الحوار المتمدن - موبايل
الموقع الرئيسي


قصاقيص، اتجننت فى سجن المرج – 6

مايكل نبيل سند

2011 / 9 / 7
حملات سياسية , حملات للدفاع عن حقوق الانسان والحرية لمعتقلي الرأي والضمير


- وصول المجلس العسكرى للحكم بعد رحيل مبارك بيفكرنى بجملة أمل دنقل ”خلف كل قيصر يموت، قيصر جديد“. 2011/7/25
- أمل دنقل ”خلف كل قيصر يموت، قيصر جديد“، أما أنا فأقول لكم ”بعد كل مقال تقرأوه لى، أكتب لكم مقال جديد ‎:D‏“‏ 2011/7/25
- اللى كنت بقوله فى فبراير 2011 فى التقرير ومكنش حد مصدقه، دلوقتى التحرير كله بيهتف بيه... لو كانوا قالولى أتسجن فى مقابل كده، كنت اخترت السجن برضا كامل. 2011/7/25
- السياسيين الشباب فى مصر فى الفترة الأخيرة (آخر 10 سنين) متسجنش منهم لفترات طويلة غير كريم عامر (4 سنين) وبعديه أحمد دومة (سنة) وبعديه محمد عادل (4 شهور)... أنا كملت 4 شهور فى السجن، يعنى كسرت الرقم القياسى بتاع محمد عادل، وبقيت فى المركز التالت بعد كريم عامر وأحمد دومة... رع يسامحك يا مصر. 2011/7/25
- حاسس إنى مش قادر أعبر بحرية عن معتقدى الإلحادى علشان مخسرش التعاطف الشعبى مع قضيتى... الآن أنا أختار بين حرية تعبيرى وبين حرية جسدى من الأسوار. 2011/7/25
- الناس فى روكسى بيهتفوا ”عسكر عسكر يإما بلاش... مجلس مدنى مينفعناش“... ياااه، كإننا بالظبط سنة 1954، ومظاهرات عبد الناصر المأجورة بتهتف ”يحيا عبد الناصر، وتسقط الديموقراطية“! 2011/7/25
- اللواء حسن الروينى بيعترف انه روج إشاعات فى التحرير علشان يحجم الثورة... اللواء حسن الروينى هو الظابط اللى صدق على الحكم بتاعى بتهمة ترويج إشاعات.
سيادة اللواء: أتنهى عن خلق وتفعل مقله؟ عارٌ عليكَ إن فعلت عظيم. 2011/7/27
- حصاد 4 شهور فى السجن: قريت 17 كتاب (حوالى 3000 صفحة)، وبتابع 3 صحف يومية مستقلة، وبقيت بعرف أكتب جمل بسيطة بالألمانى، وكتبت 20 مقال... مين قال بقى ان الفترة دى ضايعة من عمرى؟! 2011/7/27
- كان نفسى أكون موجود فى تل أبيب اليومين دول، وأشارك فى الثورة ضد حكومة نتنياهو... نفسى أعمل واجب مع نتنياهو زى ما عملنا مع مبارك.. هع هع. 2011/8/1
- عجبى على الإسلاميين اللى رافضين وجود مواد فوق دستورية، رغم انهم ليهم 40 سنة متمسكين بالمادة التانية اللى هى فوق دستوري... شيزوفرينيا. 2011/8/1
- لما ظابط الجيش أحمد عرابى يفكر انه يردم قناة السويس، فدة عمل وطنى... لكن لما الشعب المصرى يفكر انه يعطل الملاحة فى القناة كام يوم، يبقى ده خط أحمر وحلف أمن قومى... شيزوفرينيا. 2011/8/1
- بفتكر باستمرار جملة امل دنقل: ”معلق أنا على المشنقة، ورأسى محنية... لأنى لم أحنها حية“... نعم، لم ولن أحنها حية. 2011/8/1
- مصر يتحتفل بأول رمضان بعد الثورة، وأنا بعانى من أول رمضان ليا فى السجن!
- منظر مبارك جوا القفص، منظر فضلت مستنيه من سنين طويلة... بس اللى مكنتش متخيله انى هكون محبوس فى نفس الوقت. 2011/8/3
- متفائل إنسانياً مع معاناة شعب حماة بسبب حملة الجيش السورى ضدهم... حماة دى كانت بيتى وبلدى لمدة شهر كامل (يوليو 2006)... قضيت وقت جميل فيها، خصوصاً عند برج الساعة والنواعير... كنت هنضرب فى كنيستها، وحكيت القصة بالتفاصيل فى مقالى ”اضطهدوا أعداءكم“... كنت متأثر لما بشوف مبانى المدينة كلها جديدة بسبب ان البلد كلها اتخربت فى حملة حافظ الأسد سنة 1980... اللى عاش فى سوريا، هو وحده اللى يقدر يفهم مدى شجاعة وعظمة الثوار السوريين. 2011/8/3
- واحد بيقولى ”قولى حاجة حلوة واحدة فى مصر؟“ قلتله: ”الثورة... الثورة أجمل حاجة فى مصر“... سكت شوية وبعدين كملت ”مايكل نبيل تانى أجمل حاجة فى مصر“... أموت أنا فى القلش ‎:D‏ 2011/8/4





التعليق والتصويت على الموضوع في الموقع الرئيسي


التعليقات

1 - الحرية لمايكل نبيل
هاني شاكر ( 2011 / 9 / 8 - 05:30 )


روحت ماشى حزين
والدنيا ضلمة و مخيفة
غُلبْ الزمان كله فىّ
جارر خيالات نحيفة
وتاه منى السبيل

الهوا لازق و زاعق
والميدان هايص و ناعق
تحيا الدقون والبيارق
يحيا المشير الرايق
ويسقط مايكل نبيل

رُوحِى ياراسى وتعالى
بلدى فى ايد الملالى
والمجلس بعيد و عالى
و العدل ضاع فى الفلالى
والسجن باله طويل

لابد من فَجر ليكى
يامصر بعد الظلام
وجيل جديد يفديكى
يملاكى عدل وسلام
ويمسح الدمع الجليل

اخر الافلام

.. البنتاغون يعلن البدء ببناء ميناء مؤقت في غزة لإستقبال المساع

.. أم تعثر على جثة نجلها في مقبرة جماعية بمجمع ناصر | إذاعة بي




.. جو بايدن.. غضب في بابوا غينيا الجديدة بعد تصريحات الرئيس الأ

.. ما تأثير حراك طلاب الجامعات الأمريكية المناهض لحرب غزة؟ | بي



.. ريادة الأعمال مغامرة محسوبة | #جلستنا