الحوار المتمدن - موبايل
الموقع الرئيسي


اه ومالو دي بسيطة يبيء

ماجد العذاري

2013 / 1 / 26
كتابات ساخرة


اه ومالو دي بسيطة يبيء
ايام غزو العراق من قبل الايادي العاملة المصرية ابان حرب العراق مع ايران ومن جاء مع العمال المصرين اشكال والوان شتريد موجود كل الشهادات وكل الاختصاصات مع ما ترك البعض منهم تصرفات سلبية على المجتمع العراقي لكن كانوا على اتم الاستعداد لتنفيذ اي عمل تطلبه منهم دون عجز او ملل او كلل والحق يقال انهم كانو يتفانون في مجال العمل دون غش مو لسواد اعيون ابو الشغل بس خاطر يرضى عليه ويطلعه ثاني يوم وبهذه الحالة ضمن قوت يومه الثاني
ومن تسئل العامل المصري عن اي عمل يجيبك
اه ومالو دي بسيطة يبيء
وكانت اجورهم اليومية بسيطة ومعتدلة كقياس مع اجور العامل العراقي
رواتبهم يعني بسيطة مقابل ما يقدموه من عمل شاق
ولكن المشكلة الان عدنا بالعراق عمال ياخذون رواتب جدا عالية دون ان يقدموا اي عمل يذكر وامخلصينه بدك الفج والسوالف التعبانه والي ما بيها حظ وان اجورهم اغلى واعلى من اجور اقرانهم في العالم نعم في كل العالم لم اجد اجور مثل اجورهم ارقام خيالية والمصيبة ما راضين على ابو الشغل ويوميا يطلعون يحجون على الي يدفعلهم افليساتهم خطية ما راضين لان يدعون ان رواتبهم يصرفون منها على الفقراء والمحتاجين ويدفعون خمس وزكاة ومال طبخ قيمة ويدفعون ردود مظالم ويدفعون مال السلفة الي استلموها وهسه كاعد يطالبون باسقاط هاي السلفة واعتبارها هدية ما من وراها جزية وتعتبر نوع من انواع التحفيز للعمل المناط بهم
لا والمصيبة هسه همه مو هواي لكن راتبهم من شهر السادس 2012 يعني حزيران الى نص هذا الشهر الاول من سنة 2013 تدرون اشكد اخذو رواتب هذوله العمال الكسلة السكاطة
واحد وثمانون مليار و250 مليون دينار عراقي كفيلكم الله وكتبه ورسله وتدرون همه اشكد عددهم فقط 325 ثلاثمائة وخمسة وعشرون لا غيرها والغلط والسهو مرجوع بس الهم
يعني راتب العامل الواحد 32 مليون دينار عراقي والسلفة الي اخذوها الجماعة العمال الشلايتية قدرها 90 مليون دينار عراقي وهم ما يردون يرجعونها لبو الشغل
خو هسه عرفتوهم من هذوله العمال السكاطة
ذوله نواب مجلس البرلمان
تدرون اشكد راتب النائب الامريكي السنوي فقط 165 الف دولار سنويا
يعني 190 مليون دينار سنويا
تدرون اشكد يتقاضى عضو مجلس العموم البريطاني 170 الف دولار سنويا
يعني حوالي 200 مليون دينار عراقي
بينما عضو البرلمان العراقي يطلعله من هل شغلة
384 مليون دينار عراقي سنويا
من غير التايهات منا ومنا عمك خالك خشمك اذنك وتخاريج اهواي وتجمع شدة على اشدة واتصر كونية وبعدين درب الكلبه بيروت عايز نفر ايام الصالحية من جانت السيارت الدوج الفايلنت الصفر يصيح بيروت عايز نفر خل يجون هسه ويشوفون اشجم نفر لبيروت طابكين على السرة
ولكن ذهبوا المصرين وتركو لنا
اه ومالو دي بسيطة يبيء





التعليق والتصويت على الموضوع في الموقع الرئيسي


اخر الافلام

.. رحيل الممثل البريطاني برنارد هيل عن عمر 79 عاماً


.. فيلم السرب يتخطى 8 ملايين جنيه في شباك التذاكر خلال 4 أيام ع



.. الفنان محمد عبده يكشف عبر برنامج -تفاعلكم- أنه يتلقى الكيماو

.. حوار من المسافة صفر | الفنان نداء ابو مراد | 2024-05-05




.. الشاعر كامل فرحان: الدين هو نفسه الشعر