الحوار المتمدن - موبايل
الموقع الرئيسي


الاربعين مليار وجدتها وجدتها

سرمد علي الجراح

2011 / 3 / 23
كتابات ساخرة


- إن كان ماعندك سند, اقبض فلوسك من دبش
لقد بشرتنا الحكومه بأنها وجدت الاربعين مليار!!
اوكفوا لاتفرحون وتدكون وتركصون. افتهموا الفلم اول.
اللي لكوه هوه كشف حسابات -غير كامل- يحتوي على قسم من المبالغ التي تم سحبها من صندوق تنمية العمايم.
لكن وين راحت وشلون انصرفت وشنو اشتروا بيها؟ الاجوبه الكامله تبقى من الاسرار التي دفنت مع اجدادنا, ولن تظهر الى يوم يبعثون.
المهم صار عدنه سند, وكما قال ابو المثل, إن كان ماعندك سند, اقبض فلوسك من دبش. مع هذا المقال اضع اللنك ) الاول( الذي فيه كشف الحساب بالانكليزي, وهناك على نفس الموقع ) اللنك الثاني( عدة كشوفات بالعربي ايضا. وخلف الله على هذه المؤسسه اللي نشرته.
نصيحتي للعراقيين ان يطبعوا هذا السند المهم, وينكعوه ويشربون ميّه, كعلاج للقرحه التي ستصيبنا من المغثه والقهر.
لقد قمنا ببعض التحريات الصغيره عبر الانترنت لنعرف مصير صرّه الاربعين مليار والطريقه التي لغف وشلتغ وخمط بها اولوا امرنا هذه الغنيمه, فوجدنا من الاهوال مايشيب لها الولدان, وتتحدث به الركبان, ياحكومة جيري ويا توم البرلمان.

-ايفاد موظفين ) إن المبذرين كانوا اخوان البعثيين(
انطيكم مثال على اوجه الصرف المهمه التي ذهبت بالاربعين مليار بوله بشط, تجدون في اللنك الثالث خبرا لايصدقه حتى القذافي.
كلفة ايفاد موظفين واعضاء مجالس محافظات ونواب في سنه واحده بلغت مليار دولار!!
وطبعا ما دازّين مهندس او طبيب بدوره تدريبيه حتى يستفاد ويفيد البلد.
شوفوا الفلم :مخصصات ايفاد لعشر موظفين لمدة خمسه واربعين يوم الى اوربا بلغت ثلاثة ملايين دولار!! حتى ما ادوخكم يعني 6666 دولار باليوم الواحد للشخص الواحد!!
هم قبلنه, بس شتتصورون راحوا يسوون بأوربا خمسه واربعين يوم؟
فنّه اليحزر!! يدرسون؟ لا. يستوردون معدات لحل ازمة الكهرباء؟ لع. يستوردون جاجيك ومايونيز للحصه التموينيه؟ هم لا. يجيبون ابقار هولنديه حتى اهل الكوت يشربون حليبها بدل ماي المجاري؟ لع لع. يتناقشون مع شركات اوربيه لانشاء مجمعات سكنيه؟ لا لا ولالا. يحضرون دورات تدريبيه؟ دا أكلكم لا. يبيعون حب جكاير علج بمهرجان كان السينمائي؟ نو مسيو.
تحضروا للمفاجأه, راحوا يسوون معرض صور!!! محد يصدك بس هاي الحقيقه. نخسر ثلاثه ملايين دولار حتى يجي فد ميتين أجنبي يشوفون صور. لك صدك تحجون؟ شنو صور, زين شافوا الصور وبعدين؟ شراح نستفاد؟؟ يمعودين اكو اختراع اسمه الانترنت وتكدرون تحطون صور شكد ماتريدون بلاش. خلي واحد يطلع يفهمنه شنو القصه, لو يمكن ما يطلعون لأن مبعوثين ايفاد جديد بست ملايين دولار يسوون معرض بردات.
اني جدا مقهور عليهم هالموظفين المساكين, دازيه يوميه ايفاد وبعيد عن مرته وجهاله, وجماله الدائره ضلت فارغه لأن العشره المبشره كلها طالعه شايله الصور وتفتر بأوربا. بس اجرهم على ابا عبد الله على هل تضحيات اللي جاي يقدموها.
شتكولون نبجي لو نضحك؟ اكول خلي اول مره نضحك وبعدين ناخذ داس بكي ولطم.
والله اني ما مغثوث من هل سياسيين, لأن واحدهم مبين حي على الصلاة هتلي. مغثوث من اللي راح انتخبهم مره ثانيه

