الحوار المتمدن - موبايل
الموقع الرئيسي


رسالة الى رئيس الوزراء العراقي (2)

محمد خليل عبد اللطيف

2012 / 12 / 3
مواضيع وابحاث سياسية


رسالة من اخي وصديقي لؤي الصفار الى السيد رئيس الوزراء نوري المالكي...وللرسالة بقية

حديث من القلب الى السيد المالكي
الرسالة الثانية
من يكتب اليك ناصحا لايعني انه عدوك ،من يكتب اليك اليوم ناخبا نادما كان يراك املا واصبحت خيبة امل منذ مدة ليست بالقصيرة وانا احاول ان ابتعد عن السياسة والشأن العراقي بالكتابة لكن زيارتي الاخيرة الى محافظات شمال العراق دفعتني للكتابة اليك هذه المرة وربما اكررها لان الحديث طويل والموضوع شائك.
أبو أسراء
اكتب اليك لانك الحاكم الفعلي للعراق اليوم وانت الهدف المستهدف من العدو والصديق على الانجاز والاخطاء فغلطة موظف او فساد مدير او رشوة شرطي تحسب عليك انت فقط لاغير لان الناس كلها اليوم تصيح المالكي في كل ما يتعلق بالعراق بالزين وبالشين واليوم راح احجيلك على بغداد الذبيحة.
بغداد يا سيدي اقدم واول مدنية حضارية بالعالم حسب قول الدكتور المعماري احسان فتحي في محاضرته قبل عامين في قاعة الاورفلي في العاصمة الاردنية عمان كل ما موجود من بنى تحتية منهارة في بغداد اليوم مصممة لخدمة مليونين من البشر لااكثر ونضيف على طاقتها جدلا مليون اضافي فما بالك بان عدد سكان بغداد اليوم يقارب ال 7 ملايين نسمة بعد الغزو البشري من المحافظات الذي حدث بعد عام 2003،بغداد انت ماخذ قلبها وجعلتها ملك لك وللحكومة قلعة خضراء تعزلك عن الشعب المكرود هذه القلعة الخضراء بحدودها الحالية تزيد على ما احتله صدام منها في اوج عظمته واضفت عليها انت الجسر المعلق الذي يعتبر شريان وبغداد وقطعة من قلب كل بغدادي وانت حرمتنا منه ولو خرجت يا سيدي من بوابة المنطقة الخضراء المؤدية الى الكرادة فسوف تقابلك راسا ساحة تمتليء بصور واعلانات تخص احد الاحزاب الاسلامية دون حسيب او رقيب وفي محرم تحولت الى مقر لاحد المواكب الحسينية بينما لو قام احد المواطنين بوضع لوحة اعلانية بسيطة امام محله فسوف تجد ذئاب هولاكو العيساوي المرتشين على راسه فورا ليطالبوه بالمقسوم حصتهم مضافا اليه خمس العيساوي،بعد هذه الساحة يوجد جسر الطابقين الذي على يمينه تجد رئيس الجمهورية اللي ما التقى بعراقي واحد ونوابه اللي يكلفون خزينة الدولة مليارات الدولارات سنويا وهمة لانفع ولا دفع قد احتلوا الجادرية باكملها بدأ من جسر الطابقين حتى جامعة بغداد وما يقابلها من الضفة الاخرى من دجلة من مزارع وبساتين ومن يسار الجسر حتى ساحة الحرية وما يقابلها من الضفة الاخرى من دجلة من مزارع وبساتين صارت من حصة المجلس الاعلى بعدها دعني اعدد لك المناطق التي تتواجد فيها الوزارت والتي في كل دول العالم اليوم صار الاتجاه باخراج الوزارات وسكن موضفيها من المدينة الى مدن قريبة انشئت خصيصا مربوطة بالعاصمة بشبكة قطارات وانفاق ومواصلات عمومية لكي تخفف الزخم السكاني والازدحامات عن العاصمة الا بالعراق في عهدكم صارت الوزرات بين البيوت وفي قلب الاحياء السكنية لكي تجعل من معيشة الناس عذاب اليم في الدنيا قبل الاخرة مضافا اليها المؤسسات والدوائر الحكومية ومنازل المسؤلين وحماياتهم ومعسكرات الجيش ومقرات الشرطة والاجهزة الامنية ومساكن الضباط والقادة ومقرات الاحزاب والهيئات حيث يقوم كل هؤلاء بقطع الشوارع السكنية التي يتواجدون فيها دون اي احترام لساكنيها،باقي اجزاء بغداد مثل الصدرية والفضل والشيخ عمر والثورة وابوسيفين والمهدية وشارع غازي والجكوك والنعيرية وبغداد الجديدة وزيونة والكرادة داخل والحيدرخانة والكسرة والسفينة والاعظمية وراس الحواس وكمب سارة والزعفرانية وحي الطارق والفضيلية والكمالية والوشاش والطلائع وراغبة خاتون وكمب الارمن وكراج الامانة والشعلة والحرية والميدان والعبخانة والمربعة والسنك والحسينية والبتاوين وابونؤاس وملحقاته وشقق البتاوين وساحة الاندلس وساحة النصر وشارع النضال وبارك السعدون والوزيرية والقاهرة والقضاة والسفارات والعامرية والغزالية والرحمانية وجميلة والبنوك وعلاوي الحلة والدورة والرشيد والكريعات وحي العدل والجامعة والشرطة والبياع والعامل والجهاد والمسبح والعرصات ومعسكر الرشيد كلها احياء لاتصلح حتى لاقامة زرائب الحيوانات فيها لاسباب صحية ومثلها كل محافظات الوسط والجنوب واولها البصرة المنكوبة هذه الاحياء منكوبة ومهجومة بكل معنى الكلمة ولاتوجد فيها اي بنية تحتية حتى ولو رصيف صالح للاستعمال البشري سؤالي اليك هنا قل لي وين يعيش ابن بغداد؟؟؟
