الحوار المتمدن - موبايل
الموقع الرئيسي


البوري الزين

علي احمد محمود

2012 / 10 / 12
كتابات ساخرة


إذا العراقي واجه أي مشكلة او بوري في عراق دولة القانون وين يروح زين والمن ينطي وجه زين
الوجه الأولى الشرطة المباركة ؟
إذا للشرطة فيطلع منها كما ولدته أمه وبدون أي مخاض رباني وحتى حبله السري يقصوه ويأخذوه الهم .. هاي إذا طلع المكرود ...
الوجه الثانية العشيرة المباركة ؟
أول شي يأخذ فد هدية زينة للشيخ اذا بالصيف سبلت وإذا بالشتاء صوبة زيتية لين الشيخ الجليل يحب ان يحافظ دائما على درجة حرارة 37 دينية لجسمه الطاهر الشريف وعلى شرط هاي الأجهزة ماركة أصلية مو صيني لين الشيخ يستحرم من المقلد وكذالك يستحب مع الهدية فد ظرف بيه اشويه عملات أجنبية اتفيده من يروح للحج او للزيارة المليونية علمود ما يندعي علينا اذا ما ننطيه لين دعوته والقبر .. وبعدين فد بوسة زينة للكصة الايمانية البيتنجانية ولللحيه الي كلها حنى وزعفران وبوسة لجتفه العريض الي لحمنا طلع من خيره وانسوي اشوية لواكة ومديح وضجيج.. انته كبيرنا وراعينا وقائدنا وهو يجاوبك من ورة خشمة عفية عفية بابنا عفية لان الشيخ يحب هذا الاتكيت والبروتكول العشائري الوراثي لين يعتبر نفسة بس هو يفتهم بالعشيرة حتى لو ماممحصل على الابتدائية ..
لين الي جاي يستنجد به ممكن يكون طبيب او مهندس ويجوز مصقول حكومي رفيع المستوى والشرف والعفة هربان لين جماعته المصقولين يريدون يعلسوه لين خامطهم وكالب بالدخل .. ومن يتحدد موعد لقاء الخصماء لازم العراقي اخونا يحضر وليمة مكوكية من وكالة ناسا الفضائية بكل ملحقاتها وان تكون معقمة جيدا لين الشيخ متعود ياكل حسب السنة بايده ويمصمص اصابعة ومنريد مشاكل بكتيرية مضرة بالمعدة الطاهرة وهذه الوليمة مؤلفة من السابوح والناطوح الطازج والمحلي المسمى عليه قبل ذبحه وعلى شرط ان يكونا ذكر لين الشيخ يعتبر الانثى عورة ماتصلح عشائريا وكل انواع المقبلات اللبنانية والسورية وحلويات ابو عفيف والخاصكي والنساتل السويسيرية المنشا بشرط مابيها دهن خنزير لان شيخنا مؤمن والمؤمنون حلوييون واكيد شيخنا مزواج ويحتاج دائما طاقة نووية لخدمة العشيرة وافرادها ... الله يعينا ويعين امة محمد عليه .. وبما اننا في 2012 الشيخ اطور مو مثل قبل عيني.. لين كلما الشيخ ياكل زين ويحلي زين ويتريع زين وجيبه زين ومرتاح زين يحجي زين ويجبلك كلشي زين إلي تريدا ويكلب الحق باطل انته بس جثر المواجيل ومالك شغلة الشيخ يشتغلة والك الصافي وهاي انته يالعراقي المكرود بس صرف وخسارة ومتيه بيتك وشغلك ومكابل الشيخ ريكه وعشيه و وديه وجيبة و كلمن ياخذ نصيبة واذا اخذولك حقك تبقى مديون لهم ليوم القيامة كل متصير طلابه بالعشيرة يكوللك حضر سلاحك لو جيبك ومتخلص واكيد يالمكرود انته راح تنقهر وتموت من الوضعية وحتى من تموت راح يجي بفاتحتك نفس الشيخ الزين يوميا وهم ياكل زين وكلش زين وهم وعلى حسابك زين يالمكرود العراقي الزين





التعليق والتصويت على الموضوع في الموقع الرئيسي


التعليقات

1 - معدة الشيخ تطحن حتى الصلابيخ
البدراني الموصلي ( 2012 / 10 / 12 - 18:10 )
اخي ابو حسين
انها والله مقالة ظريفة جدا وخفيفة على المعدة ويمكن هضمها بسهولة مثل معدة مولانا الشيخ التي تطحن حتى الصلابيخ ورغم ان الموضوع جدي جدا ومتغلغل في مجتمعنا وخاصة الريف ويحتاج الى وقفات جادة لدراسته وايجاد حلول له تخفف عن كاهل اهلنا عبء هؤلاء الطفيليين المتاجرين بتعاستنا والمكتنزين الذهب والفضة من لقمة اطفالنا واحلامهم
اشكرك كثيرا لتناولك هذا الموضوع الحيوي وبهذا الاسلوب البسيط الذي يفهمه الجميع ويتجاوب معه منتصرا لك ولكل من يتصدى لما في مجتمعنا من سلبيات مقيتة موروثة من عهود القهر والتخلف
شكرا مرة اخرى اخي ابو حسين

2 - شكرا سيدي الموصلي
Ali Ahmed ( 2012 / 10 / 12 - 19:56 )
انشاء الله نخلص من جهلهم العشائري القبلي المريض
ونعتمد على جيل متعلم مثقف يرفض اي شيء موروث خطا

اخر الافلام

.. ذكريات يسرا في مهرجان كان السينمائي • فرانس 24 / FRANCE 24


.. الفنان السعودي سعد خضر لـ صباح العربية: الصور المنتشرة في ال



.. الفنان السعودي سعد خضر يكشف لـ صباح العربية سبب اختفائه عن ا

.. الفنان السعودي سعد خضر يرد على شائعة وفاته: مزعجة ونسأل الله



.. مهرجان كان السينمائي : فيلم -البحر البعيد- للمخرج المغربي سع