الحوار المتمدن - موبايل
الموقع الرئيسي


الصيف الساطع آتٍ وأنا كلش عركان

سرمد علي الجراح

2011 / 3 / 31
كتابات ساخرة


- إذا جاءكم كهربائي بنبأ فتبينوا…

في اخر تصريح لوزير البريمزات, ان الوزاره مستعده لهذا الصيف وستزود المواطنين بثمانية ساعات كهرباء يوميا. ماأريد اظلمك وأظلم بختي وأكول تكذب, بس اريدك تحلف بشرفك تنطي ست ساعات مو ثمانيه. واذا تشوفها صعبه احلف بشرف احمدي نجاد!!
أني مستعد احلف ماراح تكدر تسويها, ومو بس احلف, مستعد اتراهن وياك لو اني اطلع مصلخ بساحة التحرير لو انته, اذا ماوفيت بوعدك!!
تعرف ليش ماراح تكدر توفي بوعدك؟ لأن ماتعرف تحسب.
كم ميغاواط -بس لايكول شنو ميكاواط- زادت قدرة وزارتك من السنه الماضيه الى هل سنه؟ العام كنتو تنطون معدل ساعتين باليوم في الصيف. حتى تنطي ثمانيه لازم زادت القدره الانتاجيه اربعميه بالميه.
ها هسه شكلت؟ تحلف لو تتراهن, والله عاجبني اشوف خلفيتك الثقافيه!!

- برلماني من لجنة النزاهه يقول: لعب اطفال في صناديق مكتوب عليها رؤوس توليد مستورده لوزارة الكهرباء!!

يمعود انته ياالبرلماني خاف هاي الصناديق مو لوزارة الكهرباء, ومستوردتها قابله مأذونه!!, ورؤوس التوليد لزوم شغلها!!
انتوا متأكدين هاي لوزاره الكهرباء؟ يجوز العلم وصل انو من الفرارات نسوي كهرباء؟ لو اخترعوا باربي اليشوفها ينّتل؟ لو استوردوا نفاخات متروسه هواء مبَرد جاهز للاستعمال؟
مامعقوله يغشونه المسؤولين لأن كلهم يصومون ويصلون. بس إلمن يصلون محد يدري.
بس تره صفقه معتبره ياجماعة الخير, شلون؟ هنا بأوربا مرات يسوون دعايه, تشتري تلفزيون ينطوك وياه بلاش دي في دي بلاير. مكن باعولنا الفرارات, وراح ينطونه وياها محطات توليد كهرباء بلاش!!
وهاي الملاعيب اكيد رخيصه, مليارين دولار لو ثلاثه!!
مال ما إله صاحب وكولت مجلة بلاي بوي, اهم شئ الستر!!

- الاسكافي في ترقيع مؤخرة القذافي!!

الرفيق المناضل عنزة الدوري يضع تحت تصرف ابو سيف الافلام عشرين الف صنديد, مدججين بخناجر كليجه ومفخخين بعد أكل باميه وبصل.
هسه واصلين تازه من معركة -أم العلوج - في غرب المسيسبي. وبعد ان حطموا قلاع الامبرياليه في عقر دارها, فهم مستعدون للدفاع عن طرابلس العروبه ضد العدوان الاستعماري الجديد في موقعة أم الثلوج.
عيني ابو سيف الاسلام ابشر, تره راحت طرابلس, وإذا بغداد احتلوها بدبابتين, طرابلس يحتلوها بعربانه ومطي!!
احسنلك من هسه تشوفلك نكره مثل ذاك الرجال.
بس الحق يقال تكدر تستشير ابو الثلج وين تختفي, لأن الرفيق المناضل, فص ثلج وماع.

