الفيسبوك
التويتر
اليوتيوب
الانستغرام
لينكدإن
تيلكرام
بنترست
بودكاست
الحوار المتمدن
- موبايل
الموقع
الرئيسي
ثوره أونطه ...هاتوا فلوسنا ...
أسعد أسعد
2012 / 1 / 5مواضيع وابحاث سياسية
يسلم بقك يا شيخ مهدي عاكف ... قلتها و إنت رايق و ملعلع و مشعشعه معاك ... طظ في مصر و اللي في مصر و اللي جابوا مصر ... و ألف رحمه علي شهداء مصر الطيبين المخدوعين اللي دمهم راح هدر و هما فاكرين إنهم في ثوره بحق و حقيق ... آسف يا شيخ عاكف ... و إقبلها مني أسف بدموع ... عندك ألف حق ...و طظ في الثورة و اللي عملوا الثورة ... و يا خسارة شعب مصر إللي مخدوع في الثورة ...و قلبي مع حزب الكنبه المسكين اللي شايف و ساكت ... عين مفتحه و عين عوره ...المركب بتغرق و اللي عا الكنبه نايمين عنيهم مفتحه و مش شايفين و ودانهم مطرطقه و مش سامعين بينضربوا ومش حاسين ... أصل الحياة بالنسبه لهم ضاعت يومين بنقضيهم و ماشيين ...
ثورة عملها شوية شباب ضايع ... لا هوه مسلم و لا هوه كافر ... لا هوه مثقف و لا هوه جاهل .... لا هوه شبعان و لا هوه جعان ... شباب متعلم في أمريكا و أوروبا علي إيدين جمعيات حقوق الإنسان المدنيه و الديموقراطيه ...إزاي يقلب البلد و إزاي يخربها ... لكن ما عندوش أي فكرة إزاي يصلّحها و إزاي يعّدلها ... شباب يعرف إزاي يستخدم الكمبيوتر و المحمول و الإنترنت و يحط شعارات و يلملم بعضه من المدارس و الجامعات و من عا الأهاوي و من الشوارع و ينزل ميدان التحرير سرة البلد و قلب حركتها و مفتاح حياتها علشان إيه ... مش عاوزين مبارك ... طب عايزين مين ... هَــه ... طب ها تغيروا النظام إزاي ... هَــه ... طب مين اللي ها يمسك البلد ... هَــه ... أرحل ... إرحل ... إرحل ... الشعب يريد إسقاط النظام .... طب و بعدين إيه الخطة اللي عندكم لإقامه نظام سليم و رئيس شرعي من غير تزوير .... هَــه .... إيه تصوركم لشكل البلد اللي ها تبنوها من جديد بناء علي ثورتكم ... يسقط النظام ... ها تعملوا إيه في الإقتصاد ... إرحل .. إرحل ... إيه اللي بتهببوه ده ...هي ثوره مدروسه ليها مبادئ و ليها مخطط و الا مجرد هوجة شوية عيال ما وراهمش حاجه يعملوها .... لما إنتم مالكمش في السياسه و لا في الإقتصاد و لا في الإداره ولا بتقروا تاريخ و لا جرايد و لا حتي شايفين البلد حواليكم ماشيه إزاي ... عملتوا الهيجان ده ليه ... الإخوان مش معاكم ... الجيش مش معاكم ... الحكومه مش معاكم... البوليس مش معاكم ... إقتصاديين البلد و فلوسها مش معاكم ... مصانع البلد و عمالها مش معاكم ... أي قوه ليها تقل في البلد مش معاكم ... مخ مافيش ... تفكير ما فيش ... تخطيط مافيش ....قياده مؤهله و معدّه علشان تمسك البلد مافيش ....
