الحوار المتمدن - موبايل
الموقع الرئيسي


تدبير التزوير

سرمد علي الجراح

2011 / 4 / 19
كتابات ساخرة



شاحنة مفرقعات

السلطات السوريه تكتشف شاحنه محمله بالاسلحه قادمه من العراق!!
خلي واحد يفهمنا شنو الفلم, لأن منو يسويها بالعراق وليش
- الاحزاب الشيعيه هذوله حبايب ايران, وايران وسوريا حلفاء
- الاحزاب السنيه الاسلاميه والعلمانيه, كلهم ذوو افكار قوميه وسوريا بالنسبه الهم حزام ظهر
- حزب البعث والقاعده, هذوله قاعدين بسوريا وهيه ترضعهم وتبدل حفاظاتهم
هذا اذا اضفنا ان الاسلحه المكتشفه على الاحوط ايرانيه, فأن الفلم الهندي يزداد غرابه
آني اقول سائق الشاحنه دخل للعراق وما لكه العنوان فرجع لأهله!!
أو جماعة الامن السوري خلص عتادهم بالمضاهرات فطلبوا من ايران شحنه سريعه, لكن قوات الحدود ماكان عدها علم بالموضوع
او المقاومه الشريفه بالعراق رادت تبعث هدية عيد ميلاد للقائد الذروره بس وصلت متأخره.
لكن مايثير الدهشه هو صمت الحكومه العراقيه على الموضوع, وكأن القصه لاتعنيها!!
لو يمكن تعلموا على الرزاله من ايران وسوريه فبعد ما تهمهم الكفخات.
أو ان القائد العام للقوات المسلحه ووزير الجندرمه والانكشاريه وكالةً, مايعرف رجلها من حماها.
وعباله كمشوها دتدخل للعراق فقال شئ عادي ماكو جديد بالموضوع!!

دكتوراه بواري
من لطائف وطرائف بلد المجانين, خروج المزورين المفصولين في تضاهره يطالبون فيها باعادتهم الى وظائفهم!!
وقد هددوا الدوله, على اساس اكو دوله, هددوها باستعمال العنف اذا لم تتحقق مطالبهم!!
سيداتي سادتي اصحاب شهادات جامعة اكسفورد قسم مريدي لعلوم اللمندوزي, انصحكم اولا برفع شكوى ضد الحكومه ومجلس النواب لعدم اهليتهم للمناصب التي تقلدوها, لأن شهاداتهم غير معترف بها في كل دول العالم. ومفيش حد احسن من حد.
ثانيا يجب رفع شعار –أحنه كدهها بس الوكت ضاربنه بوري-
ثالثا تأسيس حزب اسلامي تحت تسمية حزب التزوير والجهاد الاسلامي, على ان يملك رئيس الحزب على الاقل بيان ولاده حقيقي, مو تالي يطلع ما مولود اصلا!!

ألأيادي الخفيه
الموضوع الطريف الاخر هو تصريح السيد بهاء الاعرجي من تيار هذا الحلو كاتلني يعمه, بأن هناك اياد خفيه تحاول ابعاد العراق عن محيطه العربي!!
بشرفكم مو تصريح يموت ضحك؟
هوه منو طلع مضاهرات ضد حكومة البحرين؟
اني شخصيا أشك بأن هذه الايادي من دولة مالي, مو مالي شغل بالسوك, لكن, جي مالي والي.
يمعود تره الايادي بصفك وبدولة خوال عمك, واللي كاعد يدرس بيها علم الطهاره والبريج
وتريد الصدك, العراق مايصير براسه حظ اذا مايبتعد عن محيطه العربي والفارسي, لأن هذوله اثنينهم أس البلاء. وما يصدرون للعراق غير التخلف والارهاب
بس املنه بيكم كبير كونكم مفتحين باللبن, وراح تفتكون علي عبد الله صالح, بين قوسين اليمني!!!