-عراقيون عالقون في ليبيا

بعد اجلاء اخر اسكيمو متواجد في ليبيا جاء دور العراقيين العالقين. وتذكرت الحكومه الموقره ان لها رعايا مشمولين بغضب آلهة المدس والعمايم هم واجدادهم وابناءهم وين ما يولّون. فأرسلت لهم سفينه لأجلائهم.
شدعوه مستعجلين؟ راح يصير حصار بحري وره الجوي قبل ما توصل السفينه, فلو دازين قافله مال بعران اسهل وارخص.
هنا اطالب مديرية الجنسيه والجوازات بتثبيت هذه الجمله على الجواز العراقي:
الحكومه العراقيه غير مسؤوله وتتبرء من حامل هذا الجواز وتنصح الدول الشقيقه والصديقه بأخذ الحيطه والحذر منه!!
بس هذوله العراقيين اللي بليبيا اكيد بيهم واحد منحوس وفكر. وأي بلد يروحله تجي امريكا وتحتله!! دخيلكم دلّوني عليه هذا البلوه, واني اسفره على حسابي لأيران!!





التعليق والتصويت على الموضوع في الموقع الرئيسي


التعليقات

1 - تره والله مظلومين ياسرمد
محمد الرديني ( 2011 / 3 / 31 - 08:03 )
في عصر الطفرات التكنولوجية السريعة لابد من متابعة سريعة هي الاخرى والا فالفرارات هي الحل الامثل
رائع ماتكتبه ايها الجراح

2 - غشيم
حمورابي سعيد ( 2011 / 3 / 31 - 08:24 )
اخي سرمد...تره وزير البريمزات مو غشيم لو تفكر هو من جماعة الاربع.هو استورد بريمزات او وياها فرارات معدنية حتى لا تحترك.مجرد تشغل البريمز رح يتولد نيار هوا حار وقوي يشغل الفرارة ويتولد 10 ميعاوات كهرباء.تحياتي

3 - شّرُ البَلِية
امين يونس ( 2011 / 3 / 31 - 09:13 )
عشتَ استاذ سرمد على هذا المقال الرائع

4 - رائع كالعادة
يونس حنون ( 2011 / 3 / 31 - 14:13 )
اخي سرمد
بوركت بكل رفسة توجهها الى المؤخرات الكريهة التي حولت العراق الى حاضنات لتفقيس الفساد المشكلة ان علينا ان ننتظر سنوات طويلة لنعرف هل افاقت جموع الاصابع البنفسجية من غيبوبتها

5 - تقبيل الرؤساء
رعد الحافظ ( 2011 / 3 / 31 - 17:50 )
عزيزي الرائع / سرمد الجراح
سوف أستغل عبارة / الإسكافي لترقيع مؤخرة القذافي
لأسالك عن وجهة نظرك بشيء محدد
بعيداً عن أزمة الكهرباء والفاسدين , من وزرائنا الميامين ونوابنا النائمين
****
ما رأيك باللقطة التالية التي تتكرر على أنظارنا يومياً ؟
رجل ( من عامة الشعب ) يُقبّل صورة الرئيس ( من فمهِ ) ههههه , أقسم لكَ
شاهدتُ بعيني تلك اللقطة مع صور الزعماء العظماء التالية اسماؤهم
العقيد العاقل ( أبو زنكة ) / معمر القذافي
الرئيس الثابت ( عكس متقلّب ) / علي عبدالله صالح
الطبيب الرئيس ( الصادق ) / بشّار الأسد
وسؤالي الثاني / عن مشاعركَ مع تلك اللقطة قبل وبعد الأكل , ههههههه
تقبّل محبتي

6 - ردود الاصدقاء
سرمد الجراح ( 2011 / 3 / 31 - 18:38 )
صديقي الرديني العزيز, نعم عزيزي جاي ننوخذ غفل من سرعة التطور بس الحمد لله لدينا حكومه صاحيه والدور على وزارة الصحه راح تستورد براغي بدل الانتي بايتك ولوزارة الداخليه مسدسات ماي وكبسون
تقبل تحياتي
العزيز حمورابي, علوم البريمز وما تحت الفتيله من اختصاص لجنة الطاقه في برلماننا وراح يقررون اي نوع يستوردون بس وره اجازة الصيف
شكرا لمرورك
الاستاذ امين يونس, شكرا جزيلا لكلماتك واطرائك
تقبل مودتي
الصديق الدكتور يونس
عزيزي ولو انا متفائل دائما بس ما اظن الطريق بهذه السهوله ولكن لو ساهمنا ولو بفتح عيون شخص واحد فأنه بداية انتصار
تقبل تحياتي
الاخ العزيز رعد الحافظ, اني هم شفت هيج حاله والحقيقه لها تفسيران, الاول ان هذا المواطن لوتي ويريد يشتم بس بطريقه المدح بقصد الذم, ويكول تره يارئيس انته خلصان .... والثاني ان هذا المواطن يعاني من حالة كبت لدرجة ان عنده استعداد يتزاوج ويه الزواحف
تقبل تحياتي