شباب مغيب ... فعلا عملاء لأمريكا بدون وعي ... بس ما أقدرش أقول خربتوا البلد ... لأن إللي مش واخدين بالكم منه إن بيكم أو من غيركم البلد خربانه خربانه ... إنتوا .. للأسف .. مجرد شويه هوا نفخها الإمريكان في البلد اللي واقعة و آيله للسقوط علشان تتطربق علي اللي فيها ... إخوان و جيش و أحزاب و حكومه ... و خاصة الوطني بتاع رياسة الجمهورية ...
سؤآل بسيط ... ما فكرتوش ها تعملوا إيه في الجيش ... أفسد مؤسسه أخطبوطية في مصر ... أول ما نزل الشارع خدتوه بالأحضان و نزلتوا فيه بوس ... الجيش و الشعب إيد واحده ... يا سذج .. يا مغيبين ... يا جهله ... أهو الجيش إندار عليكم و قلع عيونكم و دهسكم بالجزم و الدبابات و شلح بناتكم و كشف علييهم و همه لابسين من غيرهدوم و عساكره بتتفرج عليهم ... عرفتوا إنكم شباب مندفعين و ما بتفكروش ... الجيش الفاسد نازل الشارع علشان يحمي مصالحه ... ضربكم بالفسفور و الكيماوي و الغازات ... الجيش و الشعب إيد واحده ... قبض عليكم و عذبكم في السجون ... الجيش و الشعب إيد واحده ... زي ما قال الشيخ مهدي طظ فيكم و في الثورة إللي عملتوها ... و طظ في المهللين و المصفقين و المطبلين و المزمرين و المهابيل بتوع التلفزيون و الفضائيات و بتوع الإنترنت إللي سموهالكم ثورة ... وطظ في العقول المغيبه إللي عملتكم أبطال ... إنتوا السبب في إللي ماتوا من غير سبب ... دمهم علي راسكم و في رقبتكم ... خربتم البيوت و رملتم النسوان و يتمتم العيال ... لو ما فكرتوش كويس و وزنتوا الأمور قبل ما تتحركوا ها تشوفوا بعنيكم البلد و هي خربانه منهاره و إنتم زي الفيران في الشوارع بتدوروا علي حته تستخبوا فيها من كلاب الجيش السعرانه و قططه الجعانه و هي بتأفشكم من كل جحر و من تحت كل حجر علشان تسلخكو و تاكلكو في عز النهار و علي مسمع و مرأي من وكالات الأنباء الأمريكية و جمعيات و منظمات حقوق الإنسان العميله المرتشيه و علي شاشات تلفزيون جمهورية مصر العربيه...
جيش مصر اللي إحتلها و اللي بتقولوا عليه فخر مصر و درعها اللي بيحميها ... يا أغبيا يا عديمي العقل ... الجيش عباره عن عصابة مافيا كوّنها و أسسها البكباشي بطل العروبه اللي خلي زنوبة أوسخ عربي تدوس علي راس أجعص مصري ... عبد الناصر عميل أمريكا الأول في الشرق الأوسط اللي محا إسم مصر و خلي أوساخ العرب أسيادها ... و ركّب علي راس كل مصري ظابط من عصابته إللي سماها جيش مصر و نهب بيها البلد ... بمعونة و مباركة سته و تاج راسه أمريكا اللي علّمته إزاي يجعجع و يضحك عليكم و إنتوا تغنوا و تقولو له ... ولا يهمك يا ريس م الأمريكان ياريس ... و هوه بيبيع البلد حته حته لإسرائيل و يرجع يعيط و يقول أيديكم معي ... و إنتوا تردوا عليه ...