الفيسبوك
التويتر
اليوتيوب
الانستغرام
لينكدإن
تيلكرام
بنترست
بودكاست
الحوار المتمدن
- موبايل
الموقع
الرئيسي
نارك ولا جنة هلي
سرمد علي الجراح
2012 / 7 / 26كتابات ساخرة
في يوم القيامه الموعود, بدأت محاسبة الخلائق, وعندما جاء سره العراقيين, أمر الرب بجلب شخص واحد من بين كل مليون مواطن لمحاسبته, لأنهم متشابهون في الحياة والممات وحتى في تاريخ الولاده
فجيئ بأحدهم ليحاسب عن المليون اللذين خلفه
الرب: أنته عراقي؟
العراقي: (بينه وبين نفسه: لا هوايه تعرف الغيب). إي عراقي قابل نرويجي
الرب: لاتدردم تره أحطك ويه أعضاء البرلمان بالسبتتنك. احجي شسويت بدنياتك, غير اللواكه واللطم
العراقي: ربي غير اتلوك وأداري خبزتي, وألطم حتى الحسين يرضى عني وبلكي يقنعك تغفرلي وتذبني بالجنه
الرب: اولا الحسين كاعد بالجنه وساد بابه وكاتب قطعه لا تزعجوني, ومايريد يشوف خلفكم, وثانيا انته شقدمت للبشريه
العراقي: هاي غير ورطه, عمي انته قابل خالقني بطوكيو حتى تسألني هيج سؤال. شو شامرني بعفج, حافي وماعندي عشه
الرب: مو انطيتك عقل تفكر بيه ليش ماحاولت تغيير من وضعك
العراقي: حاولت هوايه, لكن انته ماناطيني موهبة اللواكه العلنيه
الرب: هاي شنو النوب
العراقي, اكو نوعين لوكيه بالعراق, لوكيه بالسر يعني بينهم وبين المسؤول, وهذوله ماكو اكثر منهم, بس لواكتهم ما توكلهم خبز. اما اللواكه العلنيه فهذي الموهبه تخلي صاحبها يصير بوق ودنبك ودف للمسؤول بدون خجل او خوف
الرب: ديلله هذا شتحجي وياه, يدور مواهب, على اساس لو مسويه لاعب تنس بعفج, جان اخذ ومبلدون. ولك مو جنت اشوفك كاضي وكتك كله بالكهاوي تلعب بخشمك.
هسه كلي شلون جنت قابل بعيشتك الزفره
العراقي: -هذا شبيه لوما هوه قاسم هالعيشه إلي-. ربي يمعود مو انته جبتني وحطيتني بنص هل المزبله, شسوي يعني؟ وجنت يوميه اندعيلك بلكي توفقني لو ترزقني, وانته مطنشني
الرب: ولك انته مخبل؟ شفتني فد يوم نزلت وساعدت احد؟ مو كل البشر اللي صار براسهم خير, اشتغلوا واعتمدوا على نفسهم. بس اريد اعرف ليش قبلت بهل عيشه؟
العراقي: صبرت, مو انته كايل, إن الله مع الصابرين. الضاهر بهاي انضربنه بوري معدل, لأن كلما نصبر كلما يطيح حظنه أكثر
الرب: صدك دماغ ماعدكم, أكو فرق بين الصابر المجبور, وبين الساكت والراضي بطيحان الحظ, مايفيد بيكم, يله دروح على جنة العراقيين وخلصني
العراقي: ربي سمعت يكولون جنة العراقيين كلها عجاج ومابيها كهرباء!! عود ليش
الرب: مو بس هاي ومخليلكم المقتل, حتى تلطمون دوم, لأن سويت لكل بلد جنه من الاشياء اللي جانوا متعودين عليها ويحبوها, حتى ما يضوجون ويصير بيهم هوم سك, وسويت النار من الاشياء اليكرهوه وما يحبوها
ألعراقي: زين ربي ممكن سؤال, شنو يكرهون الهولنديين
الرب: يكرهون الغش والكسل والوساخه والمطر
العراقي: كل هل النعيم بجهنمهم, ربي دخيلك ربي, وديني لجهنم الهولندين, لأن اليكرهوه هذوله هوه الجنه مالتنه. على كولت الشاعر: نارك ولا جنة هلي
|
|
التعليق والتصويت على الموضوع في الموقع الرئيسي
التعليقات
1 - قلبي.. نارك بالله نارك
نور ساطع
(
2012 / 7 / 26 - 08:15
)
نارك ولا جنة حور العين
نارك ولا جنة الولدان المخلدون
