الحوار المتمدن - موبايل
الموقع الرئيسي


شعيط ومعيط ,هجموا البيت

زاهد الشرقى

2012 / 3 / 3
كتابات ساخرة



أخيرا وبعد جدل كبير بيني وبين قادة الكتل السياسية ما بين رفض مني وإصرار منهم والعكس صحيح , تم ألاتفاق على اجتماع عاجل لمناقشة الوضع السياسي ( التعبان) وما خلفه من سلبيات أخرى .ولقد تم اختيار مكان ألاجتماع وهو (ملجأ سري ) تحت الأرض من أجل عدم تسريب أي من محاور ألاجتماع . وفي صباح اليوم التالي ركبت الدراجة الهواية ( البايسكل ) الخاص بي , وانطلقت بعد أن وضعت الأفكار والمشاريع في الصندوق الملحق خلفي على ( البايسكل) . وخرجت باكراً ( مغبش). حتى أصل قبل الجميع وأستعد للحظة العمر التي انتظرتها . وبعد قطعي مسافة طويلة (تعبت) . فتوقفت على جنب وطلعت ( قوري الشاي) و( الجولة) وسويت استكان شاي مهيل وشربت جكارة من هاي الأنواع المضروبة .ومن ثم اتكلت على الله , وأكملت المسير إلى حيث مكان الاجتماع , وفي الطريق تعرض ( البايسكل ) إلى ( بنجر) طارئ !! . فلم أجد مفر من ألاتصال بأحد الزعماء السياسيين . فأخرجت هاتفي المحمول نوع( طابوكة مصفح ) واتصلت بالزعيم ..

كلت : الووووو صباح الخير تسمعني لو لاء رحمة على أمك وأبوك . البايسكل بنجر ومحتاج مساعدة حتى أوصل للاجتماع بسرعة .

الزعيم السياسي: أنت منو ,, وشنو بايسكل .. وأستدرك هااااا .. أسف والله ما عرفتك لأنه الرقم غريب وتعرف موبايلاتنه ما بيه غير أرقام سفراء الدول الجبيرة وبعض دول الجوار !!

كلت : أي ادري بس ذوله مو بس بالموبايلات .. ما خذين البلد كله بجالكم .بكل شبر موجودين عيوني .. المهم ساعدني مضل وكت .

الزعيم السياسي: وانته أشعندك مغبش من فجر الله أصار شكو وراك قابل راح أتحل المشاكل

كلت : لا والله مراح أحل شيء .. لأنه بايسكلي ما اكدر أصلحه واحل مشكلته .. عيوني تكدر لو أتصل بغير زعيم .. أني ليش طلبتك أدري بيك تكعد من وكت لأنه عندك اتصالات أهواية ,, ومتكعد راحة والنوب القمة بالطريق أيبخاه .. بس أبشرفك أشكد بوست لحايا حتى يجون الربع !!.. ومشاكل اخرى خليه سكته يال ... لفته ..

الزعيم السياسي : هسه أنته شعليك قابل زعيم سياسي مثلي .. أنت مواطن عادي وجايبيك دنشوف أشتردون وبس ,, يالله راح أدزلك سياراتي وفد فوج عسكري حماية

كلت : فوج حماية ألي الوحدي .. زين وبايسكلي وين أودي و ( قوري الجاي والجولة) والصمونات والجبن المثلثات والبطانية والدوشك وأغراض أخرى .

الزعيم السياسي : عيني انته وين رايح ماخذ كل هاي الاغراض وياك قابل مسافر !!

كلت : والله اتريد الصدك انتوا مو ثقة اخاف بعد الاجتماع اطلعوني .. عميل وعندي بلاوي سود وطلعون الرجل الوطواط مالكم يغرد عليه بالتلفزيون وينهجم بيتي .. انتوا سوابق بهاي السوالف ..فحضرت نفسي وأغراضي للسجن السري !!

الزعيم السياسي : لا لتخاف ماكو شيء هسه عود من تعلك نشوف حل .. دتعال .. اشوفك بالاجتماع باي عيوني ..

والله وأقل من ربع ساعة وجتي الحماية ,, سيارات ,, وإشارات وصفارات أو واق ويق .. نزل أمرهم وكلي أتفضل أنته وأغراضك كله بلا استثناء .. صعدت ,, وصلت للمكان .. نزلت من السيارة .. وطلعت ألأفكار والمشاريع مالتي طبعاً .. وأخذني واحد ( لابس قاط) .. ماركة فرنسية أشكد حسدته عليه لأنه غالي !!!.. دخلت للمكان السري ,, ولكيت الجماعة كلهم هناك يضحكون ... ميتين من الضحك ..