وثيقه الاربعين مليار تنكعوها وتشربون مايها:
http://www.iamb.info/auditrep/kpmgreceipts010109_123109.pdf
الموقع الذي نشر الوثيقه (المجلس الدولي للرقابه والمشوره- العراق)
http://www.iamb.info/
موقع مركز العراق للدراسات وفيه خبر اعتراض بعض الكتل على الايفادات
http://www.markazaliraq.net/?state=news&viewId=6464





التعليق والتصويت على الموضوع في الموقع الرئيسي


التعليقات

1 - الكتابة الساخرة من اصعب انواع الكتابات
طلال عبدالله الخوري ( 2011 / 3 / 23 - 13:09 )
مقالة رائعة مكتوبة بلغة سهلة شعبية تدخل الى القلوب
الكتابة الساخرة من اصعب انواع الكتابات,
قد يكتب الباحثون مقالات عن الفساد لن يقرأها او يفهما الا بضعة اشخاص , اما الكتابة الساخرة باللهجة الشعبية فيقرأها الملايين ويفهمها بسرعة ويكون لها بالغ الاثر في نفوسهم
بورك قلمكم التنويري

تحياتي للجميع

2 - شروط الشفافية في العراق
رعد الحافظ ( 2011 / 3 / 23 - 15:44 )
عزيزي سرمد الجراح الرائع
ذكرتني مزحتك القوية والشروط الصعبة المطلوبة لإستعادة ال 40 مريار دولار هههههه وكولة عادل إمام مش قادر أنطقها .. المليار , بالنكتة الشعبية أيام صديم وشحّة البيض والأب الذي يطلب طبقة بيض ك مهر لإبنتهِ فيجيبه الشاب الخاطب / خوب كول ما أزوّجها ههههه
لكن عندي رواية قصيرة حقيقية لازم تسمعها بهذه المناسبة المريارية
زعل أبو عباس وترك البيت ورفض العودة ووساطة الجميع ,لتراكم عدّة أسباب مزعجة له منها شغب عباس الدائم ومشاكلهِ ونق الحاجة ام عباس طيلة الوقت ومشاكل الجيران وغير ذلك
أخيراً ذهبت اليهِ أمّ عباس تترجاه يتعقل ويعود الى عائلتهِ وسوف يتغير الجميع
أجابها / أرجع لكن بثلاث شروط
أولاً .. أطلقكِ
ثانياً .. أقتل عباس
ثالثاً .. أحرق البيت
هههههههه , أقسم لكّ أنّه كان يتحدث بكامل هدوئهِ ورزانتهِ
فما كان من أم عباس إلاّ أن تجيبه / يا خايب .. لعد ليش راجع ؟
أعتقد شروط تحقق الشفافية وإنتهاء الفساد عند الساسة العراقيين أصعب من شروط أبو عباس .. الورد , صاحبنا
تقبّل تحياتي لجهدكَ

3 - على راسي يا سرمد
يونس حنون ( 2011 / 3 / 23 - 18:14 )
لا تخاف عيني سرمد ، فما ضاع حق وراءه نواب مثل نوابنا
اكيد هسة يسوون استجواب للذين وافقوا على هالايفاد ، ويرزلوهم على تبذير اموال الشعب
وبعدين يوكفوهم ربع ساعة دايرين وجوهم على الحايط قصاص لكي يكونوا عبرة لمن اعتبر
وكل ايفاد ونحن بقرحة
وهو ليش اكو ماي حتى انكع الوثيقة

4 - عيوني سرمد
مارا الصفار ( 2011 / 3 / 23 - 19:52 )
اني اول مرة لطمت على المقال وبعدين ضحكت على نفسي لان ما اعرف الطم

