الحوار المتمدن - موبايل
الموقع الرئيسي


المعلم حسني وصبيان السياسه

سرمد علي الجراح

2011 / 2 / 10
كتابات ساخرة


تناقلت الاخبار ان ثروة عائلة المأسوف على عرشه المعلم حسني تبلغ حوالي سبعين مليار دولار, يعني سبعين الف مليون دولار وليس جنيه او تومان او ربيه, لا والمصيبه مصر بلد فقير الموارد وليس نفطي, يعني جمع من الحفاي سبعين مليار!!, لعد لو حاكم امريكا شكد جمع؟.
وبما اني ضعيف في لغة الارقام, لم استطع ان اتخيل حجم هكذا مبلغ, ناهيك عن ماذا تستطيع ان تشتري به وهل هنالك في الحياة شئ تحتاجه لاتستطيع شراءه إلا وانت حاط سبعين مليار بالجواريب - من انهجم بيت هيج جواريب-.
عدا مسألة ماذا تشتري وكيف تنفق هكذا اموال, وسوس الشيطان في رأسي فوجدتني اسأل: كيف يستطيع انسان ان يجمع هكذا ثروه ولماذا؟
نفس هذا السؤال كان محور حديث ام جلاب الدلاله وزوجها عنفوص الريسزجي*. الذي اصبح قيادي في احد الاحزاب الحاكمه في العراك العزيم.
بعد ان اصبح بقدرة قادر الدكتورعنان الكوفي- نسبة الى الكوفه وليس القهوه او مجلس الامن-!!.
أم جلاب: ولك تظل اثول دشوف وتعلم يكولون حسني جمع سبعين مليار من بلد مابيه غير الرمل, لو اني منكم ادز عليه واسويه رئيس هنا, بلكي تتعلمون منه, صارلك سبع سنين وما جمعت غير بيتين هنا وعماره بعمان وعمارتين بسوريه وشقه بدبي وشوية خرده ضاميهن بالكونيه.
اكول هنه شكثر سبعين مليار؟
عنفوص: شمدريني, كولي الحمد لله والشكر شتريدين بعد, هيه خوما فرهود. يمعوده قابل اني وحدي, شو بس احصل كم فلس يطلعولي ميت كلب ابن كلب, تكول يشمون الفلوس وهمه بالبنج. كلمن يكول حصتي عبالك ورث مال الخلفهم. وكلها بجفه والموامنه بجفه. اويلي اذا ماتنطيه, اتصير انكس من شارب دم الحسين.
ام جلاب: ولك انته مو راحه ولا ثقه, اخاف تضم الفلوس وتريد تتزوج, تره اني كلشي ادري, اعرف شغّلت رازقيه الخرسه مترجمه بالوزاره, وكلت ميخالف خلي يتونس هيه بقت عليه, شو رازقيه مسويتها سبيل على روح خالتها الماتت بحسرة الحلال.
عنفوص: لا وروح ابوج, على ذكر ابوج شلون جاكي** الله يرحمه جان. كنت ما العب الحصان اليركبه لو يصير البراق. كان المرحوم يبيع اكبر حلّه*** بربع عرق. مره حلفلي بجف العباس راح يغلب, واجه وره آخر كديش. اخخخ لو لاكفه ذاك اليوم.
ولج يازواج, مره صرت قشمر خوما يوميه.
ام جلاب: دروح شوف جاره, تره باجر تنلاص مثل مصر ونطلع ولا عانه, كم مره كتلك خليني اصير بالبرلمان
عنفوص: اللي راح يخبلني, شتريد هاي الناس وشنو هالحسد ما أدري. شنسوي اذا ننطي المشروع للمقاول ياخذ الفلوس ويشرد, وماتقدر تحجي وياه لأن حضرته ابن البطه البيضه. حتى حصتنا بالقوه يالّه ينطيها.
لا ويوميه طالعتلي دربونه جديده, هسه الموده لجنة النزاهه, ما ادري هذوله محروك ذيلهم على شنو, صايرين شرفاء براسي. ويوميه تحقيق, عبالك حايط نصيص.
لا وفوكاها الجرايد والقنوات الفضائيه
همزين راح (ضخامة) رئيس الوزراء يسد وسائل الاعلام المعاديه للحوزه في قم. وبلكي يقنع ويمنع الانترنت والدش لأن كلها فساد للشباب.
لو عليّه كان اسوي السنه كلها عاشور, الحسين مات عطشان وغريب واحنه ندك ونركص طول السنه. وحضرة الادباء يريدون نادي وطك اصبعتين للصبح.
ام جلاب: اكول صدك رئيس الوزراء تبرع بنص راتبه, وماراح يترشح بالانتخابات الجايه؟
عنفوص: اي لأن يمكن ما ناوي يسوي انتخابات بعد!!, يقول بس صرف فلوس والناس تنتخب نفس الهوش, فعليمن هالتعب والتأخير,
انسان مخلص يخاف على فلوس الوطن لا تتبذر