انطيني حي واحد بيه خدمات مثل ابسط احياء العاصمة الاردنية عمان اللي ميزانية الاردن كلها تبلغ 6 مليارات دولار وهية اقل من بوكة وزير واحد من وزراء العراق،انطيني شارع واحد مبلط مثل الشوارع اللي بلطها المقاول العراقي عدنان نصري قبل 50 سنة ولازالت تخدم البلد الى اليوم بينما انت و هولاكو العيساوي فشلتوا بانشاء رصيف واحد ضمن مواصفات عالية وقياسية الى اليوم واكرر اني هنا اضعك مع العيساوي في خانة واحدة لانك انت الرجل الاول بالدولة وانت من سكت وبارك وتستر على جرائم هولاكو العيساوي بحق بغداد واهلها.
بغداد يا سيدي صارت عبارة عن حسينية كبرى قذرة خربة لا اكثر ولا اقل وجداريات وصور رجال الدين زادت عن جداريات وصور صدام بابشع صورة والاعلام والرايات والبيارق وشعارات الاحزاب حدث ولا حرج بغداد اليوم مدينة من مدن العصر الحجري لكن بيها سيارات حديثة لان مستوى الدخل زاد واموال الفساد الاداري صارت بالمليارات،البناء عشوائي بكل معنى الكلمة عاصمة بلا ضوابط بلدية تليق بتنظيم قرية مو عاصمة الكون كله مثل بغداد.
أبو أسراء
تدري وين راحوا اهل بغداد الاصلاء والمثقفين والاغنياء والتجار والصناعيين والمقاولين والاساتذة والقضاة اللي كان مصير العراق وتطويره واقتصاده مربوط بيهم واللي جذورهم ببغداد موجودة منذ تاسيس بغداد وهناك كتاب اسمه عوائل بغداد العريقة ممكن تقراه وتعرف عن اللي اتحدث عنهم الان اكثر واكثر،تسعين بالمية من هؤلاء سكنوا العاصمة الاردنية عمان والباقي موزعين بالمهجر تعرف ليش ؟؟؟؟؟؟؟
لان صاروا غرباء في بغداد بسبب ظلم وحروب صدام وبسببك لان بغداد انهجمت ابو اسراء وانت ما نازل ماشي بشارع على رجلك وشايف الضيم والخراب اللي وصل للسماء وخله الناس تكفر بكل شي لان العراقي والبغدادي خاصة صار حشرة ممكن يدوسها موكب اي مسؤول من الاحزاب او الحكومة او النواب اللي تمشي وياهم جيوش مسلحة يدوسوه ويضربوه بطلقة اذا ضايقهم بالشارع او صادف مروره اثناء مرورهم وما سمع صافراتهم المزعجة وشتائمهم على الناس وصياحهم بمكبرات الصوت على البغدادي كانه دابه من الدواب السارحة بالشارع مو بشر،هجوا لان من يطلع من بيته ومنطقته يحتاج ياخذ اذن من السيطرة ويتنظر الازدحام القاتل ومن يرجع بعز حر تموز واب يحتاج ساعتين لمن يوصل للمنطقة وساعة حتى يعبر سيطرة مدخل منطقته وروح لسيطرة الحرية وشوف صحة كلامي.
تعرف ابو اسراء انه ماكو سيارة شرطة او جيش بكل بغداد تمشي بالشوارع العادية مع اتجاه السير ؟؟؟؟ كلهم عكس السير وبالصفارات والسلاح يسوكون العالم مثل الغنم،اتحداك اذا شفت سيارة شرطة او سيارة جيش تحترم الاشارة الضوئية او شرطي المرور الواكف بالشارع ومثلهم وانجس مواكب المسؤلين والنواب وهل الاحزاب اما رؤساء الكتل البرلمانية فتقطع الشوارع بكاملها الهم قبل ساعة من مرورهم ومثل كل هؤلاء انت من تطلع من الخضراء
بالله عليك اكو عاقل بالعالم كله يبني مقر مديرية مرور بارقى حي بالعاصمة سكني واللي هو الجادرية هاي بس انت وهولاكو العيساوي سويتوها
أبو اسراء
في الرسالة القادمة راح احجيلك على انجازات هولاكو العيساوي في تدمير بغداد ومقاولي الاحزاب والمشاريع الوهمية وملكيات موظفي الامانة والبلديات من عقارات وسيارات وارصدة.
أبو اسراء
بغداد تحتضر بغداد تستغيث فهل من مجيب ................................؟؟؟؟

للحديث بقية.............................





التعليق والتصويت على الموضوع في الموقع الرئيسي


اخر الافلام

.. هل ينتزع الحراك الطلابي عبر العالم -إرادة سياسية- لوقف الحرب

.. دمر المنازل واقتلع ما بطريقه.. فيديو يُظهر إعصارًا هائلًا يض



.. عين بوتين على خاركيف وسومي .. فكيف انهارت الجبهة الشرقية لأو

.. إسرائيل.. تسريبات عن خطة نتنياهو بشأن مستقبل القطاع |#غرفة_ا



.. قطر.. البنتاغون ينقل مسيرات ومقاتلات إلى قاعدة العديد |#غرفة