الحوار المتمدن - موبايل


قصاقيص، اتجننت فى سجن المرج – 7

مايكل نبيل سند

2011 / 10 / 10
حملات سياسية , حملات للدفاع عن حقوق الانسان والحرية لمعتقلي الرأي والضمير


- رغم انى اتسجنت بسبب الثورة، ولولا الثورة مكنتش دخلت السجن إلا إنى بتضايق جداً لما حد بيتكلم وحش عن الثورة... الثورة تستاهل كل تضحياتنا، المهم انها تكمل. 2011/8/6
- جريدة المصرى اليوم بقت المتحدث الرسمى بإسم المخابرات العامة، وجريدة الشروق بقت المتحدث الرسمى بإسم المخابرات الحربية... اللى لسه بحاول أفهمه: إزاى إبراهيم المعلم هو اللى بينشر الشروق وبينشر التحرير فى نفس الوقت؟ هل هى محاولة للسيطرة على إبراهيم عيسى؟ ولا إبراهيم عيسى متحدث بإسم حد تانى؟ 2011/8/8
- إمبارح زارنى هانى نظير... شخص جميل جداً، ودفع تمن غالى علشان خاطر آراؤه... هانى إتسجن 21 شهر، وكنت نسيته لما كتبت عن الشباب السياسيين اللى إتسجنوا فى آخر 10 سنين. كده أنا بقيت فى المركز الرابع بعد كريم عامر (4 سنوات)، وهانى نظير (21 شهر) وأحمد دومة (سنة). 2011/8/9
- مبسوط جداً ان فيه مسيحيين كتير بيدافعوا عنى، مش علشان هما بيدافعوا عنى، لكن لأن دفاعهم عن ملحد معناه ان فيه حالة من النضج السياسى بين أوساط المسيحيين. 2011/8/9
- المجلس العسكرى مش عايز يعمل حد أقصى للأجور علشان مرتبات ظباط الجيش اللى بتبقى أرقام فلكية... كده من الآخر، من غير لف ولا دوران. 2011/8/9
- عيد ميلادى 1 أكتوبر... يا ترى هقضيه فى السجن برضه؟ 2011/8/9
- الفضائيات بتستضيف اللواء عبد المنعم كاطو بصفته خبير عسكرى... مش عارف كاطو بقى خبير إمتى؟ أهم صفة فى الخبير إنه يكون محايد، وكاطو ظابط شئون معنوية، ومستشار للمجلس العسكرى، يبقى إزاى محايد؟ من فضلكم، إحترموا عقولنا. 2011/8/10
- رمضان اللى فات، لاحظت إن محلات اللانچيرى حطوا لانچيرى محتشم من أول الصيام... رمضان السنادى لاحظت اختفاء صور المزز من الجرايد! 2011/8/10
- رغم إن مش ده نوع الأغانى اللى بحبه، إلا إن ليدى جاجا أكتر مغنية وحشانى أغانيها جوا السجن. 2011/8/10
- السجن عملى فراغ عاطفى كبير... لما أطلع هبقى أرتبط بپاريس هيلتون علشان أعوض الفراغ ده ‎:D‏ 2011/8/10
- أرجو إن المجلس العسكرى يراقب اللى بيحصل فى العسكريين الأتراك على يد القوى الديموقراطية... إذا العسكر ملموش نفسهم، هيشرفوا السجون زى زمايلهم الأتراك. 2011/8/10
- أكبر جريمة بترتكبها الأجهزة الأمنية والمخابراتية فى حق نفسها إنهم بيستهينوا بيا، وبيتخيلوا إن الشاب الصغير الطيب ده قابل للسيطرة والتحجيم والمراقبة. 2011/8/10
- كل شوية الجرايد تقول إن الإسرائيليين والأوروبيين بيقلدوا ثورتنا... أساساً إحنا كنا بنقلد تونس وصربيا وتشيلى وأوكرانيا وفرنسا... مش إحنا اللى ابتكرنا الشكل ده من الثورات، إحنا مجرد ناقلين ومطورين. 2011/8/10
- رغم إنى مبحبش هتلر وبعتبره من أسوأ الشخصيات فى التاريخ إلا إنه عمل موقف بحترمه عليه جداً جداً... هتلر لما لقى نفسه إتهزم، إنتحر... الراجل كان عنده كرامة، ومحبش جنود العدو يهينوه... برضه إعترف بالهزيمة ومقعدش يعافر ضد الإنسانية... مش عارف أقارن ده بمبارك اللى جاى بدون كرامة يستعطف الشعب بمنظره على السرير... ولا عارف أقارن صراحة هتلر مع نفسه بأعضاء المجلس العسكرى ورجال النظام السابق، اللى مش راضيين يعترفوا إن الشعب عايز يسقط النظام، وعايز ناس جديدة تماماً... ياريتكم تتعلموا من هتلر، وتنتحروا بشرف زيه. 2011/8/10
- مظاهرات اليسار فى أوروبا وإسرائيل، بالإضافة للمطالب اليسارية للثورات العربية، كل ده بيقول إن السنين الجاية هتكون للإشتراكيين... ولا عزاء لليمينيين أمثالى. بس أنا سعيد باللى بيحصل، لأن صعود اليسار هيصعد معاه قيم كتير محتاجينها زى العالمانية والنسوية ومناهضة العسكرية. 2011/8/10
- أنا ارتكبت أخطاء فى الترجمة وللأسف الناس بتنقل الغلط عنى.
* كلمة pacifism ترجمتها الدقيقة ”سلمية“ مش ”سلامية“, يعنى مفيش حاجة اسمها ”فلسفة سلامية“, التعبير الدقيق ”فلسفة سلمية“.
* تعبير conscientious objection ترجمته الدقيقة ”الاعتراض الضميرى“ أو ”الاستنكاف الضميرى“، مش ”الرفض الواعى“... الرفض الواعى كان ترجمة غير دقيقة.
بعتذر عن أخطائى فى الترجمة، وأرجو من الناس التصحيح. 2011/8/10
- صحف وسياسيين كتير بيقولوا إن السعودية وإسرائيل بيعادوا ثورتنا... أنا شايف إن التعبير ده مش دقيق. شعب إسرائيل متعاطف جداً مع ثورتنا ومعجب بيها وبيشجعها، لكن حكومة نتنياهو هى اللى بتعادى ثورتنا... نفس الشىء فى السعودية، الشعب السعودى متعاطف لكن النظام معادى... لكن الفرق بين إسرائيل والسعودية إن السعودية ليها إيدين جوا مصر، وبتدفع تمويلات لكيانات سياسية علشان تجهض الثورة، لكن إسرائيل ملهاش إيدين جوا مصر تتحرك بيهم... يعنى حكومة نتنياهو بتعادى ثورتنا من بعيد لبعيد، لكن النظام السعودى مشتبك معانا فعليا... وفى الحالتين الشعوب بتحبنا وبتأيدنا. 2011/8/10
- ظابط المباحث، هو ظابط شرطة، كان طموحه انه يبقى ظابط أمن دولة، لكنه فشل، فجاتله عقدة نقص... والنتيجة انه بيعيش دور المفتش كرومبو، وفاكر نفسه طول الوقت أذكى من ألبرت أينشتاين... يع 2011/8/11