لا تتنحي ... لا تتنحي .... البدله الكاكي هتكت نساوينكم في عز الضهر و إنتوا بتقولوا عليه عبد الناصر يا حبيب ... الجيش مش فاضي للحرب ... الجيش يملك خمسه و أربعين بالمايه من إقتصاد البلد ... ضباطه متنغنغين في النوادي العسكريه ... و المنتجعات الحربية ... و الإسكان الفاخر في كل حته في الجمهوريه و كل ظابط عنده عربيه معلق عليها نسر الجيش لزوم المخالفات و المشي في الممنوع و أركن مطرح ما يعجبني و فتّح عينك تاكل ملبن ... إنتوا فاكرين الجيش بياكل العيش بتاعكوا أبو صراصير و مسامير ... الجيش عنده مخابز آليه و مطابخ عصريه .. الجيش عنده مزارع نموذجيه بيربي فيها بقر و بهايم و غنم ... و بيشغلكم فيها و إنتوا مجندين بيسوقكم قدامه زي البقر و الغنم ... الجيش يملك مصانع الإنتاج الحربي و بيبيع الإنتاج لحسابه الخاص .... الحكومه فيها وزاره مخصوصه إسمها وزارة الإنتاج الحربي .... أشيك وزاره و أغني وزاره في الحكومه كلها ....و ممنوع مجلس الشعب يراقب الميزانيه و لا جهاز رقابه إداريه و لا جهاز محاسبات ماليه ... عصابه ... مافيا ...عندكو فكره إيه هي الهيئة العربية للتصنيع و إيه قوتها الإقتصاديه في البلد ... الجيش مقاول بيشتري أراضي برخص التراب و بالأمر المباشر و في الحته اللي هوه عايزها لزوم الأمن القومي .... زي مافيا الحزب الوطني بالضبط ... و يبني عليها شقق إسكان فاخر و يبيعها بأسعار خياليه ... الجيش بيبيع سخانات و تلاجات و بوتاجازات و أدوات مطبخ و عفش ... الجيش عنده مصانع منتجات غذائيه ... الجيش بيبيع لحمه و فراخ ... الجيش تاجر سلاح و قطع غيار ...ضباط الجيش ليهم تسهيلات خاصه في كل مكان ... الجيش في كل معسكر فيه كانتين بيبيع للعساكر الغلابه المجندين أردأ أنواع الأكل بدون أي رقابه و بأغلي الأسعار ... المجندين بيشتغلوا سخرة في المصانع الحربية و في المزارع العسكريه النموذجية ... بيأكلوا البهايم و بيربوا فراخ و يلموا البيض ... الجيش المصري بيبيع بيض... الجيش دوله أكبر من الدوله المصريه ... ضباطه متنغنغين ناهبين خير البلد و مفرعنين ...الجيش عنده حسابات بنوك ما حدش يعرف عنها حاجه .... الجيش سلف البنك المركزي المصري مليــــــــار دولار ... جابهم منين ... ها تودي نفسك في ستين داهيه ... قال إحنا إللي هزمنا اليهود في تلاته و سبعين ... طب فين صور ديان و شارون و جولدا مائير علي جبل عتاقه في السويس ... الجيش التالت متحاصر و مات من الذل و العطش و الجوع و رجعوا زاحفين علي إيديهم و رجليهم حافيين و هدومهم مقطعه ... فين صور الجيش المصري التالت و هوه بينسحب ذليل من السويس تحت علم إسرائيل و إنتوا بتهتفوا ... إنتصرنا إنتصرنا إنتصرنا ... خيبه تقيله.... شعب مغيب ... ثورة إيه اللي إنتوا عملتوها ... ماما أمريكا فرحانه بيكو قوي ... و بتدرسكو في المدارس ... تعرفوا بتقول عليكو إيه ...بتقول للشعوب كلها شوفوا أنا عملت بيهم إيه ....
ها تعملوا إيه في الإخوان المسلمين اللي سرقوا الهوجه منكم و فهِّموا الشعب إنهم هما الله و هما الدين و هما أحفاد الرسول ... إنتخبهم تروح الجنه ... و عارضهم ها تروح جهنم و بئس المصير ...و إن البلد إذا ضاعت منهم هاتروح للكفره النصاري اللي ها يشغلّوا عليكم التنصير و ها يبنوا في كل بلد كنايس و دير ... و ها يفتحوالهم خماره في كل حاره و بيت دعاره في كل عماره ... إنتخبوا الإخوان المسلمين عشان ربنا يرضي عليكم و يبقي عندكم دين ...
