الحوار المتمدن - موبايل
الموقع الرئيسي


( دنيه وعسرت )

حامد كعيد الجبوري

2011 / 8 / 23
الادب والفن



لا تكتب قصيدة وتنتقد مسئول..
القصايد للمدح مو للشتم تكتب
وإذا أتعرفه حرامي كول أنظف أيد..
وهم شايف سياسي أيسلب وينهب
وإذا يبني قصر من دمعة المحتاج..
الفقره أتبرعتله وعالدمع يركب
وأبد لتظن يحرمك كهرباء أبيوم..
من حرصه علينه أيخاف نتكهرب
وجريمه الحصه ينطي وبالرجل تنداس..
وحرام أتخيس عدنه وبالزبل تنذب
( حيدر ) مو سياسي وباك حب الناس..
ولأن باك الكلوب أتشرعت ينسب
ولأن ربك حجبها الدعوة المظلوم..
جار الظالم بأحكامه وأستجلب
---------------

السياسي أبكد صلاته يحفظ القاصات..
( خوب )1 الخيره تحجي سبحة الكهرب
أنهجم بيت السياسة الهدمت أركان..
وقسمت للبشر قوميه وبمذهب
وهجم بيت السياسي اليصعد اعله الروس..
وتناوش الكرسي وبالبشر يلعب
فرحنه الصنم طاح وما ترد أصنام..
وكلنه الراح راح وخيرنه أتكرب
لتلوم السياسي أشبيده هم ايصير..
مصباح ويفركه أيحقق المطلب
وشيصير السياسي أبكل حلك مسئول..
يشبع للفقير أبجيبه المخرب
خطيه أبطرك راتب ما يسد يومين..
وعليه شرهة بشر شيوكل أشيشرب
أمدلل هالشعب ما ننكر المعروف..
وحكومتنه حريصه وأدت المطلب
أشحلاته البرلمان النال حب الناس..
لعبونه دعابل مرصع وطنب
حرموها النفسهم والشعب سلطان..
يزقونه الزلال وتمر المرطب
شيريد الشعب أكثر بعد شيريد..
كلشي أستوردوله وما بعد يتعب
ركي والحلاوه وموطا بالفستق..
رمان وعنب وخيار والأطيب
مضايف للفلح فتّح لجل ترتاح..
شتفيد الزراعه ونخل يتكرب
وشنو نفع الصناعه معمل وجاكوج..
يوفر البضاعه أمسلفن أمرتب
يسرط للنفط يستورد البنزين..
من أفضل وقود أمسرطن أمنضب
خلف الله عليهم جونه بالتدريج ..
نزلونه الجهنم ما بعد تصعب
مسئولين بينه ويبري ذمتهم ..
غداً نمشي أبجهنم عارف أمجرب
وحرام أتريد منه أيبوك بيت المال..
يعمر حزبه بيها وكلمن أتحزب
صلاته التمنعه والسبحه واللحيه..
وباجر للحساب أشيعتذر للرب
ربهم ماهو ربنه والسماحه البيه..
ربهم حيل قاسي أبسطوته أمجرب
غربي مره ربهم مره مدري أمنين..
عكارب والمثل لا تامن العكرب


لا ( أسناد) ينفع باجر و(صحوات) ..
قرينه الممحي زين ودرسه يستوعب
المؤمن من جحر ما يلدغ مرتين..
سفينتكم خراب وما بعد نركب
سواد أوجوهكم بيّض أوجوه هواي..
غسلتوا للزنيم العار والأجرب
ما نكدر نقارن بالأمس واليوم..
أشحفر ساسه الشعب بيديكم أتخرب
كراسيهم خشب وأمريكه أرضتها..
طيحت جم عرش بيه حاكمه جلب
يتهدم الكرسي المنبني أبلا ساس..
ودمعات اليتامه أمن الجمر ألهب
يرتج العرش من دمعة الأيتام..
وعلى أدموع اليتامى الكون ما يحجب
حيدر ما ملك كرسي الخشب هيهات..
كلب فوك الكلوب وعرشه يتنصب
-------------
يا ربي الستر طاحت كصص للكاع
ومد أيد الرذيله الجائر وأذنب
يستر عالحرامي أيهادن القاتل..
السيوف أيحدها بينه وللخصم أرنب
تعلمنه الكفخ من كثرة الجويات..
دامنه المذله وبيه نتلقب
تتخورس زلمنه الكثرة الطكات..
لامومن حجه ولا ثاير أتوثب
ولا صاحب بخت ويصيح بينه الله..
ولا تصحى الضماير لا كلب يشغب
دخيلك يا علي ما تحضر الشدات..
ياهو الينتخي ويا كرسي يتعتب
مقفول الفرج وأنسدت البيبان..
طحنه أبغيرتك ما غيرك أمنتب
دخيلك يا علي (ألمن بعد مذخور)2..
معسره وطحنه بيها والطفل شيّب
---------------
1 : مفردة فارسية تعني جيد
2 : جزء من شطر للشاعر الكبير عريان السيد خلف





التعليق والتصويت على الموضوع في الموقع الرئيسي


التعليقات

1 - شيعتذر
زامل تايه ( 2011 / 8 / 28 - 16:11 )
شيعتذر كلي يغريد السلام شيعتذر
وهو كلب ابن كلب وحرامي
ساقط وابن الرذيله
شيعتذر عيني حمد شيعتذر
وهو ابن حسنه ملص
من الزغر يلعب بذيله
استشرف وصار الوزير
وبالديانه ابد مايحصل مثيله
واستشرفت حسنه ملص
عافت الدك والركص
ونست البوس وكرص
وتركت الني والبع
وهسه حسنه معتبره تلبس الشيله
تبجي هاي الكاع تتنخى الزلم
والزلم خويه يحامد
بالمشي تمشي هزيله
لاتلوم الناس تعبها الوكت
والحروب الماضيه الكانت طويله

2 - شيعتذر
حامد كعيد الجبوري ( 2011 / 8 / 28 - 16:22 )
شكرا استاذ زامل تايه لهذه البوح الجميل

اخر الافلام

.. قصيدة الشاعر عمر غصاب راشد بعنوان - يا قومي غزة لن تركع - بص

.. هل الأدب الشعبي اليمني مهدد بسبب الحرب؟




.. الشباب الإيراني يطالب بمعالجة القضايا الاقتصادية والثقافية و

.. كاظم الساهر يفتتح حفله الغنائي بالقاهرة الجديدة بأغنية عيد ا



.. حفل خطوبة هايا كتكت بنت الفنانة أمل رزق علي أدم العربي في ف