الحوار المتمدن - موبايل
الموقع الرئيسي


مات عم مهدى

حسن يوسف عبد العزيز

2011 / 4 / 14
الادب والفن

1
مات عم مهدى
مات مكفى فى الطين
مات وعرقو سايل ع الجبين
لا عمرو حلم بجنه ولا بساتين
ولا خمره ولا حورعين
كان كلو حلمو يعيش ويجوز البنتين
حلم بسيط بس للفقير بيبقى محال
2
مات عم مهدى
وبلدنا اللى بتصرخ
حتى ع البهيمه والفرخه
ما طلعتلها ولا صرخه
اصلى الصراخ عندنا طبقات و الوان
الصراخ عندنا ما يجوزش ع الغلبان
3
عم مهدى فضل طول عمرو يعافر
عمرو فكر يهج من البلد ويسافر
واختلفت بلدنا هو مات مؤمن ولا مات كافر
اصلى عمرو ما ركع ركعه
صحيح كان بيقعد قدام الجامع
يسمع خطبه الجمعه
بس عمرو ما ركع ركعه
4
عم مهدى كان راجل
فى زمن عزت فيه الرجال
كان شايل هموم ما تشيلها جبال
بس كان دايما بيضحك ويغنى فى الموال
وتسالو عن الاحوال
يقولك علطول عال العال
5
عم مهدى كان رمز للطيبه
عمرو ما طلع من لسانو العيبه
بس بلدنا بقت بلد غريبه
بتحكم على البشر بالدقن والزبيبه
مش بالاقوال ولا الافعال
مات عم مهدى
وماعادش فيه كلام يتقال

---

---

---

التعليق والتصويت على الموضوع في الموقع الرئيسي

---

.. عام على رحيل مصطفى درويش.. آخر ما قاله الفنان الراحل


.. أفلام رسوم متحركة للأطفال بمخيمات النزوح في قطاع غزة




.. أبطال السرب يشاهدون الفيلم مع أسرهم بعد طرحه فى السينمات


.. تفاعلكم | أغاني وحوار مع الفنانة كنزة مرسلي




.. مرضي الخَمعلي: سباقات الهجن تدعم السياحة الثقافية سواء بشكل