الحوار المتمدن - موبايل
الموقع الرئيسي


بمناسبة 14 تموز ..خسرتم ما كسبتموه قبل 53 عاما..فتحية لنسخة كبل من الشعب العراقي ..

موسى فرج

2011 / 7 / 14
اليسار ,الديمقراطية, العلمانية والتمدن في العراق


بمناسبة 14 تموز ..خسرتم ما كسبتموه قبل 53 عاما..فتحية لنسخة كبل من الشعب العراقي .. . هساع ..هم فشله ..يمرّ 14 تموز ..ونغّلس عنّه .. وهم وكسه نعتبر 14 تموز فعل خالص لواحد فقط من العراقيين هو عبد الكريم قاسم في حين أن عبد الكريم وكّع الباب ..بس يا هو ألخلخله ..؟ الشعب العراقي ..لكن.. ألنسخه مال كبّل ، ألنسخه مال الخمسينات ..مو ألنسخه مال الألفينات .. وهساع .. أشتردون ..؟ أهنيكم انتم ..؟ ..لا والله يابه ..أنا أهني ذولاك .. والـ أشجم واحد الباقين على طبع ذولاك ..أما الـ غيرهم ..؟ فأهنيهم صخونه بجلودهم .. وجلدي ألكم مباح ..وأهلي ألكم.. شتموهم ..قربان لعيون تموز.. إما أنا ( فسقف بيتي حديد وركن بيتي حجر .. فاقصفي يا رعود وأهطل يا مطر ..) يعذرني الفيتو ري إذا ما جبتها عدل .. لأننا نسينا الفيتوري واعتنقنا أودونيس ( آنا سامع بيه هذا التالي بس ما شايفه.. وظال أغمس على الفيتوري والشابي ..) .. وآنا من أتمثل بقول الفيتوري مو لأنه أشجع منكم ..ولا لأني أفهم منكم ..لا.. لكن لأني – الكامت والكعدت عندي سوا .. والبارحه درجة الحراره 50 م والكهرباء مكطوعه..وبالليل كل 10 دقائق أفز وأروح أشغل ألمولده وما أدري بيا تشغيله تنفجر بوجهي ..مو أفز من النوم .. هو وينه النوم ..؟ لا ..أفز من سلسلة أفكاري .. إيه نعم اشتم ..وأطيهم الصخونه كص الصوف ..لكن مال اهرع أدور مصايف ..؟ لا..مو ما أكدر عليها .. لا..أكدر ..ليش آنا مو من مسئولي النظام الجديد ..؟ الجانو ..؟ لكن ..غير أنلجم مثل ألخلك ..؟حتى أكون واحد منهم ؟.. ما علينا .. . عبد الكريم قاسم كانوا يلقبونه بمفجر 14 تموز ..تمام ..؟ يعني مو ألصانعها .. ألصانعها .. الشعب العراقي .بس نسخة كبّل .. مو نسخة اليوم .. مو يكولون كما أنتم يولى عليكم ..؟.. لكن ألمشكله أكو من بين الـ أنتم ..أكو أنيتم ..هذولا الأنيتم مشلوعه أكلوبهم ..بيها وبلياها.. خل أنشوف بالله شنوا ألكسبناه من 14 تموز..؟ واشكد أهميته ..؟ وحافظنا عليه ..لو لا.. واشكد فرق بين نسخة هساع وبين نسخة كبل ..؟.. ما نروح للتنظير والخطابيه الرنانه .. أنروح للي تبجون عليه اليوم بدموع دم أنتم يهل انسخه الجديده : . أولا : الوطن ..عبد الكريم قاسم وكف على شط العرب ..وكال : شوفوا هذا شط العرب وين ما يتوسع من ذاك الصوب ..ألكم .. هسا يهل ألنسخه الجديده : شط العرب وينه ..؟ والكارون ..وينه ؟ والوند وينه ..؟.. بعد ..؟ أكو واحد يتقرب للفاو .؟ لمقصر ..؟ لسنام ..؟ حكام دول جانت خايفه أتصير قائمقام .. هساع ميناءكم وينه ..؟ رميلتكم وينها ..؟ مطلاعكم وينه ..؟ فكتكم وينها ..؟ نفطكم وينه ..؟ .. . ثانيا :الوطن ..كرامته وسيادته : بريطانيا .. جانوا ألنسخه مال كبل يسموها العجوز .. وبس لا تتعلك (تحتمي ) بأمريكا .. أمريكا ..بس يريدون يخلصون ألحاهم من نسخة كبل من العراقيين .. الـ سعود.. العراق بالنسبة لهم كابوس .. عبد الناصر ..النهار كله يصنف عليه المهدواي .. الإقطاع والشيوخ اسمهم مطايا الاستعمار .. الموامنه أخذيني بسدج يا خاله .. الشاه ..ماكو هيجي زنبور يخر عسل .. ألرجعيه ..كلمن شاف له ديره .. هسا انتم بيا حال ..؟ يهل نسخة هساع ..؟ هسا انتم الحديقه ألخلفيه مال أمريكا وبريطانيا ..وصايرين زولية الشاه الجديد يمشي عليها مو حافي ..ومو الـ سعود وربعهم ما يمونون عليكم .. حتى صبيانهم يفصلون وانتم تلبسون .. الشيوخ صاروا هم أصحاب القوامة عليكم وحتى مال يشاوروكم ويخالفونكم همين متحصلوها منهم .. ألموامنه باتوا أولياء نعمتكم .. ناطقية دولتكم تهنئ الحكومة الكويتية بمناسبة خنقها لعراقكم .. . ثالثا : ثروتكم وفي المقدمة منها إنسانكم .. كانوا نسخة كبل .. العمال جباههم تتعالى إلى الشمس بنقاباتهم ودورهم ، النساء غررهن تجاوز الجوزاء زهوا وعندما تدلف إحداهن إلى تجمع دولي يقف الكبير قبل الصغير فقد دلفن العراقيات ..شبيبتكم طلبتكم .. مقاعدهم مميزة في المحافل ألدوليه ..هساع اشلونكم ..؟ يهل ألنسخه الجديده ..؟ ذاك اليوم غلبتوا الإيرانيين بكرة القدم شككوا علمكم .. وبعض من سفراء الفن منكم ..من الكاوليه ..وليس الكبنجي ..ذاك اللي يملخ احمد رامي سترته في حضرته .. بعد .. وين نفطكم ..اشوه أتدللون بيه للشركات الاجنبيه ..!.. ومحمد سلمان حسن استرد فوك الـ 99 ./. منه ..شنو حال فلوسكم ..؟ الدولار .. اشكم دينار يعادل ..؟ يعادل 1200 دينار ..هو مو جان بوكت إبراهيم كبه ..الدينار يعادل 3 دولارات وهجع ..؟ لو أنا غلطان ..؟.. نجي على ألزراعه ..يا بلد النخيل والعنبر .؟ اكو عنبر عدكم هساع ..؟ وأشلونه النخيل ..؟.. والسمج والبني و الشبوط و الزبيدي و الطابك والمحرّش والمسموطه..وخبز ألتمن وكيمر ألسده وباسطرمة القوش وراشي الموصل وبرحي ألبصره ومن السما دهوك ..أكو هساع ..؟ لو بدلتوهم بالمالكي وعلاوي والمطلك ..؟..هسا بالله شتكولون لنسوانكم من تزعل ..؟ كومي أكلي دبس ..؟ هو وينه الاستغفر الله ..؟.. . الخدمات :كولولي بالله همين ترش الكم ألبلديه العصر الشوارع بالماي حتى تبرد ..؟ حتى تأخذون راحتكم من تلعبون بوكت الأصيل طاولي وآزنيف ..؟ ومن يتأخر عن ألنومه واحدكم ويشوف سيارة نجده ياخذوه للبيت بطريقهم ..؟ لو يأخذوه للقلق ..؟ وإذا مقندل يتناوشون ورقات من اقرب سعفه حتى يعلسهن وتروح ألريحه حتى أتصير أنفاسه ما تضايق زوجته ..؟ لو يقيمون عليه الحد ويطبقون عليه فتوى الزيدي ..؟.. كولولي همين تصبحون على فيروز وهي تشدو : يخرب بيت عيونك.,. يعليا شو حلوين ..؟.. وتنامون على صوت أم كلثوم وهي تصدح : أنت عمري ..؟.. لو تفكون عيونكم على مفخخات وتغمضوها على مشاتم رؤوسا الكتل ألسياسيه ..؟.. زين الفساد واللذي منه : انتم شايفين صورة عبد الكريم فارش يطغ على الكاع ..؟ لو اوديلكمياها ..انتم بالله سامعين بسفرطاس عبد الكريم لو احجيلكم قصته ..؟ بالله همين سمعتوا عبد الكريم موزع الأراضي على المسئولين ..؟ لو مسجل بيت باسم أخته ..؟ لو معين ابن أخوه وزير وابن خالته سفير وابن عمته مدير ..همين اسمعتوا عبد الكريم قال يوما انه شيعي ..؟ سني ..؟..لو من يصلي يسد الباب ..؟ بالله كولولي عبد الكريم من يا عشيره ..؟ طبعا هذي مو سجايا مقتصره على عبد الكريم ..لا.. على ناسه همين.. إلا من كانت طينته خبيثه من أول مره ..منين أجتي هذي القيم ..؟ ..من الشعب.. بذاك الوكت ..يعني نسخة ذاك الوكت .. . إنشاء الله واحد يجي يكول : التحول حصل عن تلك القيم اعتبارا من 9 /4 /2003 ..؟ لا ..يابه .. التحول حصل يوم 8 شباط 63 ..وإلا جيبوهم من ذاك اليوم صعودا.. تلكوهم غبران .. لكن بعد تاريخ 9 /4 /2003 اجو غبران من نوع آخر..بس غبرتهم ما ينلبس عليها أهدوم .. انتم ينسخة هساع مما استحدث وممن ترشح من نسخة كبل ..واللي كان يشكل منتجات مرفوضه ..شنو دوركم بصنع ألمشكله ..؟ نبدأ بأقلكم شوائب .. اليساريين مع بعضهم ..حيه وبطنج .. بيانات رنانه ومفردات مستله من خطابات عام 59 لكن شنو الفائده..؟ ..واحدكم ميسمع غير نفسه ولا يستوعب غير ذاته .. التقدميين مع بعضهم يشوف إبليس ولا يشوف صاحبه .. الديمقراطيين كل واحد تحت نجمه ..الوطنيين بس ينوحون وعيونهم اتبجي ..من القهر .. وكلكم أتصيحون : يا ريل صيح بقهر ..يا ريل .. يابه مو ذاك الريل جان متري وعلى النفط الأسود ..وهذا طبعه هسا صارت الريلات ..عريضه وتمشي على الكهرباء بس مو عدنا ..لأن إذا يسوون القطارات عدنا على الكهرباء شهرين ما توصلون البطحا ..يكمّز القطار مثل الكنغر تبعا لانقطاع كهرباء ألوطنيه .. لا..مو بس تصيحون ياريل صيح بقهر .. واحدكم من يحجي لو يكتب يختتمها بقوله : إن غدا لناظره قريب ..! ونكلبها على البطانه ..يا بطانه ..؟ يا بطيخ ..؟وانتم واحد ما يقبل الآخر .. شنو يابه عدكم أحزاب وتيارات ..؟ اعرضوا الأسماء حتى نشوف ملاك كل واحد من تياراتكم وأحزابكم ..؟.. . إما إذا ألحجي صدك ..؟ يالله كل واحد يرفع أيده ويكتب اسمه من اليوم ويكول نخوض البحر تحت راية حب الوطن والناس ..فقط لا غير .. وعندها يستحق كل منك أن انحني له وأقدم التهاني بمناسبة 14 تموز ..عدا ذلك ..فاني انحني حتى تلامس جبهتي التراب احتراما للنسخة التي صنعت تموزا والنسخة التي فجرت تموزا والنسخة التي لازالت تعتمل في ضمائرها ..قيم تموز ... . نسخه منه إلى :صديقيّ محمد علي الشبيبي ورعد الحافظ الذين ( أعادا ألي الشوق القديم ولم أكن ..سلوت ولكن زادا جمر على جمر ..) وللديمقراطيين من كلب ورب لا مؤدلجين ولا محنطين ولا حيه وبطنج ...