التعليق والتصويت على الموضوع في الموقع الرئيسي



التعليقات


1 - الى مايكل
عبد الرضا حمد جاسم ( 2011 / 10 / 10 - 19:41 )
انت واثق انه مفيش ايدين لاسرائيل في مصر المنخوره
ازاي يا عمده
ازاي وهي الي بنت السد الواطي فميدان التخرير(خ)مقصوده
ازاي يا خال وهي الي تنيل في المنيل يا بيه
السعوديه ياحاج اخت اسرائيل بالرضاعه
وقطر والثوار يخال هم الي مدوا الموبايلات الثريا للشباب وامهم اكبيره تشرف علتصالات
شاهد عيان ومن الميدان يا مايكل ترسل كتاباتك والامن العسكري يسمح بيها
باين انت في سجن خمس نجوج ياحاج
ادي ربك يفك اسرك وينصر دين العمده الطاوطاوطاوطاوي
ينصر....يا استاذ....
لك الحريه

اخر الافلام

.. برنامج للزراعة العضوية ينقذ أراضي ولاية أندرا براديش الهندية


.. فرنسا.. زهرة الكاميليا البيضاء تساعد على مكافحة الشيخوخة!!


.. رسائل الرئيس الفرنسي إيمانويل ماكرون في جنازة الرئيس التشادي




.. الهند تسجل زيادة قياسية عالمية بعدد إصابات كورونا.. ما السبب


.. ما هي قصة شارع القلعة في أربيل؟