الحوار المتمدن - موبايل
الموقع الرئيسي


جيش تحرير طويريج

سرمد علي الجراح

2011 / 4 / 13
كتابات ساخرة


في رسالة احتجاج وجهتها الاخت العزيزه اغصان مصطفى للحوار, قالت فيها انها ستبتعد في الوقت الحاضر عن مواضيع السياسه والدين.
ادري يا أغصان شبقه نقراه؟ والاهم شبقه نتعارك عليه؟.
إذا بطّلنا وصرنا حبابين وقرينه فقط عن صبغ الاظافر, او عمل الدولمه ميكانيكيا, او ادخال اللوز تكتيكيا في حشوة الكبه, او محاصصه الالوان في صبغ الشعر, او خياطة بدلة الزفاف رومانسيا. او نطالع باستمرار وعلى مدار الساعه عن استراتيجية برج الثور في نطح برج الحمل
كل هذه المواضيع مهمه وحيويه, واهم شئ انها صحيه وتريح الاعصاب, ولايزداد لديك السكّر او الضغط نتيجة المعاناة التي تكابدها وأنت ترى الاخبار, او سماع اطنان الكذب من افواه السياسيين, واللذين يعرفون اننا نعرف انهم يكذبون, ولكنهم يصرّون على ذلك امعانا في احتقار المواطن وزيادة في إذلاله.
شوف شلون دخلنا مرة اخرى في السياسه على كولة المثل, كل الطرق تؤدي الى نعال ابو تحسين, قدّس شسعه*
وهكذا فإن الاستنتاج العام يقول بأني اوافق الاخت اغصان تماما على قرارها, ولكن المشكله تكمن في أن هذه البلاوي لن تتركك تستمتع بالقليل من الراحه. فلابد أن يخرج اليك احدهم ليلوث عليك الهواء الذي تتنفسه برائحته.
آخر هذه البلاوي كانت خروج سيد بطيخه من سرداب في قم, ليهدد الامريكان بإرجاع جيش المهدي الى الشارع!!
بدايةً, اتمنى ان يخرج الامريكان من العراق البارحه قبل باجر.
مو لأني كلش وطني واريد نحكم نفسنا بنفسنا, فقد اثبتنا عبر خمسين سنه من الحكم الوطني اننا لانعرف كيف نحكم, ولانعرف ندير علْوه رقي, مو دوله!!
أريدهم يخرجون حفاظا على ارواحهم وأموالهم في بلد لايستحق منهم أي تضحيه.
فلسنا المانيا او اليابان او كوريا الجنوبيه او هولنده لكي نقدر أن التحالف مع اقوى دوله في العالم يعني تطورنا واستقرارنا ورفاهيتنا
أرجع لتهديد سيد صليبخ, ليش هيج, الله لا ينطيك, فززت البنتاكون, وقائد قوات المارينز مانام ذيج الليله. وسلاح الجو الامريكي أخذ طلي نذر لسيد محمد خاف صدك تسويها.
اما الغواصات النوويه فجابولهن حنّه من الحمزه الشرجي ولطخوهن, خاف السيد ياكل فاصوليه زايد ويبهذلهن.
ولك أنته ماتستحي, ولك شنو بداخل جمجمتك عدا التبن, معقوله ولا ذرة عقل.
لوما شفت بعينك أخو هدله, اللي من كنت تسمع بيه, تسويها على روحك من الخوف, شلون من خلّوْ عقلهم وياه, سووه مضحكه للبشريه
هم ارجع وأقول مو صوجك, صوج القائد العام للقوات المسلحه ووزير الدفاع والداخليه والعمبه والفلافل وكالةً, اللي هادّك تاكل -شكر- بكيفك
لكن تبقى هكذا تصريحات تبعث الامل في النفوس بأننا سنبقى دوله فالتون ورحمة الله وبركاته

* شسع النعل أربطته وسيوره





التعليق والتصويت على الموضوع في الموقع الرئيسي


التعليقات

1 - منــو صــدر منو بطــن ؟؟؟
كنعـــان شماس ( 2011 / 4 / 13 - 14:27 )
تحية للاستاذ ســرمد على الجراح على هذه المطارق . لقد ضحكت حتى ادمعت عيوني . يا استاذ سرمد سال نفر من رهــط مجلس الحكم اخو هدله اول سوال( ليش قتلت الصدر ) طبعا بدل سواله ( ليس خربت العراق ) فتيقن انه طبــــول فارغة فكان جوابه كما في اعلاه امعانا في الاهانة والتحقير . ان الاعتراف بالجميل من اخلاق الفرسان النبلاء فواصل الطرق ايها النبيل لعلهم يستحون

