الحوار المتمدن - موبايل
الموقع الرئيسي


دارميّات قبل ألقمه.. مع صديقي كفاح السنجاري...

موسى فرج

2012 / 3 / 25
اليسار ,الديمقراطية, العلمانية والتمدن في العراق


. دارميّات قبل ألقمه.. مع صديقي كفاح السنجاري... . . موسى فرج . . *موسى فرج : آنا ها الأيام مشغول بحوار على صفحات صحيفة وموقع مؤسسة المثقف وجاي أتابع ما تكتبون ..بس خطف .. وقبل يومين قرأت لك مقال حواري : . عيني أبو عمار .. آنا ما علقت يم المقال مالتك بالحوار المتمدن.. وردت اعلق أهناه حتى ألحجي يبقى أبيناتنا .. أشلون أتكول عمر كوردستان 2000 سنه وعمر العراق 90 سنه ..؟ يعني هسا عمر مصر 60 سنه تبدأ من مغادرة فاروق ..؟ لعد وخوفو وخفرع ..؟ زين الجنائن ألمعلقه ..من أشوكت سووها ..؟ وألمن سووها ..؟ مو علمود أبنيتكم ..؟ هسا اعترفوا ببنيتكم عاد.. بالله أبنينا ..ملازم ..أله الله ..تمام ..؟... .
*كفاح سنجاري :الأخ الكريم والغالي موسى فرج، شكرا كثيرا لمداخلاتكم التي اعتز بها سواء اتفقنا أو اختلفنا، وتأكد أننا في نقاط الارتكاز معا مهما اختلفت زوايا النظر لدى كل منا، وعليه أرى في المداخلة الثانية فقط سأطبع لك السؤال وجوابي حول موضوع الـ 2000 سنة واليك النص: * ولكن كوردستان جزء من العراق منذ 4000 سنة.. - لا أبدا.. هذا الذي تتحدث عنه خرافة، كوردستان هي كوردستان منذ الأزل، والعراق كدولة عمرها لا يزيد عن 90 سنة، وضمت كوردستان إليها بخباثة الاستعمار، عمرنا لم نكن جزء من هكذا كيان إلا بعد سايكس بيكو..
*موسى فرج : زين .. أبنيتكم ..اللي سوا ألها أبنينا الجنائن ألمعلقه .. أبنينا جان شغله ملك ..؟ لو جرخجي ..؟ وإذا ملك غير ملك على دوله .. لو ملك البيتزا...؟..
*كفاح السنجاري : أي أي تمام ما مختلفين بس حدوده ذيج هيه أبدا ما وصلت ديارنا، وان وصلنا شي من رائحتها صدك أخي الكريم كانت روائح حرب لا أكثر..
*كفاح السنجاري : ولا تنسى أخوية موسى ترى مو كل شي بالبنايات ترى احنه صنعنا الغذاء في الوقت ألي كان غيرنا بس يدور ويبحث ويصيد، بس احنه زرعنه.. .
*موسى فرج : أولا ..ما من عداوه إلا وبعدها صداقه ..ثانيا : أي أحنا جماعتنا يأكلون طازج وأنتم سويتوا الباسطرمه.. .
* كفاح السنجاري : هههههههههههه تمام بس لا تنسى الزلاطة والجاجيك.. *موسى فرج : جماعتنا إيمانهم أكثر ميحتاجون الأشياء التي يلزمها الجاجيك.. . *كفاح السنجاري : أي أي تمام والدليل الولو ههههههههههههه.. *أحد الأصدقاء المتداخلين :دةست خوش .. .
*موسى فرج : في نادي الموظفين في هاولير كانت أيام رائعه مع كاك دلشاد وكاك احمد وكاسترو أبو 8سنوات يبيع زرازير مسلوكه بدرهم وأحلى ما بيها هو أننا كنا مصطفين ضد الحكام ..هسا أشرايكم ..؟ أنعوف مذاهبنا ونجيكم ..موافقين بس انتم همين عوفوا قومياتكم ..مو أحنا أنعوف وانتم ما تعوفون .. .
*كفاح السنجاري : هههههههههههههه بس تعالوا وما لكم شغل ..
*موسى فرج : خلي تخلص ألقمه .. ونشوف على يا مذهب نصفى..ونجي .. . وصلتني اشاره ..تقول أن بين السيدين المالكي والبرزاني أيضا دارميّات .. سارعت دون أن استأذن من صديقي كفاح باعتبار أن دارميّات ألجماعه فوق الميول والاتجاهات ..مو مثل دارميّاتنا حيا الله أثنين من الأوساط ألشعبيه.. . وجدت آخر دارمي بينهما مفاده الآتي : . البرزاني : كاك أبو إسراء ..أنريد نشكل وفد من الكتل ألكبيره في مجلس النواب يشارك في اجتماعات ألقمه .. . المالكي : لا خويه شنو كتل ..؟ شنو كبيره ..؟هذا مؤتمر ألقمه مخصص للحكومات مو للنواب. المالكي : لياسين مجيد : أمصّدك بالله كاكا مسعود ..؟ آنا رئاسة الحكومه من أخذتها حالف بعد ما أنطيها ..أنوب منصب عميد الحكام العرب لمدة سنه كامله.. أفرط بيه .. لا والكاظم ... ياسين مجيد : حجي ..مو أخاف يسوون استفتاء بكردستان ..وينفصلون ..؟. . المالكي: لياسين مجيد : عبّر نوروز.. يعني لنوروز الجاي ..لأن هم كالوا بنوروز.. بعدين ما تخل ينفصلون يمعود ..أصلا مناه لكربلا الخيال 7 أيام يا الله يكطعها زكزاك بين الكتل ساعه كونكريتيه وساعه برلمانيه ..العراق جبير .. على الأقل نخلص من المام .. . ألمام الرئيس : كاك أبو أسراء : يرحم أهلك ..هاي أشلون مشكله .. هسا آني من رحت للسعوديه للعمره الملك عبدالله لبسني كلاده كله ليرات ذهب عثماني أخذتها أم الولد ..هسا من شالوا تخصيصات المنافع الاجتماعية بالله أشننطيهم هذولا ..؟والله حاير أشلبسهم.. . المالكي : ولا يهمك فخامة الرئيس ..فلوس هوايه ..بس كود ألشغله اللي أبالك عليها .. المام الرئيس : طبعا ..كاكا.. أنتم مو اتكولون : دافنيه سوا .. لا كهربا لا غاز وفراشه بردي ..فوك القهر والضيم ريسنا كردي ..أي هاي خوش نشيد وطني ..ناجح لأن من زرت العراقيين المغتربين برا وقرأته لهم صفكوا هوايه ...