*************************************************************************
2 - احلى مقال
سحر
(
2012 / 7 / 26 - 08:47
)
عيني سرمد عاشت ايدك، كلش حلوة وتعبر عن الكثير والكثير عن واقع الحال المؤلم، قوية هاي مال الهولنديين يكرهون المطر هههه،تسلم ونتوق المقالة القادمة مع تحياتي العطرة
3 - لطم
حمورابي سعيد
(
2012 / 7 / 26 - 08:49
)
خوية سرمد...هاي انت وين ,صارلك مدة مختفي ,عسى المانع كان خيرا ,شي واحد ما مفهوم ,,,اذا الحسين كاعد بالجنة وساد الباب عليه عليش اللطم والقامات وشك الهدوم ,المفروض الغنا والركص والهلاهل .تحياتي
4 - مئوي أو 140 فهرنهايت
جاسم الزيرجاوي-مهندس أستشاري
(
2012 / 7 / 26 - 08:54
)
تسلم يا سرمد الحلو على هذه السخرية المريرة
يكولون درجة الحراة وصلت الى 60 مئوي أو 140 فهرنهايت في ديرة عفج
قبلاتييييييييييييييييييي
5 - اضحكتني
حائر
(
2012 / 7 / 26 - 09:29
)
شكرا ،رغم ان بعض الكلمات كانت صعبة على ،يا اخي ضع في النهاية معاني بعض الكلمات العراقية العامية القح!!!!!!!
جنة الناس تتلاءم مع ظروف حياتهم المعيشية وما احبوه في الدنيا ،بناء على ذلك سينعم كثير من المسلمين بصحبة المفتين الذين استمعوا اليهم في الدنيا واستمتعوا معهم !!!!!! وستكون الفتاوى تلائم المقام .
والحوارية وليس الحورية ،جميلة جدا. تمتاز باله ديموقراطي طمنتنا ولك الشكر.
فعلا ضحكت حتى بانت نواجذي!
6 - لأنك بهولندا ؟
شامل عبد العزيز
(
2012 / 7 / 26 - 09:31
)
زين عمي أنا اريد جنة سويسرا - يابا برشلونة - عمي مونت كارلو - البندقية - بس لا تكولي عفج ما اعرف وين ؟
في بعض الأحيان لا يوجد أجمل من السخرية في التعبير عن واقع مؤلم - كتابات ساخرة باب ممتاز في الحوار وهو ادب بكل معنى الكلمة لأن شر البلية ما يضحك
هسه وين راح أتخليني سرمد ؟
بس لا هولندا دخيل ربك ؟
تحياتي للجميع
7 - كهربائك ولا جنة عفج
كاظم الأسدي
(
2012 / 7 / 26 - 11:01
)
لم أشعر بالراحة منذ أيام ولم أتذوق طعم الأشياء وتكاد الكآبة تنسيني حتى ألإبتسامة الصفراء ؟ بعد أن أشفق علينا رب العباد في أول شهره !! بدرجة حرارة جاوزت الخمسين وإلتفاتة عباده المؤمنين المتنفذين في إنقطاع شبه تام منذ أول صيامهم !! منولكن مقالك الرائع هذا أزاح عني كل حزني وكربتي حتى رحت أقهقه عاليا- مع السطور الأولى وقد قدمت لي ما عجزت عنه الدولة من راحة نسبيه !! لك كل الشكر والتقدير والأحترام ..كهربائك ولا جنة عفج ..ي
8 - يُحشر الحبيب مع مَن يُحب
رعد الحافظ
(
2012 / 7 / 26 - 11:40
)
لا هواية تعرف الغيب !
هههههههههه , فعلاً لا أحد ينجو من ألسنتنا نحنُ العراقيين , حتى ربّ العالمين
ما يعجبنا العجب وننتقد كلّ شيء في الكون / ما عدا أنفسنا
******
مرحى بعودتكَ عزيزي سرمد , ظننتك ستعتكف طيلة رمضان , لكن حتماً اُولمبياد لندن أجبركَ على الظهور / ولا تنسى بعد ساعات لقاء البرازيل ومصر بكرة القدم
*****
من نادي الحديث
مرّ الشيخ الجرّاح على جماعة من العراقيين تشكو القيظ الشديد في شهر الرحمة والطعام
فقال لهم / أما علمتم أنّ المؤمن الحديث , ينال ما يهوى , وينجو ممّا يكره ؟
فقال له فتى / نحنُ نكره الموت فهل سننجو منه ؟
فقال الجرّاح / عاد لا تثخنوها , قوموا الى صلاتكم ولا تدوخوني !
