الفيسبوك
التويتر
اليوتيوب
الانستغرام
لينكدإن
تيلكرام
بنترست
بودكاست
الحوار المتمدن
- موبايل
الموقع
الرئيسي
جكليت المهاجر وگرگري المالكي*
سرمد علي الجراح
2011 / 6 / 10كتابات ساخرة
في أحد خطب الشيخ المهاجر, أكد لجمهور الحاضرين ممن استمعوا لخطبته العصماء, إن اكل جكليته واحده, قرأ عليها آية, إنا اعطيناك الكشمش, سوف تشفيهم وتحميهم من جميع الامراض التي ليس لها دواء, والتي عجز حتى بول البعير عن شفاءها!!.
ثم أخذته الحميّه, فلم يكتف بطيران الفيله, بل تعداها الى تركيب محركات دفع صاروخيه في مؤخرة المستمعين.
ليعلن بأن جكليته واحده تكفي لشفاء عشيره كامله!! -شلون عشيره تاكل جكليته؟ ماأدري, أسألوني من يطير الحشيش من راسي-, ويحلف بأغلظ الايمان إن هذه الجكليته مجربه. وتستطيع حتى استعمالها كتحاميل في حالة البواسير!!.
مرض واحد لاتستطيع ان تشفيه هذه الجكليته العجيبه هو, مرض جنون البقر الذي اصاب العراقيين الذين يصدقون هكذا محتال ولاينزلونه من على المنبر بالكفخات والدفرات, ويقولون له يادجال ألم تقل في خطبه سابقه بأنك كنت في لندن للعلاج؟ فلماذا تذهب الى لندن ولا تأكل جكليت أو مسقول أو ضروك الفار؟
في ملهى الخضراء الاسلامي حيث سقطت الاداب بين الاحباب, واصبح الكلام بلا ميزان والتصريحات تجلب الغثيان.
وعدنا أبونا وحامي حمانا, الجليل المفدى وذو المقام المعلى, تعالى قدره وثبت عزه وعزمه. جل شأنه عما يشركون وتنزه عما يأفكون. ذو الحسب والنسب والبطنج والعنب. مالك الملك وشريك نوح في الفلك, الطويرجاوي الاصيل ابو المعالي, شاهنشاه خريطستان وماجاورها من البلدان.
وعدنا بمائة يوم كمهلة لتقييم الوزارات في سفينة نوح التي يقودها, لنعرف الناجح من الراسب والعفيف من الخفيف والخدوم من اللملوم.
ما إن أوشكت المهله على النهايه حتى ظهر للعلن, أرباب البيان واصحاب الجاه ومقربي السلطان,
وأعلنوا لنا بأننا لم نفهم نبوءة والينا المفدى. لأننا حمير -بالأصالة عن نفسي ونيابة عمن يرغب فقط- وإن المقصود من المائة يوم هو اعطاء الساده الوزراء منديل الامان في هذه المده, ليأخذوا راحتهم في هضم مايمكن بلعه وحف مايتيسر نتفه.
ثم عليهم ارجاع المنديل السلطاني ملطخا بدماء بكارة المحاصصه العفيفه, ليعرض علنا على الجمهور, كسبب لفساد الاحوال والسر في المرض العضال
فهم يسرقوننا لأننا مرضى بأمراض تدعى سنه وشيعه وعرب وكرد
مما تقدم, عليكم بجكليت المهاجر. لأزاله بكتريا وجراثيم البقع الخضراء
وبس لايكول بالخطبه الجايه جبتلكم فلفل وعمبه هنديه بدل الكهرباء وأحسن من مكيفات سوني!!
وكل مائة يوم وأنتم ببوري جديد ومعدل
يقال للشخص تبيع علينه گرگري إذا حاول الغش والخداع*
رابط جكليت المهاجر*
http://www.youtube.com/watch?v=Poes-P15b4g
|
|
التعليق والتصويت على الموضوع في الموقع الرئيسي
التعليقات
1 - آآآآآآآه آآآآآآآآه
Aghsan Mostafa
(
2011 / 6 / 10 - 14:42
)
عيني سرمد هذا المعمم كذاااااااااااب كذاب (على وزن ماشاءالله) والسبب بسيط لأنه الأحرار يعلمون ان الله قد فشل وعجز تماما عن شفاء الأمراض المستعصيه والدليل المرضى الي بالفديو !!! ولا ممكن ولا حتى لو سوولهم مصنع جكليت، والي يتأمل فاقول له انت غلطاااااااااااان غلطان ولا حتى مائة عام مو مائة يوم ممكن تشفي هيجي مرضى ويخلص العراق من الداء الي هو بيه، الا اذا والعبره هنا واقولها نصيحه طيبه لجميع الأحرار لكم ثلاث خيارات،اما ان تهاجروا، او تبطلون تضحكون على انفسكم واطلبوا مساعدة العلماء والخبراء ليشفوا مرضاكم ، او أوكفوا سره وأكلوا من الجكليت حتى تصيرون مثلهم وترتاحون!!! وتريحون!!!
