الحوار المتمدن - موبايل
الموقع الرئيسي


( طلع البدر علينا ) رؤية شخصية لواقعنا المُر / قصيدة شعبية

حامد كعيد الجبوري

2012 / 7 / 26
الادب والفن


شيفيد الحجي وثوب الحيّه أتمزك
ومن حمل المذلَه الكُصه ما تعرك
* * *
ما بين الهضم والضيم والجمره
كضّينه العمر حسره بأثر حسره
صعدنه ع النخل لهلالك أنطره
مثل هجرة محمد طيبه يتفرك
* * *
أجيناكم عراضة أنغني ونردد
البدر طالع علينه وبيكم أنعيد
بيدينه الشموع العامي والسيد
نسينه ضيمنه وبيكم فلا نغرك
* * *
ركصنه للفرح غنينه عالياني
أنفتح باب الفرج لليندعي أمتاني
الله أستجاب وخيركم جاني
ونزامط الشامت لو حجه وسبك
* * *
أخوتنه أجونه أيضمدون أجروح
وأسمعنه حجيهم بيّ ترد الروح
عميان أنتخبنه والمحنه تفوح
وبحبل الأماني اليغرك أمعلك
* * *
عالمر أشجرعنه خمسه وثلاثين
وأيوب الصبر صبر العراقيين
جزعنه وما جزعنه أبحدَة السجين
ومن كثر الذبح سجينهم يزهك
* * *
رنانه الخطب والزمط والتصريح
وأحلام الشعب ريشه وأخذها الريح
لا ينفع حجي ولا لوم لا تصحيح
والشاف الصخونه بالدوّه صدك
* * *
صدكنه وركضنه ننتخب حفاي
وأحلام الفُـكُر متعلكه بنخاي
صعدتوا عالجتاف وأثر جدمك هاي
ومن ريع الكراسي خيركم غمك
* * *
أسلامي حُـكمنَه يسوك علماني
وبداية كل حجي يحشمونه خواني
نصروا دينكم لا ينهجم ثاني
أبنهجكم دينَه والمذهب أتشكك
* * *
صار الدين لعبه والوطن طشار
وسد بابه الفرح ما يوم أجه خطار
من شفنه السياسي يبيع للفقار
مدري ينهدي ول (بريمر ) أتملَك
* * *
حذاري من الشعب دم الشباب أيفور
على ساعة وشرارة أتشب لهب تنور
بعده آذار طيب والنشامه أتثور
والخان الأمانة والشرف يزلك
* * *
نصيحه الوجه الله الينصح أنشكره
عاف المال كله وختل بالحفره
من ( صدام ) أخذ مليون ألف عبره
الما يفتح دماغه ب( الن ...ل ) يندك
* * *
تعض أصبع ندم واللوم ما ينفع
ولا توصل محاكم تصنت وتسمع
أشما تملك جناسي هناك ما تشفع
نجيبك للقصاص أنريد منك حك
* * *





التعليق والتصويت على الموضوع في الموقع الرئيسي


اخر الافلام

.. مهرجان كان السينمائي: -أكفان كروننبرغ- على البساط الأحمر


.. فنان أمريكي يُصدر أغنية بصوته من جديد بعد أن فقد صوته بسبب س



.. -الكل يحب تودا- فيلم لنبيل عيوش يعالج معاناة الشيخات في المغ

.. حصريا.. مراسل #صباح_العربية مع السعفة الذهبية قبل أن تقدم لل



.. الممثل والمخرج الأمريكي كيفن كوستنر يعرض فيلمه -الأفق: ملحمة