التعليق والتصويت على الموضوع في الموقع الرئيسي


التعليقات

1 - أقتراح
علي الشمري ( 2011 / 7 / 14 - 22:12 )
الاستاذ الفاضل موسى فرج المحترم
أذا هيج انته متمسك بنسخة قبل ,ليش ما نستنسخه ونوزعه على الشعب العراقي للاطلاع على محتوياتها ومضمونها ؟بس هم اكو مشكله بالموضوع ,منو راح يتحمل تكاليف الاستنساخ ومن الذي يقوم بالتوزيع, قربة الى الله تعالىلو بأجر مجزي,والاجر هذا يستقطع من قوت الشعب ,لو تحويل خارجي ,ووين راح نلكه ,الضمائر مثل نسخة قبل حتى تحتفظ بيها وتتخذ منها منهاج عمل ,وشلون راح توفق بين الحية والبطنج,وبين الروؤس المؤدلجة أذا يوميا تسمع بتشيكله جديده, بس ما تعرف من هم وأين يتواجدون ,على المريخ ,لوعلى القمر,وأذا هم لحد الان ما متفقين على لون ومعالم الراية شلون راح يوكفون تحتها
تقبل تحياتي

2 - العهد الملكي
رعد الحافظ ( 2011 / 7 / 14 - 22:13 )
أمّا أنا ؟
( فسقفُ بيتي حديد وركنُ بيتي حجر, فإقصفي يا رعود وأهطل يا مطر)
كل مقال أكتشف صفة حلوة فيك واليوم بتقيمكَ ل 14 تموز أضيف الوسطية والعقلانية الى صفاتك السابقة والتي أبرزها صوتك الصارخ ضدّ الفساد
*****
البعض من محبي الزعيم كريم يبالغ في ذمّ العهد الملكي وينسى أو يتجاهل ( سبب ) ترحّم العراقيين عموماً على تلك الأيام
يعتبر العهد الملكي فترة تخلّف وظلم , لكن لو رجعنا لصور بسيطة عن ذلك العهد وقسنا منطقياً تطوّر الأمور منذُ محاولات فيصل الأوّل القضاء على الطائفية وتقريب الجميع (مع إعترافهِ بصعوبة ذلك ) , إنتهاءً بمجلس الإعمار الذي أسسّه مليكنا الشاب فيصل الثاني , ولن اتحدث عن عهد أبيه (الملك غازي ) , كوني لا أحبّهُ وأحسّهُ أهوجاً رغم وطنيته الظاهرة
أقول هؤلاء المُعادين للعهد الملكي لا يقيسون الأمور حسب التطوّر المنطقي المتوّقع بتلك السياسة والمسيرة الملكيّة المتوازنة !
نعم قامت ثورة تموز بالإصلاح الزراعي وتحييد الإقطاع , لكن ذلك كان حتماً سيحدث في العهد الملكي وإن بطريقة أخرى ,غالباً تشبه الطريقة الأوربية التي وصلت بدولها برّ الأمان
لاحظ انّ المجتمع لم يكن (دينياً منغلقاً )

3 - طبيعتنا العراقية
رعد الحافظ ( 2011 / 7 / 14 - 22:16 )
لاحظ انّ المجتمع لم يكن (دينياً منغلقاً ) ولا ( ثورياً مؤدلجاً ) وهذان الطريقان أو الشعاران هما من جلبا الدمار الى العراق وكل البلدان التي إجتاحوها , أقصد رجال الدين والأحزاب الشموليّة والعقائدية !
بالمقابل هناك ( البعض ) يصادر كل حسنات ( أو الأدق النوايا الحسنة ) لثورة تموز بالإصلاح والنهوض ويلخصها بحادثة مقتل العائلة المالكة وما فيها من دموية بشعة يندى لها جبين الإنسانية فعلاً
أنا أقول كما يقول معلمنا المشترك علي الوردي , العلّة الاساسية فينا في الشعب عموماً وتلك المبالغة وحجم التناقض في صفاتنا الناتجة ربّما عن صراع الحضارة و البداوة أو الجو أو مجموعة أسباب مختلطة لاندري
اُستاذ موسى / تناولكَ لذكرى 14 تموز اليوم رغم لهجتك الشعبية المحبوبة , كان متميّزاً في ظنّي وعقلانياً الى حدٍ كبير
كلّما أتذكر أوّل مرة شاهدتكَ في التلفاز ولم أكن أعرف حتى إسمكَ وأنتَ تفنّد أدعاءات البعض بطريقة الواثق من نفسهِ وتتحدى الجميع , أضحك مع نفسي حيث قلتُ وقتها / هاي شنو ؟ أكو هيج رجل بالعراق ؟
لعد ليش ماعدنا حظّ ( إحنا العراقيين ) بحيث ساستنا الفاسدين مستعدين على الدوام لبيع العراق خردة وسكراب