يا شباب يا ثوريين ... يا هتيفه يا حنجوريين ... الأمريكان باعوكم علشان دوركم خلص خلاص ...و رموكم للسلفيين إللي ها يؤمروكم بالمعروف و ينهوكم عن المنكر ... الأمريكان إشتروا الإخوان المسلمين اللي باعولهم البلد ... أما السلفينن فعيني عينك باعوا نفسهم للصهاينه الإسرائيليين ... ليه علشان هما سُنيين فإنضموا لإخواتهم اليهود علشان يقاتلوا أعداءهم الشيعه الإيرانيين .... يا بلد ... يا بلد .... يا بلد ... الإخوان مش داخلين المجلس علشان يلبسوكم جلابيه و نقاب ... دول عايزين الهِبره الكبيره بتاعة الحزب الوطني ...الجلباب و النقاب ده بتاع السلفيين و القصد منه إنكم تفضلوا عبيد عندهم ... يؤمروكم بالمعروف و ينهوكم عن المنكر ... و الجماعه دول الهبشه بتاعتهم جايه من بلاد البترو دولار و الدينار ... و الشعب هَمّه يتخانق معاهم في الحلال و الحرام و البلد تغرق ...طظ ... الحزب الوطني اللي لسه موجود في عصاباته و ملياراته اللي سرقها مش محتاج أكل من البلد ... أكله و لبسه بيجي بالطياره من باريس ... يا متاعيس ... إستثمارات الحزب الوطني مش بس محليه دي إستثمارات و حسابات عالميه ... الجيش ما يقدرش يسيطر عليها ... الحزب الوطني زوّر الإنتخابات اللي فاتت علشان يقلش الإخوان ... مع إن الإخوان يا حبه عيني جروا ناعم في المجلس اللي فات و لا حد رفع صوته علي الفساد و لا علي الهبش و لا علي الحكومة و اللي بيحصل فيها ... كام سؤآل إستهبال علي أفلام فيها أعوذو بالله عري و سفور و شرب خمور و ماعرفش إيه .. علي كام إستهبال علي روايات قالوا فيها إباحيات و كتابات ما عرفش مين ... التلفزيون و مسلسلاته ...آدي كل إللي إتكلموا عنه في المجلس اللي فات ... الإخوان كانوا ناعمين عا الأخر يا حبة عيني.... لكن الحزب الوطني ما إداهمش أمان ... عارف إن أسهمهم بتعلي بسب نشاطهم الجامد في سب دين النصاري و فرض دين المسلمين ... و كل ما الجلاليب تزيد و الدقون تطول و الحجاب يكتر الحزب الوطني يتجنن ... راح مزور الإنتخابات و زاح المسلمين من طريقه... اصله عارف و فاهم ... إنهم لو حطوا رجلهم في المجلس تاني قوانين البلد ها تتغير إسلاميا و بالشريعة لصالح شركاتهم و ارباحهم و أرزاقهم و يطلع الوطني من المولد بلا حمص ... الشريعة الإسلامية محطوطه في الدستور مش علشان النصاري و قطع الإيد و الرقبه و رجم الزانيه ... الشريعه الإسلاميه محطوطه علشان الربح الحلال و البنوك الإسلاميه و المعاملات الماليه الشرعيه ... نلم الزكاه من المسلمين و الجزيه من الصليبيين و كله علي بيت مال المسلمين إللي بالشريعه ها يبقي تحت سلطة أمير المؤمنين... الشريعه الإسلاميه محطوطه في الدستور لخدمة الناس إللي ما حدش يقدر يقطع إيديهم... صراع الحيتان و الحراميه .... أراضي بتتنهب ... مصانع بتتباع .... محلات بتراب