بما انه اخي رعد اعطانا مثال جميل لمقالك الجميل
سوف اسرد لكم ايضا قصة حقيقية عشناها بحذافيرها
فد يوم وظفوا شخص عراقي في شركة بوظيفة محاسب
6 اشهر والمحاسب يكول لمدير الشركة
ما عدنا فلوس والعملاء ما يدفعون والبنوك ما تنطي قروض
ومن هاي الاعذار
ووقف حتى رواتب الموظفين
بعد فترة المدير شك بالموضوع
خاصة بعد ما اتصل بالشركات المتعاملة معه
طلع اخونا المحاسب العراقي
لاحس الخزنة لحس
ومشتري 10 بيوت في بغداد وعمارة بالحلة
حبسوه على ذمة التحقيق
وفي التحقيق اعترف انه اخذ الفلوس كلها
بس قال: شكد راح انسجن؟ 10 سنوات؟ 20 سنة ؟
مو مشكلة
على الاقل من اطلع من السجن
عندي بيوت ايجارها يكفيني مدى الحياة

هاي حسبة جماعتنا في الحكومة العراقية الشريفة
شنو يعني؟
اصرف ما في الجيب يأتيك ما في الغيب

تحياتي يا طيب

5 - 69.....69
سمير فريد ( 2011 / 3 / 24 - 09:07 )
العزيز سرمد الجراح
مصروف يوم واحد 6969 ولو تساْل اخونا رعد عن سر هذا الرقم او العزيز شامل عبد العزيز او كمال بربات ستعرف ان الجماعه مسوين تقشف وان الثلاثة ملايين قليله على قلافتهم ...عمي سرمد خلهم يضربون واني جنت امقرر اهديلهم 20 صندوك عرك زحلاوي بلكت ايصير ابراسهم خير ......تحياتي ومودتي للجميع

6 - ردود الاصدقاء
سرمد الجراح ( 2011 / 3 / 24 - 09:49 )
سيدي الكريم طلال الخوري شكرا لمرورك وتعليقك. وهذا ماننشده ونحاول ايصاله الى اكبر عدد من الناس, ان يكونوا حراسا للمال العام فهو ملكهم وما السياسي الا خادم بأجر ان احسن يثاب وان خان عوقب.
تحياتي
الكاتب والصديق رعد الحافظ, بس كلي ابو عباس اذا قتل عباس وطلق امه ليش يحرق البيت؟ همزين ما قال وابسط الجيران. بس ابو عباس على الاقل طرح حلول ولو ما معقوله بس اسمها حلول. لحد الان اكو واحد سمع سياسي يطرح حل لمشكله
تحياتي
دكتور يونس العزيز, ماتدري من الهرجه المن تلزم الحكومه لو البرلمان لو الموظفين لو مجالس المحافظات احسن شئ نلزم الشعب. ولو حضرتك طبيب واتعدى على اختصاصك بس لازم تنكعها للوثيقه واذا ما لكيت ماي نكعها بزحلاوي
تحياتي
الاخت الكريمه مارا الصفار, السياسيين في العراق شعارهم اصرف ما بجيب غيرك!! يأتيك ما بجيب جيرانك. كنا نسمع بالمثل حاميها حراميها بس هسه شفناه ثري دي اوضح من فلم افاتار.
تحياتي وشكرا لكل الاصدقاء

7 - العزيز سمير فريد
سرمد الجراح ( 2011 / 3 / 24 - 10:34 )
لم تخبرنا سيدي العزيز هل هذا الرقم السحري مطابق لمواصفات الرؤيه الشرعيه, ورب سائل يسأل هل ان اهل السنه يطبقون 68 بدلا من 69 لأن الطائفيه وصلت للايفادات الزوجيه. ويبقى السؤال الصعب جدا وهو اذا سني متزوج شيعيه يارقم يركبون حتى يرحون - ايفاد للبصره-
تحياتي

اخر الافلام

.. نابر سعودية وخليجية وعربية كرمت الأمير الشاعر بدر بن عبد الم

.. الكويت.. فيلم -شهر زي العسل- يتسبب بجدل واسع • فرانس 24




.. رحيل الممثل البريطاني برنارد هيل عن عمر 79 عاماً


.. فيلم السرب يتخطى 8 ملايين جنيه في شباك التذاكر خلال 4 أيام ع



.. الفنان محمد عبده يكشف عبر برنامج -تفاعلكم- أنه يتلقى الكيماو