2 - رغبة أصيلة
رعد الحافظ ( 2011 / 4 / 13 - 17:16 )
بناءً على رغبة العزيزة أغصان ورغبتكَ أنتَ أيضاً عزيزي الجرّاح , والذي تقوم بجراحات ناجحة هذهِ الأيام مع المنافقين
فلن أوّضح أنّ السيّد بطيخة أو صليبخ حسب روايتك الأخرى هو أصلاً نصف منغوليان ولو كان في أوربا لقدموا لهُ العناية الصحيّة التي يحتاجها وكثير من أجهزة الأتاري التي طالما ضربه ( بسببها ) المرحوم والده , حتى تخلّف الى هذه الدرجة
المشكلة والله يا سرمد مو هنا , ما بيها شيء واحد تخبّل (من البسط ) في صغره
بس المشكلة في كتّاب يعتبرون أنفسهم مثقفين ينتمون لجيشهِ الدموي الذي يسميّه المهدي ويطير صوابهم من أيّ إنسان ينتقدهُ بكلمة , ذولة ش تخليلهم ويطيبون ؟ ههههه
****
أما أخو هدلة اللي طلعوه من الحفرة جنّه طنطل أشعث أغبر أحمق أحقر
فهذا أيضاً بعد أن إنتبش , لهُ كتّاب ومريدين في سوق مريدي
هؤلاء نسميهم بالفصحى / أخذتهم العزّة بالإثم , فضيعوا المشيتين وبعضهم أضاع حتى شرفه بحيث رحل الى ليبيا فساند العقيد المجنون ضدّ شعبهِ الثائر وأعاد على أسماعنا قوانة القومية العربية الإسلامية الخالدة
أنا شخصياً عزيزي سرمد , مازالت رغبتي بتوفر متحف لهؤلاء المهرجين نذهب للضحك عليهم , رغبة أصيلة وقوية

3 - جمهورية الهجع الإسلامية
الحكيم البابلي ( 2011 / 4 / 13 - 18:28 )
عزيزي أبو السرامد
أنا أيضاً أصبح مزاجي برتقالي وربما لالنكي كمزاج أختنا العزيزة ( غصة ) ، حيث كلما فتحتُ النت واجهتني مخالب وأنياب مقالات السياسة والدين والتي إبتلى بها الناس أجمعين ماعدى اليابانيين
الحقيقة سيدي العزيز كتاباتك أصبحت تستهويني ، فالمقالات الساخرة الناقدة والناجحة ليست بالعمل الهين ، وشخصياً أعتبرها - في حالة نجاحها - من الأدب الصعب
الحق أعجبني أيضاً تعليق السيد نبيل الربيعي على الفيس بوك ، والمعلومات المضحكة المُبكية التي أوردها عن العمبة وبابل وجهبذ زمانه ( المسيلماوي ) !!، ويا للإسم الذي يشبه صوت الطبل ... يصل بعيداً رغم خواءه
وأعتقد أن أبناء شعبنا المسحوقين كانوا سيحترموه بمقدار ( ستة دراهم ) أكثر!! لو كان إختار إسماً له علاقة بالعمل الشريف مثل : (العمباوي )، بشرفكم شلون إسم موسيقي ويفتح الشهية على الأكل ؟
قصة المسيلماوي هذا ومعها مئات القصص في عراقنا الجريح فاقت بغرابتها وقربها من الخيال قصص( حكم قرقوش ) ، وكم أتمنى أن يقوم أحد كُتابنا الشقندحية بمحاولة لحصرها وجمعها - قدر الإمكان - في كتاب يعرض للعالم ما دار وما يدور في جمهورية الهجع الإسلامية العتيدة
تحياتي