9 - الكبير سرمد
رباح حسن الزيدان
(
2012 / 7 / 26 - 13:45
)
مبدع كعادتك نقطة راس سطر
10 - والله ضحكتني في هذا اليوم الكئيب
يونس حنون
(
2012 / 7 / 26 - 13:59
)
عيني ابو السرامد
تسلم الايادي خاصة انك اليوم تجاوزت كل الخطوط الحمراء بل والفيسرنكية ايضا
انا اعتقد ان مقالتك هذه تحتاج الى عدة حلقات كي تعطي المتعة الكاملة
فلماذا لا تحولها الى سلسلة مقالات كأن تسميها مثلا
يوميات عراقي في جنات الخلد
واعتقد انها ستكون ميدانا رحبا لقلمك الساخر
وانا مستعد ان اتقاسم معك اللعنات والشتائم والدعاء بهجمان البيت والذي سياتي من الذين يريدون يروحون للجنة بترديد (استغفر الله) خمسمائة مرة في اليوم
و اذا تريد ذبها كلها برگبتي ولايهمك ....بس استمر بهذي المقالات
شتكول اخوية سرمد
11 - في انتظار المزيد
محمد البدري
(
2012 / 7 / 26 - 14:33
)
أخي العزيز سرمد، سوف ننتظر مقالاتك عن كل فضائح اله العرب وعمي بصيرته فلا تبخل علينا. اشكرك جزيل الشكر.
12 - انا مسرور جدا بعثوري على موقعك الفرع
جمال علي الناصري
(
2012 / 7 / 26 - 14:37
)
نعم اخي سرمد وهذا بفضل التوبيب الجديدالمتطور لموقع الحوار المتمدن شكرا لك والف تحية ...لحوارنا المتمدن وسلمت اقلام كتابه ومعلقيه انهم يسحروننا دائما
13 - ههههههههههههههههههههههه
Aghsan Mostafa
(
2012 / 7 / 26 - 17:48
)
اني هم اكول هيجي، نارك ولا جنة هلي!!!!!!!، لا اعرف ماذا اقول ياسرمدنا الورد، بس اعتب عليك، ليش تعوفنا بالجنه هوايا!، ياخي مثل مالاحظت كلنا محتاجين للنار!
تره عدنا هوم سك (قوية!) واحنا ببيوتنا!!!
مبين هالصيف أمطار هوايا عدكم...على عناد هولندا، كندا صيفها حار ومشرق دوما
عاشت ايدك ولاتبخل علينا والله اني بالأخص أستاهل!؟...أضحك مو غير شيء!
محبتي واحترامي للجارح
14 - ردود الاصدقاء
سرمد الجراح
(
2012 / 7 / 26 - 20:28
)
الاخ الكريم نور ساطع, حور عين وولدان مخلدون وراح يفتح قسم جديد للادوات الكهربائيه المساعده
شكرا لمرورك عزيزي
الاخت الكريمه سحر, حقهم يكرهون المطر, يردون يشوفون شويه شمس, بس اليقهرني من تطلع كلهن يكعدن بالشمس يريدن يصيرن سمر. عبالك الاسمر فد بندله
تحياتي
العزيز حمورابي سعيد, بالجنه بس نلطم غصبا على المايرضه, واذا طلع من قبره نكتله من جديد حتى نلطم عليه. مزاج ياأخي خوما بكيفك
تحياتي
الاستاذ العزيز الزيرجاوي, وانطوهم اليوم عطله حتى يكعدون ببيوتهم اللي جنها فرن, عندي صديق يكول اريد اداوم احسن لأن الدائره مبرده واكدر انام زين!! خوش دائره وخوش دوام
تحياتي
الاخ الكريم حائر, حقك وسأحاول ان افعل ذلك الان وفي المستقبل
تدردم: بمعنى تلعن وتشتم بصوت منخفض غير مفهوم
السبتتنك: حفره مغطاة تصب فيها مجاري البيت قبل اختراع المجاري العامه ولازالت مستعمله في العراق
اللواكه: التملق
عفج: بكسر العين وفتج الفاء, قضاء عراقي قرب الديوانيه ويضرب به المثل الشهير, قيم الركاع من ديرة عفج. اي افلس الاسكافي هناك لان سكان البلده كلهم حفاة
عجاج: عواصف ترابيه
تحياتي
15 - ردود الاصدقاء2
سرمد الجراح
(
