الحوار المتمدن - موبايل
الموقع الرئيسي


نقاش رومانسي في نادي لبناني ليلي

سرمد علي الجراح

2012 / 5 / 31
كتابات ساخرة


(قال النائب عن كتلة الأحرار (الصدريون) عدي عواد, إن التصريحات التي يطلقها عزة الشابندر بشان الوضع السياسي الراهن نابعة عن تأثيرات النوادي الليلية اللبنانية التي اعتاد عليها). إنتهى الخبر
هذا التصريح جاء كجزء من الحوار والنقاش السياسي الدائر هذه الايام بين أعضاء دولة الخروف الابيض ومعارضيهم من جماعة الطلي الأثول في برلمان سوك الدواب
شلون نقاش سياسي يشفي الفّاد
أريدكم انشط, وياريت بالمدس تصير ونقل حي, من يم باب الطاحونه الحمراء في بيروت
ليش أخونه عدي, هيج تحجي على الحاج شاهبندر الكفار؟؟ شنو قابل شفته يشمر دولارات على راس المالكي وهوه يهز ركبه؟
زين شمدريك بتأثيرات النوادي الليليه البنانيه؟؟ لازم حضرتك مسوي دراسه ميدانيه عن تأثيراتها بعد البيك الرابع آناء الليل, ثم بعد الرقص بدون سروال أطراف النهار
وهذا شاهبندر الكفار صارله كاعد بلبنان شهرين شيسوي؟؟ كافي يابعد عيني ماشبعت لو هذا جوع عتيك. بس ابقه هناك أحسن على أساس راح تشرمها من ترجع
من تسمع تصريحات السياسيين تكول أيابـــــاه شكد قلبهم على هل بلد؟؟ وخايفين على الوحده الوطنيه بالدهن, ويحذرون من الطائفيه بالثوم والبصل, ويطالبون بضبط النفس بتبّدوره أو فلّينه أو جزره إسلاميه, خوفا من الباميه وانفجاراتها
من تشوفوهم بحوار بالتلفزيون, اخوان رجاءا, سدوا الصوت, وباوعوا على عيونهم وحركاتهم!! راح تشوفون العجب!!
قبل, بزمن أخو هدله, هوّه يكلك اني شقاوه وما أعرف اللي خلقني, علني
لكن هذوله الله وكيلك, واحدهم كأنه واوي حلفه, يبتسم, بس بعيونه يريد يكطّع صاحبه, ويبدي بيه من جوّه ليفوك.
وشكد مايحاول يبيّن نفسه تقي, عيونه تكول دير بالك, تره آني اكبر شلايتي وساقط
أما تعابير وجهه فهاي وحدها تصيح ياناس, آني من أهل جهنم, ودافع سرقفليه
تشوفه يبيع ثكل, بس هذاك هوه مبين, مطيرجي, أو في أحسن الاحوال سِكِن مال فورتات, لو يجي الريل
ولكم هَيْ طراطير, أنتو مال نقاشات؟ بس اطلعوا منها وهيه تعمر,
عبالكم الناس متعرفكم شلون أوغاد وسفله
هيه إذا وصلت الدنيا إلى حال, بحيث مقدده الددر يعيّن رئيس ودراء, فمن طيّح الله حظ هيج وزاره وهيج بلد وهيج دنيه
لكن اللي يبقى مدوخني هوه, معقوله أكو بالعراق مخلوقات عاقله وترضع صغارها اللبن, ولديها القدره على ضرب الجلاليق, ولا تضرب هيج سرسريه كل واحد ألف جلاق؟؟
أزمه سياسيه أم أزمة جلاليق؟؟





التعليق والتصويت على الموضوع في الموقع الرئيسي


التعليقات

1 - ازمة جلاليق ياسرمد
محمد الرديني ( 2012 / 5 / 31 - 18:53 )
اكرر وكررت وسأكرر وملايين العراقيين معي
لماذا هذا السكوت على هؤلاء الجهلة اللصوص
فعلا هناك سر غريب
لم يمر شعبنا بمثل هذه المرحلة من قبل
ومع هذا فهو راض بما قسم الله له
تيمنا بشعار
قل هذا ماكتب الله علينا
او القناعة كنز لايفنى
او
يامعود احنا شغلينة نارهم تاكلحطبهم
او
المهم خلينا نعيش بلا وجع راس
من اذن يستحق الجلاليق ياسرمد؟

2 - طرزان
حمورابي سعيد ( 2012 / 5 / 31 - 19:48 )
خوية سرمد...يكلك جماعة شافو زعيم التيار سيد مقطاطه لابس شورت او وراه جم شادي. بس اللي محير عمري ما شفت طرزان لابس براسه تاير مكمط بقماش اسود .تحياتي

3 - اتمنى
عباس فاضل ( 2012 / 5 / 31 - 20:19 )
على ذكر اخو هذله , ولو هو مجرم ومخربط , بس اتمنه لو يرجع يوم واحد واذا ماممكن نرجعه للحياة فعله الاقل اعادة لواء واحد حرس جمهوري خاطر اشوف هالقشامر وين يصفون . وعله كولة حبيب العربنجي من الحرس مسح بيهم الكاع , من ابو عمامة لابو شروال