والصلااااااة والسلاااااام على الجميع مع امممموووواااااااا ه جبيره لسرمد الجراح......قبلت لو ماقبلت غصبا عليك ههههههه....تعرفني اني بالسكم شلون اكون!!!... بدعت اليوم ياسرمد
محبتي وتقديري واحترامي
2 - لايصة
مازن البلداوي
(
2011 / 6 / 10 - 16:06
)
عيني سرمد
تره لايصة أصلي، وهسة الكل مشلّه ذرعانه ويريد يجيت، يعني واكفة عالطكّة،
وضايعة الطاسة وكل واحد يجر بصفحة، ميردون الأمور تصفه، يردوها تبقى هيج تايهة
تحياتي
3 - سنة الحسم
عباس فاضل
(
2011 / 6 / 10 - 17:48
)
بالمناسبة اخ سرمد عندي فيديو مال المهاجر يتفل بحلوك الناس بس مدا اكدر انزل الرابط المهم المالكي شغلته شغلة الايرانيين بالحرب من سوو سنة الحسم , براس السنة كالو لا احنه قصدنه سنة نوروز ومن صارت نوروز كالو لا سويناهه مفتوحة ولا المالكي 100 يوم او وراهه 100 اللخة والحبل عالجرار
4 - سياسة التجهيل
علي الشمري
(
2011 / 6 / 10 - 22:25
)
الاخ العزيز سرمد الجراح المحترم
هناك جهات تعمل بالخفاء وتدفع الاموال الطائلة الى أشخاص نكرات لغرض تأدية دورهم في تجهيل الناس وأستغفالهم بامور غيبية ,أمثال المهاجر وباسم الكربلائي , ,والشيخ فاضل المالكي والعاصفي وغيرهم الكثير,ولا تستغرب أن تسمع يوما بان هناك اختصاص في توزيع ( بيض اللقلق)بحجة انه يشفي من الامراض العقلية,أو (شعر بنات)كونه يشفي من الامراض الجنسيةوالتناسلية,أو (العكيد)لانه مجرب ومضاد فعال ضد الامراض الاخلاقية,أ و(الخريط)الذي يغير الكثير من الجينات الوراثية,الان هذه المواد لا زالت التجارب البحثية تجري عليها في أرقى المختبرات العلميةالحوزوية ,وما عليك الا الانتظار لترى المزيد من المبتكرات الاسلامية وعندها سوف تستغني عن الطب الحديث وتكاليفه الباهضة,,,فهذه هي حكومة العجائب .
,الاسلامية تتفنن في نصب مصائد للمغفلين
5 - شتحطلها وتطيب
مارا الصفار
(
2011 / 6 / 11 - 07:09
)
العزيز سرمد
طبعا ضحكاتي وصلت الى سابع جار على وصفك الجميل لمحاضرة الجكليت الدينية الرائعة
رغم انني شاهدت الفيديو منذ فترة للشيخ المهاجر قدس الله سره
ولا تكول مارا ضعيفة بالدين ... هاي دعوة مبطنة ان يقدس الله سره قريبا
وقلت في نفسي : مصيبتنا شتحطلها وتطيب؟
والي يقتل كل شوية صايحين : اللهم صلي على محمد وعلى آل محمد
على شنو؟ على صخام الوجه ؟
باعوا كركري والناس تشتري
اتمنى اكو مكنسة انتقائية تكنس شكو زبالة بشرية بالعراق
تحياتي
6 - العيب مِنة وبينة .. والحمة تجينة من رجلينة
الحكيم البابلي
(
2011 / 6 / 11 - 09:08
)
أخي سرمد
حكاية بغدادية قديمة تقول بأن رجلاً كان يعبر الجسر صباح ذات يوم من جهة الرصافة ماشياً ليصل لمحل عملهِ في الكرخ ، حين رأى رجلاً طويلاً وهو يتكئ بجسده على سور الجسر وقد مد كلتا يديه للأعلى ، وقرب قدمه يتقرفص شخص آخر وهو يشخر في نومهِ
وعند عودة الرجل عصراً من عملهِ لبيتهِ وجد نفس الرجلين وهم على نفس وضعيتهم حين مرَ بهم صباحاً !!! ، فتعجب وسأل الرجل الطويل : متكلي ليش واكف من الصبح ليهسة على هل صورة ، وهذا صاحبك ديشخر يم رجليك !!؟
أجابه الرجل الطويل : كِلِت أمد إيدي ليفوك مثل الأريل بلكن فد واحد من طيور نعيج المي ( طير النورس ) يوَكِر على إيدي وأبيعة للناس