2012 / 7 / 26 - 20:52
)
استاذنا العزيز شامل, طبعا انحاز لهولنده يابعد جبدي, وين اخليك ياخويه انته اصلا ماكو جنه على قياسك
بس شوف الفرق بالثقافات, من تكول لهولندي انهار من خمر وانهار من لبن, راح يكلك اي وشنو يعني هولنده مليانه حليب وخمور, تكله حور عين, يكلك جزعانين من الشكرات وندور افريقيات وصينيات
تحياتي
الاخ الكريم كاظم الاسدي, يسرني اني ادخلت بعض الراحه والابتسامه الى قلبك شكرا لمرورك
تحياتي
الصديق العزيز رعد الحافظ, وانا ايضا مشتاق لجميع الاصدقاء, وشكرا لتذكرك لي. وعندما مر الجراح, وجدهم ينتظرون بباب ثانوية البنات قرب جبل احد. فسألهم ماذا تفعلون هنا. فقالوا ننتظر خروج أليسا لنسلمها رسالة من روتانا وروتان الخلفونه. فركب ناقته أسترا 2.4 ورحل عنهم
تحياتي
الاستاذ رباح الزيدان, شكرا جزيلا لاطرائك وشكرا لمرورك
تحياتي
دكتورنا العزيز يونس حنون, فكره ممتازه واتمنى ان تشاركني في الكتابه, وتأخذ على عاتقك كتابه الحلقه القادمه, وميخالف نتقاسم الشتايم بالنص
تحياتي
16 - ردود الاصدقاء3
سرمد الجراح
(
2012 / 7 / 26 - 21:11
)
الاستاذ العزيز محمد البدري, شكرا لك عزيزي, كلنا في الهوى سوى كما تقولون. والسرطان اللي صابكم بينخر فينا صارلو سنين. والحل على ما اظن ان الناس لازم تجرب وتذوق المر منهم عشان تتوب. وهذي عايزه سنين طويله, لانو مفيش حقن في العضل للسرطان
تحياتي
الاستاذ جمال الناصري, وانا مسرور لسرورك واتمنى ان تجد في مااكتب مادة تستحق القراءه
تحياتي
الصديقه اللذيذه واللدوده اغصان, عزيزتي اني لااريد نار ولا جنه خلي اكعد بلفي احسنلي. وبعدين اني ياهو مالتي, رب العالمين شافج تستاهلين وخلاج بالجنه, بس اذا لابد من النار, اخذي وياج جرس حتى المطافي تندل بسرعه
تحياتي
17 - وينك
ايار العراقي
(
2012 / 7 / 27 - 00:57
)
عزيزي سرمد هاي وين هلغ
يبة ضل بالنا عليك كلنه اخاف صار مسؤل بالعراق الجديد لاسامح الله
مقالك ذكرني بصديق مواليد 1957 وتعرف هذولي خدمو بالجيش اكثر من 13سنه وفوك الفهر تعوق واصلا هو شكله فاول ومينجرغ وخاتمة الماسي تعوق
صاحبي جان يتخيل حوار مماثل بينه وبين الله ولكن بالعكس حيث هو اللذي يحاسب الله على اجرامه بحق البشر والعراقيين خصوصا وهو اولهم طبعا
صاحبي هذا مازال على قيد الحياة يلتقي في الحسينية نهارا ويسكر ليلا بالسر تصور
18 - ردود الاصدقاء
سرمد الجراح
(
2012 / 7 / 27 - 10:02
)
الصديق العزيز أيار, يفرحني سؤالك عني, واتمنى ان اجد الوقت الكافي للكتابه والتواصل, لكن اليوم لايحتوي إلا على 24 ساعه. في الحياة القادمه سأبحث عن كوكب يكون اليوم فيه 50 ساعه او اكثر. واكيد لازم مابيه لاعرب ولاعمايم
تحياتي
.. أحمد فهمى و أوس أوس وأحمد فهيم يحتفلون بالعرض الخاص لفيلم -ع
.. أحمد عز الفيلم المصري اسمه الفيلم العربي يعني لكل العرب وا
.. انطلاق فيلم عصابة الماكس رسميًا الخميس في جميع دور العرض
.. أوس أوس: هتشوفونا بشكل مختلف في فيلم عصابة الماكس وكل المشاه
.. مؤلفين عصابة الماكس: الفيلم قائم على العائلة وأهميتها.. ومشا