* الريسزجي: نسبة الى ريسز اي سباق الخيل
**جاكي: فارس
***حلّه: شوط السباق





التعليق والتصويت على الموضوع في الموقع الرئيسي


التعليقات

1 - ريسزجيه
عباس فاضل ( 2011 / 2 / 10 - 13:04 )
جا خوي شبيهم الريسزجيه؟ اشو السايس المطرود من كلية الشرطة لاسباب اخلاقية صار وزير مفوض وعلى اعنادك الكصاب سفير والمخضرجي وزير ولا واذا ما تريد الروضخوني همين وزير جا وشبيه اللي يبيع سبح ؟ بس اكلك تدري هسه احسن شغلة شنهي ؟ همين تضمن الدنيه والاخرة .... تمشّي مواكب لكربلا ! ماكو بعدك بنص الكريق ترجع تسوي موكب اللاخ وتقبض من الاحزاب ومن الحكومة وهمين من ايران! ها شتكول خوي نشترك نسوي مواكب؟

2 - يمقراطية ما ننطيه
علي الشمري ( 2011 / 2 / 10 - 20:11 )
الاخ الكريم سرمد تالجراح المحترم,
الجماعه صارلهم ثمان سنوات وسجلوا ارقام قياسية في موسوعة غينيس,,فشراح يسجلون لو بقوا ثلاثين سنه مثل أستاذ حسني لو أربعين سنة مثل أمبراطور أفريقيا القذافي,,
خويه مسالة أنتخابات وصرف المليارات والارهاق البدني والذهبي نحن في غنى عنها ,أحنه عدنه ديمقراطية وما ننطيه ,ودليل صدقنا ما يقارب العام على الانخابات وقادتنا العظام في صراع لاهب وسباق مع الزمن لادخار المزيد من ,خيرات الشعب وحرمانه من قوته,أما مسألة غلق القنوات المعادية لحوزة قم فهذا قرار متخذ من قبل حبيبي عند زيارته الاخيرة للعراق,حيث أبدى سماحته ملاحظاته القيمة ووضع الخطوط العريضة لسياسة البلد المستقبلية وأقفل راجعا.
تقبل تحياتي

3 - الاخ عباس كريم
سرمد الجراح ( 2011 / 2 / 11 - 07:11 )
يسمون اللي يودي للحج حملدار. احنه نسمي شركتنه كرلدار. بس الجماعه تحب تمشي فأحسن شئ نحط وياهم مطايه -حشا السامعين- واليتعب يركب على اخوه
شكرا لمرورك

4 - الاخ علي الشمري
سرمد الجراح ( 2011 / 2 / 11 - 07:27 )
كفّيت ووفيت. البلد اللي فيه زعماء من نوعية حبيبي اذا صح التعبير, يحتاج الى دكتاتوريه تقمع هكذا ديمقراطيه تجلب للسلطه سقط المتاع.
المفروض ان تخرج مضاهرات في العراق تنادي بطلب الوصايه الدوليه على البلد لأننا اثبتنا خلال حكم وطني دام ستين سنه بأننا غير مؤهلين لحكم انفسنا وقاصرين عن ادراك مصالحنا
شكرا لمرورك الكريم

5 - عذرا اخ عباس
سرمد الجراح ( 2011 / 2 / 11 - 07:31 )
اعتذاري اخ عباس للخطأ الغير مقصود في اسمك

6 - أغفلت
أبو مصطفى ( 2011 / 2 / 12 - 08:35 )
لقد أغفلت ذكر معنى الكديش.. حيث انه ليس بحصان ولا بغل ويترائى للناظرين كأنه حصان وكان يستعمل لجر عربات الزبالة فقط...للتوضيح...سلمت وسلم قلمك....أيها العزيز

7 - عاشت ايدك ابو مصطفى
سرمد الجراح ( 2011 / 2 / 12 - 10:41 )
شكرا للتوضيح الذي قدمته, اود ان اقول ان تعليقات الاخوان تصبح جزءا مهما من المقاله لانها امتداد لها. فبالاضافه الى طرافتها وظرفها فأن المعلومات التي تتفضلون بها تساهم في اثراء الموضوع
شكرا لمرورك الكريم

8 - دعاء الوالدة على الحرامية
يونس حنون ( 2011 / 2 / 12 - 23:00 )
الحجية ام يونس تكول : ان شالله يصرفوها عالدكاترة بجاه الحسين
بس اريد اشوف هذا الدكتور اللي رح يصرفون عنده مليارات هوه وين حيصرفها

9 - عيوني دكتور يونس
سرمد الجراح ( 2011 / 2 / 13 - 00:05 )
احسن دعاء للوالده لأن بي فايده من الصوبين اولا الوجع يكتلهم والفلوس اللي جمعوها تروح بلا ما يتمتعون بيها. بس كولتك وين توديهن هيج فلوس اولا وثانيا هذا غير مرض اللي ينصرف عليه مليارات!! لازم اسهال مايوكف لو تبني على المخرج سد دربندي خان
تحياتيلك واحترامي للسيده الوالده

اخر الافلام

.. عوام في بحر الكلام - د. أحمد رامي حفيد الشاعر أحمد راي يتحدث

.. عوام في بحر الكلام - الشاعر جمال بخيت يوضح محطة أم كلثوم وأح



.. عوام في بحر الكلام - إلهام أحمد رامي: أم كلثوم غنت في فرح با

.. عوام في بحر الكلام | الشاعر جمال بخيت - الإثنين 6 مايو 2024




.. حكايتي على العربية | ألمانية تعزف العود وتغني لأم كلثوم وفير