قال له الرجل العابر : ولك إنت مخبل ... متكلي شلون راح نعيج المي يوكر على إيدك ؟
أجاب الطويل بعصبية : هو آني المخبل لو هذا الدثو النايم اللي إنطاني عربون مال تلاثة نعيج المي ؟
السالفة وما بيها يا سرمدنا هو أن رجل الدين والمالكي وكل ساختجي جان كدروا يعبرون كلاواتهم لوما الشعب الجاهل ؟
بعدين هو صوج البائع الشاطر لو صوج الشاري الغبي ؟
رايح انام وتصبحون كلكم على نعيجات إمشيشات ومشويات ومملحات وينتظرن اللي ياجلهن
تحياتي
7 - ردود الاصدقاء
سرمد الجراح
(
2011 / 6 / 11 - 10:35
)
الصديقه اللدوده أغصان, وعليكم الموووووواه ورحمة الله وبركته ونردلجياها خرده انشاء الله. تعرفيتن عزيزتي قررت من وره نصيحتج اسوي مشروع يدر ذهب, افتح صيدليه المهاجر واحط بيها بس جكليت مستورد مباشرة من جوه عمامته. بس اريد شريكه بالمشروع وانتي خبيرة شتكولين
تحياتي
الاستاذ مازن البلداوي, ياعزيزي هذوله بيناتهم توصل بالمدس, لكن من مصالحهم تتهدد يصيرون دهن ودبس لكن بعد الخير ليكدام والحر راح يزيد ونشوف شراح يصير
تحياتي
العزيز عباس فاضل, مو زين مايكول وكع صفر من حلكي واني قصدت الف, بس الانتي فايروس اللي عندي منعه
تحياتي
الاستاذ علي الشمري, نعم عزيزي وسأدخل هذه الحليات في مشروع الصيدليه المقترح اعلاه واصرف راجيتات براحتي
تحياتي
8 - ردود الاصدقاء 2
سرمد الجراح
(
2011 / 6 / 11 - 11:06
)
الاخت الكريمه مارا, لا ماشاء الله صايره آية الله وبعد شويه وتصيرين بالحوزه _ بتزاكري من ورانا؟- هوه المهاجر من يشوف هل غنم شيكللها تسوي مو حقه يتخبل. يكلهم حطوا اديكم على روسكم يحطوها, كوموا الطموا يلطمون, كوموا اركصوا يركصون. قرود مال سيرك الله وكيل
تحياتي
الاستاذ البابلي, على كولتك وعلى كولة المثل العراقي, رجال اللي يعبي بالسكله ركي, ناس لاكين خوش قشامر ويثرمون براسهم بصل وياخذون فلوسهم وياكلون رزقهم ويتزوجون بناتهم واديهم تنباس, وفوكاها مسوين فضل عليهم من ياخذون بناتهم
اكو اكثر من هيج قشامر بالدنيه, لو يمكن احنه القشامر اللي ما اشتغلنه هيج شغله
تحياتي
9 - لا يا سرمد ؟
شامل عبد العزيز
(
2011 / 6 / 11 - 12:13
)
تحياتي للجميع - متت من الضحك بس راح أحكي شيء الرجل قال 100 يوم نعم ولكن للدراسة والآن سوف تبدأ المائة الثانية للعمل - التنفيذ - يعني الرجل بعده عند كلامه حسب ما قالوا الأتباع فلا نظلمهم ,, هسه افتهمنا هم ظلام قابل احنا هم انصير مثلهم ؟
فعلاً كما قالوا
شر البلية ما يضحك
تحياتي سرمد
10 - الاستاذ شامل
سرمد الجراح
(
2011 / 6 / 11 - 14:40
)
الاستاذ الكاتب شامل عبد العزيز, هاي حقكم بيها 100 يوم للدراسه وراها 100 للتقييم و100 للتجربه و 100 للضوك و 100 للقيمه والتمن, خلي يتعلمون ويجربون براسنه, دكول احنه فئران تجارب -حاشاكم- بس اعظم شي بالعراق انه ماكو حاكم يطلع سلامات الا ينصلخ جلده بعدين. ومن يضحك اخيرا يضحك كثيرا كما قيل
شكرا للمروركم وتحياتي لكل الاحبه
.. نابر سعودية وخليجية وعربية كرمت الأمير الشاعر بدر بن عبد الم
.. الكويت.. فيلم -شهر زي العسل- يتسبب بجدل واسع • فرانس 24
.. رحيل الممثل البريطاني برنارد هيل عن عمر 79 عاماً
.. فيلم السرب يتخطى 8 ملايين جنيه في شباك التذاكر خلال 4 أيام ع
.. الفنان محمد عبده يكشف عبر برنامج -تفاعلكم- أنه يتلقى الكيماو