4 - ردود الاصدقاء
سرمد الجراح ( 2012 / 6 / 1 - 14:13 )
العزيز الرديني, جواب على سؤالك عزيزي, اكيد اللي يستحقها احنه اللي مدوخين راسنه بدون داعي. بس شتسوي للدوده؟؟ كثيرين يتعجبون كيف وصل حال هذا الشعب لهذا الحد, لكن اعتقد السبب هو انو المثقفين والاحزاب الوطنيه كانت بين الناس, اليوم مكتفين بالتنظير والسفسطه
تحياتي
الاخ حمورابي, آني كلش خايف على السيد من الحسد, لا واحد يضربه عيـــــــن!! ويسوي يشبه الكَلَن المزروف
تحياتي
الاخ عباس, يمعود تلكاهم كلهم يلبسون زيتوني من جديد ويمسحون بينا الكاع. لاتخاف عليهم هذوله باللواكه عدهم دكتوراه
تحياتي

5 - الحقيقة المرة ... ؟
سرسبيندار السندي ( 2012 / 6 / 1 - 19:30 )
بداية تحياتي لك ياعزيزي سرمد الجراح وتعليقي ؟

2 : كافي ياسرمد تزيد على ألألم جراح
خليها ساكته مادام الصدر يلعب بين ألإجا والراح
إمتا ألك حوبة ياوطن ونخلص من كل مطي وسفاح ؟

4 : مقولة لي تقول { إن الذين يرتظون بأقدارهم ... لابد أنهم يستحقونها } ؟

5 : يكللك بالعراق منو الجكائر ليش ... يكلك حتى الصدر يبقى نظيف ولايخرب العيش ؟

6 - زين وين المشكلة؟
يونس حنون ( 2012 / 6 / 1 - 22:03 )
والله اخويه سرمد احب اجاوب السيد عدي عواي ان الاراء السياسية النابعة من اجواء الملاهي الليلية اللبنانية وبطحات العرق الزحلاوي واطباق الكبي النيي والتبولة ستكون بالتأكيد افضل واعقل وادق واجمل من الاراء السياسية التي تتشكل في سراديب تخزين الطرشي او صالات لعب الاتاري او جلسات تدخين الترياك الايراني
وشكرا للسيد عدي على تصريحه الخطير اذا صح التبعير
-وصدگ لو گالوا -البعرة تدل على البعير

7 - ردود الاصدقاء
سرمد الجراح ( 2012 / 6 / 2 - 10:22 )
الاخ السندي, مال نخلص من مطي وسفاح مانخلص. لأن احنا متعودين مثل بيت الشعر, اذا مات منهم سرسري قام سرسري. وماشاء الله الضاهر هذوله عدنه منهم كلش هوايه
تحياتي
العزيز الدكتور يونس, انا معك مائه بالمائه ان هكذا اجواء ستأتي بآراء اجمل وافضل, لكن الاخ عدي يقصد يمكن تأثير الحلوات الموجودات بالنوادي, لأن ذني ياخذن العقل ومايرجعن خرده. على اساس السيد عدي والقائد مالته بجماجمهم عقول. والله يادكتور لو تفتحها يمكن رأسا تعلن اسلامك!! وتكول هاي صدك معجزه!! اكو واحد عايش بلا دماغ؟؟ شنو ولك انته أميبا

8 - اقدر كبر معاناتك
جمال علي الناصري ( 2012 / 7 / 26 - 11:23 )
الاخ سرمد الجراح كلماتك تداوي جراحنا ايها المبدع0لا اعتراض على جمل جاءت بآ خر مقالتك طيح الله حظ هيج وزاره ولكن لا يجب ان نشتم الوطن فنقول وطيح الله -حظ هيج وطن-لا ياعزيزي فالوطن هذا هو العراق بلد الاحرار من امثالك أما امثال المقطاطة وجماعته والعمائم المزورة واللطامه المخدوعون وكل الذين يركبون موجةالدين والتزوير وخداع اناسنا البسطاءبالجنة والشفاعة وحور العين والولدان وغيرها من خربطات حارث الضاري وجماعته ستزول كما زالت دكتاتوية صدام والبعث المجرم الى القمامة ويبقى الوطن تحياتي لك ايه المبد ع

اخر الافلام

.. أقرب أصدقاء صلاح السعدني.. شجرة خوخ تطرح على قبر الفنان أبو


.. حورية فرغلي: اخترت تقديم -رابونزل بالمصري- عشان ما تعملتش قب



.. بل: برامج تعليم اللغة الإنكليزية موجودة بدول شمال أفريقيا


.. أغنية خاصة من ثلاثي البهجة الفنانة فاطمة محمد علي وبناتها لـ



.. اللعبة قلبت بسلطنة بين الأم وبناتها.. شوية طَرَب???? مع ثلاث