4 - هذا عَلَمْ .. يا قوم
رعد الحافظ ( 2011 / 7 / 14 - 22:28 )
لعد ليش ماعدنا حظّ ( إحنا العراقيين ) بحيث ساستنا الفاسدين مستعدين على الدوام لبيع العراق خردة وسكراب تحت الطاولة ؟
بحيث صدك سوونا زولية مداس لملالي إيران وبراقش الكويتية وغيرهم
يشكوّن علمنا أمام الكاميرات , لعد وينه سعد البزاز من كتب مقالة في الثمانينات / هذا علم عندما قام القطريون بتمزيق العلم العراقي في الهند ؟ أتذكر عبارته لم يكن منصور ولا مفتاح ذاك الذي تسلل أبوه ليلاً فعبر مياه الخليج العربي ليجد له وطن ... عاد لاذيج الطربكة ,ولا هذا السكوت المذّل المقيت اللي يشلع معدتنا من مكانها , شويّة وسطيّة يا قوم
بس أرجع أكول لنفسي مايكفي واحد مثل موسى فرج , ولا حتى ألف , المفروض الغالبية تسير بهذا الخط والسلوك , حتى تكون الأقلية فقط , فاسدة ومكشوفة ومعزولة
يعني الخلاصة لازم المعادلة تنقلب الى العكس من حيث النسبة
******
شرف كبير لي أن تذكر إسمي في مقالك وأن أكون داعيّة للتعريف بكَ مع أصدقائي وقرائي المحترمين
أتمنى أن تنال مقالاتك المرموقة المكان والوقت المناسب في عرضها في موقعنا الحبيب الحوار المتمدن
شكراً لجهودكَ المخلصة على الدوام

5 - يوكفون بالشمس..
موسى فرج ( 2011 / 7 / 14 - 23:28 )
الاستاذ علي الشمري المحترم ..طبعا اكثرهم يشتموني الجماعه.. بس ماتوصل ..اتذكر امي الله يرحمها ويرحم والديك من تنذر حتى شغله اريدها تصير وما تصير أكوللها شو هذا صاحبج ما سوا الشغله النذرتي له على مودها ..تقول لي : يمه مو انت ما تعتقد بالنذر ..هسا انا ما اعتقد بالشتايم .. وهمه همين ما ينسمع منهم لأم ما عدهم باسوورد الشتايم ..انا مستعد اروح ألهم واحد واحد غير يتفقون ..؟ لا وداعتك ..بس تحجي ويا واحد يجيبها من ارسطو وانت جاي ويطلع الاخرين كلهم زط ..شنو الموضوع شنو الخلاف ..؟ بالضبط مثل الجماعه الثانين واحد يكول جان المفروض فلان يصير خليفه اول مره والثاني يكول لا..فلان ....يابه هسا بالخيال العلمي شلون واحد يمشي بالزمن ليكدامعرفوها ..لكن يرجع بالزمن كري ..حتى بالخيال العلمي ما مكتشفيها ..اشلون انحلها ..يكلك الحل انا احكم ....ليش انت ابو سبالات تقارن نفسك بفلان ..؟ وخر عابت ها الدعاديع ..الجماعه نفس الشي مال يتفقون على علم ..؟ ما يسووها وبالنتيجه ما يكوفون تحت علم ..يوكفون بالشمس ...

6 - اخي واستاذي رعد الحافظ ..
موسى فرج ( 2011 / 7 / 15 - 00:21 )
العراقيين نسخة هسا ..روح شوفهم هم يحجون على الموامنه من الصوبين على اساس تمسكهم باحاث من الماضي ..بس همه اضرب واضربين واحد يكول ثوره وواحد يكول انقلاب ..واحد يكول جريمه بنظرنا وثوره بنظر الاخرين ..واحد يكول الملك شاب ..الاخر يكول لا يابه لأن هاشمي ..يابه يمعودين حدث حصل في ظرفه وزمانه الوطن والشعب اهم من ملك فيصل ومن عبد الكريم قاسم اللو متتصرف هسا جان كلنا لو باقي العهد ملكي احسن ولو باقي عبد الكريم احسن كولولي الثوره الفرنسيه والبلشفيه وثورة ماو وحركة جمال عبد الناصر همين يناقشوها مثل مناقشتكم لو يشوفون حالهم ويتقدمون للامام ..؟هسا انتم بنظام حكم احسن من الملكي ؟ احسن من عبد الكريم ؟ لو مو احسن من ذاك ولا ذاك يابه وطنك صاير خان اجغان ، شعبك صاير يخني ..سفينتك راح توكع من شلالات نيكارا انت شنو موقفك من اليوم حتى تكون مؤهل للحكم على تصرفات من مضى ..؟اذا موقفك وطني ..؟ شوفنا توجهك ..فعلك ..قولك ..وبهاالحاله حقك ..بس مال انت من يطير الغراب طرنا وياه ومن يحط الغراب حطينا وياه ولسانك وقولك وفعلك مربوط بجيبك لو تعصبك لو بعثيتك لو تتصور نفسك فولتير ..لآ.. احنا عدنا مقياس سهل كلش الوطن .. ..

