الحوار المتمدن - موبايل
الموقع الرئيسي


هنا طهران !

جمعة العتاگ

2012 / 5 / 25
كتابات ساخرة


ها هو العراق يعود كعادته الى الصدارة في الأهتمام بقضايا التحرر العالمي ونضال الشعوب .
انظار العالم تتجه صوب بغداد وهي مترقبة بحذر شديد ما سيسفر عنه اجتماع ايران بالدول الستة , وأيماناً مني بجسامة الموقف تنقلت في شوارع بغداد للتعرف على ردود الأفعال وفيما يلي ما مختصر لما رصدته عدسة جمعة العتاك في أحدى المقاهي البغدادية :
* عمي التحالف الكردستاني يكول , أيران لازم توافق وتسكت العالم لأن اذا موفقت راح يسحلوها سحل وأذا فشل الأجتماع راح تصير أزمة دولية جبيرة .
*لك يا التخلف الكردستاني , هذولة دكهم ومدكوكهم كركوك , وهو جلال شمفهمه بهاي السوالف هو مكضيها نكات , حته ما خله هيبة للمسؤول العراقي .
* ولكم دولة القانون تكول , العراق قادر على تخفيف التوتر الصاير بين أيران والغرب , ويكولون فشل الأجتماع راح ينعكس عالمنطقة ويؤدي الى أزمة دولية كبيرة .
* والله ضحكتني ودولة القانون تدري بالدنيا وين صفت , هم مكضينها يعاركون بالعالم خايفين على كرسي صاحبهم .
* لا يابة وداعتك مو هيج الجماعة بالعراقية يكولون الأجتماع أكيد راح يفشل لأن ايران مراح تقبل تسوي برنامج نووي سلمي , هذولة يريدون يصنعون قنبلة نووية , انتو شمفهمكم اني سمعت حيدر الملا يكول الأجتماع مليون بالمية راح يفشل ( وما ان ذكر أسم حيدر الملا حتى تعالت ضحكات الحاضرين ) ويكول فشل الأجتماع راح يؤدي الى أزمة دولية كلش جبيرة .
* انوب حيدر الملا علينه , متكلولي هذا منين طلعلنه هذا التعبان , اشو بكلشي يفتهم بالطب والهندسة والتاريخ والجغرافية والتراث والقانون والصحة والمرأة والطفل , وذابح روحه عالتلفزيون عبالك مشايف .
* سيد مقتدى يكول أحنة منريد الأجتماع يصير هنا , والله هذا كلبه عالعراق مو مثل هذولة الحثلكية , ويكول فشل الاجتماع راح يؤدي الى أزمة دولية جبيرة .
* هههههه قداوي سودة عليه مو جان كاعد بأيران , خطية هذا بعده متأثر بالسيكا والبلاي ستيشن وعبالة بعدنه غشمة وتمشي علينة هاي السوالف .
* ليش مو اللوكي علي الدباغ يكول العراق ما الة أي علاقة بالأجتماع والعراق راح يكون معزب , أكل وشرب ومبيت الوفود .
* لك يا علي الدباغ هذا يكول أني خبير بالمرجعية , شجابه على هاي السوالف .
* اكللكم ترة هي كلها بيد حجي نوري وداعتكم وهو يكول الأجتماع سينعكس على العراق بالأيجاب , واذا منجح الأجتماع راح تصير أزمة دولية جبيرة .
بعد حديث مطول بين شريحة من أبناء العراق قام رجل كبير السن تبدو عليه علامات الوقار والأحترام . زجر الجميع وأمرهم بترك هذا الحديث التافه والغير مجدي وهو يقول :
كل واحد يبجي على ليلاه والشعب هو المستلك جده , شنو نسوا أعضاء مجلس النيام وعلاوي الدباغ ورئيس قطيعه ,نسوا كل البلاوي الوكعت فوك راس العراق من ورة هاي السوالف والفيكات , شنو مو العراق أول من ساند الوحدة العربية وأول واحد أنضرب بيها دبة , ومو العراق أول من وصل دمشق يدافع عنها وبعدين سورية أدزلنه فواتير وقود الدبابات , انوب علينه ملف أيران النووي , عمي لفتهم حية سيد دخيل , وهمه لو همهم البلد , مو الارامل والأيتام أولى بهذا الأهتمام ومو الحصة التموينية أولى بمتابعاتهم وشباب العراق المثل الورد الكتلتهم المخدة ونومت الفراش مو أحق بهذا الأهتمام , لو همه السادة النيام شكالوا لروحهم وأكو قوانين بالبلد حتى الوحي الالهي جبريل أدخل بيها ولحد هسه ما فضت , والمجاري أباب بيتهم طافحة من عهد نوح والكهرباء الله يذكرها بالخير نسيناها . أصحوا كافي عاد مو وطنكم بنيتوا بالجماجم وجثث الشهداء , متكلولي بالقبور اللفتكم انشاء الله شراح تخلون .
بعد أن أكمل الرجل حديثه نهض أحدث المثقفين الجالسين في المقهى ليردد وهو يهم بالخروج : لقد هزلت حتى بدا من هزالها كلاها وحتى سامها كل مفلس .
من قلب الحدث , لنقل أراء المواطنين ونقاشاتهم حول الأجتماع المتعلق بالملف النووي الأيراني كان معكم مراسلكم جمعة العتاك .

ـــــــــــــــــــــــــــــــــــــــــــــــــــــــــــــــــــ
[email protected]





التعليق والتصويت على الموضوع في الموقع الرئيسي


التعليقات

1 - حلوه
محمد الكرخي ( 2012 / 5 / 25 - 03:32 )
شكرا جمعة العتاك على هذه المقالة الصباحية والله ضحكتنه من الصبح حاور جميل ومهزلة مبكية

اخر الافلام

.. ا?صابة الفنان جلال الذكي في حادث سير


.. العربية ويكند |انطلاق النسخة الأولى من مهرجان نيويورك لأفلام



.. مهرجان كان السينمائي - عن الفيلم -ألماس خام- للمخرجة الفرنسي

.. وفاة زوجة الفنان أحمد عدوية




.. طارق الشناوي يحسم جدل عن أم كلثوم.. بشهادة عمه مأمون الشناوي