التعليق والتصويت على الموضوع في الموقع الرئيسي


التعليقات

1 - الكص والشاورما من اختراع اشور بانيبال ع
الان كاردوخي ( 2012 / 3 / 25 - 19:40 )
احم احم انني اعترف بان كاكا سنجاري على خطأ لانه ينسى بان الفلافل كان من صنع حمورابي طبعا هو عربي , وكذلك اشور بانيبال اخترع الشاورما , ولاتنسى ياكاكا سنجاري بان اسمك هو من سنحاريب وهو مخترع الباجا , بعدين الهكط والتشريب انت شنو دلك مين اخترعها قبل 3000 اما المسكوف فيا كاكا انتم الاكراد كنتم تاكلوا السمج طازة واخرتعها جدنا الحجاج ولا تنسى باننا اول من حفر الارض للاختباء كاستراتجية عسكرية بفضل مخترع ام المعارك
لله في عباده شجون
سنة ’ ,

2 - تصحيح...
موسى فرج ( 2012 / 3 / 25 - 20:21 )
لله في عباده شجون ..غلط.. والصحيح : لله في خلقه شؤون .. تصحح أينما وردت ..!.

3 - الاستاذ موسى فرج المحترم
عبد الرضا حمد جاسم ( 2012 / 3 / 26 - 15:55 )

نأكل ونتريع ونبول
ونخري وفق الأصول
هذا الطلعت بيه القمة وتعتبره أحسن حلول
جوكَه الكَعدوا بالقمة
منهم مايعرف يقره ويكتب
بعمره مالازم كشكول
يحك بأذنه وراسه
دايخ ما يعرف شيكَول
ومنهم...صافن.ويفر براسه
جنه فد واحد مسطول
ولو واحد ندار عليه أو كَال
يجاوب رأساً
إي يابه وأنت شتكَول
وجبير ألقمه تنحنح
ما يكَدر يحجي لسانه جنه مشلول
لازم ينطونه حقنه
واحد منهم فك حلكَه وكَال
منوا منكم عنده سؤال
لو لا تره نزعل
وبقصايدنه نصول
القايد يستلم الرايه
قايدنه يحجي معقول
وما نسمح لو واحد يطلع ويكَول قايدنه مخرف معلول
ونهدد ونلزم شاربنه المفتول
ونوضح للعالم كله ونكَول شكَال البهلول
من السنه كل ما مر فصل
نكَول الباقي تلث فصول
والي يتعصب ويحوس
لو يهداء لو يصبح عدنه مو مسئول
وطلعوا..
واحد يصفكَ للثاني
أعمه يكَود مخربط
ومجنون يشرح للمهبول
أظلم يستهزئ بالصاوي
وأهلم بسنونه متغاوي
وأعمه يزين لكَرع
وأطرش من أخرس يسمع
وأعرج يتوجه عله مكَرم
ويداوي طبيبه االمسلول
انها غير كامله بسبب الكلمات الاف
شكر

4 - يمته تسوون دوله ؟؟؟؟؟؟؟؟
علي الغالبي ( 2012 / 3 / 26 - 22:25 )
عمر كردستان 4000 سنه وبعدكم مامسوين دوله لعد يمته راح تسووها ؟؟؟؟؟؟؟؟؟؟؟؟؟؟؟؟؟؟؟بالعصر الجليدي السابع

اخر الافلام

.. سائقة تفقد السيطرة على شاحنة وتتدلى من جسر بعد اصطدام سيارة


.. خطة إسرائيل بشأن -ممر نتساريم- تكشف عن مشروع لإعادة تشكيل غز



.. واشنطن: بدء تسليم المساعدات الإنسانية انطلاقاً من الرصيف الب

.. مراسل الجزيرة: استشهاد فلسطينيين اثنين بقصف إسرائيلي استهدف




.. وسائل إعلام إسرائيلية تناقش إرهاق وإجهاد الجنود وعودة حماس إ