التعليق والتصويت على الموضوع في الموقع الرئيسي


التعليقات

1 - ثلاث نغزات
رعد الحافظ ( 2011 / 4 / 19 - 09:24 )
قوية نغزاتك عزيزي سرمد , يكون تغزّر بيهم ويحسّون
الأولى
المقاومه الشريفه بالعراق رادت تبعث هدية عيد ميلاد للقائد الذروره
صحّ لسانك .. مقاومة كلّش شريفة , وقائد جداً ذرورة هههههه هاي إشلون خطرت ببالك ؟
زين صُدگ , أشو حكومتنا الفاسدة , ماكو صوت منها .. لامن فوگ ولامن جوّه ؟؟
****
الثانية
أحنه كدهها بس الوكت ضاربنه بوري , خوش شعار للشعارّة والاحزاب الإسلاميّة , بس ليش ضاربهم بوري بعد شيردون ؟ مو أخذوا مال الله وعبدالله .. طلابه ؟
****
الثالثة
بهاء الأعرجي , مو هذا صاحب الشريط الرائج الرايق .. إطلع برّه ؟
اللي هدّ بيه لسانه على الرجال / علي شلاه ؟ وملّخه بالسبّ وإلاّ شويّة بالعّض ؟
زين أكو واحد لاخ أعرجي , هم بالتيار الص .. ي بس يلبس سيّد وعمامه والذي منّه , هذا هو نفسه يداوم دوام ثاني العصر ؟ لو أخوه ؟
والله يا سرمد ساستنا والاحزاب الإسلامية , سووا الديمقراطية سينما بالعراق
بس لا باقي الشعوب العربية عبالهم هي هاي الديمقراطية الأصلية ويمشون على نفس المنوال العراقي ؟
تحياتي لجهدكَ الرائع وإسلوبك الممتع

2 - خرنكعية
عباس فاضل ( 2011 / 4 / 19 - 13:40 )
لا عجبني مسؤول كال حجي كلش خطير : انو الشاحنة طلعت من العراق فارغة بس ترسوهه اسلحة من دخلت سوريا ! الله واكبر تره صدك عدنه عباقرة . لا وجمالة يريدون يسوولنه مؤتمر قمه اخاف اللغف ما مكفي . صدك ابو نعال من كال.... طيح الله حضج موزمبيق

3 - اعتصام
احمد الجوراني ( 2011 / 4 / 19 - 18:15 )
انني ادعو من هذا المنبر جميع القتله والمرتشين للاعتصام والتضاهر للعفو منهم اسوة باخوانهم المزورين تحت شعار مفيش حد احسن من حد لان دولة القانون تاهة

4 - ردود الاصدقاء
سرمد الجراح ( 2011 / 4 / 19 - 18:32 )
اخي العزيز الكاتب رعد الحافظ, واحد دورات مايصدك اللي يصير, بس هاي الحقيقه,الا اكو بالعالم بلد يطلعون بيه مزورين شهادات مضاهره؟ لعد شكد صار انحطاط بالاخلاق بحيث كام واحدهم يمشي بطوله ويكول انا ساقط وحرامي ومزور. واذا ما تنطوني راتب اشيل سلاح واصير قاطع طريق.
اما بهاء الاعرجي فنعم هو نفسه صاحب الشريط اللي ذكرته. وهو من اشقياء البرلمان ويخاف منه اكثر النواب لمعرفتهم بتاريخه النضالي في عكود الميدان!! وقد تصدت له نائبه في احد المرات واسكتته بعد ان ذكرته بأمه واخواته وماذا كن يمتهن. فهرب منها ولم ينطق بكلمه
اما صاحب العمامه فهو حازم الاعرجي ومن التيار ايضا وهو مشهور في احتراف الشلتغه والسمسره
الاخ العزيز عباس فاضل, اي حضرة النائب متأكد ان الشاحنه فرغت حمولتها من المتفجرات فشلون وجدوا بيها غرفه سريه مايدرون بيها. بس اللي دزها من ايران الضاهر نسى ان يبلغهم عنها
تحياتي

5 - الاخ احمد الجوراني
سرمد الجراح ( 2011 / 4 / 19 - 18:48 )
ما يكفي بس يعفون عنهم, لأن طول الوقت يقتلون ويحطون مفخخات ويختطفون ناس, ميصير كلها بلاش قابل همه جمعيه خيريه. المفروض ينطوهم راتب على هل التعب!!
تحياتي