كالوالي : ها جيت أتفضل بسرعة عدنه مشاغل ..

كلت : مشاغل أكو مشاغل أهم من الوطن والشعب

كالوا : أهو اشتغلت السوالف مال البطرانين .. بابا اكعد ..

كلت : هاي كعدة .. يالله

كالوا : أسمع أتفقنه قبل متجي وهاي النتائج ( أولا العمل على أثارة أزمة سياسية وتفعيل المشاكل بين القادة والنواب وإثارة ملفات قديمة جداً و توجيه الإعلام للترويج لكل المشاكل ومجلس النواب أنبقي واحد أيجر أو واحد أيعر !! والمالية كالعادة نصرفه والله كريم السنة الجاية !! .وانت تطلع اتكول اتفق الزعماء على حل المشاكل وراح يعقدون مؤتمر عن قريب ,, وكل كتله أطلعله كم واحد لبلبان بالحجي ايضل يومية يحجي سالفة شكل وخلي الشعب دايخ ,, وكان الله يحب المحسنين ... موافق على النتائج لو شنو رائيك ..

كلت : ها موافق شنو وحنه شحجينه وشتفقنه ..

كالوا : عيوني يا أتفاق يا حجي انته والله بطران .. كلام الليل يمحيه النهار

كلت : أي يمحي النهار زين هذا انهار ميمحيكم ويخلص الناس منكم ..

كالوا: تالي وياك خلص الاجتماع وراح نشكل لجان لاجتماع ثاني ,, ونسمي .

كلت : أني اختار التسمية موافقين ..

كلوا : موافقين

كلت : أسمي مؤتمر ( شعيط ومعيط .. هجموا البيت) ..ومكانه انعقاده بالزوراء ..
كالوا : الاسم اوكى بس ليش بالزوراء ..

كلت: حتى نصعد بديلاب الهوى .. بلكي يضربكم هوى شرجي ونخلص ..

ضحكوا ,, وراح كل واحد منهم الشغلة .. تعرفون أشغالهم ميحتاج واحد أيعيدهن كل يوم ..وأني صلحت بايسكلي ورجعت ,, والمشاريع والأفكار كله راحت بالشط !! ..تالي يا عراقيين ,, مشبعتوا من سوالف شعيط ومعيط .. مو راح يهجمون الأول والتالي وبالأخير يضحكون بينهم

أخ منك يا لساني .. سلامات يا وطن





التعليق والتصويت على الموضوع في الموقع الرئيسي


التعليقات

1 - خويه زاهد
محمد الرديني ( 2012 / 3 / 4 - 04:16 )
ردي يقع بين اللوم والاعجاب
اللوم لانط نسيت جرار الخيط وهو الاهم لان الامور بدونه لاتستقيم
وجرار الخيط هو ابن عمنه برايمر وخليفته .. لو هم نسيت
اما عن الاعجاب فهو مقال يضم صاحبه الى عصابتنا في هذا الموق عصابة الادب الساخر والبايسكلات المبنجرة
امض ياصديقي في مسعاك وبين حين وآخر اصرخ بهم
بخ بخ
صدأتم ورب الكعبة

2 - الى الاستاذ محمد الرديني
الكاتب / زاهد الشرقي ( 2012 / 3 / 4 - 09:07 )
تحياتي وتقديري أستاذ محمد الرديني المحترم

اولاً شكراً لتعليقك المميز ومرورك الكريم ..يا سيدي والله ما نسيت (بريمر) وسلبياته لانه الجماعة بعدهم ديطبقون نصائحة بكل دقة ..بل زادوا عليها بأن أتقنوا فنون الكذب والقتل والخراب .. حتى يقال أن بريمر .. منزعج من تفوق البعض على ما لديه من بلاوي سود !!وأما البايسكلي فهو صحيح ( بنجر) بس صدقني احسن من مصفحاتهم الخاوية مثل أفكارهم التي لا تحتوي سوى الفساد ..

شكراً جزيلاً يا صاحب الفكر الجميل ..

تقديري .. يا محترم

زاهد الشرقي

اخر الافلام

.. شاهد: دار شوبارد تنظم حفل عشاء لنجوم مهرجان كان السينمائي


.. ربنا سترها.. إصابة المخرج ماندو العدل بـ-جلطة فى القلب-




.. فعاليات المهرجان الدولي للموسيقى السيمفونية في الجزاي?ر


.. سامر أبو طالب: خايف من تجربة الغناء حاليا.. ولحنت لعمرو دياب



.. فيديو يوثق اعتداء مغني الراب الأميركي ديدي على صديقته في فند