الحوار المتمدن - موبايل
الموقع الرئيسي


( حزب الحمير ) قصيدة شعبية

حامد كعيد الجبوري

2011 / 10 / 30
الادب والفن


هنا يمن جنه وجنت
أمبارك وطنه الغابه
خلصنا من ليل الظلم
هدّت علينه (أذيابه)
***
هنا يمن جنه وجنت
السوك (الهرج) ودونه
عرضونه والبيعه شلع
وبرخَص ثمن باعونه
والمشتريه أتعززت
ع البايع أيردونه
يكولون ما نسوه (فلس)
ولا نسوه صم ترابه
***
هنا يمن جنه وجنت
(عاكر) وحبلت كوه
بالنذر حبلت والدعه
وربك حسبها مروه
شالت خشمها وشمخرت
ع الرَجَل صارت بلوه
أمدوهن يطلك حرمته
لو يصبح اللعابه
***
هنا يمن جنه وجنت
ميت وينده موته
كل (المطايه) أتشردت
من طبت (الستوته)1
لا زكط واحد وأنكسر
لا زعج نايم صوته
بالديخ يمشي ولا حرن
و(القمجي) فوك صوابه
***
هنا يمن جنه وجنت
ليش (المطي) يتسرح
ما عمل سايه ولا ذنب
ولا (كرن) عنده وينطح
خيط (الكراب) أمدستره
و( ناعور) مايه ينضح
(للهجع ) تركص رشمته
ولا فر عكس دولابه
***
هنا يمن جنه وجنت
من أجل هاي الغايه
مؤتمر تأسيسي أنعقد
وظيم (الحمير) هوايه
دروب الولايه (عنفصوا)
يردون حزب (مطايه)
يطالب أبحقه المغتصب
يا خذها من أحزابه
***
هنا يمن جنه وجنت
حكه (المطي) اليتحزب
ويفتحها بيبان الكسب
(للبغل) و(حصان) أجرب
دستور يكفلّه المقر
ويحمل فكر ومرتب
ولا همه يركض ع العلف
يترس شعير (جرابه)
***
هنا يمن جنه وجنت
حزب (الحمير) أتأسس
يناضل لجل خير الشعب
وللوطن يبني أتكرس
أمحزم ويغلب (طولته)
أيخاف المغانم يفلس
(للقاصه) حارسها الوفي
ويحفظها بين أهدابه
***
هنا يمن جنه وجنت
اليخبط لئيم ولاصه
للأمي صارت مرتبه
(المميه) و(المصاصه)
بالدرب ماشفنه ( المطي )
ونسمع وحيف أجراصه
ب(الرشمه) مشدوده وترن
وتهد علينه (أطوابه)
***
هنا يمن جنه وجنت
ذب (الزمال) (أجلاله)
يم (جون) فصّل سترته
ويزمط أبكثرة ماله
صاغ (العليجه) من (الذهب)
(الدولار) غير حاله
وتزوج بأحله (فرس )
وخلّف ( بغل ) حبابه
***
هنا يمن جنه وجنت
يا جرح يدي ويلحم
خمسه وثلاثين أنكضت
والعسر خلّف مأتم
دنيه وتفر بينه عكس
نزرع أهموم ونلهم
مسدوده بيبان الفرج
والفرح غـلَـك بابه
***
هنا يمن جنه وجنت
بين المضه وبين الجاي
جربنه ما شفنه الفرق
بين الرفيق ومولاي
يكعد يصفطلك حجي
وقدموا خيرا هواي
وأعترف زادوا مرتبه
من كثرة النهابه
***
هنا يمن جنه وجنت
من أيدك ومن أيدي
بالصبخه ما يطلع ورد
واليحدي بينه (أمعيدي)
نستاهل وأكثر بعد
حيل ومراره زيدي
والرايد أيضوك العنب
يحسب عدل بحسابه
***
هنا يمن جنه وجنت
مو بالدعه نتغير
نتوكل أنشد الحزم
وجفي أعله جفك يكبر
كل ظلمه يجليها الضوه
للكون فكرك نوّر
تهزم الشيطان الشمس
وتشرد السلابه
***