7 - تتمه ..
موسى فرج ( 2011 / 7 / 15 - 00:36 )
والناس مفردها انسان يعني اللي حريص على سلامة وطنه وكرامة وطنه ويحترم الشعب ويحترم خيارات وحقوق الانسان... هذا مقياسنا سهل كلش هذولا العهدين الملكي والقاسمي كان العراق كوطن خلالهما محترم ..الانسان تعرض ولكن نسبة الى الذي حصل لاحقا لعهد عبد الكريم قاسم.. الامر لايمكن قياسه .. نزاهة واستقامة الحكام ضمن العهدين يعتبران قياسا للي تشوفه عينك ملائكه.. الراح ما يعود والمات ما يرجع ..كلي باليوم وباجر ..اشناوين ..؟تبقون هيجي اتصيرون مثل اهل بيزنطه ترا عراقكم يتبزنط ويصفى الماي عليه.. تصحون لو ما فاز الا النوّم ..؟كل المحبة لك اخي وصديقي ابو سيف ..

8 - اختلاف القراءات
مازن البلداوي ( 2011 / 7 / 15 - 07:06 )
العزيز المحترم الاستاذ موسى فرج
هذه المرثية هي من المرثيات القلائل التي كتبت بحق العراق ورغم اختصارك
لسماتها المميزة الا انها واضحة وجليّة ، وتعكس اسباب النكوص الحقيقي للعراق بعدما عمل الجهاز السياسي عمله مذ تسنّمه السلطة بعد 1963، وإشاعة قيم القومية وتأمين المحيط لعمل الفكر الديني، وهذا ما وصلنا اليه هو نتاج لعمل سنوات طوال كانت العمل فيها على تغيير الأجيال التي عاشت تلكم الفترة واخضاعها للتغيير الفكري وسط عجز او شلل تام لتواجد اي من التيارات الاخرى...... الحديث طويل
ودعوتك لِلَمّ الشمل هي ليست الاولى ولن تكون الاخيرة حسب تصوري، الا اني ارى بأن العراق مقبل على احداث لن ينفع معها لم الشمل وأنها تجري الآن وأمام اعين الجميع وليس من ساكن يُحَرَّك الا اليد كي تُبْعِدَ ذبابة تحاول الوقوف على انف احدهم
من الواضح ان العراقيين اصبحوا ديمقراطيين ومانراه من عدم تحريك ساكن هو اقتناع الاغلبية بان مايجري هو مُوافَقٌ عليه
هذه قراءتي وارجو ان تكون قاصرة
ولدي سؤال لم احصل له على إجابة مقنعة لحد الان
لماذا ارتضى العراقيون بتنصيب الملك فيصل الاول، بينما رفضته سوريا ولم تسانده؟
تقبل احترامي

9 - يا محلى العشق الوطني بعون شعبه ؟؟
ذياب آل غلآم ( 2011 / 7 / 15 - 07:07 )
استاذ موسى اريد اسولف خارج السرب ، ماكتبته اتمنا ان يستطيع احد الفنانين العراقيين المخلصين موش (كاولي على كولتك) ويحاول هذا الذي كتبته الى اوبريت موسيقي ومسرحي ، صدقني يا استاذ موسى ما كتبته قصيدة ساحرة من نشيد للوطن والناس نسخة اصلية ونشيج بالآهات والدموع النسخة الحديثه ذيول وشياطين مابين الجيب وهز الوسط ويمكن (افوافج) حسب الكاسيت للمحتل ؟ ارجع واقول ياليت احد المخرجين المسرحيين ان يتحول هذا النص الرائع لمسرحية ومعها (سنغرافيا ) بالصورة والصوت والجملة اللحنيه ما كتبته عزف من الروح للروح ولكل مخلص وعاشق للوطن وللناس وللحب وللعصافير او للزرازير هي هم يسيرين هل ايام زرازير البراي ؟؟ لك ارفع نخب العشق العراقي وانا قريب منك وبعديا جغرافيا والماعنده وطن ما عنده سماء ؟ وانا يا استاذ موسى مع العراق حتى لو صار ضد الله ؟ لك محبتي وبصحتك نخبي من شمس الحمية الوطنية العراقية قبلاتي