6 - سرمد اضف لمقالك هاي الطرفة
الاء حامد ( 2011 / 4 / 19 - 19:36 )
اوربا تكنس الكنيسة بمكانسها الكهربائية وتتجه الى الغاء الحدود وتوحيدها ونحن نفقس العمائم ونبني الجوامع والحسينيات .اما الفقراء فلهم الله الذي لايسكن الا في الجوامع والحسينيات , شاهدت وكيل السيد(قدس سره- يركب بغلته الالمانية المرسيدس - تأتيه امرأه اكل الماء يديها فأعطش جفنيها -: دخيلة الحسين وصاحبة ايتام والبهاك اكل ايدي واريد غسالة!!!ه
رد عليها سماحته -يا اختاه ... تأسي بجدتي فاطمة الزهراء البتول فقد كانت تطحن الرحى بيديها -ه
فقالت له - يا مولانه ... ما تتأسى انت بجدك علي , علي جان يركب مرسيدس!!!!ه
شكري وتحياتي لك اخي سرمد على هذه المقالة التي احتوت الكثير من بلاوينا وبلاوي ساستنا

7 - الاخت الكريمه الاء
سرمد الجراح ( 2011 / 4 / 19 - 19:59 )
شكرا جزيلا لمرورك سيدتي, لو بيده هذا المعمم جان كال جدي يزيد, هوه حاطهم اهل البيت للاسترزاق, مثل مجدي مطلع رجله المكسوره يجدي بيها, اما الاقتداء بيهم فهاي لبقية الناس هوه مامشمول بيها.
حتى اذا تراقبيهم للمعممين والخطباء بعد مايجيبون طاري الامام علي لأن مايصرفلهم, شلون خليفه ويخصف نعله بيده؟ وهمه قصور وسيارات
تحياتي

8 - مقولة قديمة
علي الشمري ( 2011 / 4 / 19 - 22:51 )
حضرة الاخ الكاتب سرمد الجراح المحترم
أول جانو يكولون رزق واحد على واحد والكل على الله,اليوم تغيرت وأصبحت كذب واحد على واحد والكل على الفقره,,هذوله اللي تحجي عنهم من يشوفون كبيرهم يكذب بوضح النهار واموره ماشيه وهواي من الطرش مصدكته ,يكلك ظلت عليه أنا هم خلي اكذب وهل الفقره تصدقني حتى أصير كبير,
أخي سرمد,أخر تقليعه خامنائيةهل سمعت بها؟أمام جمعة طهران الذي عينه الولي الفقيه مؤخرا يقول,,علي الخامنائي أول ما أجه للدنيا نطق بكلمة يا علي سوي ((صلوات)حتى بعد لحد يكول مو هو وكيل الحجة المنتظرأصبح كمنزلة نبي الله عيسى مفترض الطاعة, يكلم الناس صبيا؟فمثل هذا تستكثر عليه ان ينهل من علمه وعلومه رعاة الاغنام ؟والعاقل يفهم.,,فأن للدجل أبواب كثيرة وواسعة
تقبل تحياتي

9 - سر
حمورابي سعيد ( 2011 / 4 / 20 - 08:18 )
اخي سرمد...مقالة حلوة تشكر عليها.بهذه الماسبة يقال ان فلان ..اية الله العظمى دام ظله وقدس سره .اتعلم سر هذا الاية ولم يقدس ؟ تحياتي

10 - ردود الاحبه
سرمد الجراح ( 2011 / 4 / 20 - 08:57 )

الاخ العزيز علي الشمري, نعم لقد سمعت بهذا الخبر حسب رواية خطيب جمعة طهران, فقد كان الخطيب واقفا فوك راس الوالده عندما خرج خامنئي وهو يحمل الشعله الاولمبيه, وكان من امره انه ولد بعمامه اديداس ومداس نايكي
تحياتي
الاخ العزيز حمورابي, السر يكمن بانهم دافنيه سوه. وهو لايعدو كونه حرامي يبيعك سمج بالشط, لاهوه ضامنه ولا انته قابضه. والوحيد اللي يقبض نقدي هوه جنابه المقدس. بين قوسين ياكل ويشرب ويتزوج ويجمع فلوس براس القشامر.
تحياتي

اخر الافلام

.. حكايتي على العربية | ألمانية تعزف العود وتغني لأم كلثوم وفير

.. نشرة الرابعة | ترقب لتشكيل الحكومة في الكويت.. وفنان العرب ي



.. عوام في بحر الكلام - الشاعر جمال بخيب: أول قصيدة غنتها أم كل

.. عوام في بحر الكلام - الشاعر جمال بخيت: أول من أطلق إسم سوما




.. عوام في بحر الكلام - الشاعر جمال بخيت: أغنية ياليلة العيد ال