الفلوس ... و ديون البلد بتكتر ... وطظ في الشعب المنحوس ... ياتري عارفين الكلام ده و دارسينه و عندكم حل للنصب و التهليب و السرقه ... والا دلعو يادلعو و مبارك شعبه خلعو... يبقي يا إما إنتوا عملاء للإخوان يا إما إنتوا عملاء أمريكا عشان تشيلوا مبارك و تحطوا الإخوان ... ليه ... ليه ... ليه ما بتفكروش ... مبارك عاوز يورث إبنه ... يعني إبنه يورث العصابه بتاعته ... شله حراميه زي عصابه الجيش ... و عصابه كبيره قوي مقسومه بين رجال أعمال الحزب الوطني و ببين كبار موظفين الحكومه ...اللي وزيرها ... و اللي وكيلها ... و اللي مستشارها ... الناس الأبهه ... لو الحزب مسك البلد و حط إيده في إيد الإخوان ها تبقي عصابه كبيره في المجلس و ها نشغل شريعة الربح الحلال و الإكراميات و النبي قبل الهديه ...ها تزنّق و تقطّع علي عصابه مصر العسكريه اللي هي الجيش اللي لابس البياده و حاطط الرتب علي كتافه... جمال و عصابته و حكومته لابسين برانيط و شغلهم بره و جوه ما يمشيش مع العسكر ... لو إتصادم مع الجيش ... طيران علي أوروبا و أمريكا .... لكن الإخوان علي كل لون مالهمش غير السعوديه و دول الخليج و دي دول تحت سيطرة ذراع الجيش الطويله ... لو جم الإخوان و مسكوا البلد ها يضطروا غصب عنهم يحطوا إيدهم في إيد الجيش ... رئيس جمهوريه رتبه و رئيس مجلس الشعب حاج ... و الوزرا بين البينين ... و المحافظين زي ما هما ... كلهم لوآت ... و ها يدوّروا وشهم الناحيه التانيه و ها يسيبوا الجيش يسرق و يبعدوا عنه الشعب بالحجاب و الجلباب و القبقاب ... و الجيش شيلني و اشيلك ... و الجيش عمل معاهم صفقه ... و إدوا لبعض شيكات علي بياض ... الإخوان يهدموا كنايس النصاري و يولعوا في بيوتهم و يستمتعوا بما ملكت أيمانهم من نسوانهم و الجيش يدهسهم بالدبابات و يسجن اللي يتكلم منهم ... عارفين الصفقه دي ...شايفينها .... عملتوا حسابكم و إنتوا بتطبلوا و تزمروا في الميدان ... إحنا شباب الإنترنت ... إحنا شباب الواد و البت ... مصيبه ... مصيبه تقيله .... زي ما قلت لكم البلد خربانه خربانه ... اللي شال حسني مبارك هو الجيش مش إنتم ... إتقلب عليه علشان موضوع التوريث ... و سوزان و عنادها و كبرياءها هي السبب .... عايزه المحروس يبقي رئيس زي أبوه و هي تعين في الوزرا و تشيلهم زي ما هي عايزه .... طبعا الجيش مش أهبل ...لأن جمال و عصابته ها يقطعوا علي طنطاوي و عصابته زي ما قلتلكم ... جمال معاه جنسيه إنجليزي زي أمه و سته ... الجيش ما يقدرش عليه... الموضوع مش إن جمال ما يفهمش في العسكريه و إنه مدني مالوش يتدخل في العمليات الحربيه .... هو الجيش فيه عسكريه و الا عمليات حربيه ... الجيش فيه هبر و نهش و سف ... و جمال خطر قوي علي الحاجات دي .... عنده خبره إنجليزي أمريكاني يقدر يكشفها و يعرف أسرارها....