10 - الاستاذ مازن البلداوي المحترم ..
موسى فرج ( 2011 / 7 / 15 - 16:26 )
لماذا ارتضى العراقيون تنصيب الملك فيصل بينما رفضه السوريون ..؟ سأقول لك مستندا الى معرفتي بطرف الشليله الثاني : طبعا اختيار المرحوم فيصل ملك على العراق كان اختيار وقرار انكليزي وهم المسيطرون على العراق لا اختيار عراقي ولا ابن عمه في ذاك الوقت الانكليز حاطين ثقلهم على شيوخ العشائر ولا يطيقون المثقفين والطبقة الوسطى.. شيوخ العشائر بيهم طبع نجس مال يقبلون يحكمهم منهم ..؟ لا..بدافع الحسد وبدافع تصور كل واحد منهم لنفسه هو وبس والجانب المهم انهم يسعون لاظهار انفسهم مهمين امام عشائرهم لفرض السطوه عليهم ، الانكليز انغوله يعرفون هذي النوازع ..كالولهم الملك انتم تختاروه ويصير الكم خادم ..الشيخ حتى هسا اذا اجا خبر من دولته يريدهم.. يخلي اهله بدون مصرف ويخسر ويتحمل الحر والبرد ويجي مو حبا بدولته ..لا..حتى من يرجع لعشيرته يكوللهم: دولته عزمني ويخشش بذهن ربعه ان دولته ما يفل التجه الا ياخذ رايه ويكوللهم انا جنت معزوم عند دولته ولو شايفين الاكل والخدمه ..؟ وهو في اغلب الظن ملطوش بالاستعلامات الخارجيه يغفي وموزعين عليهم لفات همبركر وميرندا ومن يكتمل حضورهم يدخلوهم بقاعه ويجي دولته يحجي حجايتين ...ن

11 - تتمه ..
موسى فرج ( 2011 / 7 / 15 - 16:46 )
هذا طبع الشيخ وشفتوهم اشلون يتمركصون بحضرة صدام وذاك من ذاك اللي احترم نفسه وهسا نفس الشي ..انت جرب كوم هسا لشيخكم وكله اريد اشتري سياره بس كلشي ما افتهم بالسيارات وما اميز بين السياره والهايشه يكوم وياك ويفتر بيك العراق ويوصل الى اربيل ودهوك وحتى يخسر عليك كراوي لكن هو يختار وهو يعامل وهو يشتري لكن ان تروح انت تشتري سياره بمعرفتك حتى لو كانت سيارة وليم العرس ذاك اليوم يطلعها الشيخ ما تسوى عانتين ..راحو الجماعه الشيوخ على اساس يختارون الملك ..!هي اكلاوات الانكليز.. بقوا الجد يسولف للحفيد آنا اللي اختار الملك ونصبه ..!بسوريا الفرنسيين هم المحتلين وما يريدون طاري الشريف ونسبة العشائريه بيهم اقل مما هو عليه الحال في العراق والمتعلمين يريدون ان يحكموا انفسهم رفضوا الملك ..الاردن مثل العراق همين العشائريه طاغيه ..لهذا السبب نكول ياعراقيين ترا اذا الشيخ يسيطرون يبيعوكم بلفة همبركر في استعلامات دولة المسؤول وما يطول اغطاكم ..استاذ مازن ..الشيوخ خوب ميقرون الحوار المتمدن ..؟ أيه أشوا ...

