الحوار المتمدن - موبايل
الموقع الرئيسي


آه يا دنيا يا بنت الإيه

زهرة الشمس محمد

2012 / 11 / 7
كتابات ساخرة


آه يا دنيا يا بنت الإيه
ساعات بأحاول
أضحك على الدنيا بنت الإيه
وساعات احايلها حتى ولو بجنيه
وساعات أغنيلها أغنيه إنما إيه!
وكل ده مش عاجب!
وقال إيه شايلانى وزاعقه
واللى زاد وغطى يا بيه
اتاريها بتخوفنى
وبترفعلى الحاجب!
اتارنى بعد كل ده
قال إيه.. مش عاجب!
*****
آه يا دنيا يا بنت الإيه
والله لأبيعك فى سوق العبيد
علشان تعرفى مين فينا العبد
ومين فينا السيد!
آه يا دنيا نسايه
وحكايتى معاكِ حكايه
بس برده مش هأسيبك
وبيعك فى سوق العبيد
برده مش كفايه!
ولو بعتك ألف مره
مش هأتسبينى حر
ولو بعتك ألف مره
مش هتنتهى الحكايه !
******
آه يا دنيا غداره
كل يوم أفكرك باماره
يوم اعملك شيخ منصر
و يوم اعملك شيخ حاره
بس اتاريكى بنت إيه..غداره
لا ينفع معاك شخط
ولا ينفع معاك اماره
ولا تفتكرى معروف
ولا تصونى حق جاره
آه يا دنيا يا بنت الإيه
احايلك بس بإيه؟
******
آه يا دنيا يا بنت الإيه
هأتصفى إمتا وتخلينى بيه؟
هأقولك بس إيه
صدق اللى قال دنيا غداره
لا ينفع معاها صبر
ولا ينفع معاها شخط
ولا ينفع معاها اماره
******
آه يا دنيا يا بنت الإيه
هأتصفى إمتا
وتخلينى بيه ؟
هأتصفى إمتا
وتدينى حتة زوجة وشقه
وعيل أفرح بيه
آه يا دنيا يا بنت الإيه
احايلك بس بإيه؟
صحيح.. صحيح دنيا غداره
******
فالحة بس تفتكيرنى فى الخساره !
و تزلزلى عليا الدنيا
وتهدى عليا العماره !
ويوم تفجريلى ماسورة مجارى
ويوم تدخلينى عايم فى الحاره
ماتفهمينى الحكايه
ما تشرحيلى العباره
مستقصدانى ليه ؟
ماتسيبنى وتروحى لعم البيه
ابو بدله وبابيون لايق عليه
ليه عاشقه أبو قميص مرقع ؟
ليه بتحاربى أبو عقب سجاره ؟
آه يا دنيا يا بنت الإيه
احايلك بس بإيه؟
صحيح.. صحيح دنيا غداره
******





التعليق والتصويت على الموضوع في الموقع الرئيسي


اخر الافلام

.. المخرج كريم السبكي- جمعتني كمياء بالمو?لف وسام صبري في فيلم


.. صباح العربية | بمشاركة نجوم عالميين.. زرقاء اليمامة: أول أوب



.. -صباح العربية- يلتقي فنانة الأوبرا السعودية سوسن البهيتي


.. الممثل الأميركي مارك هامل يروي موقفا طريفا أثناء زيارته لمكت



.. أمسيات شعرية- الشاعر فتحي النصري