الحوار المتمدن - موبايل
الموقع الرئيسي


اربعين مليار وكيلو باذنجان

سرمد علي الجراح

2011 / 2 / 24
كتابات ساخرة


رئيس البرلمان اسامه النجيفي يقول مضيعين اربعين مليار دولار!!. اي والله اربعين مليار. يمعوّد مو انته مصلاوي والمصلاوي اذا ضاع منه دينار يعلن الحداد شهرين.!!
يمكن الحكومه كانت صاعده باص وانضربت جيب ؟. فاذا اكو واحد شاف نشال شايل اربعين مليار يبلّغ اقرب حسينيه, حتى نطلع كلنه نلطم ونضرب زنجيل وقامه على هل المصيبه السوده.
لو يمكن استثمرت الحكومه الاموال في البورصه بشرائها صفقة بيتنجان, ثم هبط سعره بعد ان زادت الصين من انتاجه وادخلت للاسواق البيتنجان المقلي وراثيا. فراحت الاربعين والبيتنجان معها.
بدلا من ان نطلع مضاهرات ضد الفساد نطلع موكب عزاء على حظنه الاغبر وقسمتنه الطايح حظها.
كم مره كلنالكم ياحكومه من تصعدون الباص خلو اديكم على جيوبكم. وكم مره نصحناكم, البيتنجان ماينفع استثمروا في الشعير لكثرة المطايا في عالمنا.
هاي اللي ردتوها, اكو واحد يضيّع الف مدرسه وخمسين مستشفى وعشر محطات توليد كهرباء وعشرين مجمع سكني تكفي لأسكان مليون لطّام. واربع حدائق حيوان نسكنها بدل مدن التنك. والاف الكيلومترات من الطرق وعشرات الجسور.
هذه ليست مصيبه انها كارثه بكل المقاييس, يمكن يا أخوان اني بطران ومتأثر بهذوله الكفره الاجانب اللي بلا دين ومايلطمون على ابا عبد الله, بس ياويله وسواد ليله السياسي اللي يضيع فلوس الشعب. مره وزيره هولنديه لكفها صحفي, مفوله بانزين لسيارتها الخاصه ومقدمه الوصل للحسابات, ما اريد احجيلكم شنو الرزاله اللي اكلتها الى ان استقالت, والمسكينه تحلف انها استخدمت سيارتها بعمل رسمي!! يكولولها العمل الرسمي يمكن يحتاج ربع تفويله الباقي وين صار؟؟
اني اريد اسألكم بلكي واحد مطفّي مثلي يكلّي كم ربع زحلاوي نشتري بالاربعين مليار حتى نظل سكاره العمر كلّه ومانشوف ولانسمع واحد يكول ضيّعنا اربعين مليار ومايشنق نفسه!!.





التعليق والتصويت على الموضوع في الموقع الرئيسي


التعليقات

1 - لاتخبصونه
عباس فاضل ( 2011 / 2 / 24 - 14:50 )
يابه شدعوه خبصتوهه؟ هي كلهه 40 مليار وفد 10 مليارات مال فرق سعر بيع النفط من صعد سعره وهم يمكن 20 لو 30 واكثر شي 40 مليار لخه مال الحصه هاي ثمن سنين ! ادري لعد همه الويلاد جانو متعذبين بالغربة سنين واحنه متنعمين بايام الحصار بالعراق تروح بلاش! هاي الشغله ذكرتني بحجايه بالجنوب ايام زمان : اكو ولد اجه لامه يبجي كلتله ولك شبيك؟ كلهه الولد يكلولي امك ام الرياجيل! اح ! ولك انه ام الرياجيل؟ ولك هو كلهه عويد واخو عويد والنوب ثنين بعدهم وابوك الله يرحمه وهالجذعه لمكابلتني والنوب يصيحولي ام الرياجيل؟

2 - الاخ عباس فاضل
سرمد الجراح ( 2011 / 2 / 24 - 17:04 )
والله حقك ياعزيزي احنا ناس حسودين وما نستحي ابد. المفروض نقول ولا يهمج ياحكومه. فدوه الكم, وكافي يوميه نفرح بشوفتكم. اصلا واحد يصبح بوجوهكم وجهركم تسوه مليارات الدنيا كلها
شكرا لمرورك وتعليقك

3 - خرجية
حمورابي سعيد ( 2011 / 2 / 24 - 18:25 )
عمي سرمد...تره هاي الاربعين مليار دولار ما ضاعت ,لكن الويلاد اشتروا بيها مصاصات وكعك وابيض وبيض وحمص وشلغم درمان الصدر والاهل ما يدرون بهل خرجية .تحياتي