7 - كم اضحكتني ياسرمد
Aghsan Mostafa ( 2011 / 3 / 31 - 23:11 )
واو واو واو سرمد مابقيت شي!!! لقبك من الان وصاعدا الجراح سرمد الجارح!!! تحياتي وتقديري وعظيم اعجابي لك وللجميع

8 - حصان طروادة الديني
الحكيم البابلي ( 2011 / 4 / 1 - 07:09 )
الأخ العزيز سرمد الجراح
والله مقال على جرح الكلب ، وصدكني لو تم ضرب هذه الحكومة على راسهة بالنِعِل مِنا إلى نهاية العمر ، ما راح يبرد كلبنة
في المسرح هناك مصطلح ( الكوميديا السوداء ) ، ويطلق على كل الظروف الحياتية المآساوية والتي تبلغ بألإنسان لمرحلة يختلط فيها الضحك بالبكاء والتندر والسخرية من الواقع الرهيب
وهذا بالضبط ما يحدث للشرفاء والغيارى من ابناء وطننا العراقي المغلوب على أمره للأسف حيث لم نعد نملك غير أن نسخر ونتندر من المسرحية المؤلمة التي تدور في العراق منذ سنوات ، والتي لو كان قد أخبرنا أحدٌ من الناس عن تفاصيلها في أيام الخير من عمرنا الماضي لماصدقنا به حتى لو حلف بدوبة قراعين وأناجيل
ثم إننا لا نرى مما يحدث للعراق غير ما يصلنا من فيديوهات واخبار شفاهية أو مكتوبة ، فماذا مثلاً لو عايشنا المسلخة كما يفعل ابناء الداخل المساكين ؟
المجد للشرفاء من العراقيين ، ولا أعتقد ان أي طايح حظ من الذين يُنكلون بهذا الوطن هو عراقي اصيل ن بل حتماً هو فرخ لو فريخ من ابناء الدول الحاقدة تاريخياً على العراق ، والتي جائتنا متنكرة في داخل حصان طروادة الديني الطائفي الزنخ
تحياتي وشكراً

9 - ردود الاصدقاء
سرمد الجراح ( 2011 / 4 / 1 - 12:21 )
العزيزه الورده اغصان, شكرا جزيلا لكلماتك الحلوه. تعليقاتك هي - ال فييد باك- الذي يشعرني بالسعاده وبأن ما اكتبه يمكن ان يصل الى القلوب والعقول
تحياتي
العزيز الحكيم البابلي, نصبر انفسنا بكلمات من قبيل, هاي قسمتنه وشنسوي هذا حظنه. ولكن الواقع مخالف تماما, فإن الامم تصنع مستقبلها وحظوظها بيدها. الدين والخرافات تترعرع في الجهل والفقر, وتساهم ايضا في زيادتهما. انهما يعتاشان تكافليا ويعتمدان على بعضهما في الديمومه. النخبه السياسيه هي نتاج لهذه المعادله وتساهم اراديا او لااراديا بتغذيته وتنميته
تقبل مودتي

اخر الافلام

.. صراحة مطلقة في أجوبة أحمد الخفاجي عن المغنيات والممثلات العر

.. بشار مراد يكسر التابوهات بالغناء • فرانس 24 / FRANCE 24




.. عوام في بحر الكلام-الشاعر جمال بخيت يحكي موقف للملك فاروق مع

.. عوام في بحر الكلام - د. أحمد رامي حفيد الشاعر أحمد راي يتحدث



.. عوام في بحر الكلام - الشاعر جمال بخيت يوضح محطة أم كلثوم وأح