يامساكين ... يا بؤساء ... ماعندكمش مخ ... ما بتفكروش ... هو الموضوع طبل و تسقيف و إرحل إرحل ... عاجبكم كده .. أهي أمريكا حطتكم إنتوا في الصوره و طلعتكوا إنتوا المسؤلين عن الهباب اللي بيحصل في البلد ... بتحرق كل حاجه في مصر ... زي المتحف العلمي و البقيه تأتي ... و بتقول إنتوا المسؤلين... مطب أمريكاني تمام شربتوه بالهنا و الشفا ... قال ثوار قال ... ثورات العالم كلها قامت و عندها مخطط علشان تنفذه و تحقق مطالبها ... و إنتوا واقفين تتهزوا و تتنططوا ... إرحل إرحل ... أهو رحل ... فين البديل ... فين النظام اللي إنتوا محضرينه ,,, فين الريس اللي إنتوا محضرينه ... فين مجموعة القيادات اللي ها تمسك البلد ... إنتوا عارفين ان الحكومه نفسها ... الجهاز الإداري ... يعني الوزارات بتنهب البلد بحاجه إسمها صناديق الرسوم ... عشرات المليارات جمعتها الحكومه من الشعب و بتتوزع علي الوزرا و وكلائهم و علي كبار صغار الموظفين و مجلس الشعب ممنوع يسأل عن الفلوس دي مين اللي فرضها و بتتصرف علي إيه وإيه حسابات الصناديق دي ... مصيبه تقيله ... قاعدين في الميدان بتاكلوا هامبرجر و كنتاكي و الا حتي فول و طعميه ... البلد ضاعت ... و أمريكا ها تقسمها يعني ها تقسمها ... و الوكسه الكبيره اللي إحنا فيها دي أهي أمريكا لبستهالكم ... بدل الجيش ما ينقلب علي مبارك علنا و يشيله ... أمريكا جابتكم إنتم في صفقه مع الجيش و مع مبارك و مع الوطني و مع الإخوان ... و حطيتكم إنتوا في الوش ... بقيتوا إنتوا السبب في خراب البلد ... ياتري إنتوا وطنيين و الا زي الباقي حراميه و مرتشين ... و طظ في مصر و اللي في مصر و اللي جابوا مصر ...
آسف يا بلدي يامصر ... العيال دول خلوني فرقعت من الغيظ و الغم و خرجت عن وعيي و عن ألفاظي ... سامحيني يامصر ... البلوه تقيله قوي و أنا مش قادر أستحملها ... و لسه اللي جاي في السكه .. إزاي و إمتي و ليه هاتتقسم مصر ... خيرك لغيرك يامصر و أولادك بيموّتوا بعض علي رغيف عيش واقفين في في طابور م الصبح لغايه العصر...
|
|
التعليق والتصويت على الموضوع في الموقع الرئيسي
التعليقات
1 - العزيز اسعد المحترم
عبد الرضا حمد جاسم
(
2012 / 1 / 6 - 06:25
)
انها صرخه صادقه من اعماق الوطن
2 - يسلم بؤك يا اخ اسعد
نيللى مصريه بدون نقاب
(
2012 / 1 / 6 - 08:44
)
يسلم بؤك يا اخ اسعد. فى مقالك ده لخصت حال المحروسه مصر ام الدنيا. وياخوفى عليكى من الجاى. ياعالم فوقوا ثورة ايه ونيله ايه دى كلها مخطط امريكى / اسراءيلى (عزراءيلى). حسبى الله ونعم الوكيل.
3 - كلامك صحيح
محمد بن عبد الله
(
2012 / 1 / 6 - 14:03
)
شوية العيال الهطل افتكروا انهم هما اللي قلبوا مبارك
اللي هيّج الناس سنين وسنين كان الاخوان عشان عارفين انهم حيورثوا
قبل الهوجة كنت اتكلم مع الناس وكلهم كانت مخوخهم مغسولة يقولوا ما نجرب الاخوان...وفيها إيه؟...متصورين ان دخول الحمام زي خروجه !