12 - بعد همين تتمه ..
موسى فرج ( 2011 / 7 / 15 - 17:14 )
بالمناسبه :تعرضت لمحاولة اختطاف باول اسبوع بالعهد الديمقراطي ..اشلون ؟ واحد من جماعة الجلبي ويعذرني ابو هشام يفتر بالمحافظات يشتري سيارات مبيوكه من دوائر الحكومه ويبيعها بغير مكان ليش ما واحد من ابناء عشيرتي اخذ فلوسه وطرده ما يهمه الدرزن باجات المعلكهن بحزامة..ولا بهاي اللاستيكه الحاطها على ركبته خاف ينجبح ..وصلني الخبر يابه اليوم لا تبات ابيتكم ترى تنخطف لو بالليل لو الصبح ..ليش يابه ؟ ايه مو حتى يكسرون خشم العشيره والمدينه .. وياخذون السياره وفوكها حشم كلتلهم : جا شيخي ايكيف ..لاني ما اعترف لا بيه ولا بشيخته ..نمت بغير بيت وقبل الشمس انا اتلبك بالدوره وكبل على مقرهم ..هاه ..؟ كلتلهم عمي ليش جماعتكم يخطفوني ويحطوني بالصندوك واحتمال اختنك وخطيه ..انا أجيتكم تخطفوني اهناه ..انخبصوا اشتغلت الثريات بوكتها ماكوا موبايل ..ورجعت لهلي وحرام لو خاطفيني شيخنا ما يطالب ..شنو جوابه ..؟ ليش هو يعترف بعشيره ؟ بشيخ ..؟

13 - راح ذاك العشك ..يا استاذ اذياب ..
موسى فرج ( 2011 / 7 / 15 - 17:33 )
أخي وحبيبي الاستاذ ذياب آل غلام .. ذاك العشك راح يخويه وصار بمكانه مسج لي ومسج لك ..شيلني واشيلك ..حاصص لي واحاصص لك ..ويضربه بوري ..انت انشاء الله ترجع وتشوف لا عذري بقى ولا افلاطوني ولا الريل وحمد ..هذا الحجي مال ذيج النسخه ..هسا هاي النسخه يورق أيه ..عبد الامير الحصيري بالـ 970 يوكف على منصة اتحاد الادباء يكوللهم ترا اذا انتهيت سياسيا آنا ما انتهيت وطنيا ..هسا صارت سياسه واشلون سياسه عيني؟ ..فن الممكن ..لا قيم ولا ثوابت ..وكل تموز وانتم بخير لمانشوف وين توصل ..كل المحبة لك والتحايا ...

14 - هذه الحكاية
سرحان الركابي ( 2011 / 7 / 15 - 20:42 )
السيد موسى فرج تحياتي واتمناتني لجهدك المتواصل
قد يكون من الضروري ان تكون لكل مرحلة رجالها وملابستها وظروفها
وفي هذه المرحلة بالذات نحن بحاجة الى ادراك المشاكل الحقيقية التي تواجهنا دون اللجوء الى التبسيط
ومن الضروري جدا النزول الى جذر اي مشكلة وتحليلها تحليلا علميا
اما وصف المشاكل ورفع الاصوات وكثرة الصراخ فعلا اعتقد ان ياتي بحل جذري لكل مشاكلانا
تحياتي وتثميني لجهدك

15 - السيد سرحان..
موسى فرج ( 2011 / 7 / 15 - 21:47 )
اكو طريقتين للتعقيبالاولى :ان تسأل.. والثانيه : ان تصحح او تضيف ..الحاله الاولى تفضل السيد مازن :لماذا قبل العراقيون فيصل فيما رفضه السوريون ..؟ الحاله الثانيه تفضل السيد رعد الحافظ.. في الحالتين تكون قد قدمت ما يفيد وشاركت بايجابه ..تعليقك لا من الحاله الاولى ..؟ ولا من الحاله الثانيه ..اما ان يكون لك رأي في نبرة الصوت او درجة الحراره.. فقد لا تجدها فيما اكتب وتجدها في مكان اخر وهو امر متاح لك في هذا الموقع على الاقل ..اما ان تريد مقالات توصاه فاعتقد ان ذلك يكون متاحا لك عندما تكون رئيس تحرير صحيفه فبامكانك ان تطلب ذلك ممن يعملون تحت يدك بصفة دائمه او بالقطعه ..مع تحياتي

اخر الافلام

.. فيديو يتسبب بإقالة سفير بريطانيا لدى #المكسيك #سوشال_سكاي


.. فيديو متداول لطرد السفير الإسرائيلي من قبل الطلاب في جامعة #



.. نشرة إيجاز - مقترح إسرائيلي أعلنه بايدن لوقف الحرب في غزة


.. سلاح -إنفيديا- للسيطرة على سوق الذكاء الاصطناعي




.. -العربية- توثق استخدام منزل بـ-أم درمان- لتنفيذ إعدامات خلال