4 - حمورابي العزيز
سرمد الجراح ( 2011 / 2 / 24 - 18:55 )
الله يبشرك بالخير, ما كنت ادري راحن عيديه للويلاد, بس اخاف يريدون يركبون مراجيح و ديلاب الهوا وما ضل عدهم خرده. تره الله وكيلك بقينه بطرك الفانيلات, وشلون ما اشوف اخوتنه بلحكومه ناوين يخلونه ربي كما خلقتني
تحياتي وشكرا لمرورك الكريم

5 - وحك شلتاغ لم تسرق
علي الشمري ( 2011 / 2 / 24 - 19:28 )
الاخ الغالي سرمد الجراح المحترم
أن الاربعين مليار لم تسرق ,فالاخوة الاسلاميين كلهم من أصحاب الجباه السوداء يستحرمون ان يمدوا أيديهم على مال الفقراء,لكن القصة وما بيها أن نفس العفريت من الجن قام بنقلها الى الامام المنتظر تمهيدا لقرب أعلان قيام دولته,كما فعلها من قبل بنقل بلقيس ملكة سبأ مع عرشها الى سليمان,هذا أحتمال ,والاحتمال الثاني هذا المبلغ قد تم أيداعه للفقراء المحرومين ذخرا للدار الاخرة,
أخي العزيز ,كلي ما سمعت بأخر تصريح لمحافظ البصرة شلتاغ ,(عاريات فرنسا أشرف من العراقيين )لمجرد قيام مجموعة من وجهاء البصرة بالمطالبة بحقوقهم المشروعة,وحتى ما كلوله انتم بايكين فلوسنه,,عمي خليه سكته خاف نقول نباكت الاربعين مليار دولار ,ويتهم وزير المالية العراقيين بتهمة اكبر من تهمة شلتاغ ,فما بين شلتاغ وصولاغ ضاعت حقوق العراقيين,
تقبل تحياتي

6 - اخي الكريم علي الشمري
سرمد الجراح ( 2011 / 2 / 24 - 20:52 )
هاي نظريه فاتتني ابو حسين, جن النبي سليمان. همزين تفضلت بطرح هكذا احتمال, لأن هناك الكثير من ضعاف النفوس ومنهم انا, قد بدءنا نشك في ذمة الحكومه. شفت شكد ظالميهم
اما معركة شلتاغ واهل العمايم لهذه الواقعه, كانت من الاحداث التاريخيه وفديو المعركه الموجود على الانترنت يعد من النفائس
تحياتي وشكرا لمرورك الكريم

7 - علي و اربعين م م م م مليار م م م م مـــــاذا
عبدالله خوشناو ( 2011 / 6 / 5 - 00:06 )
علي و اربعين م م م م مليار م م م م مـــــاذا؟

انا اذا سَرقتٌ اقصد ان ضَيعت من اي شعب اربعين الف او اربعين مليون دولار
لا لا بل هو اربعين مليار دولار يا جماعة !! و هم ساكتين و راضخين للامر و مستسلمين للاقدار نادبين حظهم العاثر فقط و لا يفعلون شيئا ضدي
فاول ما افعل بالمال ساتبرع بمليار دولار من اجمالي المبلغ المسروق اقصد الضائع لكي اشتري شعير للمطايا و الحمير من هذا الشعب و اتمتع انا و احفاد احفادي بباقي المبلغ من هذه الكميه الهائله من المال
و كلما رفعت الكأس ساشرب نخب الحمير المطايا في حظيرة هذا البلد الامين
الا ان يتركوا النهيق و يتعلموا النطق و مطالبه حقوقهم المسلوبه من علي بابا و حراميه
اربعين مليار دولار فقط لا غيرها
عبداللـــــه خـوشـــناو - استراليا

8 - يقتدون أثار من هم في المهنة أقدم
عبدالله عبدالغفار ( 2012 / 1 / 11 - 01:56 )
أكيد تعلموا الدروس السرقة من المطايا زعماء العشائر الكوردية الذين يسرقون شعوبهم و هم نائمون منذ ١٩٩١ لا ينطقون بكلمة راضين مشكورين كحظاير المطايا عندما تمتليء بطونهم ينامون

اخر الافلام

.. كلمة أخيرة - ياسمين علي بتغني من سن 8 سنين.. وباباها كان بيس

.. كلمة أخيرة - المهرجانات مش غناء وكده بنشتم الغناء.. رأي صاد



.. كلمة أخيرة - -على باب الله-.. ياسمين علي ترد بشكل كوميدي عل

.. كلمة أخيرة - شركة معروفة طلبت مني ماتجوزش.. ياسمين علي تكشف



.. كلمة أخيرة - صدقي صخر بدأ بالغناء قبل التمثيل.. يا ترى بيحب