4 - ردود الاصدقاء
سرمد الجراح ( 2011 / 4 / 13 - 21:20 )
الاخ الربيعي شكرا لمرورك وتعليقك.والله يا اخي واحد يحير شيكول. الظاهر اكو ازمة اسطوات مال كص وشاورمه بالبلد. وما لكو واحد منهم يتقلد هالمنصب فاضطروا لاعطائه لصاحب شهاده وخبره اقل ويحمل ماجستير في خلط العمبه بالشريس. وفقنا الله لما فيه خير اهل الباكله
تحياتي
الاخ العزيز كنعان, ليش زعلانين الاخوان شو ماشاء الله السيد القائد بطيخه يعادل ميت صدر تك باب دك النجف
صديقي العزيز الكاتب رعد الحافظ, اعرف واحد من اللي ذكرتهم يكتب تحت اسم المستشار الثقافي للتيار. اتفرج على كتاباته دورات واصفن, اكول يعني هذا ليش مايتعالج اذا هلكد عنده قبوضيه. اظن مستحيل هوه يفتهم شجاي يصفط. لا وهلكد واثق من نفسه بحيث كأنه ستوه جاي من اجتماع ويه مجلس ادارة الانبياء والصحابه, صدك العقل زينه
تحياتي
العزيز الانيق الحكيم البابلي, احد الاصدقاء نبهني الى مسأله, ان العراقيين يهتمون بالشعر اكثر, واهملوا فن القصه مع الاسف, فهو قليل جدا قياسا الى ضخامة الاحداث. فلو كان لدينا كتاب على غرار نجيب محفوظ او المغربي الرائع محمد شكري, لكانت هناك الاف القصص والطرائف مستخلصة من سنين الكوابيس التي مرت على العراق
تحياتي.

5 - مهام السيد لاتنحصر في تحرير العراق
ايار العراقي ( 2011 / 4 / 13 - 22:41 )
شكرا عيني سرمد على هذا المقال الحلو يعني صدقني اخي وثق بمقدساتي اني جنت انسان طبيعي مثلكم قبل الاحتلال-التحرير من يوم اللي شفت بيه هلمنغولي وهاجت عليه امراض الكون قرحة وسكر وضغط واعصاب الله لاينطيه ولايوفقه مقطاطة بحد ذاته تنجرع سالفته بس اويلي على مثقف ويكولك اني معجب واقتدي بلسيد هاي شلون ترهم ؟
بعدين للعلم تره هو موبس راح يطرد الامريكان هاي بس وحده من شغلاته هو يريد يطير ابو البحرين وينصر حزب الله وحماس ويحرر فلسطين واذا بقه عنده شويه وقت يمر على ابو ليبيا يجر اذاناته
انا لله وانا اليه راجعون وبه نستعين

6 - السياسه اتجيب الوجع
الاء حامد ( 2011 / 4 / 13 - 23:00 )
بصراحة كنت قبل ايام منهمكة بقراءة ومتابعة سلسلة مقالات وابحاث سامي لبيب وكل مقال اقراءه اصاب بدوار ووجع راس لامثيل له حتى انني اصبحت عبوسه لا اتكلم الا همسا ولا اضحكا الا بأتسامه مخجلة ..تخيل اخي سرمد انت انني خفت ان يطلقني زوجي بنظام الصلي وليس المفرد طالق طالق طالق ..ثم كالعادة المقالات السياسيه هي اخرى لاتجلب لنا الا الصداع ودوخة الرأس ومع ذلك فنحن نقرأها ..يبدوا اننا ادمنا عليها .. هاي احنا النساء فما بالكم انتم الرجال . - عموما لا جديد في الساحة العراقيه غير طلاق عرفي من مجلس التهاون الخليجي لعروستنا العراقيه بعد ان خلعت عذرتها العربيه واصبحت فارسية في الغاء القمة العربيه المزمع عقدها في بغداد العروبه -.. يبدوا ان المشهد فعلا متورم والمخرج اعمى .. ولازال مسلسل الكلاوات مستمر في العراق من خيبه الى خيبه والله يستر من الجايات

7 - ضاع العراق
محمد جمعة ( 2011 / 4 / 13 - 23:38 )
بين كاتب المقال وخصومه ضاع العراق فالاحتلال والدكتاتورية بكل اوصافها واسمائها وان كانت تحت مسمى ديمقراطية هي اوجه لعملة واحدة وان العجاف الثمان تؤكد ان الاحتلال لا ينتج الا خراب

8 - اخي العزيز سرمد
Aghsan Mostafa ( 2011 / 4 / 14 - 02:10 )
شكرا سرمد لأنك فهمت ماقصدته بقولي عن التوقف مؤقتا بالتكلم عن السياسه والدين لنستعيض عنه بالتكلم عن الحشًاشه والمسطولين الي يبلبعون ويبربرون هههههههههههه
اما عن سؤالك الي بخصوص عن ماذا نقرأ وعلى شنو نتعارك؟ فأخي ماكو داعي للعركات خليها صافيه لبن هههههه واذا تريد تعرف عن العالم الي اني حاليا عايشه بيه شيقرون هالأيام، لح اكولك شيقرون بس اني ما الي دخل اذا تحصرت واحتصرت وتكول العالم وين واحنا وين؟؟ اكثرهم كاعدين يقرون بالأعلانات مال العطلات تعرف همه مايستحملون ضغوط ...همه صح يشتغلون هوايا بس عطلهم مايفوتوها لو يجي الحر!!! هالسنه اكثرهم رايحين على الدومنيكان!!! يكولك -أوول انكلوسف - يعني يطيرون وينامون وياكلون ويشربون واكيد يتونسون !!! تريد احجيلك بعد على الكروزات لو اخاف تغص!!! انت والحكيم ورعودي والجماعه مثل ما اني غصيت !!!
طبعا احنا بصاية ابن الحفره والي لح يوكع بيها ورااااااااااااه !!!! صرنا ناس عمليين وجديين ومو بطرانين مثلهم نعتبر كل هذه رفاهيه ما الها لزوم

