الحوار المتمدن - موبايل
الموقع الرئيسي


بعد الكاس العاشرة ... ناجيتك ...

لؤي عجيب

2012 / 7 / 5
الادب والفن


زعلان عليك كتير ومقهور .... بس والله ما طلع بايدي أعمل شي ...
انت مصدقني أكيد ؟؟؟
أنا متلك ... تجاهلوني سنين ... وشلحوني بالصحراء ...

شو مفكر يعني .. مين بيترك الجبال .. الخضار .. النهر والبحر .. وبيطلب الصحرا ..
مين بيترك الناس يلي حبهم وحبوه ... وبعيش مع الغربا....

مين بيترك الحضن الحنون..؟؟؟؟

غير يلي متلي ومتلك ...

كنت صغير ... وكنت اتطلع عليك ... وراسك عالي ومرفوع .. بس ولا مرة قدرت شوف دمعتك ...
أنا ما عم أكذب عليك ولا بعمري غشيتك وأنت بتعرف ...
بس كتير كنت زعلان منك .. لأنك حضنت يلي غشوك ... وكذبوا عليك وتركتني ...
كنت مفكر أنك.. أنت تخليت عني ...
ما فكرت أنك تركتني غصب ... وبكيت قهر علي وعلى غيري ...
بس والله ... ومع أني كتير كنت مقهور منك ...
... ...
لما مشي الباص من دمشق وراح للصحرا ...
اتطلعت خلفي كتير ... اتطلعت عليك ...
قلت ممكن تناديني ... وتقلي رجاع ... أنا بدي لفك وبوسك وضمك وما أتخلى عنك ...
بس ما صار ...
وضليت زعلان منك ... سنين .. وأنا زعلان منك ....
وكنت .. عم فكر .... ما أرجعلك ..
بس ... بحبك ... ما بقدر على بعدك ..
رجعت ... بس كنت .. أنا عم اتحداك ... بدونك ... أنا عملت شي ..
وبدونك أنا صرت شي ...
مرة تانية ... ما قدرت شوف الغصة ولا الدمعه بعيونك ...
تركتك ... ورجعت ... لمكاني التاني ...
كنت مبسوط ... ومقهور بعدني منك ...
لأنك لميت كتير نصابين لحضنك ...
ولما مشي الباص مرة تانية من دمشق ... ما اتطلعت خلفي ..
وغرغرت الدمعه بعيوني .. وأنا عم قول ... ما رح أرجعلك ...
الغصة ضلت ...
كنت حاكيك .. ليش عم تعمل هيك ...؟؟؟
ليش عم تبعدنا عنك ...؟؟؟
ضليت سنين ... وما قدرت ... ... اشتقتلك .... كتير اشتقتلك ...
رجعت ... وبست ايدك ... وقلتلك سامحني ...
بدي كون هون ... هون ... معك ... وبدي كون أنا ... ومعك ...
ما قدرت تضمني لحضنك ...
وما قدرت تخليني كون أنا .. ومعك ...
ما عرفت ليش ....؟؟؟
غلطك ... غلط يلي حضنتهم ... بس كنت مقهور وما عم افهم ليش هيك ....

ومن كتر زعلي منك ....
كنت اتخيلك ...
لو سألوك ...
ليش هيك ساويت بأبنك و بأولادك ....
اتخيلك .... وأنت مطأطأ .. راسك ...
وعم تقول .. ما قدرت أحمل .. أبني ... ما قدرت أحمل أولادي ....
تخليت عنهم ... حتى يعيشوا ... وشوف ضحكتهم ... ولو من بعيد ....

والغصة تكبر بقلبي ....
ليش ما قدرت ..؟؟؟
ليش ..؟؟؟؟؟؟

اليوم فهمت... ليش....؟؟؟؟
وأنا عم أشرب كاسك ...

اليوم فهمتك ...
لما شفت دموعك دم ...
اليوم فهمتك ...
وأنت عم تبكي عالكل ...

غلطي أني تركتك ..؟؟؟
غلطي أني زعلت منك ؟؟؟
لازم كون ضليت معك ؟؟
.........................
اليوم عرفت .... يا بلدي ....
أني ما لازم كون تركتك انا وغيري .. لوحدك ...
مع الدجالين يلي ارتموا بحضنك ...
لازم كون ضليت معك أنا وغيري لو خسرنا كل شي ... ولا نخسرك ....
سامحنا يا وطني .... غلطنا كتير .... بحقك ...





التعليق والتصويت على الموضوع في الموقع الرئيسي


اخر الافلام

.. تفاعلكم | الفنانة اللبنانية هبة طوجي في حديث عن الأولمبيا وز

.. شاهد: -ربما يتحركون لإنقاذنا-.. شابة غزيّة تستغيث بالغناء فو



.. عمل ضجة كبيرة ومختلف.. أحمد حلمى حكالنا كواليس عرض فيلم سهر


.. بتهمة -الفعل الفاضح- والتـ.ـحرش.. شاهد أول حديث لسائق أوبر ف



.. من هو نجم العراق الأول اليوم؟... هذا ما قاله الفنان علي جاسم