الحوار المتمدن - موبايل
الموقع الرئيسي


نذر أعيادة اله ولولاده

ماجد العذاري

2013 / 1 / 25
كتابات ساخرة


نذر أعيادة اله ولولاده
في الستينات
قدم أعيادة يريد يتعين في وزارة الداخلية وقد اكمل كافة الاوراق بعد ان شاف حليب امه الرضعه من ورى شهادة الجنسية العراقية وروح للعمارة وتعال لبغداد وجيب الشهود وودي المختار وسوي المضبطة واكعد عل المصطبة وبعد مشوار خلص افليساته الي جمعهن من شغلة الحمالة في ميناء البصرة ورطوبة البصرة ـ ـ علواه عليها حتة الرطوبة جانت طيبة هسه هم سوهها محاصصة
تدرون على شنو قدم أعياده
شرطي بقوة السيارة جانت قبل بالشاكرية الي هسه المنطقة الخضراء
فـأعياده
نذر نذر اول راتب يوزعه على الفقراء
الله سهل وانقبل أعياده شرطي وذبح ديج وعزم كل الجيران
بس هو ايفكر اشلون راح يوفي النذر
فوصل راس الشهر وقبض الراتب واجه للبيت فرحان وهو يفكر اشلون يوزع هاي الفليسات الي قبضهن اخذله صفنه صاح على ولده وما شاء الله هو عنده جوكة مال ولد وبنات جمعهم بنص الغرفة وجابله تنكة فارغة
مال دهن زبيدة
وهذا اعلان جان قبل ايطلعوه بالتلفزيون مال دهن زبيدة
ـ ـ دهن نبات اصلي زبيدة شهي ونقي وصحي زبيدة ـ
نرجع لأعياده
وكف على التنكة مال الدهن وجهاله داير ما دايره ولزم الفلوس مال الراتب وكال ياربي
هذا نذر أعياده اله ولولاده
وطش الفلوس وبعدين جمعهن ورجعهن لجيبه مدري ضمن بالبطل لان قبل ماكو بنوك تقبل من أعيادة
اليوم عدنا بالعراق طلع مليون اعياده بس بالمنطقة الخضراء يستلمون ملاين الدولارات تحت مسميات ما انزل الله بها من سلطان متعرف اشلون يطلعولها تخريجات وتصريفات ويخمطون بهل الملاين ووفق قاعدة
نذرأعياده اله ولولاده
لكن الفرق بين أعيادة الشرطي انه لم يتهرب من النذر لاجل الحرام بل لاجل ان يصرفها على اعياله ويشتريلهم جزمات تشتغل بالشتاء وبالصيف الا ان تتملخ والف ركعه وركعه بيها وما يذبها
بس أعيادة مال المنطقة الخضراء شسوى بهاي الفلوس كلها درب التهريب وراسا لبيروت رايحين رادين عبالك رايحين من العلاوي للبياع والله يرحم ايام زمان من جانت الريمات تشتغل على خط بغدا بصرة وبغداد عمارة والاخ السائق مدوشم الكشنات بكواني مال شكر بس مو مال وزارة تجارة السوداني لا شكر مال ايا زمان
هسه راسا وين السيد النائب والله اتغدى ببيروت وتعشى بالقاهره
والله يرحمك ياسين ابو العنبه جان اشلون يطرد هل ماركات التعبانه من جانوا بالحجيرة بسوريا
وليرحم الله أعياده الشرطي





التعليق والتصويت على الموضوع في الموقع الرئيسي


اخر الافلام

.. رحيل الممثل البريطاني برنارد هيل عن عمر 79 عاماً


.. فيلم السرب يتخطى 8 ملايين جنيه في شباك التذاكر خلال 4 أيام ع



.. الفنان محمد عبده يكشف عبر برنامج -تفاعلكم- أنه يتلقى الكيماو

.. حوار من المسافة صفر | الفنان نداء ابو مراد | 2024-05-05




.. الشاعر كامل فرحان: الدين هو نفسه الشعر