تحياتي اخي وشكرا لك ولكل من ساهم بأضحاكي اليوم

9 - ردود الاصدقاء
سرمد الجراح ( 2011 / 4 / 14 - 10:08 )

الاخ العزيز أيار, في زمن القئد الضروره قرأت لافته كانت سبب هجرتي من العراق. مكتوب عليها سيبقى العراقيين مشاريع استشهاد!! ويه القائد لو ضده, يمنه يسره لازم نستشهد, على شنو؟ ماتدري. سيد بطيخه عجبته اللعبه وهم يريد يسوينه مشاريع لأيران, والحواوين التركض وراه مستعده.
تحياتي
الاخت الكريمه آلاء, جديا وبدون مزايده كافي وجع قلب, شو احنه لاحول ولاقوه والشعب يعرفهم وينتخبهم, فالقاضي راضي. بس على الاقل نحصل على ابتسامه وضحكه من هل حديقه مال الحيوانات اللي صارت عدنه
تحياتي
الاخ العزيز محمد جمعه, يعني انته تشوف العراق ماضايع صارله خمسين سنه؟ ملايين القتلى والاف المليارات صرفت على الحروب والاف من افضل العقول تركت البلد والى الابد, خمسين سنه من الطريق نحو الهاويه وقد وجدناها بانتظارنا. وعزيزي اني صرحت بالمقال بأني افضل انهاء الاحتلال ويروحون هالشباب الامريكان لبلدهم ويقضون وكتهم ويه الحلوات بدل مامشلوع قلبهم بناس لاتقدر ولاتفتهم. واحنه إلنا سيد بطيخه هوه اللي راح يكحلها
تحياتي

10 - ملعون ابو الدنيا
يونس حنون ( 2011 / 4 / 14 - 14:48 )
والله ياسرمد كلامك على راسي
اني اول فكرة شلعة من العراق راودتني عن نفسي لما دخلت وزارة الصحة وشفت صور العمائم
بكل مكان وفوكاها لافتات مثل كوادر وزارة الصحة تعزي صاحب الزمان 3 مرات بالشهر على اللي مات واللي تمرض واللي تزحلك واللي صار اسهالبس قبل الف سنة
وبدل ماتسوي الوزارة توعية صحية ومؤتمرات علمية مثل البشر الصاحين يومية وزير الصحة يرعالي مجلس عزاء وياويل اللي ما يحضر
اللي قاتلني ملايين العراقيين اللي مصرين ان يسلمون مقاليد التفكير الى القادة الجرذان اللي
ندعيلهم ان الله يحفظهم ويقصف عمر الناس
صارلي شهر اريد اكتب موضوع كلما اجي للكيبورد واتخيل صورة مقتدى اكول شنو الفائدة وابطل
لعد موحقها غصونة تقرر تمتنع ان تغث نفسها بلا مبرر او فائدة
عيوني سرمد اني هم قررت ما اقرة بعد اليوم الا المقالات الساخرة الى ان احس انه بدينا نرجع
ندخل قائمة الاوادم بالغي سن الرشد
يريدون يسموها جلد الذات يسموها مازوشية يسموها غيبوبة فكرية اني اسميها ديمقراطية كلمن بكيفة

اخر الافلام

.. فقرة غنائية بمناسبة شم النسيم مع الفنانة ياسمين علي | اللقاء

.. بعد تألقه في مسلسلي كامل العدد وفراولة.. لقاء خاص مع الفنان




.. كلمة أخيرة - فقرة غنائية بمناسبة شم النسيم مع الفنانة ياسمي

.. كلمة أخيرة - بعد تألقه في مسلسلي كامل العدد وفراولة.. لقاء




.. كلمة أخيرة - ياسمين علي بتغني من سن 8 سنين.. وباباها كان بيس