الحوار المتمدن
- موبايل
الموقع
الرئيسي
قصيدة الدنيا غابة
جمال الشرقاوى
2012 / 4 / 12الادب والفن
![](https://www.ahewar.org//debat/images/fpage/art/7.jpg)
الدنيا غابة
و احنا فيها ميتينْ
صاحيينْ
عايشين مش دريانينْ
ناس بتضحك
و ناس بتصرخ
و ناس ماشيينْ
و ناس بتبحث ع اللى ضايع
الوش ضاحك مبتسم
و القلب باكى من سنينْ
و ناس معهاش سلاح كمانْ
و دى غابة مفيهاش الأمانْ
و لا يملكوش غير الدموع
حتى من قبل السنينْ
الدنيا غابة
و اللى فيها مكشرينْ
كل م امشي جنب واحد
يإمَّا خنزير أو م الكلاب
ألاقيه بيغدر بالعينينْ
بيخور يا ناس بالصوت صوتينْ
الدنيا غابة
و اللي فيها كإنهم مش مخلوقينْ
من لحم و لا دم و لا طينْ
اللي يجهر بالعيوب
ع الصحاب و الجيران
بعاد و لا حتى قريِّبينْ
و اللي يسمع بالشتيمة ف ضهر اخوه
وودنه الاتنين من عجينْ
و اللي م يصدِّش ف ديب
بياكل جرح المجروحينْ
الدنيا غابة
ليه بتيجي كتير يا دنيا
ع المغلوبينْ
ع الحَيَارَىَ
و السْهَارَىَ
و اللي م الجوع يبكو أنينْ
و اللي ينهش لحم جاره
يتعَدَّىَ الأصول ذوق و عافية
و يلوي له إيديه الاتنينْ
و اللي أعطىَ لحد حاجة
ساعده يعني بأى حاجة
لإنه كان م المحرومينْ
جاله تاني يوم يعايره
سجَّان و بيعذب سجينْ
أو قاضي يطلب م المدينْ
الدنيا غابة
مفيهاش مكان للفقير
للضعيف للمسكينْ
الدنيا غابة
و فين يعيش الطيبينْ ؟!
الدنيا غابة
مفيهاش مكان للمحتاجينْ
الدنيا غابة
يا ربّ حُوش الظالمينْ
الدنيا غابة
م فيهاش رجال
فيها الذكور
بس تربيِّة حريمْ
إبن المَرَه
تربية الورشة اللئيمْ
قاسي و لو بيِّن حنينْ
إبن الشوارع
مجرم و ابن مجرمينْ
جالي صدَّر نفسه يوم
قاللي هسدّلك كل الديونْ
قلتله يا عم عيب
قاللى انت اخويا مش زبونْ
لمَّا جه ف الجَدّ قاللي
شق مع نفسك طريق
سابني وحدي ف الحريق
سابنى ف دموعي غريق
كأني كل المكروبينْ
عرفت إنه
كان متربِّي ع الرصيفْ
و كان م يلقاش الرغيفْ
و طبعه من طبع النسا
كلامه زبدة أو عجينْ
الدنيا غابة
و لا إيه رأي ( الزعيم )
أبو الكرم مضياف كريم
عايز اقوله أعمل ايه ؟!
رغم إنه كمان حزينْ
عايز اقول ( لعصام ) يا صَحْبي
أعمل ايه ؟!
الدنيا غابة
و الموج بيضرب ف السفينْ
الدنيا غابة
و الشمس خبيتها السحابة
و الليل طويل
طويل قوي
و مين بيسأل فينا مينْ ؟!
مين بيهمه أمرنا ؟!
مين بيسأل فينا مين ؟!
|
التعليق والتصويت على الموضوع في الموقع الرئيسي
.. إليكم ما كشفته الممثلة برناديت حديب عن النسخة السابعة لمهرجا
![](https://i4.ytimg.com/vi/Oskuuvqi_Ns/default.jpg)
.. المخرج عادل عوض يكشف فى حوار خاص أسرار والده الفنان محمد عوض
![](https://i4.ytimg.com/vi/ebLDnEfCmD8/default.jpg)
.. شبكة خاصة من آدم العربى لإبنة الفنانة أمل رزق
![](https://i4.ytimg.com/vi/8GlIUuq4LkE/default.jpg)
.. الفنان أحمد الرافعى: أولاد رزق 3 قدمني بشكل مختلف .. وتوقعت
![](https://i4.ytimg.com/vi/2wtFEw41O10/default.jpg)
.. فيلم تسجيلي بعنوان -الفرص الاستثمارية الواعدة في مصر-
![](https://i4.ytimg.com/vi/Sa4TqFFUIns/default.jpg)