حد يقوللك جرب الزرنيخ ولّا جرب تاكل حاجة معفّنة..تقوم تصدّقه؟؟
عموما من الشباب فيه كتير متعصبين مستترين أولهم البنات ال3 المتحجبين (بين صافيناز وغيرها) وغنيم لأبو سكسوكة وبلال فضل عدو التنوير اللي هاجم عمنا الدكتور (رغم أنوفهم) سيد القمني والجلاد وغيرهم وغيرهم
ماذا ننتظر من شعب فاسد العقيدة فاقد العقل؟
4 - تصحيح
محمد بن عبد الله
(
2012 / 1 / 6 - 14:22
)
جاء في تعليقي:
أولهم البنات ال3 المتحجبين (بين صافيناز وغيرها) وغنيم لأبو سكسوكة
الصواب:
أولهم البنات ال3 المتحجبين (بنت صافيناز وغيرها) وغنيم أبو سكسوكة
5 - الاستاذ اسعد اسعد
محمد حسين يونس
(
2012 / 1 / 7 - 07:06
)
شكرا علي هذه الرؤيه النافذة .. صرختك هذه في حد ذاتها دليل علي ان الامور تتغير و اننا في طريقنا لبلورة وعي يسمح بتكوين ثوره حقيقيه تضبط الايقاع و تنقل مصر و ابناءها الي بحور المعاصرة الواسعه .. قبل 25 يناير لم يكن بالامكان سماع وجهه نظر متكامله مثل ما تفضلت و قدمت .. عموما الخراب كان اكبر من الشباب و اكبر من الزباله الفكريه القادمه من تورا بورا و اخوتها . تحياتي و تمنياتي بمداومة و استمرار رؤيه المبصرين .
6 - سورات
محمد ماجد ديُوب
(
2012 / 1 / 7 - 07:52
)
منذ البداية أسميتها سورات فهاج السَوْريون وماجوا وعلا صراخهم ومزايداتهم
هذا هو مصير من لايميز بين الثورة والسورة
7 - شكرا لإخوتي جميعا
أسعد أسعد
(
2012 / 1 / 7 - 17:17
)
تشجيعاتكم و تعليقاتكم بمثابة مواساة لي في ما أحسه من ألم و وجع يكاد قلبي أن ينفطر بسببه
المشكلة التي نعاني منها هو إرتباطنا بفكرة الزعامة الأبويه و القائد الملهم و فخامة الرئيس المفدي
الرئيس يملك البلاد و العباد و الحكومة هي و لية أمرنا ... شباب الثورة غرر بهم .... تحركوا تحت ضغط الحياة و الرغبه في التغيير ... لكن التغيير إلي ماذا .... خبز و حريه و كرامه .... شعارات لا تشبع و لا تغني عن جوع ... وكلمات عاطفيه رنانه ... أنا أرجو قبل أن ينزل الشباب إلي التحرير أو غير التحرير أن يجلسوا مع أنفسهم و يشكلوا مجلس ثوري ... ثم يذهبوا و يتفاوضوا مع الجيش ... ثم مع الإخوان ... ثم مع الحزب الوطني المنهار ... و بعد ذلك يضعوا تصور و خطة عمل للوصول بالبلاد إلي نقطة بداية الإنطلاق إلي هدف الرقي و الرخاء و التقدم للجميع .....
أشكركم ... تحياتي للجميع
.. تحدي الشجاعة داخل نفق مظلم.. مغامرة مثيرة مع خليفة المزروعي
.. الحوثي ينتقد تباطؤ مسار السلام.. والمجلس الرئاسي اليمني يتهم
.. مستوطنون إسرائيليون هاجموا قافلتي مساعدات أردنية في الطريق
.. خفايا الموقف الفرنسي من حرب غزة.. عضو مجلس الشيوخ الفرنسي تو
.. شبكات | ما تفاصيل طعن سائح تركي لشرطي إسرائيلي في القدس؟