التعليق والتصويت على الموضوع في الموقع الرئيسي


التعليقات

1 - يستاهل حزب المطايه (تكرموا)؟
ذياب آل غلآم ( 2011 / 10 / 31 - 17:50 )
أبفـلـس ماصـــحاش بعـته بزانه
ومتحسف الشراي يركض ورانه
عشت يا أبا طيف : انها المغناة التهكمية المؤدبة جدا ؟ وهذا حزب الحمير ! يستاهل ان يجعل كل العراق طولات ومعالف !؟ والف مبروك ميخالف ...انه حزب القطيع ؟

2 - حزب المطايه
حامد كعيد الجبوري ( 2011 / 10 / 31 - 17:57 )
شكرا لتعليقك الجميل ايها الشيخ الجليل ذياب آل غلام وسلمت لنا

3 - لكل مئة الف عراقي حمار واحد..!!
أمير أمين ( 2011 / 10 / 31 - 23:13 )
الغالي حامد الجبوري رئيس إتحاد الشعراء الشعبيين في بابل
تحية وإحترام..والله قصيدتك بمحلها..لقد سر قلبي بها وهي تنسجم مع واقعنا العراقي الحالي وعلى ضوئها أقترح أن يكون في الإنتخابات القادمة حمار واحد لكل مئة الف عراقي إنسجاماً طبعاً مع ما تمخضت عنه نتائج الإنتخابات الأخيرة وصعود شكول وشكول ما أدري منين بحيث أنني صوبت النظر إتجاه هذه الشكولات بدقة حينما تسمرت أمام شاشات التلفزة ولم أرى إلاّ عدد لا يتجاوز أصابع اليد من الذين كانوا معنا في المعارضة خلال الربع قرن الذي سبق سقوط النظام..أما أعضاء مجالس المحافظات فكما يقال من كل زيج ركعة وما نعرف وين جانوا في تلك الحقبة التي إمتشقنا بها السلاح في كردستان وإستشهد مئات من خيرة شبيبتنا ما ينلام البلغار حينما رشحوا الحمار ماركوا أن يكون رئيس لإحدى البلديات لأنهم حسب زعمهم يفقه أكثر من أي رئيس بلدية بالشؤون العامة لذلك أصر على إقتراحي راجياً دراسته من قبل المفوضية العامة للإنتخابات وهي أن يكون لكل مئة الف عراقي حمار واحد..تحياتي لك وتسلم لنا

4 - تسلم
ابو زهير الغراتي ( 2011 / 11 / 15 - 14:11 )
هنا يمن جنا وجنت
نسلم جميله اشعارك
روحي اعلى روحك من تون
ناري جريبه النارك
امعاهدك كول اوفعل
وداري تعاهد دارك
ماننتخب واحد مطي
ونكضي العمر بطلابه

5 - لكل مئة الف عراقي حمار واحد..!!
حامد كعيد الجبوري ( 2011 / 11 / 15 - 17:32 )
أحبتي وأصدقتئي أبن عمي الشيخ ذياب آل غلام وصديقي أستاذ أمير أمين وصديقي الشاعر أبو زهير أعجز من أن أرد عليكم وبخاصة الأستاذ أمير لأنه يعرف التفاصيل أكثر مني بكثير وشكرا لصديقي الشاعر الفراتي الذي أضاف من عذب شعره ليستكمل معنى جديد لقصيدتي تحية لكم جميعا وتسلمون لي أحبتي

اخر الافلام

.. قصيدة الشاعر عمر غصاب راشد بعنوان - يا قومي غزة لن تركع - بص

.. هل الأدب الشعبي اليمني مهدد بسبب الحرب؟




.. الشباب الإيراني يطالب بمعالجة القضايا الاقتصادية والثقافية و

.. كاظم الساهر يفتتح حفله الغنائي بالقاهرة الجديدة بأغنية عيد ا



.. حفل خطوبة هايا كتكت بنت الفنانة أمل رزق علي أدم العربي في ف