إيران، وعاصمتها طهران

2 - شكرا يا سالم
نوري جاسم المياحي ( 2011 / 2 / 6 - 20:41 )
شكرا يا سالم السلمان لثنبيهي على النسيان
فانا بردان وتعبان ...فنسينت باي الاء ربكما تكذبان
فلك مني تحية وتقدير وشكران

3 - يااخوان
سعد محمد البياتي ( 2011 / 2 / 7 - 16:17 )
العجله من الشيطان فبأي..يوم اويومان شهر شهران سنه سنتان كرن حشا السامع كرون لازم تتفق القائمتان ويتأسس مجلس السياسات الأسفنجيه المتفق عليه قبل شهران في فلة مسع....د البر.....ن ويتم تسمية القبطان وسيلقي خطابه الرنان
واللهيييييييي هيييه اني من الشعب خجلان وحسب تعليمات الساده الامريكان اول عمل وقرار اصدره منع تداول الفتيله والمحكان..... حينها يصفق ويهتف اعضاء
البرطمان (عفيه عل قبل بينه اوعاف لبنان/ شو يعني الشعب بالشته بردان/ باجر
صيف ويبرده هوه الذبان)استاذي الفاضل ابقه بردان احسن اجرك على صاحب ال
مع اعتذاري حبيت اضحكك وانها شر البليه ودمت

اخر الافلام

.. فيلم ولاد رزق 3 يحقق أعلى إيرادات في تاريخ السينما المصرية


.. مصدر مطلع لإكسترا نيوز: محمد جبران وزيرا للعمل وأحمد هنو وزي



.. حمزة نمرة: أعشق الموسيقى الأمازيغية ومتشوق للمشاركة بمهرجان


.. بعد حفل راغب علامة، الرئيس التونسي ينتقد مستوى المهرجانات ال



.. الفنانة ميريام فارس تدخل عالم اللعبة الالكترونية الاشهر PUBG